arrow_back Literatúra

Book

OSỌHIALỌ – Bé owé he gọna hiadonu 7 lẹ we?

Ewald Frank

library_books Kapitoly: 24 calendar_month 4. 6. 1993

Formats

pdf PDF epub EPUB

Typ písma

Výška riadku

1.5

Medzera odseku

1.0

Veľkosť písma

16

Navigate

Kapitoly

expand_more

Navigate

Kapitoly

Jump to any chapter without leaving the reader.

NUKỌNYÌYÌ 1 OTA 1 – Ohó nukọn tọn - “Azán Oklunọ tọn” lọ – Dòdó po tùnmẹ ohó dọdai tọn lọ tọn po 2 OTA 2 – Owẹn ṣinawe he yín Oklunọ he fọ́ntite sọn oṣiọ lẹ mẹ lọ tọn – Owẹn tintan lọ: Hẹn owanyin tintan lọ go 3 OTA 3 – Owẹn atọ́ntọ lọ: Whèta Núvọ́jladó tọn – Huhlọndido madógannọ to yise mẹ lẹ 4 OTA 4 – Nukun zé hlan olọn mẹ 5 OTA 5 – Owé núdabla tọn lọ po hiadonu ṣinawe lẹ po 6 OTA 6 – Hùnhùn ohiadonu lẹ lọ tọn – Huhlọn agọ̀jẹdo-Klistigotọ lọ tọn he yè hùndohia – Núpinpọ́n omẹ lẹpo tọn 7 OTA 7 – MẸHE YÈ DOHIAGONA SỌN JU LẸ MẸ 8 OTA 8 – Hiadonu ṣinawetọ lọ – Odádó to Olọn mẹ – Ofìn lẹblanu tọn lọ na lẹzun ofìn whẹdida tọn – Odohia opẹ̀ngbe ṣinawe whẹdida tọn lẹ tọn lọ – Opẹ̀ngbe ẹnẹ tintan lẹ 9 OTA 9 – Awúfiẹsa he yè ma sọgan zéjlẹ – Opẹ̀ngbe atọ́ntọ lọ – dindọ̀n tintan lọ 10 OTA 10 – Númimọ ṣẹnṣẹn mẹ tọn tintan lọ: Hùnhùn owè lọ tọn – Oklunọ lọ kẹdẹdi Angẹli alẹ̀nùnù tọn lọ 11 OTA 11 – Númimọ ṣẹnṣẹn mẹ tọn awetọ lọ: Jijlẹ tẹmpli lọ tọn po devizọ́n kunndètọ awelẹ tọn po 12 OTA 12 – Yọnnu he yè yí owhè do dóaṣọ́na lọ – Klisti po Omẹ Etọn lẹ po – Satani – Dlagọni vệ lọ po hodotọ etọn lẹ po 13 OTA 13 – Gigọ̀yì godo nado pọ́n númimọ Daniẹli tọn – He tindo kọ̀ndopọ́ po Osọhia lọ po 14 OTA 14 – Lẹngbọvu lọ po omẹ fọtọ́n kantọ̀n-konukun-ẹnẹ (144,000) he yè dohiagona lẹ po 15 OTA 15 – Ogò ṣinawe Whẹ̀dida Jiwheyẹwhe tọn lọ tọn lẹ po awhànpa susugege ohù Klistali tọn po tọn 16 OTA 16 – Ogò ṣinawe homẹgble Jiwheyẹwhe tọn lọ tọn: Whẹ̀dida homẹgble Jiwheyẹwhe tọn godogodo tọn lẹ lọ 17 OTA 17 – Yọnnu he hẹ́ Kanlin lọ ji 18 OTA 18 – Vàsúdo Babilọni daho lọ tọn 19 OTA 19 – Ayajijẹ to Olọn mẹ do vàsúdo Babilọni tọn ji – Alọwle Lẹngbọvu lọ tọn 20 OTA 20 – Biblá Satani tọn – Fọ́nsọnkú pipé tintan yisenọ he yè ko hù lẹ tọn – Ahọludù Owhè Fọtọ́n tọn 21 OTA 21 – Lilá olọn yọ́yọ́ po aigba yọ́yọ́ po tọn – Gigo Jelusalẹm Yọ́yọ́ lọ tọn – Nọ̀tẹn omẹ dindọ̀n lẹ tọn he dobu 22 OTA 22 – Asisa ogbẹ̀ tọn lọ po atin ogbẹ̀ tọn lọ po – Ehe na taidi ninọ̀mẹ paladisi tọn to Ahọludù Owhè fọtọ́n tọn mẹ 23 EHE YÈ GỌ́NA LỌ – Osẹ̀ kande-gbàn (70) Daniẹli tọn lẹ po nújijọ̀ he to jijọ̀ alọnu-alọnu po Islaẹli po to hinhọ́n dọdai Biblu tọn tọn mẹ 24

