E singruok manyien, onge chik maler mar timo nyasi chieng` odiechieng mokuongo mar juma (jumapil) kata kete kar Sabato. Bende, e Muma wayudo mana nying’ mar odiechieng’ mar abiriyo e juma, ma en odiechieng’ Sabato. Onge odiechieng’ machielo ma owuoyie gi nying. Owacho mana ni: “Odiechieng’ mokwongo mar juma…” (Johana 20:1) Nying’ ma imiyo odiechienge mag juma gi nyinge mopogore opogore en ma owuok kuom joma kia Nyasaye (jokafiri), bende “odiechieng’ mar chieng’” – odiechieng’ mokwongo mar juma (Jumapil). Kata kamano, kae, wadwaro mana ng’eyo tiend wach mar Nyasaye e “chieng’ mogik” kod “chieng’ mokwongo” mar juma kaluwore gi Ndiko Maler; gik moko duto mamoko waweyo ne Ng’at ma biro ng’ado bura makare.

Wach maber chiwo neno mowinjore kuom chier mar RUOTH Yesu e odiechieng’ mokwongo mar juma, ma en odiechieng’ bang’ Sabato: “To ka Yesu nochier e odiechieng’ mokwongo mar juma…” (Mariko 16:9). Kokalo kuom chier mar RUOTH, odiechieng’ “mokwongo” mar juma noyudo berne, ma ne osebedo ka oketne e Singruok Machon. E odiechieng’no bende, Jal mane ochier nofwenyore ne Joge owuon: “Kendo chiengono ji ariyo kuomgi nonwango dhiyo kadala moro miluongo ni Emmau, nobor gi Jerusalem wuoth mar seche ariyo.” (Luka 24:13)

Ka gin kodgi Ne en gi puonj mar Muma ma ne oriwo Singruok Machon duto – chik mar Musa, Zaburi kod Jonabi – kendo ne omiyogi ng’eyo mar Ndiko. E odiechieng’ mokwongo mar juma, ne otimore: chier; wuotho ​​gi jopuonjre ariyogo nyaka Emmau; donjo e ot; ngi’ngo makati ma ne omiyo giyange (Luka 24:13-35); kendo e odhiambo Jal mochier nodhi limo jopuonjre mage: “kanochopo odhiambo chieng`no, ma en chieng mokuongo bang sabato, dho udi ne ochiegi kama jopuonjre ne nitie, nikech ne giluoro Jo-yahudi, Yesu nobiro nochung e diergi, ma owachonigi ni ya, »okuwe uru«.” (Johana 20:19)

Ne ondiki kendo kama: “Bang’ ndalo aboro, jopuonjrene ne ni e ot kendo, Thoma ne ni kodgi…” (Johana 20:26) Ang’o momiyo adier bang’ juma achiel? Ang’o momiyo ok otim bang’ ndalo adek kata abich? En thuolo maduong’ ahinya ni ok puonjwa gi dhano, to gi Wach Nyasaye! Ok mana jopuonjre kende ema ne Nyasaye telonigi e yo ma kamano mondo gichokore e odiechieng’ mokwongo mar juma, to bende Paulo, nikech ondik ni: “To e odiechieng’ mokwongo mar juma, ka jopuonjre ne ochokore kanyachiel mondo ong`ing makati…” (Tich Joote 20:7) En gima ber ahinya neno Ndiko ka Roho Maler tayowa! Paulo ne ngi’ngo makati gi jomaler e odiechieng’ bang’ Sabato; kuom mano ne oluwo ranyisi mar RUOTH, Mane ong`ingo makati bang’ chier e Emmau e okang’ mokwongo e odiechieng’ mokwongo mar juma. Kendo watimo nyasino e kinde lamo, bed ni en odiechieng` mar sabato kata odiechieng’ mokuongo mar juma, nyaka Obi (1. Korintho. 11:26).

Kaka Paulo ne itelone gi Roho Maler mondo oket ler ni onego gichokore e odiechieng’ mokwongo bang’ Sabato, to mano nigi berne makende. Ne onyalo mana ndiko e yo machuok ni: “Ne wachokore e ngi’ngo makati,” ma ok owuoyo kuom odiechieng’ mokwongo mar juma. Ka bende rieko Nyasaye keto nyithinde kare. Ka sani wachokore e odiechieng’ mokwongo bang’ Sabato mar rito Wach, mar lalruok, mar lamo, kendo mar ngi’ngo makati, to mano en gima luwore ahinya gi tim mar RUOTH kod joote kendo kamano e Dwaro mar Nyasaye. E yo machielo, mach mar Roho ne liel matek ahinya e i Jokristo mokwongo kendo Roho ne miyogi ngima kendo ne gitimo odiechieng’ ka odiechieng’ kaka odiechieng’ mar chokruok: “Kendo pile e hekalu, kendo e dala, ne ok giweyo puonjo kendo yalo Yesu Kristo.” (Tich Joote 5:42)

