Whẹ̀dida he yè lá to ota 15 tọn mẹ, sọawúhia to ota 16 mẹ. “Yẹn sọ sè ogbè lélé de sọn tẹmpli lọ mẹ, to didọ hlan angẹli ṣinawe lẹ, dọmọ, Mì yì, bo túntún ogò homẹgble Jiwheyẹwhe tọn tọn lẹ do aigba mẹ” (OSỌHIA 16:1). Whladopo dogọ́, Wẹndagbe Jesu Klisti tọn na yín lilá to vivọnu ojlẹ jọmiọn tọn tọn mẹ hlan gbẹtọ lẹpo. Podọ wanyin Jiwheyẹwhe tọn he sọawúhia, jónaylando oylanwà lẹ tọn po sẹ́nmẹjẹ lẹ po, po pipé whlẹngan tọn po kaka jẹ whenuena mí na yín gigọ̀dóai to fọ́nsọnkú tintan mẹ kẹdẹdi ovisunnu po oviyọnnu Jiwheyẹwhe tọn lẹ po. Enẹwutu, mẹdepope he na gbẹ́kọ núniná Jiwheyẹwhe tọn he lọ go, dóna sọgbè hẹ alè Jiwheyẹwhe tọn he É na ná ẹn.

Do ayi e go, ogò tintan homẹgble tọn lọ yín túntún jẹgbonu do yé he tindo ohia kanlin lọ tọn lẹ po yé he na sẹ̀n boṣiọ etọn lẹ po ji.

“Tintan yì, bo túntún ogò etọn do aigba mẹ, agada yinyọn ylanylan sọ kọnyìn gbẹtọ he tindo ohia kanlin lọ tọn lẹ go, po yé he to taliaina boṣiọ etọn lẹ po.”

“Angẹli awetọ sọ túntún ogò etọn do ohù mẹ; e sọ di ohùn omẹ kúkú de tọn: ayiha yé he to ogbẹ̀ lẹ tọn sọ kú to ohù mẹ.”

“Angẹli atọ̀ntọ sọ túntún ogò etọn do tọ̀sisa daho podọ do asisadò mẹ, yé sọ lẹzùn ohùn. Yẹn sọ sè angẹli osìn lẹ lọ tọn dọmọ, Dódónọ wẹ hiẹ, Dopo, he tin, bo ko tin, hiẹ Mẹwiwé lọ, na hiẹ dawhẹ̀ dólé wutu. Na yé ko sọ̀n ohùn mẹwiwé po yẹwhegán lẹ po tọn dai, hiẹ ko sọ ná ohùn yé nù; yé tin jẹ. Yẹn sọ sè angẹli devo tọ́nsọn fie agbà lọ te dali to didọmọ, Mọwẹ Oklunọ È, Jiwheyẹwhe Ganhunupo, nugbo po dódó po wẹ whẹ̀dida towe lẹ.”

“Angẹli ẹnẹtọ sọ túntún ogò etọn do owhè ji; yè sọ yí huhlọn hlan ẹn nado yí miyọn do fiọ gbẹtọ. Yè yí yózò daho do hẹn awutu gbẹtọ tọn fiọ, yé sọ to nùzán do oyín Jiwheyẹwhe tọn go, he tindo huhlọn to azọ̀n ylankan helẹ ji: yé ma sọ lẹnvọjọ nado ná gigo é gba.”

“Angẹli atọ́ntọ sọ túntún ogò etọn jẹgbonu do ofìn kanlin lọ tọn lọ ji; ahọludù etọn sọ dozinvlu; yé to odẹ́ yetọn kándù na awufiẹsa, bo sọ to nùzán do Jiwheyẹwhe olọn tọn go, na awufiẹsa yetọn po agada yetọn po tọn wutu, yé ma sọ lẹnvọjọ na owalọ yetọn gba” (OSỌHIA 16:2-11).

To ogò atọ́n tintan homẹgble daho lọ tọn lẹ whenu, onú jọ̀ do aigba go badabada. Do ayi e go dọ, ninọ̀mẹ lọ diọ sọmọ bọ, Satani ma sọ do homẹkẹn kavi do awufiẹsa na yisenọ lẹ gba, adavo whẹ̀dida he angẹli lẹ kọ̀n sọn homẹgble Jiwheyẹwhe tọn mẹ do yé he sẹ̀n Satani bo sọ yín núzinzán etọn lẹ ji. Kẹdẹdilé osọhia lọ to didohia dó, mí mọ dọ, yé mẹhe na sẹ̀n núyiwà agùn he tọn lọ po boṣiọ etọn lọ po na jiya. Do ayi e go, azọ̀nylankan lẹ lọ ma sọgan yín zizéjlẹ gba, na hógbè de matin ehe yè na ná nado jlẹ ẹ gba. Dinvie, whenuena ojlẹ jọmiọn tọn lọ to dindẹn, omẹ de sọgan dawhá ogbè lélé to ogbè gbẹtọ lẹ tọn po angẹli lẹ tọn po mẹ, dọ, “Mì din Oklunọ whenu yè sọgan mọ ẹn do, mì ylọ ẹ, whenuena é tin to yakẹ” (ISAIA 55:6).