Kapitola 4

OTA 3 – Owẹn atọ́ntọ lọ: Whèta Núvọ́jladó tọn – Huhlọndido madógannọ to yise mẹ lẹ

4 / 24

arrow_back Predchádzajúca kapitola Ďaľšia kapitola arrow_forward

Owẹn atọ́ntọ hlan agùn Sadi tọn ṣẹ̀ po ohógo helẹ pó dọ, “Onú helẹ wẹ ewọ he tindo Gbigbọ ṣinawe Jiwheyẹwhe tọn lẹ, po sunwhlẹvu ṣinawe lẹ po dọ; Yẹn yọ́n azọ́n towe lẹ, dọ hiẹ tindo oyín de dọ hiẹ tin to ogbẹ̀, ṣigba oṣiọ wẹ hiẹ. Payi e go, bo sọ ná huhlọn onú he pò lẹ, he pọ́ kúkú; na yẹn ma mọ azọ́n towe lẹ de pégan to Jiwheyẹwhe nukọn gba. Enẹwutu flin lé hiẹ mọyí bo sọ sè dó, hẹn e go gligli, bo sọ lẹnvọjọ. Eyín hiẹ ma payi e go gba, yẹn na tọ́n do oji we di ajotọ, hiẹ ma na yọ́n ojlẹ he mẹ yẹn na tọ́n do oji we te gba” (OSỌHIA 3:1-3).

Do ayi e go, whèta agùn he tọn lọ jai biọ bibẹ́nu whenu Núvọjladó tọn mẹ. Ṣigba to ofi , mí mọ wọ́hẹ de pannukọn yisenọ lẹ. Agùn lọ sọgan sọawúhia di ehe to ogbẹ̀, ṣigba to ojlẹ dopolọ mẹ bo sọ yín oṣiọ to gbigbọ mẹ. Na e bọawu nado tindo awúsọhia di mẹhe togbẹ̀ to gbigbọ mẹ bo sọ sọgan pégo nado zán núniná gbigbọ tọn lẹ, ṣigba Gbigbọ Jiwheyẹwhe tọn kẹdẹ wẹ sọgan hẹn gbigbọ do ogbẹ̀. Na yè nọ sá amìsisá na gbigbọ lọ to ninọ̀mẹ awetọ lọ mẹ, ṣigba Jiwheyẹwhe dá ogbẹ̀ wiwé lọ do alindọn lọ mẹ gbọn jiji yọ́yọ́ lọ dali.

Pahonamẹ lọ wẹ yín nado fọ́ntite bo sọ dohuhlọn yé he pọ́ kúkú lẹ. Na azọ́n yetọn lẹ ma sọgbè to nukọn Jiwheyẹwhe gba. “Enẹwutu, flin lé hiẹ mọyí bo sọ sè dó, hẹn e go gligli, bo sọ lẹnvọjọ” (OSỌHIA 3:3). Kẹdẹdilé e te to whenẹnu to ninọ̀mẹ dopolọ mẹ po, awhànpa pẹvi de pò, yèdọ yé he ma hodo awhànpa yé he ylọ yédelẹ dọ Yisenọ lẹ ṣigba bo ma yín mọ gba. Enẹwutu, yè wlán dólé, dọ, “Hiẹ tindo oyín vude, yèdọ to Sadi mẹ, he ma hẹn avọ̀ yetọn gble; yé na to zọnlinzin hẹ mi to wéwé mẹ, na yé jẹ wutu” (OSỌHIA 3:4).

