Dinvie, mí ma dóhudo nado dọhó dó owé he yè wlán hlan agùn ṣinawe lẹ lọ go susu gba, na yè ko dọhó do yé ji titegbe to owé he yín “Whèta Agùn Ṣinawe lẹ” tọn mẹ. Yé ko yín núhe mí ko mọdona susu kavi pẹde. Owẹn he lọ yín alọkẹyí gbọn wẹnzagun he yín angẹli piplimẹ lọ tọn dali. To enẹgodo, é zé e hlan agùn lọ blébu. To e mẹ finẹ, mí mọ pipa na dagbe podọ wọ́hẹmẹ pannukọn núplọ́nmẹ he jẹagọ̀ po núhe pò lẹpo po. Podọ to vivọnu owé winwlán lẹ lọ dopodopo tọn, yè dopagbè dèdovo lẹ hlan awhàngbatọ lẹ. Do ayi e go, ehelẹ ma yín zinzán na piplimẹ dèdovo he yè dlẹnalọdo lẹ kẹdẹ gba, ṣigba hlan yisenọ lẹpo to whenu Agùn Alẹ̀nù Yọ́yọ́ mẹ tọn lọ tọn.

Núyọ́nẹntọ otanhó agùn tọn lẹ tọn ko dọhó yì sisósisó mẹ po asiko vòvo sinawe po. Mẹhe mí yọ́nẹn to yé mẹ dagbedagbe wẹ Dọtẹ Klahlẹnsi Lakin, mẹhe dohia to owé winwlán etọn he yín “Nugbo he yè to mimá lọ” mẹ, to apáwhé 130-132, yèdọ whenu lẹ po asiko yetọn lẹ po. Podọ Mẹsẹ́do sọn Jiwheyẹwhe de, William M. Branham ko zán hógbè dopolọ to whenuena é dọhó do ohóta he yín Whèta Agùn Ṣinawe lẹ tọn ji.

Do ayi e go, owẹn ṣinawe nẹlẹ tindo zinzán dọdai he na sọawúhia tọn bo sọ tindo tùnmẹ to kọ̀ndopọ́ mẹ hẹ titò whlẹngan tọn lọ. Podọ Omẹ dopo he dọhó bo sọ tindo azọ́n Etọn to Omẹ Etọn lẹ mẹ wẹ nọ yín Oklunọ he fọ́ntite sọn oṣiọ lẹ mẹ. Ewọ sọ do Ede hia to owé winwlán dopodopo mẹ to ninọ̀mẹ vòvo lẹ mẹ, ṣigba bo tin to kọ̀ndopọ́ mẹ whepoponu po pinplán dèdovo de tọn po hlan Agùn Etọn. Enẹwutu, Ewọ (Agùn lọ) dóna yọ́n Mẹhe hunkọ Ewọ yín bo nasọ dótó núhe É to didọ. Podọ pagbè ṣinawe he yè dohlan awhàngbatọ lẹ tindo vògbingbọn. To kọlẹ́wá Oklunọ tọn whenu, yé mẹhe na tindo dọpọ́n vivọnu tọn sọn owhèta agùn lẹpo tọn mẹ, na yín máhẹtọ to fọ́nsọnkú tintan mẹ bo nasọ dùgu núdepope he yè ko dopagbè etọn tọn.

