To anádemẹ he lọ mẹ, mí na dlẹnalọdo Owé Daniẹli tọn po Owé Osọhia tọn po ga. Kaka jẹ egbé, Bibluplọ́nmẹtọ he yè ko yọ́nẹn lẹ ma ko pégo nado mọdona núhe tin to Owé dọdai tọn nẹlẹ mẹ gba. Na whepoponu wẹ yé nọ tindo tukla to whenuena yé nọ tẹnpọ́n nado tùnwun, na yé ma nọ pégo nado hia ogbè ohia he yè zán to finẹ lọ tọn gba. Enẹwutu, núhe yè dohia bo sọ wlán gbọn gbọdemẹ nugbo lọ glọ́ lẹpo wẹ sọgan yín domọnabo sọ yín hùnhùndohia sọn aga. To ofi, gbigbọ gbẹtọ de tọn ma sọgan yì dindona gbọn ninọ̀mẹ núyọ́nẹn tọn de dali gba, adavo nado mọdona to ninọ̀mẹ he yín Gbigbọ Jiwheyẹwhe tọn he na táhinhọ́n bo sọ hùn enẹ he yín whiwhla lọ dohia (1 KỌLINTINU 2:10-13). Na ojlẹ apáwhé dọdai godogodo Owé Wiwé mẹ tọn lẹ tọn he lọ ma ko sọawúhia gba, yèdọ omẹ gbõgbo lẹ lọsu tẹnpọ́n nado dó núyọ́nẹn yetọn hia dilé yé sọgan dó.

Do ayi e go, dọdai Biblu tọn lẹ ma sọgan yín tùntùnmẹ gba; na yé dóna yín ayihapana bo sọ yín domọna kẹdẹdilé yé ko yín ṣiṣẹ̀ dó. Dinvie, yè ko dọ nújijọ̀ he na sọawúhia to ojlẹ godo tọn mẹ lẹ jẹnukọn gbọn oyọ́nẹn wiwé he jẹnukọn po didè jẹnukọn lọ tọn po dali. Na Jiwheyẹwhe ko mọdona awelẹ, yèdọ otànhó gbẹtọ yínyín tọn po titò Whlẹngan tọn po, podọ enẹwutu, É tindo onú delẹ he yè ko wlán dai jẹnukọnna whenu lẹ gbọn omẹ didè Etọn lẹ dali. Ovẹ̀vẹ̀tọ nahunkọ tọn wẹ ehelẹ, yèdọ anádemẹtọ Biblu tọn lẹ, he ko tẹnpọ́n nado dọhó dogbọn ohóta dọdai tọn lẹ dali, to tintindo onú pẹvi de nado wà po gblọndo he sọn Ohó Jiwheyẹwhe tọn mẹ wá po, kẹdẹdilé mí na mọ dó! Do ayi e go, eyín mẹde lẹn dọ ewọ mọdona núde, é dóna yọ́nẹn dọ wuntùntùn lẹpo dóna tin to gbèsisọ mẹ po Owé Wiwé lẹpo po, bo sọ yigbèna. Enẹwutu, núdepope he yè ko dọ do ohóta de ji, tin to finẹ to whenuena ohókànbiọ godogodo tọn he tindo gblọndo hòmẹhùn tọn na yín niná.

E ma yín mí ko hia Biblu yì sisósisó mẹ kavi to pipé de mẹ gba, ṣigba na ojlẹ ko sọawúhia to dinvie na núdabla Ohó lọ tọn lẹ nido yín didohia mlẹnmlẹn, enẹwutu wẹ Oklunọ do ná wuntùntùn nado mọdona apáwhé dọdai Owé Wiwé mẹ tọn lẹ tọn. Do ayi e go dọ matin hiho, mí tin to apáwhé godogodo tọn na ojlẹ jọmiọn tọn. Po ehe lọ po, mí ma jlo nado dá núyiwà obú tọn de kavi whẹ̀dazán tọn de gba, ṣigba mí jlo nado dá núyiwà finfọ́n tọn de nado mọ ninọ̀mẹ he mẹ mí tin te to dinvie bo nasọ zé núyiwà lọ hẹn do vivẹ mẹ. Dinvie, nukunnumọjẹnúgo lọ dóna na yín zizédai do dọdai Ohó lọ tọn he yè jódo to apáwhé wẹndagbejijla tọn po núplọ́nmẹ tọn po to ojlẹ he ko wáyì lẹ mẹ.

Do ayi e go, yè ko dọ hlan yẹwhegán Daniẹli dọ, dọmọ, “Ṣigba hiẹ, Daniẹli è, súnúdo ohó lẹ lọ, bo sọ yí ohiadonu do tlẹ́ owé lọ, yèdọ jẹ ojlẹ opòdo lọ tọn: mẹsusu na họ̀nwezun yìgodo podọ yìnukọn, yè nasọ hẹn oyọ́nẹn sudeji” (DANIẸLI 12:4).