Podọ pagbè he yè do hlan yé lọ wẹ ehe, dọ, “Ewọ he gbawhàn, wẹ yè na yí avọ̀ wéwé ṣinyọnna dólé; yẹn ma to oyín etọn na gbidi sẹ̀ sọn owé ogbẹ̀ tọn mẹ gba, ṣigba yẹn na dèkunnuna oyín etọn to Otọ́ ṣie nukọn, podọ to angẹli etọn lẹ nukọn” (OSỌHIA 3:5). Do ayi e go, jlọjẹ de tin bọ oyín he yè wlán do Owé Ogbẹ̀ tọn mẹ sọgan yín súnsún sẹ̀. Ṣigba sọn Owé Ogbẹ̀ tọn Lẹngbọvu lọ tọn mẹ, oyín de ma sọgan yín súnsún sẹ̀ gbèdé. Na Owé dopo yín gigọ́na oyín mẹyiylọ lẹ tọn bọ awetọ lọ yín gigọ́na mẹdidè lẹ tọn.

Do ayi e go, whenuena Islaẹli lẹ sẹ̀n boṣiọ, Jiwheyẹwhe ko wléawu nado dè Oyín yetọn sọn Owé Ogbẹ̀ tọn mẹ. Ṣigba Mọse wẹ mẹhe nọte di whẹgbọtọ de na gbẹtọ lẹ lọ. Na é jlo nado basi vọ́jladó na yé he yín máhẹtọ to owédúdú lẹ́do agbò gànvệ tọn he yé ko ylọ dọ yẹwhe yetọn. “Gãnṣo eyín hiẹ ma jona oylando yetọn – ; podọ eyín lala, súnsún mi, yẹn vẹ̀ we, sọn owé towe he hiẹ ko wlán mẹ. Oklunọ lọ sọ dọ hlan Mọse dọmọ, Mẹdepope he ko wàylando do mi, ewọ wẹ yẹn na súnsún sọn owé ṣie mẹ” (EKSỌDUSI 32:32-33). Dinvie, yè ma ko ṣinyọn ojẹgbakunna yisenọ to bibẹ́nu gba, adavo to opòdo whẹ̀zizẹ yetọn tọn.

Owẹn ṣidopotọ lọ:
Whèta Filadẹlfia tọn lọ - Ojlẹ wanyinna mẹmẹsunnu lẹ tọn

To owẹn ṣidopotọ lọ mẹ, Oklunọ Lọsu dọhó dólé dọ, “Onú helẹ wẹ ewọ he yín wiwé dọ, ewọ he yín nugbonọ, ewọ he tindo họ̀nhùngàn Davidi tọn, ewọ he hùn, bọ mẹdepope ma sú, podọ he sú bọ mẹdepope ma hùn. Yẹn yọ́n azọ́n towe lẹ, do ayi e go, yẹn zé ohọ̀n he yè hùn dai do nukọn towe, mẹde ma sọgan sú i: na hiẹ tindo huhlọn pẹvide wutu, bo yí ohó ṣie whlá, bo ma sọ mọ́n oyín ṣie. Do ayi e go, yẹn na hẹn omẹ sinagọgu Satani tọn mẹ lẹ, he dọ dọmọ, Ju wẹ yéwlẹ, bo ma yín, ṣigba lalo yé dó; – do ayi e go, yẹn na hẹn yé nado wá, nado litai to afọ towe nukọn, podọ nado yọ́nẹn dọ yẹn yinwanna we. Na hiẹ ko yí ohó homẹfa ṣie tọn whlá wutu, yẹn nasọ whlá we to whlepọ́n whenu ga, ehe ja aihọn lẹpo ji, nado whlé yé he nọnọ̀ aigba ji lẹ pọ́n. Do ayi e go, yẹn ja zãndevie. Ehe hiẹ tindo nẹ, hẹn e go gligli, na mẹdepope ma nado yí ojẹgbakun towe” (OSỌHIA 3:7-11).

Do ayi e go, whèta agùn he lọ tọn sọawúhia godo núvọ́jladó tọn, podọ enẹwutu, ojlẹ sọawúhia nado hùn họ̀ngbo wanyinna mẹmẹsunnu lẹ tọn tọn. Na yè ko hùn ogànhọ̀ Babilọni tọn podọ ga yè sọ hùnhọ̀n na lilá Wẹndagbe lọ tọn na aihọn lẹpo. To pinpọ́n mẹ, huhlọn pẹvide wẹ yisenọ lẹ tindo, ṣigba yé yí ohó lọ whlá bo ma sọ mọ́n oyín Oklunọ tọn gba. Na Ewọ lọ ko hẹn gbẹtọ he tin to sinagọgu Satani tọn mẹ lẹ nado tọ́njẹgbonu wá bo nasọ litai to Oklunọ nukọn to opli lọ mẹ, na Owẹn huhlọnnọ he yè ko lá lọ wutu.