To owẹn tintan lọ mẹ, Oklunọ dọhó hlan Omẹ Etọn lẹ dólé, “… Onú helẹ wẹ ewọ he tẹ́do sunwhlẹvu ṣinawe lẹ go to adusilọ etọn mẹ, he to zọnlinzin to sika zògbántin ṣinawe ṣẹnṣẹn dọ; Yẹn yọ́n azọ́n towe, magbọjẹ towe, homẹfa towe, podọ lé hiẹ ma sọgan dóakọ́nna mẹylankan lẹ dó: bo ko sọ whlé yé he dọmọ, apọsteli wẹ yé lẹ pọ́n, bọ yé ma sọ yín mọ, bo sọ yí yé do mọ lalonọ: bo ko dóakọ́nna, bo sọ fahomẹ, na oyín ṣie tọn wutu, bọ onú ma sọ ṣikọna we. Ṣigba yẹn tindo onú de do ogo we, na hiẹ ko jo owanyin tintan towe dai. Enẹwutu, flin fie aijijẹ towe fọ́n sọn, na hiẹ ni lẹnvọjọ, bo sọ wàzọ́n tintan; yín e ma yín mọ, yẹn na wá dewe zãndevie, bo nasọ họ̀n zògbántin towe sẹ̀ sọn otẹn etọn mẹ, adavo hiẹ lẹnvọjọ. Ṣigba ehe wẹ hiẹ tindo, na hiẹ gbẹwanna owalọ Nikolaitani tọn lẹ he yẹn gbẹwanna ga.” (OSỌHIA 2:1-6).

To ofi, yè dọhó do azọ́n he yisenọ lẹ to wiwà to Ahọludù Jiwheyẹwhe tọn mẹ po homẹfa yetọn po go. Podọ yé tindo kunnudidè de, dọ, yé ma sọgan dóakọ́nna mẹylankan lẹ po yé he ma yín azọ́nwàtọ nugbo lẹ popo. Na yé ko whlé yé pọ́n, bo ko sọ mọ dọ lalonọ wẹ yé. Do ayi e go, ehe kàn yé he ylọ yédelẹ dọ apọsteli ṣigba bo ma sọ yín mọ gba. Mọwẹ yé sọawúhia dó kẹdẹdi lalonọ lẹ to whèta agùn tintan tọn mẹ gbọn yé he nọte gigli po Ohó lọ po lẹ dali.

Do ayi e go, apọsteli Paul ko dọhó dote dogbọn nukọnyìyì nẹlẹ tọn dali to Owé OWALỌ 20:28-32 tọn mẹ, dọmọ. Omẹ mọhunkọ tọn lẹ na fọ́ntite to whenuena ewọ ko yì godo, bo na ṣẹ̀ núplọ́nmẹ agọ̀ lẹ ná ji bo nasọ dọ̀n núplọ́ntọ lẹ do godo. To kọ̀ndopọ́ he mẹ, é dègbedo mẹho Agùn lọ tọn lẹ nado nọ̀ wunzẹn. To whenẹnu, yisenọ lẹ tùnwun núplọ́nmẹ po zinzán apọsteli nugbo lẹ po tọn go, kẹdẹdilé yé ko tindo onú lẹ sọn bibẹ́nu to oflin mẹ dó titegbe. Do ayi e go, yé nọ mọdona whenuena mẹde sọawúhia matin núplọ́nmẹ tintan lẹ lọ po zinzán lọ po, whenẹnu yé nọ yọ́nẹn dọ mẹvlẹtọ wẹ yé podọ omẹ yè ma suwhẹna wẹ yé. Podọ zìzẹ tọ́nsọn dòdónu lọ mẹ ṣẹ̀ sọn whẹndo Yisenọ tintan lẹ tọn mẹ. Enẹwutu, dòdónu Agùn Yisenọ Tintan lẹ tọn dóna yín nújlẹpò po ninọ̀mẹ dopolọ po na yisenọ nugbo lẹpo kakajẹ vivọnu.

