--- type: BookChapter work_id: '369' book_url: https://nasa.misia.sk/books/2359 book_markdown_url: https://nasa.misia.sk/books/2359.md language: gu position: 5 canonical_url: https://nasa.misia.sk/book_chapters/7791 markdown_url: https://nasa.misia.sk/book_chapters/7791.md markdown_source: converted translations: gu: https://nasa.misia.sk/book_chapters/7791.md --- # CIRCULAR LETTER June 1976 - GUNGBE ## AZỌ́NHE YÈ ZÉ NA AGÙN LỌ Dinvie, yẹn jlo nado hia Owé 2 KỌLINTINU 5:14- tọn jẹ. To owéfọ helẹ mẹ, yè dọhó dogbọn owanyin Klisti tọn he to azọ́nwà to mí mẹ tọn dali. Enẹwutu, donanọ wẹ mẹhe na dọ ewọko tindo dọpọ́n owanyin Jiwheyẹwhe tọn tọn, yèdọ ehe sọawúhia to Klisti mẹ to Satin ji to Gọlgọta, to ni nọ̀ ewọ mẹ bo sọ to ewọ lọ plán. Na owanyin Klisti tọn kẹdẹ wẹ dóna yín gbọdemẹ ayiha mítọn tọn. Podọ Paul ko do owanyin he lọ hia to ninọ̀mẹ etọn alọpãlọpa lẹ mẹ, podọ to kọ̀ndopọ́ etọn alọpãlọpa lẹ po mẹ. É dlẹnalọdo ehe lọ dọ, *“… Omẹ dopo kú na omẹ popo, enẹwutu omẹ popo wẹ kú: podọ é kú na omẹ popo, na yé he tin to ogbẹ̀ lẹ ma nado tin to ogbẹ̀ sọn dinvie hlan yéde ba, adavo hlan ewọ mẹhe kú na yé, bo sọ fọ́ntite”*(2 KỌLINTINU 5:14-15). Finẹ lọ wẹ núdabla ogbẹ̀ mítọn tọn hẹ Jiwheyẹwhe te, yèdọ ehe nọ hẹn sinsẹ́n to kọ̀ndopọ́ po É po kẹdẹ mẹ, bo sọ sọgan tin to dona mẹ hẹ mẹhe pò lẹpo. Do ayi e go, mí ma yín mídelẹ tọn gba, ṣigba Ewọ tọn wẹ mí, na Ewọ lọ wẹ flí mí gọ̀ wutu. Na yé he mẹ linlẹn helẹ to ni nọ̀, nọ zé núhe yè wlán do file lẹ hẹn ayiha mẹ, dọ, *“Sọn dinvie yì, míwlẹ ma sọ yọ́n omẹde kẹdẹdi agbasalan tọn ba gba; yèdọ eyín míwlẹ tlẹ ko yọ́n Klisti kẹdédi agbasalan tọn dai, bé sọn dinvie, míwlẹ ma sọ yọ́n ẹn ba”*. Do ayi e go, míwlẹ mọ mẹfligọ̀ lẹ to ninọ̀mẹ dopolọ mẹ kẹdẹdilé Mẹflitọ lọ nọ mọ yé dó, nado dọ gbọn Ohùn he yè kọ̀ndai na whẹdọgbọ lọ. Ewọ flí mí gọ̀ sọn okú si bo sọ ná mí Ogbẹ̀ madopòdo. Enẹwutu, Ewọ sọgan nọ̀gbẹ̀ to aigba he ji gbọn gbẹ̀zán mítọn lẹ dali. Na Ewọ jlo nado do huhlọn fọ́nsọnkú Etọn tọn hia gbọn mí mẹ. Apọsteli lọ sọ to nukọnyì bo to didọ, dọmọ:*“Enẹwutu, eyín omẹ de tin to Klisti mẹ, mẹdida yọ́yọ́ wẹ ewọ: yè ko hẹn onú hóhó lẹ juwàyí; bo dayi e go, onú lẹpo lẹzun yọ́yọ́!”