“Yẹn sọ mọ ohia devo de to olọn mẹ, e klo bo sọ jawu, angẹli ṣinawe he tindo azọ̀nylankan godomẹ tọn ṣinawe lẹ; na yé homẹ wẹ yè hẹn homẹgble Jiwheyẹwhe tọn vọ̀ te” (OSỌHIA 15:1). E to didohia to homẹgble he mẹ hézéhézé dọ, gbọn azọ̀nylankan nẹlẹ dali, homẹgble Jiwheyẹwhe tọn ko wá vivọnu etọn. Podọ ehe lọ na sọawúhia to opòdo nukunbibia daho lọ tọn godo.

To afọ etọ awetọ mẹ, ohóta didiọ daho de tọn sọawúhia. Na yè do awhànpa yé he gbawhàn to ojlẹ nukunbibia tọn lọ tọn mẹ lẹ hia, dọ, “Yẹn sọ mọ di ohù mẹpọ́nnu tọn de he flusọ po miyọn po; podọ yé he gọ̀ to awhàngba mẹ sọn kanlin lọ de, sọn boṣiọ etọn de, podọ sọn sọha oyín etọn tọn de, ṣite to ohù mẹpọ́nnu tọn lọ ji, yé tindo ajalẹn Jiwheyẹwhe tọn lẹ. Yé sọ to ohàn Mọse devi Jiwheyẹwhe tọn tọn ji, po ohàn Lẹngbọvu lọ tọn po, dọmọ, Kiklo po nújawu po wẹ azọ́n towe, Oklunọ È Jiwheyẹwhe Ganhunupo; dódó po nugbo po wẹ ali towe, hiẹ ahọlu mẹwiwé lẹ tọn” (OSỌHIA 15:2-3).

Kẹdẹdilé mí ko dọhó do ota ẹnẹtọ lọ ji dote dó, ohù mẹpọ́nnu tọn he tiadi klistali tọn tin to ofìn lọ nukọn. Do ayi e go, Asivu lọ na tin to ofìn lọ ji (OSỌHIA 3:21), bọ yé he na tọ́njẹgbonu wá sọn nukunbibia mẹ lẹ na tin to ofìn lọ nukọn (jijlẹdo OSỌHIA 7:9 go). To ojlẹ he lọ mẹ, awhànpa susugege yín didohia to ofìn lọ nukọn. To whenẹnu, ofìn Jiwheyẹwhe tọn ma na tin to olọn mẹ kẹdẹ gba, ṣigba to aigba ji po ahọludù Etọn po. Owé he lọ to didohia hézéhézé dọ, awhànpa susugege he lọ ko mọ awhàngba yí to kanlin lọ ji, to boṣiọ etọn ji, to ohia etọn ji, podọ to sọha oyín etọn tọn ji, bo sọ yín awhànpa donu vòvo awe. Dinvie, awufiẹsa he na wá yisenọ nugbo lẹ ji jẹnukọnna bẹ́yìlọnmẹ matin hùhùsúdo, dopolọ na wá yé he yè jó do godo lẹ ji, yèdọ awhli nulunọ lẹ po yé he yè na whlẹn to Islaẹli mẹ lẹ po ji po vàsúdo daho de po, na yè ko dè Satani jẹte do aigba ji to whenẹnu wutu. To ofi, mí mọ mẹhe yín dódónọ to ojlẹ homẹkẹn tọn mẹ lẹ, podọ to Owé Osọhia 20 tọn mẹ, mí sọ mọ mẹhe kú di hùhùsúdo tọn lẹ.

Dinvie, ohàn he tọn yè dọ to ofi, ko yín didọ to Owé Osọhia 5 tọn mẹ kẹdẹdilé yè ko sè bọ e yín jiji dó gbọn awhànpa olọn tọn lẹ dali. To ofi, mí tin po Ju dódónọ lẹ po, podọ hẹ yé he yín dódónọ to nukunbibia akọta lẹ tọn whenu ga. Ehe lọ yín hinhẹnṣẹ̀ gbọn núyiwà he yín dọ ohàn awe na yín jiji dali, dọ: Ohàn Mọse, devi Jiwheyẹwhe tọn tọn po ohàn Lẹngbọvu lọ tọn po. Owé he lọ sọ yín hinhẹn wá gbẹpiplinọ lẹ de, na Jiwheyẹwhe dopolọ He wẹ na wà hẹ Islaẹli podọ hẹ akọta he tin to titò Etọn whlẹngan tọn lọ tọn mẹ lẹpo. Whenẹnu, yè to Oklunọ lọ pà di Jiwheyẹwhe Ganhunupo, azọ́n Mẹhe tọn klo bo sọ jawu. Na nugbonọ podọ dódónọ wẹ Ewọ to ali Etọn lẹ mẹ, yèdọ Ahọlu mẹwiwé lẹ tọn podọ to akọta lẹpo ji.

Opòdo whẹ̀dida helẹ tọn wẹ Owhè Fọtọ́n na sọawúhia, to asiko didiọ tọn mẹ. Enẹwutu, yè wlán ẹn dọ, akọta lẹpo na wá bo sẹ̀n Oklunọ lọ: “Mẹnu wẹ ma na dibusi we, Oklunọ È, bo ma na pagigona oyín towe? Na hiẹ dopokẹdẹ wẹ wiwé; na akọta lẹpo wẹ na wá bo litai to nukọn towe; na yè ko do whẹ̀dida towe lẹ hia” (OSỌHIA 15:4).