Dinvie, yè ko sọ dọhó na mí dogbọn tenọgli po linsinsinyẹn yisenọ he jiya na Oyín Etọn tọn lẹ dali. Enẹgodo wọ́hẹmẹ, na omẹ delẹ ko jo wanyin yetọn he to jiji lọ do wutu. Enẹwutu, yè dègbena yé nado lẹnvọjọ bo nasọ gọ̀ do azọ́n yetọn tintan lẹ go. Yín e ma yín mọ, Oklunọ Lọsu na họ̀n zògbántin lọ sẹ̀ sọn otẹn etọn mẹ. Bé dagbe tẹwẹ zògbántin de na wà eyín hinhọ́n ma họ́nwun jẹgbonu wá sọn e mẹ? To ninọ̀mẹ mọtọnhunkọ mẹ, oflin po okú po kẹdẹ wẹ pò to finẹ lọ. Whladopo he Oklunọ lọ ko dègbe núhe sọgbè lẹ tọn, mọdopolọ wẹ yisenọ nugbo lẹ gbẹwanna azọ́n Nikolaitani tọn lẹ dó. Na Nikolaitani lẹ ko ṣẹ̀ mẹ zé doaga to ṣẹnṣẹn mẹmẹsunnu he nọ dọyẹwhehó to opli lẹ mẹ po agùnvi he yín tódómẹtọ lẹ po tọn. Oklunọ Lọsu sọ gbẹwanna wiwà Nikolaitani lẹ tọn ga.

Enẹwutu, pagbè he yè dohlan yé he na sè núhe Gbigbọ to didọ hlan agùn lẹ lọ, ṣẹ̀ dólé, “Ewọ he tindo otó ni sè onú he Gbigbọ to didọ hlan agùn lẹ lọ; Ewọ he gbawhàn wẹ yẹn na ná atin sinsẹ́n ogbẹ̀ tọn hlan nado dù, ehe tin to paladisi Jiwheyẹwhe tọn mẹ.” (OSỌHIA 2:7). To whẹ́whẹ́whenu Adam po Evi po ko hẹn jlọjẹ yetọn to atin ogbẹ̀ tọn lọ kọ̀n bú, bo sọ yín didè tọ́njẹgbonu sọn paladisi mẹ. Godo he fligọ̀zọ́n po whẹdọgbọ po na ko yín bibasi vọ̀, wẹ yisenọ nugbo lẹ na tindo jlọjẹ jẹ Atin ogbẹ̀ tọn lọ po paladisi po kọ̀n whladopo dogọ́ (LUKU 23:43).

Owẹn awetọ lọ: Yín nugbonọ jẹ okú!

To owẹn awetọ lọ mẹ, Mẹfọ́ndogbẹ̀ Lọ do Ede hia dólé, dọ: “… Onú helẹ wẹ nukọntọ, godotọ dọ, mẹhe lẹzùn oṣiọ bo sọ tin to ogbẹ̀. Yẹn yọ́n azọ́n towe, nukunbibia po ohẹ́n towe po (ṣigba adọkunnọ wẹ hiẹ), yẹn sọ yọ́n nùzinzán yé he dọ Ju wẹ yé, bo ma yín mọ, ṣigba sinagọgu Satani tọn wẹ yé. Hiẹ sí onú nẹlẹ depope he hiẹ pọ́ yaji na blo: do ayi e go, lẹgba ko pọ́ bibẹ́ adade to mì mẹ kọ̀n do ogàn mẹ, na yè nido whle mì pọ́n; mì na mọ nukunbibia họ̀ azán ao; yín nugbonọ jẹ okú, yẹn nasọ ná ojẹgbakun ogbẹ̀ tọn lọ we.” (OSỌHIA 2:8-10).

Do ayi e go, yisenọ nugbo he nọ̀ ojlẹ nẹ mẹ lẹ jiya nukunbibia tọn titegbe. Yè yí ohẹ́n do hò yé to agbasalan mẹ bo sọ yín mẹhe yè zánnùdogona gbọn yé he ylọ yédelẹ dọ Ju, yèdọ yisenọ nugbo lẹ, ṣigba to nugbo de mẹ, sinagọgu Satani tọn wẹ yé. Enẹwutu, Oklunọ to huhlọn do Omẹ Etọn lẹ po ohó helẹ pó dọmọ, “Hiẹ sí onú nẹlẹ depope he hiẹ pọ́ yaji na blo.” Whepoponu wẹ nukunbibia nọ sọawúhia gbọn yé he lẹn dọ nugbonọ wẹ yé lẹ dali, ṣigba yé ma yín mọ gba. Na ovi Jiwheyẹwhe tọn lẹ ma nọ dohomẹkẹn gba, ṣigba yè nọ dohomẹkẹn yéwlẹ to whepoponu (GALATIA 4:28-29).