*. Mí yí enẹ lọ sè, mọ mí ko sọ dó dọpọ́n enẹ lọ tọn. Na mí sọgan dọ azán lọ po ganhiho he mẹ Jiwheyẹwhe pé te lọ, yèdọ fie É jona ylanwà mítọn po núṣiwà mítọn lẹ po te, fie mí gbẹ́ aliho mítọn titi lẹ dai te, na Jiwheyẹwhe nido hẹn mí biọ aliho Etọn lẹ mẹ na Ewọ. Enẹwutu, e to dandan mẹ, dọ, mí ni gbọn hódidọ nugbo de mẹ, ehe mẹ yè nọ lẹ́ pannukọn Jiwheyẹwhe te, podọ gbọn vọji yọ́yọ́ he to mí hẹn zùn núdidá yọ́**y**ọ́ de dali. Do ayi e go, míwlẹ ma jẹ na enẹ lọ gba, ṣigba núyiwà Jiwheyẹwhe tọn wẹ to enẹ lọ wà. Enẹwutu wẹ apọsteli lọ do sọgan wlán dọ, *“Podọ Jiwheyẹwhe de wẹ enẹlẹ pó sọn wá, mẹhe gbọwhẹ na mí po É po gbọn Klisti dali bo ko sọ ná mí devizọ́n owhẹdọgbọ tọn.”*Ehe lọ wẹ linlẹn titegbe he mí dèsọn lẹnpọ́n nẹ lọ mẹ, dọ: É zé Ohó whẹgbọ tọn do yé he ko dó dọpọ́n owhẹdọgbọ tọn po Jiwheyẹwhe po to yédelẹ mẹ. Mọwẹ Ohó Satin lọ tọn sọ tin to yé he dó dọpọ́n awhàngbigba Satin lọ tọn lẹ mẹ. To ofi, núyọ́nẹn depope matindo pinpẹn mẹ de gba, podọ linlẹn depope kavi tùnmẹ yisenọ depope tọn ma sọgan wàzọ́n gba. Enẹwutu, Owẹn Dagbe lọ wẹ yín dọ: **“Jiwheyẹwhe po gbẹtọ po ko dọwhẹgbọ bo ko sọ kọ̀ndopọ́ to Klisti mẹ”.** Do ayi e go, ewọ mẹhe dó dọpọ́n owhẹdọgbọ tọn he lọ po kọ̀ndopọ́ tọn he lọ po kẹdẹ wẹ sọgan dọhó owẹn awhàngbigba Gọlgọta tọn lọ tọn hlan mẹhe pò lẹ. To whenẹnu, Jiwheyẹwhe ma sọ to ylando depope hia do okọ̀ na mí ba. Na É ko jona ylando lẹpo, bo ko sọ zé do mí mẹ yèdọ Ohó whẹgbọ tọn do Ewlọsu po míwlẹ po ṣenṣẹn. Whenẹnu yisenọ mọtọnhunkọ lẹ ma sọ nọ dọhó yédelẹ titi tọn, kavi núplọ́nmẹ alọpa de tọn gba, adavo Klisti tọn. Na yé nọ yọ́nẹn dọ Jiwheyẹwhe to Klisti mẹ ko gbọwhẹ hẹ aihọn hlan Ewlọsu, dilé yè wlán ẹn dó to Owé 2 KỌLINTINU 5:19 tọn mẹ, dọ,*“Jiwheyẹwhe tin to Klisti mẹ, bo to whẹgbọ hẹ aihọn hlan ede, bo ma sọ to ylando yetọn hia hlan yé gba; bo sọ yí ohó owhẹgbọ tọn hlan mí”*. Dinvie, ojlẹ lọ ko sọ, yèdọ ehe mẹ Jesu Klisti, kẹdẹdi mẹwhèdo-satingo lọ, dóna yín whiwhè to yọ́yọ́ jẹ mẹ to nukun mítọn lẹ mẹ. Na awhàgbigba Satin tọn lọ ma sọgan sọawúhia to fiedepope adavo to fie Jesu Klisti yín didohia to Satin ji te. Enẹwutu, mí dóna mọ Ẹn, bo na yọ́nẹn dọ É ko kú na mí, dọ É ko dè ylando mítọn lẹ sẹ̀, podọ gbọn okú Etọn he nọ dè ylando sẹ̀ dali, mí ko mọ jona ylando mítọn lẹ tọn yí, podọ gbọn yise mítọn to Ewọ mẹ dali, mí tindo Ogbẹ̀ madopòdo. *“Enẹwutu mẹdagun na Klisti tọn wẹ míwlẹ, di Jiwheyẹwhe tlẹ to mìwlẹ vẹ̀ gbọn míwlẹ dali: mí vẹ̀ mì na Klisti tọn wutu, mì ni yín mẹgbọwhẹ hẹ hlan Jiwheyẹwhe.”