To Ahọludù Owhè Fọtọ́n lọ tọn dohia mẹ, yẹwhegán Alẹ̀nù Hóhó tọn lẹ ko dọhó do E go na mí, dọmọ: “E nasọ wá jọ, agbasalan lẹpo wẹ na wá litai to nukọn ṣie, sọn osùn yọ́yọ́ de mẹ kaka jẹ dẽvo mẹ, podọ sọn azán gbọjẹ tọn de mẹ kaka jẹ dẽvo mẹ, wẹ Oklunọ dọ” (ISAIA 66:23).

Dinvie, whẹ̀dida he dobu talala lọ na wá akọta he na hoavùn pannukọn Jelusalẹm lẹ ji, ṣigba po mọ po, e ma na yín dọ yé omẹ pó wẹ na kú gba, ṣigba mẹdelẹ nasọ pò to ogbẹ̀. “Podọ ehe nasọ yín azọ̀nylankan he Oklunọ na do hò gbẹtọ he ko fùnawhàn hẹ Jelusalẹm lẹpo; agbasalan yetọn na dùsúdo sẹ̀ whenuena yé ṣite to afọ yetọn lẹ ji, podọ nukun yetọn lẹ nasọ dùsúdo sẹ̀ to oslo yetọn lẹ mẹ, podọ odẹ́ yetọn nasọ dùsúdo sẹ̀to onù yetọn mẹ… E nasọ wá jọ dọ, omẹ dopodopo he yè na jódai sọn akọta he wá Jelusalẹm ji lẹpo mẹ, na nọ hẹjiyì sọn owhè mẹ jẹ owhè mẹ nado litaina Ahọlu lọ, Oklunọ awhànpa lẹ tọn, podọ nado payi ohunwhẹ gohọ̀tùntùn lọ tọn go” (ZEKALIA 14:12, 16). Ohógbè he yín dọ gbẹtọ lẹpo na kú to whẹ̀dida whenu, bọ ninọ̀mẹ klándowiwé tọn jẹnukọnna didóai Ahọludù Jiwheyẹwhe to aigba ji, ma sọgbè hẹ kunnudidè ayajijẹ Owé Wiwé lẹ tọn gba.

LÉ WẸ OKLUNỌ DỌ: “To enẹgodo to azán pòdo gbè, yè na yí yonu owhé Oklunọ tọn hẹnai to aga osó daho lẹ tọn ji, yè nasọ zé e yì oji hú osó pẹvipẹvi lẹ; akọta lẹ nasọ lìn biọ e mẹ. Gbẹtọ susu wẹ na yì bo na dọmọ, mì wá na mí ni yì osó Oklunọ tọn ji, yì owhé Jiwheyẹwhe Jakọbu tọn tọn gbè; ewọ nasọ plọ́n ali etọn mí, mí nasọ zinzọnlin to omọ́ etọn mẹ, na Ziọni wẹ osẹ́n na tọ́nsọn yì, ohó Oklunọ tọn sọn Jelusalẹm. É na dawhẹ̀ to akọta lẹ ṣẹnṣẹn, é na wọ́hẹ omẹ susu: yé nasọ yí ohi yetọn do tùn agbogọ́dọẹ: akọta ma to na zé ohi do akọta ji bà, mọ yé ma to na plọ́n awhànfùn bà” (ISAIA 2:2-4).

“LÉ WẸ OKLUNỌ AWHÀNPA LẸ TỌN DỌ: E na gbẹ́sọ wá jọ, dọ gbẹtọ lẹ na wá finẹ, po tòmẹnu daho gbõ lẹ tọn lẹ po: podọ tòmẹnu tòdaho de tọn lẹ na nọ yì jẹ awetọ de, dọmọ, Mì gbọ mí ni doteji nado vẹ̀vẹ̀na nukundagbe Oklunọ tọn podọ nado din Oklunọ awhànpa lẹ tọn yì Jelusalẹm mẹ, podọ nado vẹ̀vẹ̀na nukundagbe Oklunọ tọn. LÉ WẸ OKLUNỌ AWHÀNPA LẸ TỌN DỌ: To azán nẹlẹ mẹ e na wá jọ, dọ omẹ ao na tẹ́do é go, sọn akọgbè akọta lẹpo tọn mẹ, yèdọ na tẹ́do avọ̀tónu ewọ he yín Ju de tọn go, dọmọ, Míwlẹ na yì hẹ mì, na mí ko sè Jiwheyẹwhe tin to mì de” (ZEKALIA 8:20-23).

Whẹpo gbẹtọ lẹpo nado wá sẹ̀n Oklunọ lọ to Jelusalẹm mẹ, núhe númọtọ lọ wlán dóna yín hinhẹnṣẹ̀, dọ: “Enẹgodo yẹn sọ pọ́n, do ayi e go, yè hùn tẹmpli gohọ̀túntún okunnuhó lọ tọn lọ do nùvò to olọn mẹ: angẹli ṣinawe lẹ sọ tọ́nsọn tẹmpli mẹ, yé po azọ̀nylankan ṣinawe lẹ po, he yè ṣinyọn alavọ̀ wéwé tété na, bo sọ yí gbaja sika tọn do gbàn akọ́nnu na yé. Dopo to mẹdidá ẹnẹlẹ mẹ sọ yí ogò sika tọn ṣinawe na angẹli ṣinawe lẹ lọ, he gọ́na homẹgble Jiwheyẹwhe mẹhe tin to ogbẹ̀ kakadoi tọn. Ohò tẹmpli lọ tọn mẹ sọ gọ́na azọ̀ sọn gigo Jiwheyẹwhe tọn mẹ, podọ sọn huhlọn etọn mẹ; mẹde ma sọ sọgan biọ tẹmpli lọ mẹ, kaka yè nado hẹn azọ̀nylankan lọ ṣinawe angẹli ṣinawe lẹ lọ tọn vọ̀” (OSỌHIA 15:5-8).