Ota ṣinawetọ lọ bọawú nado mọdona. To apawhe tintan mí mọ ohiadógóna omẹ fọtọ́n-kantọ́n-konukun-ẹnẹ (144,000) sọn whẹndo wiawe ovi Islaẹli tọn lẹ tọn mẹ; podọ apawhe awetọ mí mọ gbẹtọ susu gédégédé sọn akọta lẹ mẹ, he dóna gbọn nukunbibia daho lọ mẹ. Podọ whẹdida angẹli he hẹn jẹhọn enẹlẹ go he yè na túndote poun to whenuena opẹ̀n ṣidopotọ lọ dọnú. (OSỌHIA 9:14-15).

“To onú he godo, yẹn sọ mọ angẹli ẹnẹ ṣite to gosu ẹnẹ aigba tọn lẹ ji, yé sọ hẹn jẹhọn ẹnẹ aigba tọn lẹ go, na jẹhọn nikã yín do aigba go, kavi do ohù mẹ, kavi do atin depope go. (OSỌHIA 7:1-)

Podọ jẹhọn to hógbè dọdai tọn mẹ wẹ yín dindọn po vásúdó po. Podọ mí sọ mọ ṣiṣẹ etọn to owé dọdai tọn lẹ mẹ (ZEKALIA 6:5).

Podọ to afọ he bọdoego lẹ to alọdlẹndó ohiadógóna omẹ fọtọ́n-kantọ́n-konukun – ẹnẹ lẹ sọn whẹndo wiawe lẹ mẹ (144,000). Yè dóhia yé go po Ohidónu Jiwheyẹwhe tọn po to nukọn yetọn. Podọ yé he tin hlan Agùn nugbo tọn lọ lẹ wẹ yè yí Gbigbọ Wiwé do dóhiagóna ehe yè ylọ dọ Ohiadónu Jiwheyẹwhe tọn. EFESUNU 1:13 podọ ota 4:30 podọ ofi susu to Owé Wiwé mẹ to didóhia dọ Gbigbọ Wiwé wẹ yín Ohiadónu Jiwheyẹwhe tọn. Kẹdẹdilé Gbigbọ Wiwé jẹte dó Ovisunnu Jiwheyẹwhe tọn ji do (MATIU 3:16) “… Na Ewọ lọ wẹ Jiwheyẹwhe Otọ́ ko tlẹhiadónuna” (JOHANU 6:27) Mọdopolọ wẹ Gbigbọ Wiwé dopolọ nọ wá visunnu po viyọnnu Jiwheyẹwhe tọn lẹ pó ji do, yèdọ yé he mẹ Ewọ yín homẹvivinọ te talãlã (OWALỌ 2:38-39; LOMỌNU 8:11 po 23; 2KỌLẸTINU 1:21-22).

Podọ dogbọn owhẹhó omẹ fọtọ́n-kantọ́n-konukun-ẹnẹ lẹ tọn (144,000) na dọpọ́n daho he lọ to didóhia apajlẹ wiwá angẹli he sọn whèzẹtẹn tọn he hẹn Ohiadónu Jiwheyẹwhe tọn. Yẹwhegán Ezekiẹli ko mọ yé he to winwẹn bo sọ to avivi na osúnù lẹ lọ he to jijọ to Otò Wiwé lọ mẹ wẹ yè ko dóhiagóna (EZEKIẸLI 9:1-6). Podọ dogbọn dóhia Ezekiẹli tọn dali po Osọhia ota he tọn po, mí mọdona hézéhézé dọ ohiadógóna whẹwhẹ wẹ yítẹnmẹ. Podọ to enẹ lọ godo wẹ whẹdida angẹli lọ lẹ tọn lẹ ṣẹ̀ azọ́nwà.

“Yẹn sọ mọ angẹli devo de tọ́n sọn whèzizẹ dali ja, é tindo hiadonu Jiwheyẹwhe ogbẹ̀nọ tọn lọ to alọ etọn mẹ: é sọ dawhá to ogbè lélé mẹ hlan angẹli ẹnẹlẹ, he yè ná nado gbleawuna aigba lọ po ohù po, dọmọ, Hiẹ gbleawuna aigba, kavi ohù, kavi atin lẹ blo, kaka mí nado yí hiadonu do dóhiagona mẹmẹglọ Jiwheyẹwhe mítọn tọn lẹ to nukọn yetọn.” (OSỌHIA 7:2-3).