* Do ayi e go, Ohó Satin tọn lọ yín huhlọn de na yé he yí yẹwhehó lọ sè lẹ kẹdẹ. Na Jiwheyẹwhe nọ dọhó gbọn yé he ná otó Ohó Etọn lẹ dali. É sọ nọ ná whẹdọgbọ gbọn yé he ko dọwhẹgbọ lẹ dali. Enẹwutu, Klisti nọ dọhó gbọn míwlẹ dali hlan yé he ko bú lẹ bo sọ ná whlẹngan yé. Mọwẹ É nọ dọhó gbọn míwlẹ dali hlan yé he tin to kanbla mẹ lẹ, bo sọ nọ hẹn yé tùnwun dọ, yé ko mọ túndote yí. Podọ É nọ dọhó hlan awutunọ lẹ gbọn míwlẹ mẹ bo sọ nọ hẹn yé nado mọdona dọ, yé ko mọ azọ̀nhẹngbọ yí. Podọ hlan madógannọ lẹ, É degbè dọ: *“Mì dotu, na yẹn ko gbawhàn aihọn tọn”*. Do ayi e go, Agùn Jesu Klisti tọn to aliho winyan tọn sisósisó de mẹ gbọn to ojlẹ helẹ mẹ, podọ gbọn klandowiwé mẹ, na awhàngbigba pipe Jiwheyẹwhe mítọn tọn lọ nido yín didohia. Podọ jẹnukọn, Oklunọ mítọn Jesu ko dùto ylando ji gbọn awhángbigba Satin Gọlgọta tọn tọn dali, Ewọ ko dùto awutu po okú po ji. Ewọ gbọn opa Jẹsemani tọn mẹ yèdọ to tukla lẹ mẹ, Ewọ sọ hóavùn to odẹ̀ po ovẹ̀vivẹ po mẹ. Podọ to ninọ̀mẹ nẹlọ dopolọ mẹ wẹ Agùn lọ sọ to nukọnyì te to dinvie to aliho lọ ji.Podọ jẹnukọnna awhángbigba Jiwheyẹwhe tọn godogodo tọn, podọ whẹpo vivọnu nado wá, yèdọ taklina podọ nado ṣiọn ojẹgbàkúnna azọ́n Jiwheyẹwhe tọn to núdidá yọ́yọ́ lọ mẹ, ehe ko bẹ́ po Klisti po, yè dóna gbọn gbigbà sisósisó de mẹ, yèdọ gbọn avọ́sinsán mẹde-titi tọn po mẹde-gbigbẹ́ pata-pata po tọn dali: na mọwẹ omẹ popo dóna hẹn satin etọn titi nado hodo Oklunọ. Do ayi e go, ahọludu de matin eyín yè ma jiya, kavi awhàngbigba de matin eyín yè ma hoavùn. Dinvie, Oklunọ tin to awà mítọn ji, mọwẹ míwlẹ lọsu tin hlan dali Etọn dó. Podọ Ohó Etọn, yèdọ Ohó Satin tọn lọ po Ohó whẹgbọ tọn lọ po tin to míwlẹ mẹ. Enẹwutu, owanyin Klisti tọn to mizọn-mizọn do na mí, sọmọ bọ mí jlo nado dọ hlan Togùn Jiwheyẹwhe tọn, yèdọ núhe É dọ na mí to ojlẹ he mẹ lẹpo gbọn Gbigbọ Etọn po Ohó Etọn po dali. E ma yín to Agùn he kẹdẹ mẹ gba, ṣigba to ofi popo, na yisenọ nugbo lẹ nido dó dọpọ́n núhe Jiwheyẹwhe to wiwà to ojlẹ he lọ mẹ tọn, podọ lé É to azọ́nwà dó. Mí yín dagbenọ dọ mí mọ jọmiọn to nukun Jiwheyẹwhe tọn mẹ sọmọ bọ É hẹn mí mọdona aliho Etọn lẹ, bọ mí sọ yín máhẹtọ to núhe É to wiwà lẹ mẹ. To asiko lẹpo mẹ, yèdọ whenuena núyiwà he yè magbè yetọn lẹ dóna sọawúhia, Jiwheyẹwhe ko degbè nado plán Omẹ Etọn lẹ. Na Ewọ lọ Dopolọ to osọ, egbé, mọwẹ podọ kakadoi. Do ayi e go, mí ko dó dọpọ́n dọ É nọ dọhó hlan Agùn Etọn blebu, podọ hlan omẹ dopodopo. Mí ma sọgan lá núhe Oklunọ to wiwà to “Agùn Klefẹldi tọn mẹ, podọ mí ko sọ dó dọpọ́n dona gbigbọ mẹ tọn lẹ tọn. To whenẹnu, mí nọ jlo nado dọ hlan mẹdelẹ dogbọn dọpọ́n nẹlẹ tọn dali, na yé he ko gbàpé lẹ nido yín máhẹtọ to pinplan azọ́n Jiwheyẹwhe tọn tọn mẹ. Enẹwutu, mí dóna payi e go dọ, núhe yè dọ lọ ma yín ohó didọ agbasalan tọn he yè na hiajẹ kẹdẹdi ohó Oklunọ tọn de poun gba; ṣigba nado dọ jẹnukọn, dọ, Oklunọ nọ dohia gbọn númimọ mẹ, yèdọ núhe e yín, podọ to enẹgodo, yè nọ lá owẹn de gbọn gbọdemẹ Gbigbọ Wiwé tọn dali. Do ayi e go, e sọgan sọawúhia gbọn Gbigbọ Wiwé dali, dọ, yè lá owẹn de hlan mí to ogbè devo de mẹ, podọ to godo mẹ, gbọn gbọdemẹ dopolọ dali, núniná gbètùnmẹ tọn nọ detana mí to ogbè mítọn mẹ. Kándeji núdohiamẹ wiwé lẹ tọn to ṣẹnṣẹn mítọn ma yín hinhẹnṣẹ̀ gbọn onù omẹ awe tọn atọ̀n tọn mẹ gba, ṣigba gbẹtọ kanwe-ko donu sọha de sọgan dèkunnu onú nẹlẹ tọn to owhè lọ blebu mẹ.” To azán kòtọ osùn ṣidopotọ, owhè fọtọ́n-fẹnẹ-kẹ̀nnẹ e lán fọtọ̀nnukun-dopotọ tọn mẹ, to whenuena mí ko dótó yẹwhehó nọvisunnu Branham tọn de vọ̀, Oklunọ dọhó hlan mí, dọmọ: “Omẹ Ṣie lẹ emi, bé mì mọ, lé wẹ Gbigbọ Wiwé dọ to ṣẹnṣẹn mìtọn! Bé mì payi Ohó Ṣie he mì ko sè to ojlẹ he lọ mẹ go, yèdọ ehe Yẹn ko dọ do ayiha mìtọn mẹ? Dinvie, mì ma lẹn nado zé núdepope whlá blo. Na eyín Yẹn kàn núṣiwà nẹlẹ biọ ylandonọ lẹ, nẹmunẹmu wẹ Yẹn ma na kanbiọ húgan mọ to alọ dódónọ lẹ tọn mẹ? Podọ eyín mì ma jlo dọ enẹ lọ ni sọawúhia to whẹhọ̀ Ṣie mẹ, enẹ lọ dóna yín hùndohia to ofi. Bé Gbigbọ Ṣie ma ko gbẹ́ núde sọn whẹ́whẹ́whenu? Enẹ wẹ: Ayọdide, ogalilọ, wantuntun, wẹ Gbigbọ lọ dọ to ṣẹnṣẹn mìtọn. Enẹwutu, owè aihọn tọn he yín linlẹn mìtọn lẹ tọn lẹpo yín nukun zé do Odàn he to linlẹn mìtọn lẹ po núdọnnú mìtọn lẹ po blu.  Ṣigba Yẹn to klándowiwé biọ sọn Omẹ Ṣie lẹ de, podọ na Gbigbọ Ṣie nido jẹgodona mì to linlẹn mìtọn lẹ po azọ́n mìtọn lẹ po mẹ. Na Yẹn mọ núhe mì ko wà lọ, mọwẹ Yẹn sọ sọgan dọ susu hlan dopodopo mìtọn lẹ, yèdọ omẹ dopodopo, na e ma yín gbẹtọ lẹ de wẹ mì wá gba, adavo Hinhọ́n Ṣie kọ̀n; podọ gbọn Hinhọ́n Ṣie he nọ sọawúhia dali, Yẹn mọ hlan