Enẹ lọ wẹ kẹ̀ntọ lọ mọ dọ yè bẹ́ adade yetọn kọ̀n do ogàn mẹ, bọ mẹhe pò lẹ dóakọ́nna nukunbibia daho lọ. Podọ azán oa he hó yè dọ to owé he lọ mẹ yín yinyọ́nẹn to otànhó agùn tintan tọn lọ tọn mẹ di owhè ao awubla daho nukunbibia yisenọ tọn to oglọ́ Diokletiẹni tọn sọn owhè fọde-kanwe-kotọ mẹ biọ owhè fọde-kanwe-gbàntọ mẹ(A. D.). Do ayi e go, mẹdepope he tin to ninọ̀mẹ he lọ mẹ bo dóakọ́nna jẹ okú bo sọ yín nugbonọ, omẹ dopolọ wẹ na mọ jẹgbakún ogbẹ̀ tọn yí. Ehe wẹ pagbè lọ, dọ, “Ewọ he gbawhàn ma na gbleawu to okú awetọ mẹ gba.” (OSỌHIA 2:11). Dinvie, okú tintan lọ nọ sọawúhia to whenuena alindọn lọ jo agbasa lọ do, podọ okú awetọ lọ nọ sọawúhia to whenuena gbigbọ lọ jo alindọn lọ do to Ofin Wéwé Whẹdida tọn lọ kọ̀n.

Owẹn atọ̀ntọ lọ: Wọ́hẹ Balaami tọn po Nikolaitani tọn po

To owẹn atọ̀ntọ lọ mẹ, Oklunọ do Ede hia to ohógbè helẹ mẹ, “Onú helẹ wẹ ewọ he tindo ohi dida nùawenọ lọ dọ; Yẹn yọ́n azọ́n towe po fie hiẹ nọnọ̀ po, yèdọ fie aisintẹn Satani tọn te: bọ hiẹ sọ tẹ́do oyín ṣie go gligli; bo ma sọ mọ́n yise ṣie, yèdọ to azán nẹlẹ mẹ he Antipa do yín kunnudètọ nugbonọ ṣie, mẹhe yè hù to mì ṣẹnṣẹn to fie Satani nọnọ̀. Ṣigba yẹn tindo onú pẹvide do ogo we, na hiẹ tindo yé he tẹ́do oplọ́n Balaami tọn go to finẹ wutu, mẹhe plọ́n Balaki nado hẹn zannu ahlidida tọn wá ovi Islaẹli tọn lẹ nukọn, nado nọ dù onú he yè do sánvọ́ hlan boṣiọ lẹ, podọ nado nọ lọgà. Mọwẹ hiẹ sọ tindo mẹdelẹ he tẹ́do oplọ́n Nikolaitani lẹ tọn go ga, onú he yẹn gbẹwanna. Lẹnvọjọ: yín e ma yín mọ, yẹn na wá zãndevie, bo nasọ yí ohi onù ṣie tọn do hòawvùn hẹ yé” (OSỌHIA 2:12-16).

Oklunọ yọ́n Omẹ Etọn lẹ po azọ́n yetọn po. É yọ́n núhe yé nọ wà bo sọ yọ́n fie yé nọnọ̀. To ojlẹ he mẹ, Satani zé ofin etọn yìji to agọ̀jijẹ Yise tọn mẹ. To owhè fọde-kantọ̀n e lán atọ́ntọ (325) mẹ to Okú Klisti tọn godo, opli Nisea tọn sọawúhia. Omẹ dohlan fọde-kandeao (250) hunkọ tọn yín máhẹtọ to opli lọ mẹ. To finẹ, zédaga yé he nọ ylọ yédelẹ dọ plántọ gbigbọnọ lẹ tọn to agùnvi lẹ ji, táhinhọ́n do enẹ lọ ji bo sọ yí i do basi osẹ́n de. Podọ nukọntọ titegbe awelẹ wẹ Atanasiusi po Aliusi po.

Podọ Oklunọ dóna wọ́hẹ yisenọ nugbo delẹ, yèdọ yé he yígbèna oplọ́n Balaami tọn he yè ko dọ to kọ̀ndopọ́ mẹ po oplọ́n Nikolataini tọn po. Do ayi e go, Balaami ma tin to apa ovi Islaẹli tọn lẹ tọn ji gba, ṣigba é pégo to Alẹ̀nù Hóhó mẹ nado dọ̀n Islaẹli biọ vodùn sinsẹ̀n mẹ bo sọ kọ̀n yé dopọ́hẹ akọta devo lẹ. Alà Nikolaitani tọn he lọ yín awhànpa he yè kọ̀ndopọ́ de bo sọ yín awhàngbatọ gbọn gbọdemẹ de dali, podọ gblòmẹ he tin to ṣẹnṣẹn agùnvi lẹ tọn po yẹwhehódọtọ lẹ tọn po ko lẹzùn onú núdlẹnalọdó de to agùn jẹagọ̀ he lọ mẹ.

Dinvie, zinzán Nikolaitani lẹ tọn to whèta agùn tintan tọn mẹ ko lẹzùn oplọ́n daho he Oklunọ gbẹwanna de to whèta agùn atọ̀ntọ tọn mẹ. Enẹwutu wẹ É do ylọ Omẹ Etọn lẹ do lẹnvọjọ kọ̀n. Yín e ma yín mọ, Ewọ na ko wá bo hòavùn po ohi onù Etọn mẹ tọn po, ehe yín Ohó Etọn he É dọ pannukọn yé he jẹlá sọn E mẹ lẹ.

Opagbè lọ wẹ yín ehe lọ, “Ewọ he gbawhàn wẹ yẹn na ná nado dù sọn mana whihwlá lọ mẹ, bo nasọ ná ozannu wéwé de é, podọ to zannu lọ mẹ, oyín yọ́yọ́ he yè wlán de, he mẹde ma yọ́nẹn, adavo ewọ he yí i” (OSỌHIA 2:17). Do ayi e go, Oklunọ nọ ná núdùdù Omẹ Etọn lẹ po mana whiwhlá Ohó he yè hùndohia lọ tọn po, po pagbè oyín yọ́yọ́ de tọn po hlan awhàngbatọ lẹ.