Whenuena ojlẹ nẹ lọ wá, whenu na fẹ́ kakadoi, podọ dilé owé lọ to didohia dó, na e ma na bọawú nado dọhó hẹ Oklunọ bà. Whenẹnu wẹ ojlẹ jọmiọn tọn na dóalọte, fligọ̀ kavi whlẹgan ma nasọ tin bà. Dindọ̀n po agbagbigbọ tódidó tọn po na wá gbẹtọ lẹpo ji. Podọ omẹ dopodopo nasọ tin to otẹn etọn po tòdaho etọn he é na dè po mẹ. Enẹwutu, dinvie wẹ omẹ dopodopo dóna mágbè fie é na wá nọ̀ tọn.

“Angẹli ṣidopotọ sọ túntún ogò etọn do Euflate otọ̀ daho lọ mẹ; osìn etọn sọ hú, na yè nido jla aliho dó na ahọlu he sọn whèzẹtẹn ja lẹ. Yẹn sọ mọ gbigbọ mawé atọ̀n, yé taidi bésé, bo tọ́nsọn onù dlagọni lọ tọn mẹ jẹgbonu, podọ sọn onù kanlin lọ tọn mẹ, po onù yẹwhegán lalonọ lọ po tọn mẹ jẹgbonu. Na yé lẹ wẹ gbigbọ aovi lẹ tọn, he to azọ́n jawu wà, he nọ yì ahọlu aigba po aihọn lẹpo po tọn lẹ de, nado bẹ́ yé pli hlan awhàn azán daho Jiwheyẹwhe Ganhunupo tọn lọ gbè. Do ayi e go, yẹn na wá di ajotọ. Donanọ wẹ yé he to alihọ́, bo sọ sẹ̀ avọ̀ etọn dó, na é nikã zinzọnlin to omẹ́, yé bo nasọ mọ winyan etọn. É sọ bẹ́ yé pli do ofi yè nọ ylọ Amagẹdọni to ogbè Heblu tọn mẹ” (OSỌHIA 16:12-16).

Ohógo to owé he lọ mẹ wẹ yín “awhàn”. To ofi, mí ma to hódọ do awhàn he tin to akọta lẹ ṣẹnṣẹn go gba, adavo do awhàn daho he na wá jẹnukọnna bibẹ́nu Ahọludù Owhè Fọtọ́n. Odohia lọ tin to hinhọ́nnu titegbe: na yé he sọn Whèzẹtẹn lẹ zé yédelẹ do ninọ̀mẹ de mẹ, bo nasọ sọawúhia to otọ̀ Euflate tọn kọ̀n. Ehe to didohia ninọ̀mẹ he mẹ yé na tọ́nsọn to aihọn lọ blébu mẹ. Owéfọ Owé Wiwé mẹ tọn devo lẹ to didohia hézéhézé dọ, awhànpa helẹ na kọ̀ndopọ́ hẹ yé he na tọ́nsọn otò whèzẹtẹn Islaẹli tọn lẹ tọn mẹ.

“Bo dọmọ, Lé wẹ Oklunọ Jiwheyẹwhe dọ: Dayi e go, yẹn tin agọ̀ do ogo we, hiẹ Gọgi È, ahọvi daho Loṣi tọn, Meṣẹki, po Tubali po: yẹn bo nasọ lẹ́ we pé, bo yí omlẹn lẹ do alaka towe lẹ mẹ, yẹn bo nasọ hẹn we jẹgbonu wá, po awhànfuntọ towe lẹ po, osọ́ towe lẹ po osọ́nọ lẹ po, popo yetọn ṣinṣinyọnavọ̀na to awhànfunnu gigọ́ mẹ, ogbẹ́ daho de po ogáglo po po awọyinu po, popo yetọn he hẹn ohi lẹ go: Pẹlsia, Kuṣi po Puti po to yé de; popo yetọn po awọyinu po po awhàngbakun po: Gomẹli po awhànpa daho etọn lẹpo po; owhé Togalma tọn to agewaji patapata tọn lẹ mẹ, po awhànpa daho etọn lẹ po: yèdọ akọta susu po e po… To azán nẹ mẹ whenuena omẹ ṣie lẹ na nọ yí oblẹo do nọnọ̀, bé hiẹ ma na yọ́n ẹn? Hiẹ bo nasọ sọn otẹn towe mẹ wá sọn adà agewaji petepete tọn lẹ ji, hiẹ, po akọta susu po to de we, popo yé he hẹ́ osọ́ lẹ ji lẹ tọn, ogbẹ́ daho de po awhànfuntọ hlọnhlọnnọ de po: hiẹ bo nasọ hẹji wá Islaẹli omẹ ṣie lẹ ji, di aslọ de nado ṣinyọn aigba lọ ji; e nasọ wá jọ to azán godo tọn lẹ mẹ…” (EZEKIẸLI 38:3-16).