Podọ Owé dọdai tọn lọ dọhó dogbọn gbẹtọ he yí ohia kanni lọ tọn lẹ do nukọn yetọn podọ to alọ adùsin yetọn tọn go, podọ to ofi ga yè ko sọ dọ hlan mí dogbọn afanumẹ Jiwheyẹwhe mítọn tọn dali dọ, Jiwheyẹwhe sọ dóhia yéwlẹ lọsu go to nukọn yetọn. Podọ awelẹ, ohia kanni lọ tọn po Ohiadónu Jiwheyẹwhe tọn po, ma sọgan yín mimọ to agbasalan mẹ po nukun po gba, kavi sọha Nuọ̀ntọ̀n kandekoatọ́n e lán dopo tọn gba (666) (OSỌHIA 13:18) kavi yọnnu lọ po kọfọ sika tọn lọ po, po oyín núzinzán etọn po onú winwlán etọn tọn po” “Babilọni daho” hẹ kanni de ji to zungbo mẹ ma sọgan yín mimọ po nukun agbasa tọn po gba. To fi mí to afọdè biọ aigba núdóhiamẹ tọn mẹ, na tukla gbigbọnọ lẹ dohúdó dómọnanú onú he to taji lẹ tọn (1KỌLẸTINU 2:13-15). Na Jiwheyẹwhe Lọsu yọ́n omẹ Etọn lẹ podọ omẹ Etọn lẹ sọ yọ́n Ewlọsu. (JOHANU 10:14).

Podọ ehe kàn omẹ fọtọ́n-kantọ́n-konukun-ẹnẹ lẹ(144,000) wéfọ he ma sọgan yín túntúnmẹ taidi hlan awhanpa he yè ko zé daga sọn Agùn lọ mẹ, kavi sọn agùngbẹpipli lẹ mẹ gba. Ṣigba owéfọ tin hlan yisenọ he yè pòdai lẹ, kẹdẹdilé yè wlán ẹn do, dọmọ, “Yẹn sọ sè sọha yé he yè yí hiadónu do dóhiagóna lẹ yín fọtọ́nkantọ́nkonukunẹnẹ sọn whẹndo ovi Islaẹli tọn lẹpo mẹ.

Sọn whẹndo Juda tọn mẹ yè yí hiadonun do dóhia fõfõ ṣidopo. Sọn whẹndo Gati tọn mẹ, yè yí hiadonu do dóhia fõfõ ṣidopo. Sọn whẹndo aṣeli tọn mẹ, yè yí hiadonu do dóhia fõfõ ṣidopo. Sọn whẹndo Naftali tọn mẹ, yè yí hiadonu do dóhia fõfõ ṣidopo. Sọn whẹndo Manasse tọn mẹ, yè yí hiadonu do dóhia fõfõ ṣidopo. Sọn whẹndo Simẹọni tọn mẹ, yè yí hiadonu do dóhia fõfõ ṣidopo. Sọn whẹndo Levi tọn mẹ, yè yí hiadonu do dóhia fõfõ ṣidopo. Sọn whẹndo Isakali tọn mẹ, yè yí hiadonu do dóhia fõfõ ṣidopo. Sọn whẹndo Zabuluni tọn mẹ, yè yí hiadonu do dóhia fõfõ ṣidopo. Sọn whẹndo Josẹfu tọn mẹ, yè yí hiadonu do dóhia fõfõ ṣidopo. Sọn whẹndo benjamini tọn mẹ, yè yí hiadonu do dóhia fõfõ ṣidopo.” (OSỌHIA 7:4-8).