dopodopo mìtọn. Dinvie, Yẹn na ná pọ́ndego de to egbé he na osi nido sọawúhia omẹ dopodopo, bọ mì ma nado nọte dọ Yẹn ni ylọ oyín mìtọn gba, ṣigba na mì nido wá Nukun Ṣie bo sọ dẹ́ mìde…” Do ohó nẹ lọ ji, mẹhe yè ko dohia gbọn númimọ dali lẹ yín yiylọ gbọn oyín yetọn lẹ dali gbọn dọdai dali, yéwlẹ sọ gọ̀ gbẹ̀zán yetọn do titò mẹ to Jiwheyẹwhe nukọn podọ to gbẹtọ lẹ nukọn. Enẹwutu, mí omẹ pó dóna klán mídelẹ do wiwé mlẹnmlẹn hlan Jiwheyẹwhe, bo nasọ biọ jọmiọn Oklunọ tọn nado yigbè núhe linlẹn he yín dido agbàn na lẹ tọn, nado gọ̀ enẹ lẹpo do titò mẹ. Humọ, Ewọ sọ dọ, dọmọ: “… hiẹ ma ko yọ́n núhe hiẹ dóna yigbè yetọn lẹpo gba… Podọ linlẹn towe lẹpo ko yín didohia hlan Mi, mọwẹ ylando towe lẹ lọsu ma sọ yín whiwhla sọn Nukọn Ṣie gba. Bé mì mọdona? Na ehe lọ wẹ bibẹ́nu to ṣẹnṣẹn mìtọn! Podọ mẹhe na gbẹ́sọ to agọ̀jẹ do Gbigbọ Ṣie jãnwẹ, Yẹn na ylọ ẹ tọ́njẹ gbaungba gbọn oyín etọn dali wá ofi. Podọ mì yọ́n ehe dagbedagbe, dọ, to agà finẹ ga, yè na dè asli mìtọn lẹ tọ́njẹgbonu, eyín mì ma jlo dọ e ni yín mọ to ofi.” To azán nẹlẹ mẹ, Gbigbọ Jiwheyẹwhe tọn hẹn azọ́n de ṣẹ̀ to sisósisó de mẹ. Na É jlo nado tún mí dote, bo nasọ dè mí jẹ mẹdekannu sọn diho agbasalan tọn dopodopo po gbigbọ tọn dopodopo mẹ. Kẹdẹdilé Paul dọ dó, dọmọ: “*Enẹwutu lé, mí tindo opagbè hẹlẹ, mẹyiwanna vivẹ emi, mì gbọ mí ni klọ́ míde sọn diho agbasalan po gbigbọ tọn lẹpo po mẹ, bo sọ hẹn wiwé sọgbè to osi Jiwheyẹwhe tọn mẹ”*(2 KỌLINTINU 7:1). Míwlẹ ko tindo opagbè daho daho Jiwheyẹwhe tọn lẹ, mí ko sọ yín yiylọ gbọn gbèdidè Jiwheyẹwhe tọn dali dọ, omẹ yiwanna lẹ. Enẹwutu, dinvie wẹ whenu klándówiwé tọn, nado tọ́njẹgbonu sọn diho agbasalan tọn po gbigbọ tọn lẹpo po mẹ.Na gbọn ninọ̀mẹnẹlọ kẹdẹ dali wẹ klándowiwé sọgan wàzọ́n to mí mẹ. Na yè wlán ẹn dọ: *“E yín klándowiwé matin mẹde ma sọgan mọ Oklunọ gba”.* Godo he Gbigbọ Wiwé ko plán mí gbọn núdabla sisósisó po linlẹn Jiwheyẹwhe tọn lẹ po mẹ, gbọn núdohiamẹ Ohó Etọn tọn mẹ, É to azọ́nwà to dinvie nado yí klándowiwé sisósisó de zán to gbẹ̀zán yé he jlo nado nọte to Jiwheyẹwhe nukọn lẹ tọn mẹ. Do ayi e go, zinzán depope matin hlan mẹdepope, yèdọ ehe ewọ na yí zán jẹnukọnna dọpọ́n he tindo po Oklunọ po gba, kavi ehe yín hódidọ dogbọn vọ́ji yọ́yọ́ lọ tọn dali, kavi dogbọn baptẹm Gbigbọ Wiwé tọn dali, kavi dogbọn dona he