Podọ e to dandanmẹ nado tindo nukunmọjẹnugo po wùntùntùn de po do gbọn agọ̀jẹdo-Klistigotọ lọ dali, podọ, enẹwutu, matin whẹgbledo, míwlẹ na pọ́n hlan Ohó Jiwheyẹwhe tọn bo sọ dindona nudabla dawe he lọ tọn gbọn hinhọ́n ohóta owé wiwé mẹ tọn lẹ tọn dali, podọ dohia dawe lọ tọn die, kẹdẹdilé yè ko dohia do to owé winwlán vovo mẹ sọn asiko dindẹn de mẹ. Ṣigba dinvie, mí tindo jlojẹ nado dindona onú jẹagọ lọ, he ma tindo gblọndo de adavo gbọn Ohó magbọvọ Jiwheyẹwhe tọn kẹdẹ dali.

Kunnudidè lẹpo sọawúhia to Owé Wiwé mẹ, to yéwlẹ lọsu mẹ podọ to kànṣiṣa ode pannukọn awetọ mẹ, bo sọ yín odohia gbọn Nugbonọ yínyín Jiwheyẹwhe tọn dali. Podọ núdidá nọ dèkunnuna Núdátọ lọ. Dinvie, eyín mẹde gbẹ́ awúsọhia Núdátọ lọ tọn, bé whenẹnu ewọ dóna ko gbẹ́ awúsọhia núdidá tọn to whẹkẹ lọ mẹ. Na mẹfligọ̀ lẹ wẹ kunnudidè gbẹte de podọ dohia Mẹfligọ̀tọ lọ tọn. Onú wiwé lẹ ma dóhùdo ṣiṣẹ̀ kavi odohia míwlẹ tọn tọn gba – na yéwlẹ ko to nugbo lọ dohia wutu. Do ayi e go, enẹ lọ nọ yín zinzán na ohógbè dopodopo po ohóta dopodopo po to Owé Wiwé lẹ mẹ.

Dinvie, zinzán ylankan agọ̀jẹdo-Klistigotọ lọ tọn yín dopo to ohóta he sinyẹnawu talala lẹ mẹ nado dọhó do yé go. Jẹnukọn, yẹwhe yínyín Jesu Klisti tọn sọawúhia, to enẹgodo awetọ he na sọawúhia wẹ dawe dabla agọ̀jẹdo-Klistigotọ lọ tọn. Do ayi e go, ohóta awe helẹ ko yín núhe go yè nọ dọhó do podọ gbẹtọ susu sọ tin to wuwlú de mẹ. To ninọ̀mẹ awelẹ mẹ, vogbingbọn daho de tin to wuntùntùn lọ mẹ. Na azinpo de matin to aigba ji ehego ogán-núplọ́nmẹtọ he nọ dọhó de sọgan ná mí nukunnumọjẹnugo do ohóta awe helẹ ji gba. Podọ oyọ́nẹn zédai otànhóhó tọn to núpinpọ́n he lọ mẹ tin to zinvlu titli de mẹ. Enẹwutu, mí nọ mọ gbèdide po linlẹn agùn alọpãlọpa lẹ po tọn yí, ṣigba na yéwlẹ tọn e ma húgan mọ gba.

Kẹdẹdilé yè dọ dote dó sọn yẹwhegán Daniẹli de, owé dabla he lọ dóna yín titlẹ́ bo sọ yín nusúdo kaka jẹ ojlẹ opòdo tọn mẹ. Podọ to Owé OSỌHIA 5:1 tọn mẹ, mí wá mọdona dogbọn owé ohiadonu tọn de dali to Alẹ̀nù Yọ́yọ́ mẹ. Do ayi e go, yè ko dọ hlan Johanu he mọ onú helẹ dọmọ, “… Do ayi e go, Kinnikinni lọ he sọn whẹndo Juda tọn mẹ, Adọ̀ Davidi tọn, ko gbawhàn nado hùn owé lọ, podọ nado họ̀n hiadonu etọn ṣinawe lẹ…” (OSỌHIA 5:5).