Kẹdẹdilé Oklunọ ko sọ dọ dó, whenu ojlẹ he lọ tọn tin jẹnukọnna ojlẹ whlepọ́n he ja aigba lẹpo ji tọn. Ewọ ko dọdai jẹnukọn to ofi dọ, enẹ lọ dóna jọ̀ jẹnukọnna kọlẹ́wá Etọn, É bo sọ dọ hlan Omẹ Etọn lẹ dọ, “Do ayi e go, Yẹn ja zãndevie. Ehe hiẹ tindo nẹ, hẹn e go gligli, na mẹdepope ma nado yí ojẹgbakun towe” (OSỌHIA 3:11).

Ehe sọ wẹ pagbè lọ, dọ, “Ewọ he gbawhàn, wẹ yẹn na yí do basi dòtin to tẹmpli Jiwheyẹwhe tọn ṣie tọn mẹ, ewọ ma nasọ tọ́njẹgbonu ba: yẹn nasọ wlán oyín Jiwheyẹwhe ṣie tọn do é go, po oyín otòdaho Jiwheyẹwhe ṣie tọn po, Jelusalẹm yọ́yọ́, he jẹte sọn olọn mẹ ja sọn Jiwheyẹwhe ṣie de: yẹn nasọ wlán oyín ṣie yọ́yọ́ do é go” (OSỌHIA 3:12).

Owẹn ṣinawetọ lọ: Wọ́hẹ pannukọn agùn to ninọ̀mẹ etọn godogodo tọn mẹ

To owẹn godogodo tọn he lọ mẹ, Oklunọ Lọsu dohia to Godotọyínyín Etọn po Nukọntọyínyín Etọn po mẹ to wọ́hẹ he mẹ, dọmọ, “Onú helẹ wẹ Niṣẹ dọ, kunnudètọ dódónọ, nugbonọ, omẹ tintan to núdidá Jiwheyẹwhe tọn lẹ mẹ; Yẹn yọ́n azọ́n towe, dọ, hiẹ ma miọn, mọ hiẹ ma hùnzo; yẹn jlo dọ hiẹ ni gbọ bo miọn kavi hiẹ ni hùnzo. Bé lé hiẹ yín gbigblọ, bo ma miọn bo ma sọ hùnzo, yẹn na slú we jẹgbonu sọn onù ṣie mẹ. Na hiẹ dọmọ, Adọkunnọ wẹ yẹn, bo sọ tindo adọkun susu, bo ma gbọ̀agba núde tọn wutu; bo ma yọ́nẹn dọ tapònọ wẹ hiẹ, lèlènọ, agbátọnọ, nukuntọ́nnọ, omẹ́nọ” (OSỌHIA 3:14-17).

Whèta agùn godogodo tọn he lọ yín didohia gbọn ninọ̀mẹ he tin to ewọ mẹ dali; ewọ ma miọn kavi hùnzo gba, ṣigba bo yín gbigblọ. Enẹwutu, Oklunọ dègbe dọ yé he ma na lẹ́gọ̀do É go lẹ, wẹ Ewọ na slú jẹgbonu sọn onù Etọn mẹ. Enẹ wẹ nado dọ, dọ, yé ma na sè oylọ Etọn to fọ́nsọnkú tintan whenu gba.