mí ko mọ yí tọn dali gba. Dinvie, Oklunọ lọ degbèna yisenọ lẹpo nado biọ klándowiwé po lẹwé pipé po mẹ, podọ to osi Jiwheyẹwhe tọn de mẹ. Whẹpo pagbè godogodo tọn lẹnido sọawúhia, núyiwà klándowiwé pipé lọ tọn dóna wá ṣiṣẹ̀ mẹ to míwlẹ mẹ (1 JOHANU 3:3). Do ayi e go, ylando hóhó lọ sọawúhia to ninọ̀mẹ awe delẹ mẹ. Tintan tọn wẹ: Tolivẹna Ohó Jiwheyẹwhe tọn, po dihó gbigbọ tọn po to gbẹtọ mẹ. Awetọ lọ wẹ: osẹ́ngbigbà Ohó lọ tọn po dihó agbasalan tọn po. To Ohó Jiwheyẹwhe tọn mẹ, ode yín yiylọ dọ ayọdidè gbigbọ mẹ tọn; awetọ lọ sọ yín yiylọ dọ ayọdidè agbasalan tọn. Do ayi e go, mí dóna klán mídelẹ sọn onú awe nẹlẹ go mlẹnmlẹn, to ma hò gbigbọ mawé mẹde titi tọn pọ́n mẹ. Enẹwutu wẹ Oklunọ jlo nado gbà mí hànyanhànyan bo nasọ yí mí do basi núzinzán he jẹ na yẹyi Etọn de. To whelẹponu, na gbigbọ he tin to mí mẹ po goyíyí mítọn po wutu wẹ yè do hẹn mí nado yigbè ylando mítọn lẹ tọn, podọ finẹ lọ wẹ aliglọnnú he to aliglọnna Gbigbọ lọ nado ṣẹ̀ azọ́nwà ji te, podọ na awhàngbigba pipé Satin lọ tọn ma nado sọawúhia. Dinvie, núdepope matin he mí na gbọagba etọn, kavi ehe mí na zéwhlá gba. To alọ lẹpo mẹ, yè ko hùn onú popo dohia to nukọn Jiwheyẹwhe tọn, podọ eyín mí ma jlo dọ enẹ lọ ni yín hùnhùndonuvò to whẹhọ̀sa Klisti tọn mẹ kẹdẹ, bé whenẹnu mí dóna hùn i dohia to ofi dote. Yẹn yọ́nẹn dọ ali sinsinyẹn de wẹ enẹ lọ, ehe yín aliho mẹdetiti gbẹ́dai tọn, yèdọ aliho winyando mẹ tọn de; ṣigba aliho Jiwheyẹwhe tọn wẹ enẹ lọ to yínyín hlan mí to whenẹnu. Na donanọ wẹ omẹ lọ, yèdọ mẹhe jlo na tindo jọmiọn nado dibusi enẹ lọ: Eyín e ma yín mọ, bé ewọ ma sọ sọgan lẹnvọjọ gbèdé. Mí jlo nado mọdona to vlẹkẹsi de mẹ, dọ, e ma yín onú daho lẹ wẹ mí to wiwà gba, adavo onú pẹvi lẹ kẹdẹ. Do ayi e go, tolivivè ṣẹ̀ sọn osẹ́ngbigbà Ohó de tọn mẹ, yèdọ ehe mí ma nọ hiajẹ po kandeji de po gba. Enẹwutu, mí dóna yọ́nẹn dọ gbigbọ devo de tin he yín whiwhla to godo na tolivivẹ dopodopo, podọ mẹhòba de sọ jẹ godona enẹ lọ. Gbọn enẹ lọ dali, mí nọ zé mídelẹ do huhlọn kẹ̀ntọ lọ tọn glọ́ bọ ewọ sọ nọ tindo aṣẹpipa de do mí ji. Podọ ehe yín aṣọ́didó mítọn tọn, Oklunọ ko do alihia mí. Whlasusu wẹ nọvisunnu Branham ko dọhó enẹ lọ tọn to yẹwhehódidọ etọn lẹ mẹ: nawẹ nọviyọnnu ehe,sọlé ewọma tlẹyọ́n whànpẹ depope, dóna whédọ to Oklunọ nukọn dogbọn aṣọ́didó he é dó nado