To anádemẹ he lọ mẹ, mí ma sọgan dọhó do hùnhùn hiadonu lẹ tọn po núhe yé yín po ji gba. Na ehe lọ dóna yín wiwà to blọsi devo lẹ mẹ. Na ehelẹ wẹ núhe kàn mí po ohóta he tin to nukọn mítọn he lọ po. Dinvie, mí dóna wá tadèna lọ po apajlẹ he hodo e go lọ po ji, yèdọ ehe mí to mimọ to dinvie lọ. Na dọdai lọ taidi ohógbè Oklunọ mítọn tọn lẹ, Mẹhe dọhó do oló lẹ mẹ bo sọ zán apajlẹ alọpãlọpa lẹ, yèdọ ehemẹ gblọndo lẹ lọ lọsu tin te ga. Podọ to owé dọdai tọn awelẹ mẹ, mí hia dogbọn gbékanlin lẹ dali, dogbọn ota lẹ dali, dogbọn azò lẹ dali, dogbọn boṣiọ kanlin lọ tọn dali, dogbọn ohia kanlin lọ tọn dali, dogbọn osọha kanlin lọ tọn dali, podọ dogbọn ayọ̀detọ he hẹ́ kanlin lọ lọsu tọn dali ga, podọ onú devodevo lẹpo ga. Na tadèna apajlẹ helẹ pó tọn dóna yín didohia gbọn alọgọ́ Owé Wiwé lẹ tọn dali po ayipipa daho de po.

Do ayi e go, zinzán agọ̀jẹdo-Klistigotọ lọ tọn yín mimọ to ninọ̀mẹ alọpãlọpa lẹ mẹ bo sọ to yìyì dómọ na owhè fõ hunkọ to otànhó agùn tọn mẹ. Enẹwutu, Owé Wiwé do núhe e yín lọ hia mí to kọ̀ndopọ́ vòvo lẹ mẹ. Dinvie, Paul dlẹnalọdo gbẹtọ he lọ to azọ́nyiwà etọn po azọ́nyikọ sọha etọn tọn po. Podọ po núpinpọ́n dọdai tọn de po, é tẹnpọ́n nado do é hia hézéhézé. Enẹwutu, apọsteli lọ wlán bo wọ́hẹ yisenọ lẹ dọ, “Mì dike mẹdepope klọ mì to núdepope mẹ blo: na azán lọ ma na wá, adavo aijijẹ de wá whẹ́, bọ yè na yí dawe ylandonọ nẹ hia, ehe yín ovi vivà tọn; mẹhe to alinglọ́n, bo sọ to ede zé do oji hú ehe yè nọ ylọ dọ Jiwheyẹwhe, kavi ehe yè nọ litaina lẹpo; sọmọ bọ é sinai to tẹmpli Jiwheyẹwhe tọn mẹ, bo zé ede do gbonu di Jiwheyẹwhe. Bé mì ma flin dọ, whenuena yẹn tin to mì de, yẹn ko dọ onú helẹ na mì ga? Dinvie mì sa ko yọ́n onú he glọ́nali nệ na yè nido do é hia to ojlẹ etọn mẹ. Na núdabla ylando tọn ko ṣẹ̀ do azọ́nwiwà ji: ṣigba ewọ he to aliglọ́n nệ na to aliglọ́n nệ kaka yè na do dè e sẹ̀ sọn ali ji. Whenẹnu wẹ yè na dè mẹjẹglo lọ hia, mẹhe Oklunọ na yí gbigbọ onù etọn mẹ tọn do súdo, bo nasọ yí sisẹ́ wiwá etọn tọn do súkundona: yèdọ ewọ lọ, mẹhe wiwá etọn na taidi azọ́n Satani tọn kẹdẹ, po huhlọn lẹpo po, po lalo he jawu lẹ po po oklọ mawàdódó tọn lẹpo po na yé he dọ̀n lẹ…” (2 TẸSALONIKA 2:3-10).