Owẹn ẹnẹtọ lọ: Owhèta zinvlu tọn lọ - Wọ́hẹ pannukọn oklọ́ po gbọdemẹ lalonọ po

To owẹn enẹtọ lọ mẹ, Oklunọ do Ede hia dólé dọ, “Onú helẹ wẹ Ovi Jiwheyẹwhe tọn dọ, mẹhe tindo nukun etọn di zodẹ́, afọ etọn sọ taidi gànvệ dagbedagbe; Yẹn yọ́n azọ́n towe lẹ, po owanyin towe po, po yise po, po devizọ́n po, po homẹfa po, podọ azọ́n towe godomẹ tọn lẹ tin sù hugan tintan lọ. Ṣigba yẹndo ehe do ogo we, na hiẹ dike nawe nẹ Jẹzebẹli, he to ede ylọ dọ yẹwhegán yọnnu de nado nọ plọ́n, podọ nado nọ klọ mẹmẹglọ ṣie lẹ nado nọ lọgà, podọ nado nọ dù onú he yè do sánvọ́ hlan boṣiọ lẹ. Yẹn sọ ná ojlẹ ewọ nado lẹnvọjọ na gàlilọ etọn; é ma sọ lẹnvọjọ gba. Do ayi e go, yẹn na dọ̀n ẹn do adọ́zán de ji, podọ yẹn na bẹ́ yé he to ayọ̀de hẹ ẹ lẹ biọ nukunbibia daho mẹ, adavo yé lẹnvọjọ na owalọ yetọn. Yẹn nasọ yí okú do hù ovi etọn lẹ; agùn lẹpo nasọ yọ́nẹn dọ, yẹn wẹ ewọ he nọ dla homẹ po ayiha po pọ́n: yẹn nasọ ná hlan dopodopo mìtọn dilé azọ́n mìtọn te. Ṣigba mìwlẹ wẹ yẹn dọ hlan, podọ hlan yé he pò to Tiatila lẹ, yé omẹ sọha he ma yí oplọ́n he bo ma yọ́n odò Satani tọn, (dilé yé to didọ) yẹn ma to na doagbàn pinpẹn devo do ota na mì gba. Ṣigba ehe mì ko tindo nẹ, mì hẹn e go gligli kaka yẹn nado wá.” (OSỌHIA 2:18-25)

Dinvie, agùn Tiatila tọn tin to ninọ̀mẹ de mẹ kẹdẹdi whèta osinọ de, podọ to enẹgodo wẹ mí mọ dọ yè to zizé e daga na azọ́n etọn wutu, po wanyin etọn po, po nugbonọyínyín etọn tọn po, podọ yè ko sọ dọhó dogbọn akọ́ndónanú etọn dali. Podọ ga, ewọ whẹ́n to gbigbọ mẹ, ṣigba to whenẹnu, Oklunọ mọ núhe ma hẹn homẹ Etọn hùn to finẹ. Enẹwutu, Ewọ dọhó jẹagọ̀do yọnnu he É ylọ dọ Jẹzebẹli he wànú di yẹwhegán yọnnu de. Oklọ́ daho podọ ehe blawu to ninọ̀mẹ gbigbọ tọn mẹ sọawúhia po yé he to didọdai lẹ po. Podọ omẹ susu jlo nado yí yé sè. Na yé ko pọ́n yé bo ko sọ yinwanna yé gbọn homẹvọnọ he ma mọdona núde dogbọn oklọ́ he tin to dọdai helẹ pó godo tọn dali.

Do ayi e go, Jiwheyẹwhe ko zé devizọ́n atọ́n lẹ do Agùn Alẹ̀nù Yọ́yọ́ tọn mẹ do nọvisunnu lẹ mẹ. Podọ núde matin ehe yè ylọ dọ, Jiwheyẹwhe tindo yẹwhegán yọnnu lẹ, kavi apọsteli yọnnu lẹ, kavi mẹplọ́ntọ yọnnu lẹ po onú devodevo lẹ po gba. Do ayi e go, eyín e wá jọ bọ yọnnu de yí tẹnmẹ yẹwhegán de tọn, kavi apọsteli de tọn, kavi mẹplọ́ntọ de tọn, bé whenẹnu gbọn dóhia Owé Wiwé tọn dali, mẹde dóna yọ́nẹn dọ Satani wẹ to yọnnu lọ zán na tẹnpọ́n de pannukọn agùn lọ. E sọgan dẹn kavi e sọgan zãndevie, vọfọ́n gbigbọ tọn dopodopo dóna tindo dọpọ́n tẹnpọ́n dopolọ tọn kẹdẹdi Evi. Enẹwutu, Apọsteli Paul táhinhọ́n do gbèdide wiwé lọ ji hézéhézé to whenuena é wlán dọ, “Gbọ yọnnu ni yí abọẹninọ po taliai lẹpo po do plọ́nnú. Ṣigba yẹn ma dikena yọnnu nado nọ plọ́nmẹ gba, kavi nado nọ dègbe di ogán to sunnu ji gba, adavo ni nọ̀abọẹ. Na Adam whẹ́ wẹ na yè dá, enẹgodo Evi. Yè ma sọ klọ Adam gba, ṣigba yọnnu lọ, whenuena yè klọ ẹ, ewọ wẹ jai do sẹ́nmẹjẹ mẹ” (1 TIMỌTI 2:11-14). Dinvie, yọnnu depope he lẹn ede yín gbigbọnọ bo sọ dọ̀n ede sọn aṣẹpipa asú etọn tọn glọ́, dilé Oklunọ Jiwheyẹwhe ko dègbe dó to Owé GENẸSISI 3 tọn mẹ, to nugbo de mẹ ewọ tin to oglọ aṣẹpipa Satani tọn tọn, bo sọ lẹzùn aisinnu etọn. Kẹdẹdilé e nọ̀ to Jipa Edẹni mẹ, e ma jọ domọ pọ́n gbèdé to ohódidọ mẹ dogbọn poliki tọn kavi gbọn tukla devodevo lẹ tọn dali to aigba ji gba, ṣigba yé tin to siside mẹ to whelẹponu to ehe Jiwheyẹwhe ko dọ lẹpo mẹ.