dọ̀n linlẹn sunnu lẹ tọn do ede ji, bo sọ hẹn yé nado dèayọ hẹ ẹ to linlẹn yetọn lẹ mẹ. To yẹwhehódidọ nọvisunnu Branham tọn lẹ mẹ, Gbigbọ Jiwheyẹwhe ma gbọawupo nado to enẹ lọ dọ gba, bọ Ewọ ko sọ jlahomẹdóna mí vivẹvivẹ dogbọn enẹ lọ dali to ojlẹ he lọ mẹ. Dinvie, yẹn jlo nado vọ́ ohó homẹjladó tọn lọ dọ to ofi bo nasọ vẹ̀ nọviyọnnu lẹpo to Oyín Oklunọ tọn mẹ, nado sọnú dagbedagbe ma nado jẹlá sọn Ohó lọ mẹ, to ninọ̀mẹ wiwé de po osi po tọn mẹ, yèdọ to ninọ̀mẹ ma nado hẹn sunnu lẹ dèayọ gba. Yẹn mọdona hézéhézé dọ, to lilá ohó homẹjladó tọn he lọ tọn mẹ, mí ma na zán linlẹn yisenọ lẹ tọn he ma sọgbè de gba. Ṣigba yẹn yọ́nẹn dọ yé mẹhe yè dè na bẹ́yilọn mẹ lẹ na yí ohó homẹjladó tọn he lọ do vivẹ mẹ, bo nasọ jo yédelẹ do nado yín kinklándowiwé sọn diho agbasalan tọn po gbigbọ tọn po mẹ, nado tin to lẹwé pipe de mẹ, yèdọ kẹdẹdilé Ohó Jiwheyẹwhe tọn jlo sọn mí de dó. Do ayi e go, e ma sọgbè na mí nado tẹ́do jọmiọn lọ kẹdẹ go gba, adavo na do zé Ohó Jiwheyẹwhe tọn dopodopo do vivẹ mẹ.Na mẹhe dó dọpọ́n ojọmiọn tọn lọ tọn, nọ kẹalọyí huhlọn nado zé Ohó lọ hẹn to azọ́nwiwà mẹ ga, bo nasọ hẹn ojlo Jiwheyẹwhe tọn ṣẹ̀ to aigba ji fi dote. Na Jiwheyẹwhe ma to núhe mí ma sọ wà de biọ sọn mí de gba. Na mẹdepope matin ehe ma kúdiho to ninọ̀mẹ de kavi to awetọ mẹ gba, bo ma wàylan to linlẹn etọn lẹ mẹ, kavi to ohó mẹ kavi to wiwà mẹ gba. Mọ mẹdepope matin he sọgan dlán zannu tintan kavi dlẹnalọdo omẹ devo depope gba. Enẹwutu, na omẹ dopodopo ni dindona ede to Oklunọ nukọn, bo yigbè núṣiwà etọn lẹ tọn po ylando etọn lẹ tọn po, bo ma yín mẹdevo lẹ tọn gba. Do ayi e go, owanyin Jiwheyẹwhe nọ ṣinyọnnúdo ylando susu, dọ whenuena yè ko yigbè popo tọn vọ̀, ojọmiọn he nọ hẹn jonaylando wá nọ sọawúhia to gbẹ̀zán mítọn mẹ. Enẹwutu, Oklunọ jlo Agùn he ma dó diho kavi ehe ma gbì tọn, podọ mọwẹ Ewọ na do E hia hlan Ẹn dó, na mọwẹ Ohó Etọn dọ. Azọ́nyiwà sọn Jiwheyẹwhe de. Nọvisunnu Frank ## Chapter navigation - [Previous chapter](https://nasa.misia.sk/book_chapters/7790.md) - [Book contents](https://nasa.misia.sk/books/2359.md) ## Available translations - [Gungbe](https://nasa.misia.sk/book_chapters/7791.md) ## Source - [Canonical HTML page](https://nasa.misia.sk/book_chapters/7791) - [Markdown representation](https://nasa.misia.sk/book_chapters/7791.md)