Dinvie, onú zéjlẹdonúgo helẹ ná mí ohia agọ̀jẹdo-Klistigotọ lọ tọn delẹ:

Klisti wá to Oyín Otọ́ tọn mẹ (JOHANU 5:43);
Mẹvlẹtọ Etọn wá to oyín ede titi tọn mẹ (JOHANU 5:43).

Klisti huwhẹ Ede mlẹnmlẹn (FILIPINU 2:8);
Ovi vivà tọn lọ zé ede daga na onú lẹpo (2 TẸSALONIKA 2:4).

Yè vlẹ Klisti bo sọ gbẹ́ Ẹ (ISAIA 53:3);
Yè nọ sẹ̀n agọ̀jẹdo-Klistigotọ lọ bo sọ nọ jlayinna ẹn (OSỌHIA 13:8).

Klisti dèkunnu na Nugbo lọ (JOHANU 18:37);
Agọ̀jẹdo-Klistigotọ lọ zé Nugbo dlán odò jẹ aigba (DANIẸLI 8:12).

Klisti wá nado wà ojlo Jiwheyẹwhe tọn (HEBLU 10:7-10);
Agọ̀jẹdo-Klistigotọ lọ nọ wà núhe é jlo (DANIẸLI 11:36).

Klisti wá nado whlẹn mẹhe dọ̀n lẹ gán (LUKU 19:10);
Agọ̀jẹdo-Klistigotọ lọ wá nado và mẹwiwé lẹ súdo (DANIẸLI 8:24).

Klisti jó Ede na osẹ́n Jiwheyẹwhe tọn (MATIU 5:17);
Yè ylọ kẹ̀ntọ lọ dọ “matin osẹ́n” (DANIẸLI 7:25; 2 TẸSALONIKA 2:8).

Yè ylọ Klisti dọ Ovi Jiwheyẹwhe tọn (LUKU 1:35);
Agọ̀jẹdo-Klistigotọ lọ yín yiylọ dọ, ovi vivà tọn (2 TẸSALONIKA 2:3).

Klisti wẹ núdabla jijọ-di-Jiwheyẹwhe tọn (1 TIMỌTI 3:16);
Agọ̀jẹdo-Klisitgotọ lọ wẹ núdabla ylando tọn (2 TẸSALONIKA 2:7).

Do ayi e go, onú zéjlẹdonúgo lẹ lọ to dandan mẹ nado mọdona dawe he lọ. Yè nasọ gọ́ núhe pò lẹpo na. Podọ to anádemẹ mítọn he lọ mẹ, vogbingbọn he tin to Klisti po agọ̀jẹdo-Klistigotọ lọ po ṣẹnṣẹn, ko wá hinhọ́nnú hézéhézé. Podọ omẹ susu ma ko mọdona núhe yé na wá mọdona gbọn blọsi he lọ daligba. Na to Owé Daniẹli tọn mẹ, to episteli apọsteli lẹ tọn mẹ, podọ to Owé Osọhia tọn mẹ, mí mọ odohia alọpãlọpa dawe dopo nẹ lọ tọn po núyiwà dopolọ po to ninọ̀mẹ susu mẹ.

Nado dọ gbaungba, gbẹtọ dabla de wẹ agọ̀jẹdo-Klistigotọ lọ. Kẹdẹdilé yè sọgan yọ́n Klisti gbọn awúsọhia Jiwheyẹwhe tọn dali dó, mọdopolọ wẹ yè sọ mọ agọ̀jẹdo-Klistigotọ lọ gbọn yẹwhe etọn dali dó, eyín yè táhinhọ́n do ohóta lọ ji sọn agà. Do ayi e go, Klisti wẹ awúsọhia Jiwheyẹwhe tọn to ninọ̀mẹ gbẹtọ tọn de mẹ. Podọ awúsọhia agọ̀jẹdo-Klistigotọ lọ tọn na yín Satani to ninọ̀mẹ gbẹtọ daho de tọn mẹ to aigba. Do ayi e go, Satani ma yín yẹwhesẹ̀ntọ de gba, na é yise to Jiwheyẹwhe mẹ bo sọ sisọ (JAKỌBU 2:19). Podọ afọzedotetọ etọn to aigba ji, nọ zinzọnlin gbọn afọdomẹ etọn lẹ mẹ. To gbonu finẹ, mí na dọhó do dawe sinsẹ̀nnọ dèdovo he nọ zán owéfọ lẹ do fidepope he jẹ̀ de ji kẹdẹdilé Satani ko wà dó, yèdọ to whenuena é tẹn Jesu Lọsu pọ́n do.