Whedepopenu he yọnnu de dasa gbèdide lẹ lọ, ewọ na ṣẹ̀ ohóta Biblu tọn lẹ plọ́n omẹ devo lẹ. To asiko dopolọ mẹ, ewọ na zé ede yìji na Owé Wiwé po asú etọn po. Ehe lọ ma sọ yín ohia núṣiwà tọn dọ ewọ yín gigọ́na gbigbọ kẹ̀ntọ tọn gba, bo yí agùn do basi núṣinyọnnú de ṣigba bo sọ tin to gbọdemẹ lalonọ de glọ́, yèdọ gbọn huhlọn kẹ̀ntọ tọn dali to oyẹdomẹ de glọ́. Enẹwutu, apọsteli lọ ná gbèdide he lọ dọmọ: “Mì gbọ yọnnu lẹ ni dó onù abọẹ to agùn lẹ mẹ:na yè ma ná hlan yé nado dọhó gba; ṣigba gbọ yé ni tin to taliai glọ́, dilé osẹ́n dọ dó ga. Eyín yé sọ jlo onú de na plọ́n, mì gbọ yé ni kànsè asú yetọn lẹ to owhè gbè…” (1 KỌLINTINU 14:34-35). Kẹdẹdilé mí to hódọ do Wẹndagbe Jesu Klisti tọn he to ote kakadoi lọ ji dó, gbèdide pinplán lọ tọn he yè ko dè sọn whẹ́whẹ́whenu gbẹ́sọ to ote kakajẹ opòdo. Enẹwutu, gbọn azọ́n Jiwheyẹwhe tọn lọ dali, apọsteli lọ dlẹnalọdo núhe jọ̀ to Edẹni mẹ bo sọ do otẹn yọnnu lẹ tọn hia yé.

Do ayi e go, pahonamẹ dopolọ ko yín niná hlan Islaẹli dote to Alẹ̀nù Hóhó mẹ, dọmọ: “Podọ hiẹ visunnu gbẹtọ tọn, zé nukunmẹ towe do viyọnnu omẹ towe lẹ tọn go, he to dọdai dọ sọn ayiha yetọn titi mẹ; bo dọdọdai do yé go, Bo dọmọ, LÉ WẸ OKLUNỌ JIWHEYẸWHE DỌ: Dindọn hlan yọnnu he tọ̀ okọ̀dó lẹ to opétẹ̀n alọ lẹ tọn lẹpo ji, bo sọ basi odukù lẹ na otà gbẹtọ otè lẹpo tọn tọn nado yànwẹ̀nna alindọn lẹ! Mì to wẹ̀nyànna alindọn omẹ ṣie lẹ tọn, mì sọ to alindọn he ma yín mìtọn lẹ whlẹngan” (EZEKIẸLI 13:17-18). Dinvie, yè dèwé hẹ mí nado hia owéta lọ blébu bo sọ plọ́n núpinplọ́n lọ to nukọnyìyì mẹ. E paṣa talala, ṣigba to dinvie, núdepope ma ko diọ gba. Enẹwutu, yọnnu he lẹn dọ ewọ yín gbigbọnọ, bo sọ ṣẹ̀ mẹdevo lẹ plọ́n, ewọ tin to gbọdemẹ lalonọ de glọ́. Podọ dọdai gbọdemẹ etọn lalonọ lẹ lọ tindo ninọ̀mẹ azé tọn po owọ́n tọn po, bo sọ zé núdidó odàn tọn hẹn to ede homẹ. Yé omẹ he tódó onú mọtọnhunkọ lẹpo tin to kànbla gbigbọ mẹ tọn glọ́ bo sọ dóhudo túndote tọn po mẹdekànnujẹ tọn po gbọn gbèdide Oyín Jesu Klisti tọn tọn dali.