Podọ whẹndo wiawe helẹ yín hihia gbọn oyín yetọn lẹ dali. Enẹwutu, núṣidọ kavi núplọ́nmẹ jẹagọ̀ dóna dóalọte. Podọ e ma sọ sọgan yín didọ húmọ gba. Na núplọ́nmẹ he yè yọ́nẹn di “Islaẹli he tin to whèyihọ̀ agewàji tọn to otò Elopea tọn mẹ lẹ tọn” he kàn whẹndo ao he ko dánbu biọ akọta lẹ mẹ ma yín nugbo gba. Na ehe lọ jẹagọ̀do Owé Wiwé lẹ mlẹnmlẹn, yèdọ ehe to kunnudè dọ yé whẹndo wiawe lẹpo na tin to finẹ to ojlẹ hiadogona tọn lọ mẹ.

Gbẹtọ susu gedegede he na tọ́njẹgbonu wá gbọn nukunbibia daho lọ dali

Sọn afọ etọn ṣinẹnẹtọ lọ mẹ, Johanu dọhó do osọha gbẹtọ susugege he na jẹgbonu wá sọn akọta lẹpo mẹ go, dọmọ:

“To onú helẹ godo yẹn pọ́n, do ayi e go, gbẹtọ susugege, he mẹdepope ma sọgan hia, sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ, ṣite to ofìn lọ nukọn podọ to Lẹngbọvu lọ nukọn, yè sọ do aṣọ́vọ̀ wéwé na yé, odéma sọ tin to alọ yetọn mẹ, yé sọ to awhádo ogbè lélé, dọmọ, Whlẹngan hlan Jiwheyẹwhe mítọn he sinai to ofìn lọ ji, podọ hlan Lẹngbọvu lọ. Angẹli lẹpo sọ ṣite lẹ́do ofìn lọ pé, lẹ́do mẹho lẹ lọ pé, podọ lẹ́do mẹdidá ẹnẹlẹ lọ pé, bo jẹklo to ofìn lọ nukọn bo ṣinyọn nukunmẹ dò, bo litaina Jiwheyẹwhe, dọmọ, Niṣẹ: Dona, po gigo po, nuyọ́nẹn po opẹ́ po, yẹyi, huhlọn, po hlọnhlọn po ni tin hlan Jiwheyẹwhe mítọn kakadoi. Niṣẹ!” (OSỌHIA 7:9-12).

Do ayi e go, yé he gbawhàn lẹ na yín zizéyì Gigo mẹ jẹnukọnna nukunbibia daho lọ. Yé sọ tindo dọpọ́n pagbè nado sinai po Oklunọ po to ofìn ji, ehe yín jijlẹ do osọha gbẹtọ susugege he na sọawúhia to ofìn lọ nukọn lẹ go. Enẹwutu, yè wlán ẹn dọ, “Ewọ he gbawhàn, wẹ yẹn na ná nado sinai hẹ mi to ofìn ṣie ji, dilé yẹn ga gbawhàn, bo sọ sinai hẹ Otọ́ ṣie to ofìn etọn ji dó” (OSỌHIA 3:21). Podọ yisenọ he yè pòdai bo sọ yín dódónọ to nukunbibia daho he lọ whenu lẹ na yì biọ Ahọludù Owhè fọtọ́n tọn mẹ bo nasọ sọawúhia to ofìn lọ nukọn.

Do ayi e go, osọha gbẹtọ susugege he lọ tọn na sẹ̀n Oklunọ Jiwheyẹwhe to Tẹmpli Etọn mẹ ṣigba bo ma na dùahọlu hẹ gba.

Podọ yè wlán ẹn dọ, “Dopo to mẹho lẹ lọ mẹ sọ gblọn dọ hlan mi dọ, Mẹnu wẹ ehe yè do aṣọ́vọ̀ wéwé na helẹ? Fie wẹ yé sọ tọ́nsọn wá? Yẹn sọ dọ hlan ẹn dọ, Mẹdaho, hiẹ wẹ yọ́nẹn. É sọ dọ hlan mi dọ, Ehelẹ wẹ yé he tọ́nsọn nukunbibia daho mẹ, bo yàn aṣọ́vọ̀ yetọn bo hẹn yé zùn wéwé to ohùn Lẹngbọvu lọ tọn mẹ. Enẹwutu wẹ yé do tin to ofìn Jiwheyẹwhe tọn lọ nukọn, bo sọ to sinsẹ̀n ẹn to okle po ozán po to tẹmpli etọn mẹ: podọ ewọ he sinai to ofìn lọ ji nasọ dlẹ̀n ogohọ̀ etọn do yé ji. Huvẹ ma na hù yé ba, mọ ovẹ́ ma na hú yé ba; mọ owhè ma na vẹ́ do yé ji ba, kavi yózo depope. Lẹngbọvu lọ he tin to ofìn ṣẹnṣẹn na yín lẹngbọhọtọ yetọn, bo nasọ nọ plán yé jẹ fie asisà osìn ogbẹ̀ tọn lẹ te: Jiwheyẹwhe nasọ súnsún dasìn lẹpo sẹ̀ sọn nukun yetọn lẹ mẹ” (OSỌHIA 7:13-17).