Kẹdẹdilé Klisti tindo otànhó dindẹ̀n de dó, mọdopolọ wẹ na Satani lọsu ga. Yé omẹ awelẹ sọ tindo jọtẹn yetọn sọn olọn mẹ. Eyín mẹde na dindona yé, e bọawu nado mọ dọ Klisti gọ̀yì Jiwheyẹwhe de, bọ agọ̀jẹdo-Klistigotọ sọ gọ̀yì Satani de. Do ayi e go, Klisti nọtena Ahọludù Jiwheyẹwhe tọn po hinhọ́n po, podọ po ogbẹ̀ po. Agọ̀jẹdo-Klistigotọ lọ nọtena ahọludù Satani tọn po zinvlu po, podọ po okú po. Yé omẹ awelẹ sọawúhia to aigba ji, yè do yé omẹ awelẹ hia bo sọ yín whiwhla to asiko dopolọ mẹ.

Kẹdẹdilé mí ko pa ayi e go dó, mí mọ odohia yé omẹ awelẹ tọn to Owé Wiwé mẹ. Sọn dòdó ojlẹ lẹ tọn, oyẹ lẹ po ohia lẹ po tin bo sọ to ohódọ dogbọn Klisti po agọ̀jẹdo-Klistigotọ lọ po tọn dali. Na ahọludù de wẹ yé omẹ awelẹ. Yé omẹ awelẹ sọ to avùnho na ofìn de, po vogbingbọn de po dọ dopo wẹ Jiwheyẹwhe, bọ yè nọ sẹ̀n omẹ awetọ lọ di Jiwheyẹwhe. Enẹ wẹ Hinhọ́n po zinvlu po, okle po ozán po, podọ ogbẹ̀ po okú to kunnudè sọn dòdónu núdidá vòvo donu awe tọn po ninọ̀mẹ tọn po. Do ayi e go, mí mọ okún awelẹ sọn Kaini po Abẹli po ji kaka jẹ Jesu po Juda po whenu, podọ to vivọnu jẹ̀ Klisti po agọ̀jẹdo-Klistigotọ lọ po ji.

Do ayi e go, yè do Klisti hia to kànṣiṣa alọpãlọpa lẹ mẹ po devizọ́n Etọn po, podọ po titò Whlẹngan tọn po kẹdẹdi Ovi Jiwheyẹwhe tọn, di Ovi Gbẹtọ tọn, di Ovi Davidi tọn, di Lẹngbọvu Jiwheyẹwhe tọn, di Whẹ̀yidomẹjitọ, di Whẹ̀yidọtọ, di Ahọlu, di Yẹwhenọ, di Yẹwhegán, po oyín devodevo lẹpo po.

Podọ hlan agọ̀jẹdo-Klistigotọ lọ, dilé yè ko dọ dó, yè do é hia to ninọ̀mẹ alọpãlọpa lẹ po azọ́nyínkọ vòvo lẹ po: kẹdẹdi yẹwhegán lalonọ lọ, di matin osẹ́nnọ, di dawe ylando tọn lọ, po oyín devodevo lẹpo po. Dinvie, e ma na sinyẹnawuna mẹdepope he dín owéfọ lẹ mọ to Owé Wiwé mẹ nado jẹgodona azọ́nyínkọ Klisti tọn lẹ dọ yé wẹ azọ́nyínkọ Jiwheyẹwhe Lọsu tọn kanwe-kò do kanwe-kò ji, podọ ga ehe yín agọ̀jẹdo-Klistigotọ lọ tọn lẹ dóna yín Satani tọn lẹ.