Dinvie, devi Etọn he nọ dọyẹwhehó Ohó Etọn tọn lẹ dóna yọ́nẹn hézéhézé bo nasọ hùnnú sọn wiwà yẹwhegán yọnnu Jẹzebẹli tọn tọn ji. Ṣigba dilé Evi ko dótó odàn lọ dó bọ Adam ko sọ sè ogbè Evi tọn dó, na ewọ wẹ sisẹ́ ẹ biọ aijiji jẹ mẹ, mọwẹ devizọ́nwàtọ Jiwheyẹwhe tọn lẹ jai biọ núplọ́nmẹ gbọdemẹ lalonọ Jẹzebẹli he lọ tọn glọ́ dó, yèdọ mẹhe “klọ mẹmẹglọ ṣie lẹ nado nọ lọgà, podọ nado nọ dù onú he yè do sánvọ́ hlan boṣiọ lẹ”. Do ayi e go, ehe ma kàn gàlilọ agbasa tọn gba, adavo gbigbọ tọn, ehe yè dohia hézéhézé gbọn hihiamẹ he lọ dali. Na yọnnu he lẹn dọ yé yín gbigbnọ bo sọ wànú di yẹwhegán yọnnu lẹ dóna payi bo ma sọ dóna yín máhẹtọ to gàlilọ mẹ hẹ devi Jiwheyẹwhe tọn lẹ, na aṣẹpipa yetọn gbigbọ mẹ tọn po huhlọn yetọn to yé ji po wutu. Na Jẹzebẹli he wànú di yẹwhegán yọnnu bo sọ to mẹplọ́n nẹ lọ, wẹ yè dègbena nado lẹnvọjọ podọ yé he yín máhẹtọ po é po lẹ ga. Enẹwutu, ovi gbigbọnọ he tọ́njẹgbonu wá sọn ṣakaṣaka he lọ mẹ lẹ ko kú okú gbigbọ mẹ tọn.

Dinvie, yé he ma kẹalọyí núplọ́nmẹ lalonọ yé he yí yédelẹ do basi yẹwhegán yọnnu lẹ tọn wẹ yè ná pagbè he lọ, dọ,“Ewọ he gbawhàn, bo sọ yí azọ́n ṣie whlá jẹ pòdo, wẹ yẹn na ná huhlọn to akọta lẹ ji: ewọ nasọ yí opò ogàn tọn do hẹn yé sẹ̀n; di núzinzán zẹ́nmẹtọ tọn wẹ yè na gbà yé hányánhányán, kẹdẹdilé yẹn yí huhlọn sọn Otọ́ ṣie de dó. Yẹn nasọ yí sunwhlẹvu afọnnu tọn ná ẹn” (OSỌHIA 2:26-28). Do ayi e go, mẹfligọ̀ lẹ na dùgú onú popo tọn po Mẹfligọ̀tọ yetọn po bo nasọ dùahọlu hẹ Ẹ to akọta lẹ ji to owhè fọtọ́n whenu.