Dinvie, ohógbè he yè zán dólé dọ, “okle po ozán po” dọhó hézéhézé dọ ehe lọ to alọdlẹndo whenu de to Ahọludù Owhè fọtọ́n tọn mẹ bo ma sọ yín to madopòdo he ma yọ́n okle kavi ozán, kavi osọ̀ he wáyì po osọ̀ he ja po mẹ gba. Do ayi e go, osọha gbẹtọ susugege he na sẹ̀n Oklunọ to tẹmpli Etọn mẹ to aigba ji lẹ wẹ Mẹfligọ̀ he tọ́nsọn nukunbibia mẹ, yèdọ yé he ma ko sọgbè nado yín máhẹtọ to Agùn Asivu he yín zizé biọ Jelusalẹm yọ́yọ́ lọ mẹ lẹ mẹ bo nasọ nọnọ̀ E mẹ (OSỌHIA 21:9-10). Podọ Jelusalẹm yọ́yọ́ he yín otòdaho Jiwheyẹwhe tọn lọ matindo tẹmpli de gba: “Yẹn ma mọ tẹmpli de to e mẹ; na Oklunọ Jiwheyẹwhe Ganhunupo, po Lẹngbọvu lọ po wẹ tẹmpli etọn. Otòdaho lọ ma sọ jlo owhè kavi osùn, nado nọ họ́n hinhọ́n do e mẹ: na gigo Jiwheyẹwhe tọn wẹ to hinhọ́n họ́n do e mẹ, Lẹngbọvu lọ sọ wẹ hinhọ́n etọn”OSỌHIA 21:22-23.

Do ayi e go lò, osọha gbẹtọ susugege helẹ tọn wẹ yisenọ he yè whlẹn bo sọ fligọ̀ gbọn Ohùn Lẹngbọvu lọ tọn dali lẹ. Podọ gbọn ojọmiọn dali, yè na yé aṣọ́vọ̀ wéwé, ṣigba yé matin to gbèsisọ mẹ nado yín zizéyì Bẹ́yìlọnmẹ mẹ gba. Payi e go dọ, nukunbibia lọ ma sọgan whlẹn kavi klandowiwé gba, ṣigba yé ko yín whinwhlẹn bo ko sọ yín kinklandowiwé whẹpo yé do biọ nukunbibia mẹ; dinvie, yé gbọ̀ Bẹ́yìlọnmẹ go na yé matindo amì Gbigbọ lọ tọn. Enẹwutu, fligọ̀ tin na yé omẹ he dọwhẹgbọ hẹ Jiwheyẹwhe lẹpo gbọn Ohùn Lẹngbọvu Jiwheyẹwhe tọn he yè kọ̀ndai lọ kẹdẹ mẹ, bo ma sọ hò awhànpa he mẹ mẹdopodopo tin te tọn lọ pọ́n gba. Do ayi e go, azọ́n dagbe po nukunbibia po ma wẹ to whlẹgan kavi ogbẹ̀ madopòdo ná mẹdepope to egbé gba. Na to Jesu Klisti kẹdẹ mẹ wẹ Jiwheyẹwhe dó Alẹ̀nùnù Alẹ̀nù Yọ́yọ́ tọn lọ ai te gbọn ohùn he yè kọ̀ndai to osó Kalvali tọn ji dali. Enẹwutu, mẹdepope he yise bo sọ tindo dọpọ́n whẹdọgbọ mẹde titi tọn po Jiwheyẹwhe po wẹ tindo ogbẹ̀ madopòdo.