Sọ do ayi e go dọ, ohiadonu owé lọ mẹ tọn ma yín kakadoi gba, ṣigba jẹ ojlẹ opòdo lọ tọn. Podọ dogbọn “ojlẹ opòdo” lọ tọn dali, kavi dogbọn “azán godo” tọn lẹ tọn dali, whlasusu wẹ yè wlánwé etọn to Alẹ̀nù Hóhó po Yọ́yọ́ mẹ. Owé DANIẸLI 8:17-19 tọn dọmọ, “Tùnwun, hiẹ visunnu gbẹtọ tọn è; na númimọ lọ tin hlan ojlẹ opòdo tọn … Ewọ sọ dọ hlan mi dọ, do ayi e go, Yẹn na hẹn we yọ́n núhe na tin to ojlẹ agọ̀gbọnẹn homẹgble tọn lọ mẹ: na e tin hlan ojlẹ didè opòdo lọ tọn.”

Dinvie, núhe yè zéwhlá bo sọ tlẹ́ hlan ojlẹ he lọ ko yín hùnhùndohia to gbaungba gbọn hùnhùn ohiadonu ṣinawe lẹ tọn dali, bo sọ sọgan yín domọna dagbedagbe. Nugbo, yé he na hia owé anádemẹ tọn he lọ po odẹ̀ po, na mọdona Owé Daniẹli tọn po Owé Osọhia tọn po hézéhézé.

Yẹwhegán Daniẹli mọ númimọ lẹ ehemẹ nukọnyìyì delẹ yín didohia te bo sọ yín lilá to ninọ̀mẹ ohia tọn lẹ mẹ. Ṣigba e ma yín hlan ewọ nado dètana yé gba; nado dọ to alọ devo mẹ, yè do angẹli Gabliẹli hlan ẹn nado hẹnzùn yinyọ́nẹn hlan ẹn, yèdọ tadèna oyẹ he yè dohia ẹ lọ tọn lọ. Enẹwutu, Daniẹli dèkunnu etọn dọmọ, “Ewọ sọ hẹn mi nado tùnwun , bo sọ to hódọ hẹ mi, bo dọmọ, Daniẹli è, Yè hẹn mi jẹgbonu wá dinvie nado hẹn we zùn anàtọ wuntùntùn tọn. To ṣaunṣaunwhenu ovẹ̀ towe lẹ tọn wẹ gbèdide jẹgbonu yì, yè sọ hẹn mi wá nado dọ na we; na yè yinwanna we talala: enẹwutu, lẹn owhẹ̀hó lọ pọ́n, bo sọ tùnwun númimọ lọ” (DANIẸLI 9:22-23).

Kẹdẹdi whenẹnu, mọwẹ míwlẹ lọsu dóhùdo tùnmẹ lọ tọn po wuntùntùn onú lẹ tọn po to egbé dó ga. Ṣigba míwlẹ lọsu dóna hodẹ̀ ga na Jiwheyẹwhe nido sọgan ná mí gblọndó po nukunmọjẹnugo de po. Họ́nhungán onú helẹ tọn tin to pahónamẹ he lọ mẹ, dọmọ: “lẹn owhẹ̀hó lọ pọ́n, bo sọ tùnwun númimọ lọ” Enẹwutu mẹdepope he na gbẹdai Ohó Jiwheyẹwhe tọn to apadopo na tin to núṣiwà mẹ, yín etlẹ yín dọ ewọ to linlẹn dọ ewọ ko kẹalọyí núdóhia de. Ṣigba Jiwheyẹwhe ko yín bibládó Ohó Etọn go kakadoi. Na Ewọ nọ basi onú lẹpo kẹdẹdi Ohó Etọn. Podọ mí sọ hia to owé DANIẸLI 11:2 tọn mẹ, dọmọ: “Podọ dinvie wẹ yẹn na do nugbo lọ hia we.” Podọ mí masọ jlo núdevode ba, ṣigba mí jlo Nugbo onú he tin to owé he mẹ lẹ kẹdẹ.

Podọ Johanu lọsu tindo dọpọ́n mẹdlapọ́n Angẹli lọ tọn to whenuena ewọ tin to osó Pasmọti ji. Mí sọgan hia ehelọ sọn owé OSỌHIA 1:1 tọn mẹ. Ewọ dèkunnu dọmọ: “Osọhia Jesu Klisti tọn he Jiwheyẹwhe na hlan ẹn nado dohia hlan afanumẹ etọn lẹ, onú he ma na nọ ma wájọ to zãdevie; é sọ domẹhlan bo do yé hia gbọn Angẹli etọn dali hlan Johanu mẹmẹglọ etọn:” To whenuena ewọ ko mọ onú mimọ helẹ po, po onú he jọ lẹpo po, na ewọ ko dọ to OSỌHIA 22:8-9 tọn mẹ dọmọ: “Podọ yẹn Johanu wẹ ewọ he sè bo sọ mọ onú helẹ po. Whenuena yẹn sè bo sọ mọ, yẹn jẹklo nado litai to afọ Angẹli lọ tọn nukọn, he do onú helẹ po hia mi. Whenẹnu wẹ é dọ hlan mi, dọ, pọ́n hiẹ wà mọ blo: devi hatọ de wẹ yẹn po hiẹ po, po yẹwhegán mẹmẹsunnu towe lẹ po, po yé he to ohó he tin to owé he mẹ tọn yìn lẹ po: litaina Jiwheyẹwhe.”