Bende wanyalo neno ni Paulo noketo ler ahinya e odiechieng’ mokwongo mar jumano kuom puonj mare ni choko ma ne ochoki ne jomaler ne onego okaw e odiechieng’no: “Chieng mokwongo bang sabato, juma ka juma, ng`ato ka ng`ato kuomu opog dir gima Nyasaye okonyego okane…” (1. Korintho 16:2) Ok wanyal konyo to wayie mana kaka Ndiko wacho, ni wach ka wach iyudo e dho joneno ariyo kata adek. RUOTH ma ja adier osechiwo gik ma dwarore ne ogandane e wachni bende. Ne omiyogi yore mag odiechieng’no ma ne osebetie e Singruok Machon. E Tim Jolawi. 23:7 ondik ni: “E ndalo mokwongo unubed gi chokruok maler kik utie tich moro.” E ndiko mar 10 owacho ni: “ … kendo ukayo keyo, mare eka unukelni jadolo cham motuwe mar gik mukayo mokwongo … kinyne bang sabato jadolo nokwadhe.” (matindo 10-11). Jadolo ne loso cham motuwe mar nyak mokwongo e odiechieng’ ma ne luwo Sabato. Mano en ranyisi maduong’ ahinya mar keyo mar chunje mag rombe makayo mar Singruok Manyien!

Jadolo ne nyaka los cham e nyim RUOTH Nyasaye e odiechieng’ mokwongo mar juma. En gima yot winjo tiend wach mar “loso”: Gik moko ka ng’ato ne oriwre e kindgi kendo e yo ma kamano ne giloso gimoro ma opong’ – cham (Zaburi 126:5-6). Yesu Kristo e “kayo,” kendo Kanisa mar Singruok Manyien bende en “kayo,” ma en ringre. Jokanyo duto oriwre kanyachiel gi wich kendo gi ng`ato ka ng`ato. Ne en koth ngano (Johana 12:24) ma ne olwar e piny e lowo, kendo joge owuon gin ngano ma ochiek ma ikayo kendo ichoko e dero keno mar polo (Mathayo 3:12).

E singruok machon, ne en jadolo ema ne loso cham ma ne ni e piny. E singruok manyien en Yesu Kristo, Jadolo Maduong’ mar yie wa mawahulo, ma loso kayo kaka cham mar keyo mar nyak mokwongo ma ne onyiewo kowuok e piny – e iye wangima kendo wan gi bedo marwa (Tich Joote 17:28).

Ber mar “odiechieng’ mokwongo” rieny ne ji duto ma dwaro neno adiera. “kendo unukwan kuomu nyaka a kinyne bang sabato, nyaka a ndalono kama ukelo cham motuwe mar misango mikwadho; sabato abiriyo norum: kata nyaka a kinyne bang sabato mar abiriyo…” (Tim Jolawi. 23:15-16) E wechegi, kwan ma kare mar pong’o nyathi ma kayo gi Roho Maler oler. Odiechienge abiriyo nyadi abiriyo – ndalo piero ang’wen gi ochiko ne dhi kalo; odiechieng’ maluwo en odiechieng’ mar Pentekost, ma en odiechieng’ mar piero abich. E odiechieng’ mar piero abich bang’ ka Kristo osechier kuom joma otho gi loch kaka olemo mokwongo, olo Roho Maler notimore. Ne otimore e odiechieng’ ma ne luwo Sabato 7. Omiyo chier kod pong’o gi Roho Maler ne oket gi Nyasaye owuon chon e Singruok Machon mondo obed e odiechieng’ mokwongo mar juma.

Ok mana chier kende, to bende yudo Roho Maler ne otimore kaluwore gi Ndiko e odiechieng’ bang’ Sabato. Ng’ano ma ne dhi kwedo weche maler kendo ma adier ma kamago mag Ndiko? Ng’at ma ok oyie gi Wach ka Wach kaka ondik kendo kar mano otemo timo weche mag Ndiko mondo odonjne gi paro mage owuon, pok owinjo dhok mar Nyasaye. Ng’at moro amora ma dhi ataro gi neno mar Ndiko ok oyie gi gima Wach owacho, to oyie gi loko mare owuon.