“Yẹn bo nasọ lẹ́ we pé, bo plan we yì, bo sọ we nado hẹji sọn adà agewaji lẹ tọn petepete wá; yẹn nasọ hẹn we wá osó Islaẹli tọn lẹ ji: yẹn bo nasọ hò ogába towe sọn alọ towe mẹ, yẹn nasọ hẹn ogá towe lẹ nado flẹ́ sọn alọ adusi towe mẹ. Hiẹ na jai to osó Islaẹli tọn lẹ ji, hiẹ, po awhànpa daho towe lẹ po, po akọta he tin to de we lẹ po: yẹn na jó we hlan ohẹ̀ wẹnyantọ hunkọ lẹpo tọn, podọ hlan gbékanlin danji tọn lẹ nado yín dùdùsúdo” (EZEKIẸLI 39:2-4).

“… Dilé wunkinkẹn dlẹn do osó lẹ ji dó; gbẹtọ susu lẹ de po huhlọnnọ de po, mọhunkọ ma ko tin gbèdé, mọ depope ma nasọ tin to yé godo, yèdọ jẹ owhè whẹndo lẹ susu mẹ” (JOẸLi 2:2). Dinvie, “awhàn wiwé” he go aihọn Malénu lẹ tọn to hódọ do na wá sọawúhia to whenẹnu, dọ,

“Mì lá ehe to akọta lẹ ṣẹnṣẹn; klán awhàn do wiwé: fọ́nadán omẹ hlọnhlọnnọ lẹ; gbọ yé ni hẹji wá… Gbọ akọta lẹ ni fọ́nadán yéde, bo hẹji wá jẹ agbàdo *Jehọṣafati tọn mẹ: na finẹ wẹ yẹn sín nado dawhẹ̀na akọta lẹpo lẹ́do pé” (JOẸLI 3:9, 12).

“Yẹn ko dosẹ́nna omẹ wiwé ṣie lẹ, yẹn sọ ylọ huhlọntọ ṣie lẹ ga na homẹgble ṣie, yèdọ yé he to ayajẹ to yẹyi ṣie mẹ lẹ. Awhá omẹ susugege lẹ tọn to osó ji, di omẹ susu tọn, zingidi ahọludù akọta he yè bẹ́pli lẹ tọn; Oklunọ awhànpa lẹ tọn bẹ́ awhànpa lẹ pli. Yé sọn aigba dindẹn ji wá, sọn opòdo olọn tọn, yèdọ, Oklunọ, po awhànfunnu homẹfiọ etọn tọn po, nado gbà aigba lẹpo súdo” (ISAIA 13:3-5).

“Na ahọ́suyí zàngbè Oklunọ tọn wẹ, podọ owhè ahọ́suyí tọn na whẹ̀gbè Ziọni tọn” (ISAIA 34:8).

Atọ̀nyínyín Satani tọn he yín:
Dlagọni, Kanlin po yẹwhegán lalonọ po

Atọ̀nyínyín Satani tọn he go yè dọhó do to Owé OSỌHIA 16:13 tọn mẹ, na zán huhlọn etọn po aṣẹpipa etọn po do aigba lẹpo ji. Do ayi e go, Satani wẹ ahọvi aihọn he lọ tọn. To whenẹnu, ewọ na do vivẹnu etọn godogodo tọn lẹpo nado hẹn vàsúdo wá aigba ji. Ewọ na bẹ́ awhànpa awhànfuntọ he é sọgan lẹpo pli bo wá jẹagọ̀do Islaẹli (ZEKALIA 14:2). Satani he yín dlagọni lọ, na zán huhlọn etọn lẹpo to politiki mẹ podọ to núyiwà agùn tọn lẹ mẹ to whenẹnu. É na tẹnpọ́n nado dọ̀n gbẹtọ lẹpo do ede de do aijijẹ daho lọ mẹ.