Do ayi e go, Oklunọ Lọsu wọ́hẹ gbèdide oklọ́ tọn he yín dọ, yisenọ lẹ tindo onú popo podọ to gọ́fla mẹ, bo ma sọ dóhudo núdepope tọn po ohógbè helẹ pó dọmọ, “… bo ma yọ́nẹn dọ tapònọ wẹ hiẹ, lèlènọ, agbátọnọ, nukuntọ́nnọ, omẹ́nọ” (OSỌHIA 3:14-17). Dinvie, eyín mẹde yín agbátọnọ to agbasa mẹ, bo yín nukuntọ́nnọ, podọ omẹ́nọ, e sinyẹnawu titegbe. Ṣigba eyín omẹ lọ ma yọ́nẹn bo ma sọ mọdona ninọ̀mẹ ede titi tọn, bé whenẹnu onú ma sọgbè de tin to omẹ dopo nẹ lọ mẹ. Mọdopolọ wẹ e te to ninọ̀mẹ gbigbọ tọn mẹ dó ga. Ṣigba awubla daho he tin to whèta agùn godogodo tọn oklọ́nọ lọ tọn mẹ wẹ yín dọ dawe nẹ lọ ma yọ́nẹn dọ ewọ to ede klọ́ gba. Na ewọ to ogbẹ̀ to ninọ̀mẹ linlẹn etọn tọn mẹ, bo ma sọ mọdona gbẹtọ he hunkọ ewọ yín gba. Kẹdẹdi whẹdida Oklunọ tọn, yisenọ he tin to vivọnu ojlẹ jọmiọn tọn mẹ lẹ, ma tindo jlọjẹ whẹdida gbigbọ mẹ tọn gba. Ehe lọ tin taidi dọ yè to ogbẹ̀ to odlọ mẹ bo sọ jlo to linlẹn mẹ ma yọ́nẹn dọ núdepope he Oklunọ ko zé do nukọn di wọ́hẹ ko yín owhẹ̀sùna gba. To ehelẹ pó mẹ, Ewọ gbẹ́sọ to ohọ̀n Omẹ Etọn lẹ tọn húhú bo sọ to hókọnamẹ he lọ ná yé dọ, “Yẹn dewe hẹ wẹ nado họ̀ sọn dẽ sika he whlepọ́n to miyọn mẹ, na hiẹ nido yín adọkunnọ; podọ avọ̀ wéwé lẹ, na yè nido ṣinyọnavọ̀na we, podọ na winyan omẹ́ towe tọn sọawúhia blo; bo sanú do nukun towe, na hiẹ nido mọnú. Yé omẹ sọha he yẹn yinwanna, wẹ yẹn nọ wọ́hẹ, bo sọ nọ hò: enẹwutu, na hiẹ ni dovivẹnu bo lẹnvọjọ.” (OSỌHIA 3:18-19)

Dinvie, yé mẹhe mọnukunnu bo tindo wuntùntùn ninọ̀mẹ yéde titi lẹ tọn, bo sọ nọ pọ́n yédelẹ kẹdẹdilé Oklunọ nọ pọ́n yé dó, yéwlẹ wẹ na zé núhe Ewọ dọ hlan yé lẹ do ayiha mẹ, bo kẹalọyí pagbè lọ he Ewọ do bo sọ yín awuwlénọ. Whenẹnu wẹ yè na sá amìsisána nukun yetọn lẹ, podọ enẹgodo wẹ yé sọgan mọ onú wiwé he kàn Ahọludù Jiwheyẹwhe tọn, bo nasọ mọ osọhia Gbigbọ lọ tọn yí kẹdẹdilé yé mọdona núhe Oklunọ lọ dọ dó. Enẹwutu, É dèkunnuna Ede dọ, É ṣite to ohọ̀n go bo sọ to họ̀nhúhú. Ṣigba yé gbẹ́sọ to nukọnyì to agùn lẹ lọ mẹ to hànjiji mẹ, to yẹwhehódidọ dogbọn Ewọ tọn dali lẹ mẹ, podọ to núniná gbigbọ tọn lẹ mẹ ga. Ṣigba Ewọ ṣite to gbonu. Núyiwà agùn lẹ lọ tọn lẹ gbẹ́sọ to nukọnyì, ṣigba yè ma dègbena Ẹn nado dọhó to agùn lẹ lọ mẹ gba, bo ma sọ sọgan do Ede hia to finẹ. Ṣigba akọ́ndónanú Etọn na wá opòdo.

Enẹwutu, É dọhó hlan omẹ dopodopo kẹdẹdilé É to ohọ̀n ayiha yetọn lẹ tọn húhú dó, dọ, “Do ayi e go, yẹn ṣite to ohọ̀n go, bo to họ̀nhúhú, eyín mẹdepope sè ogbè ṣie bo hùnhọ̀n, yẹn na biọ whégbè wá é de, yẹn nasọ nọ dùjlonú hẹ ewọ, podọ ewọ hẹ yẹn” (OSỌHIA 3:20). Dinvie, ehe lọ wẹ dohia ninọ̀mẹ he to awúsọhia dinvie tọn. Do ayi e go, e ma yín agùn lẹpo wẹ É to hódọ hlan gba, adavo omẹ dopodopo he tin to agùn lẹ lọ mẹ he na sè oylọ Etọn, bo yí hónámẹ Etọn, bo sọ hùnhọ̀n ayiha yetọn lẹ tọn hlan Ẹn. Whenẹnu wẹ É na biọ whégbè wá yé de bo sọ dùjlonú hẹ yé. Ṣigba, do ayi e go dọ, tafo Oklunọ tọn lọ matin to whèta agùn depope tọn mẹ gbèdé sọlé e sọgan yín adọkunnọ sọ kẹdẹdi egbé gba.