Enẹwutu, mí dóna dopẹ́na Jiwheyẹwhe bo sọ nọ sẹ̀n Ewọ dopo kẹdẹ, yín Ewọ tlẹ dó angẹli kavi yẹwhegán de hlan, na Ewọ tindo awhanpa to olọn mẹ podọ to aigba ji he yín wẹnzagun gbèdidè etọn tọn. Ewọ sọgan dọhó bo sọ wàzọ́n gbọn yé mẹ kẹdẹdilé Ewọ jlo do (HEBLU 1:7)

Podọ azọ́ndedovo de he yín bibla do titò Whlẹngán tọn go, dopo tindo hudo dọdai tọn po oylọ aposteli tọn lẹ po. Eyín mẹde tindo linlẹn dọ yè ylọ ẹ, to whenẹnu ewọ na blá gbẹtọ lẹ po hòdótọ etọn lẹ po do núplọ́nmẹ etọn titi go. Ṣigba eyín mẹde yín didóhlan sọn Jiwheyẹwhe de, ewọ na nọ dọhó Jiwheyẹwhe tọn bo nasọ hẹn gbẹtọ lẹ biọ kanṣiṣamẹ po Jiwheyẹwhe po. Podọ gbẹtọ Jiwheyẹwhe tọn mọhunkọ lẹ wẹ nọ wléawúna aliho Oklunọ tọn, bo sọ nọ wléawúna gbẹtọ lẹ lé togùn Jiwheyẹwhe tọn lọ sọgan zinzọnlin do. Yé dóna dèsẹ̀ jẹnukọn onú he nọ zínmẹdódò lẹ (ISAIA 62:10). To alọ he lọ kẹdẹ ji wẹ gbẹtọ de sọgan jẹgodona Jesu Klisti te.

Linlẹn he lọ hẹn mí nado flin dọdai he tin to owé MALAKI 3:1, tọn mẹ dọmọ: “Dayi e go, Yẹn do lizọ́nyítọ ṣie hlan, ewọ bo nasọ wléawúna aliho lọ to nukọn ṣie: Podọ enẹlọ yín ṣisẹ to devizọ́n Johanu Baptiste tọn mẹ, mẹhe yè dohlan nado wléawúna aliho Oklunọ tọn lọ. ( MATIU 11:10)

To owé OSỌHIA 22:6 tọn mẹ, mí hia dolé, “E sọ dọhlan mi, dọ, Dódó po nugbo po wẹ ohó helẹ: Oklunọ Jiwheyẹwhe yẹwhegán wiwé lẹ tọn wẹ do angẹli etọn hlan nado do onú he to na wá jọ dinvie hia hlan devi etọn lẹ. Podọ to vivọnu Oklunọ Lọsu dọhó dolé dọ: “Yẹn Jesu ko do angẹli ṣie hlan nado dèkunnu onú helẹ tọn hlan mì to agùn lẹ mẹ…“ (OSỌHIA 22:16)

Podọ whedepopenu he nújijọ dèdovo de he yín bibladopọ po titò whlẹngan tọn po sọawúhia, Jiwheyẹwhe nọ do angẹli kavi yẹwhegán etọn de hlan, to owé AMỌSI 3:7 tọn mẹ é dọmọ: “Nugbonugbo Oklunọ Jiwheyẹwhe ma na wà núde, adavo ewọ dè aṣli etọn hia hlan devi etọn yẹwhegán lẹ” podọ nado dọ, jiji Johanu Baptiste tọn yín lilá gbọn angẹli de tọn dali, to owé LUKU 1:13 tọn mẹ, podọ to agbégbé he dọnsẹpọ Jelusalẹm dali, lẹngbọhọtọ lẹ sè hànjiji awhànpa olọn mẹ tọn lẹ tọn po núlilá lọ po, he yè ko dọ gbọn angẹli lọ dali, yèdọ jiji Mẹfligọ̀tọ lọ tọn, dọmọ: “Angẹli lọ sọ dọ hlan yé, dọmọ, mì dibu blo: pọ́n, yẹn hẹn wẹndagbe homẹhùnhùn daho tọn wá na mì, he na tin hlan gbẹtọ lẹpo. Na yè ji whlẹngantọ hlan mì to egbé to otò daho davidi tọn mẹ, he yín Klisti Oklunọ.”(LUKU 2:10-11). Podọ to asiko mítọn mẹ ga, hùnhùn hiadonu ṣinawe lẹ tọn ko yín lilá bo sọ sọawúhia to ninọ̀mẹ huhlọn tọn de mẹ.