Sọn atọ̀nyínyín Satani tọn he lọ mẹ, mí na mọ: Dlagọni po Satani po, kanlin lọ po ota politiki tọn lọ po, yẹwhegán lalonọ po ota agùn tọn po; gbigbọ mawé atọ̀n lẹ na tọ́njẹgbonu wá, bo na to ohia lalonọ basi po azọ́njawu lẹ po nado dọ̀n omẹ lẹ podọ nado klọ bo sọ hẹn aliho yetọn lẹ jẹ ahọlu aigba ji tọn lẹ de. To ojlẹ nẹ mẹ, ota politikinọ otòdaho tọn lẹ po mẹdepope he tin to otẹn aṣẹpipa tọn de mẹ, na wá sọawúhia gbọn aṣẹpipa Satani tọn glọ́. Yè ma na dè mẹdepope pò to finẹ gba. Yè ma sọ to zinzán depope he tòmẹnu otò nẹlẹ tọn na zán pannukọn Islaẹli gba, aṣẹpipa ahọludù lẹpo tọn na wànú to kọ̀ndopọ́ mẹ, na yé yín máhẹtọ to kọ̀ndopọ́ akọta lẹ tọn mẹ wutu.

To Owé OSỌHIA 16:17-21 tọn mẹ, mí mọ odohia dogbọn whẹ̀dida he na wá Babilọni Daho lọ ji tọn dali. Podọ to ofi ga, tòdaho hóhó Babilọni tọn lọ ma yín didohia gba, yèdọ ehe yè tùnmẹ dọ “wuwlu” to ogbè wuwlu whenu to atọ̀họ̀ Babẹli tọn kọ̀n gba, ṣigba apajlẹ otòdaho Babilọni tọn he tin to egbé tọn. Yè do e hia hézéhézé to ota susu Owé Osọhia tọn tọn mẹ.

“Angẹli ṣinawetọ sọ túntún ogò etọn jẹgbonu do ojiwhèhomẹ; ogbè daho de sọ tọ́nsọn tẹmpli olọn tọn mẹ, sọn fie ofìn lọ te, dọmọ, E vọ̀. Ogbè lẹ sọ tin, po osò po, po abì po; aigba whinwhàn daho sọ whàn; ehe hunkọ ma jọ gbèdé whenuena gbẹtọ ko tin to aigba ji, aigba whinwhàn gángán mọhunkọ de, he klo sọmọ. Otò daho lọ sọ tlẹn do tẹnmẹ atọ̀n, otò daho akọta lẹ lọ tọn lẹ sọ gbà: Babilọni daho sọ yín finflin to Jiwheyẹwhe nukọn, nado yí kọfo ovện homẹgble etọn tọn he hùnzò ná ẹn. Lopo lẹpo sọ họ̀n yì, yè ma sọ mọ osó daho lẹ bà. Kẹnsu daho flẹ́ sọn olọn mẹ jẹ gbẹtọ lẹ ji, kẹnsu dopodopo di ojlẹ́ talẹnti dopo tọn na pinpẹ̀n: gbẹtọ lẹ sọ to nùzán do Jiwheyẹwhe go na tukla kẹnsu lọ tọn tọn wutu: na tukla etọn lọ sù gbahúgbahú” (OSỌHIA 16:17-21).

Onú he yè dlẹnalọdo lẹpo to didohia dọ, ojlẹ na wá bọ e ma na yín awhànpa awhànfuntọ lẹ tọn lẹ kẹdẹ gba, ṣigba aigba po ohù na tin to e mẹ ga. Lopo lẹ po osó lẹ po na yín tẹnsẹ̀na sọn otẹn yetọn mẹ. Aigba whinwhàn daho de di ehe hunkọ ma ko tin sọn whenu aihọn ko ṣẹ̀ na whàn otò daho aigba tọn lẹ, nado dọ taun dọ, otòdaho Babilọni tọn. Sọn ofi popo, podọ to ninọ̀mẹ lẹpo mẹ, whẹ̀dida po nukọnyìyì klándowiwé tọn po na yí tẹnmẹ yetọn. Mẹdepope ma na jlo nado tin to aigba ji to whenẹnu gba, enẹwutu, na omẹ popo ni yise to Ohó Jiwheyẹwhe tọn mẹ, dọ, mì ni nọ họ́ali bo sọ hodẹ̀ podọ nado họ̀ngán sọn núhe na jọ̀ do nukunmẹ aigba lẹpo ji tọn mẹ, podọ nado ṣite to Ovi gbẹtọ tọn nukọn.

“Ṣigba mì nọ họ́ mìde to osã lẹpo mẹ, bo nọ basi ovẹvivẹ, na mì nido yínuglo nado họngan sọn onú helẹ pó mẹ he to na wá jọ, podọ nado ṣite to Ovi gbẹtọ tọn nukọn” (LUKU 21:36).