Pagbè he yè ná lọ wẹ yín daho hú ehe pò lẹpo po, dọ, “Ewọ he gbawhàn, wẹ yẹn na ná nado sinai hẹ mi to ofìn ṣie ji, dilé yẹn ga gbawhàn, bo sọ sinai hẹ Otọ́ ṣie to ofìn etọn ji dó” (OSỌHIA 3:21). Do ayi e go, to Klisti mẹ, Jiwheyẹwhe ko bẹ́ bibẹ́nu núdidá yọ́yọ́ lọ tọn gbọn jiji de dali. Enẹwutu, É do Ede hia to whèta agùn he lọ tọn mẹ kẹdẹdi kunnudètọ dódónọ podọ nugbonọ, omẹ tintan to núdidá Jiwheyẹwhe tọn lẹ mẹ. Do ayi e go, yé he yè ko dètọ́n gbọn Gbigbọ Etọn dali lẹpo (JOHANU 3:3-7; JAKỌBU 1:18; 1 PITA 1:23; 1 JOHANU 5:1-4), nọ basi pipli daho agùn plọ́nji lọ tọn (HEBLU 12:23) bo yín núdidá yọ́yọ́ to Klisti mẹ (2 KỌLINTINU 5:17-19), bo na gbawhàn dilé Ewọ ga gbawhàn dó, bo na sinai hẹ Ẹ to ofìn Etọn ji bo nasọ dùahọlu hẹ Ẹ.

Mí dayi e go dọ, to bibẹ́nu owé dopodopo tọn, yè tindo LÉ WẸ OKLUNỌ DỌ lọ to finẹ. Podọ to vivọnu owẹn dopodopo tọn, wuntùntùn lọ tin hlan yé he tindo otó nado sè núhe Gbigbọ to didọ hlan agùn lẹ lọ. Na enẹ lọ wẹ onú titegbe he jẹ lọ, enẹ wẹ nado dọ dọ, yè ni dótó ohó he yè to didọ to alọnu-alọnu gbọn Ohó he yè dohia lọ dali gbọn Gbigbọ lọ mẹ. Na enẹ wẹ owẹn dinvie lọ tọn he yín onú hudo mítọn. To owẹn atọ̀n he jẹnukọn lẹ mẹ, ohógbè he lọ yín mimọ jẹnukọnna pagbè lọ; podọ to owẹn ẹnẹ he gbọn godo lẹ mẹ, ehe lọ yín mimọ to pagbè lọ godo.

To Owé MATIU 13 tọn mẹ, Oklunọ dohia hézéhézé, yèdọ lé e yín nuúhọakuẹ dó nado nọ dótó podọ nado nọ mọ. Enẹwutu, Ewọ dègbe dọ donanọ wẹ nukun po otó yé he mọ bo sọ sè lẹ tọn. Podọ awhàngbatọ whèta agùn lẹpo tọn wẹ yé he kẹalọyí bo sọ yise to owẹn Jiwheyẹwhe tọn lẹ mẹ to awúsọhia yetọn tintan mẹ. Gbọn enẹ dali, yé yín máhẹtọ to núhe Jiwheyẹwhe to wiwà dinvie lẹ mẹ. Enẹwutu, míwlẹ lọsu dóna sè núhe Gbigbọ lọ tindo nado dọ to azán mítọn lẹ mẹ gbọn owẹn ojlẹ lọ tọn dali, to ninọ̀mẹ nado yín máhẹtọ to núhe Jiwheyẹwhe to wiwà dinvie lẹ mẹ kẹdẹdi Ohó Etọn pagbè tọn lọ tọn. Do ayi e go, ovi Jiwheyẹwhe tọn nugbo lẹ ma nọ dótó wẹnzagun he na yín angẹli hlan whèta agùn lọ tọn po owẹn wiwé de poun po gba, adavo nado nọ dótó whepoponu, yèdọ LÉ WẸ OKLUNỌ DỌ lọ bo sọ yise to kunnudidè Ohó Jiwheyẹwhe tọn tọn mẹ, podọ gbọn enẹ mẹ, yé na yín awhàngbatọ bo nasọ dùgu onú popo tọn.

Available translations