Do ayi e go, to ṣẹnṣẹn opẹ̀ngbè ṣidopotọ po ṣinawetọ lọ po tọn, mí mọ ota 10 lọ, kẹdẹdilé mí ko mọ dó dote, na ota 7 lọ ko yín didóai to ṣẹnṣẹn hiadonu ṣidopotọ po ṣinawetọ po tọn. Dinvie, mí na dọhó do ota 10 lọ go titegbe. Na eyín núvivẹ de nado mọdona nukọnyìyì ojlẹ tọn po núyiwà he yè na dóai do gbèdidè nukọnyìyì tọn mẹ. Na núvivẹ lọ wẹ yín dọ, yè ni tindo “ohógo vivẹ lẹ”, yèdọ sọn ehe mẹ ohota he lọ kavi núyiwà he lọ nado yín domọna.

“Yẹn sọ mọ angẹli huhlọnnọ devo de jẹte sọn olọn aga, yè yí aslọ do ṣinyọn avọ̀ nệ; aidowhẹ̀do de sọ tin to ota etọn, nukunmẹ etọn di owhè, afọ etọn sọ di dòtin miyọn tọn” (OSỌHIA 10:1).

Sọn ohógo hóhó lọ mẹ, mí tindo ohógo dopo gẽ na angẹli po wẹnzagun po (AГГEɅΩ). Enẹwutu, eyín Oklunọ sọawúhia di Angẹli kavi yín didohia to ninọ̀mẹ dopolọ, to whenẹnu e nọ tin to kọ̀ndopọ́ mẹ hẹ owẹn de kavi núlilá de, yèdọ núde nado dọhó hlan gbẹtọ lẹ. Podọ ga, devi Etọn he nọ hẹn owẹn dèdovo de wá lẹ yín yiylọ to Owé Wiwé lẹ mẹ dọ, “angẹli lẹ” kavi “wẹnzagun lẹ” (HAGAI 1:13; MALAKI 3:1; LUKU 7:27; HEBLU 13:2; OSỌHIA 2 po ota 3 po; po devodevo lẹ po). To apáwhé awetọ Owé MALAKI 3:1 lọ tọn mẹ, yè dọ hlan mí dọ Oklunọ awhànpa lẹ tọn na wá jẹ tẹmpli wiwé Etọn mẹ ajiji di Angẹli Alẹ̀nù tọn lọ. Podọ dogbọn mẹhe wléawuna aliho Etọn tọn dali, yè dọmọ, “Do ayi e go, Yẹn do angẹli ṣie hlan…” Dinvie, aidowhẹ̀do he yín mimọ to olẹ́do Angẹli huhlọnnọ he lọ tọn, to didóhia Ewọ kànṣiṣa alẹ̀nù lọ tọn. Podọ sọn hóhówhenu gbọ́n wẹ aidowhẹdo yín alẹ̀nù de to Jiwheyẹwhe po gbẹtọ po ṣẹnṣẹn (GENẸSISI 9:8-17).

Podọ awúsọhia ninọ̀mẹ gbaungba Oklunọ Jiwheyẹwhe tọn tọn ko yín mimọ to Ojipa Edẹni tọn mẹ. Podọ to Osó Sinai tọn ji Ewọ ko sọ jẹte wá to ninọ̀mẹ dopolọ mẹ nado basi Alẹ̀nù Etọn po Islaẹli po. Sọn whenẹnu gbọ́n wẹ Ewọ ko yín yiylọ dọ Angẹli Alẹ̀nù tọn podọ ga Angẹli awúsọhia Etọn tọn (ISAIA 63:9). Enẹwutu, yè wlán dogbọn Mọse tọn dali, dọ,

“Whenuena owhè kande juyì, angẹli Oklunọ tọn de sọawúhia ẹ to zùngbo mẹ to osó sinai tọn ji to ozòlọ mẹ to nukan lọ mẹ. Whenuena Moses mọ ẹn, nupinpọ́n lọ jiawu to nukun etọn mẹ: whenuena é sẹpọ́ ẹ nado pọ́n ẹn tlintlin, ogbè Okklunọ tọn wá é de, dọmọ, Yẹn wẹ Jiwheyẹwhe otọ́ towe lẹ tọn, Jiwheyẹwhe Ablaham tọn, Jiwheyẹwhe Isaki tọn, Jiwhyẹwhe Jakọbu tọn.” (OWALỌ 7:30-32)

“Ehe lọ wẹ mẹhe (Moses) tin to agùn lọ mẹ to zùngbo mẹ po angẹli he to dọhó hẹ ẹ po to osó Sinai tọn ji, podọ hẹ otọ́ mítọn lẹ: mẹhe yí ohó ogbẹ̀ tọn nado na mí (OWALỌ 7:38).

Do a yi e go, to owé godotọ Alẹ̀nù Hóhó tọn mẹ, to Owé MALAKI 3:1, mí mọ hihia dolé dọ, “Dayi e go, Yẹn do lizọ́nyítọ ṣie hlan, ewọ bo nasọ wleawúna aliho lọ to nukọn ṣie: podọ Oklunọ, mẹhe mì to dindinyì, na wá jẹ tẹnpli etọn mẹ ajiji; yèdọ (wẹnzángùn) angẹli alẹ̀nù tọn lọ, mẹhe mẹ homẹvivi mì te, dayi e go, é ja, wẹ Oklunọ awhanpa lẹ tọn dọ”. Podọ tintan apawhé wéfọ he tọn ko yín hinhẹnṣẹ gbọn devizọ́n Johanu Baptizi tọn dali, kẹdẹdilé mí mọ ṣiṣẹ̀ etọn to owé Alẹ̀nù Yọ́yọ́ tọn mẹ do (MATIU 11:10; MALKU 1:2; LUKU 7:27.) Podọ apawhé awetọ lọ po Angẹli alẹ̀nù tọn lọ po na yín hinhẹnṣẹ̀ po Islaẹli po dilé e sọgan yín mimọ to owé lọ mẹ dó.

Dinvie, núhe go mì na payi titegbe wẹ yín dọ, yè ma dọhó do Oklunọ lọ go yèdọ yín e tlẹ yín whladopo nado dọhó hlan Agùn Jiwheyẹwhe Ogbẹ̀nọ lọ tọn to zinzán ohógbè he yín Angẹli Alẹ̀nù tọn lọ gba, adavo nado tin to kọ̀ndopọ́ mẹ hẹ omẹ Islaẹli tọn lẹ kẹdẹ, podọ enẹ lọ tin na alẹ̀nùnù he Ewọ basi hẹ omẹ Etọn alẹ̀nù tọn lẹ (LOMUNU 9:4).

Didóai alẹ̀nùnù Alẹ̀nù Yọ́yọ́ mẹ tọn po Agùn Alẹ̀nù Yọ́yọ́ mẹ tọn po tọn ma yín gbọn awúsọhia Oklunọ tọn di Angẹli de dali gba, adavo gbọn Ovi Jiwheyẹwhe tọn tọn dali, yèdọ gbọn Ohó he diọzùn agbasalan dali. Do ayi e go, whenuena Alẹ̀nùnù Yọ́yọ́ lọ yín bibasi to Ohùn Etọn mẹ hẹ omẹ Etọn lẹ (MATIU 26:26-28), nukunmẹ Etọn ma họ́nwun di owhè gba. Podọ whenuena É zé ylando aihọn tọn lẹ hẹn, whànpẹ depope matin ehe mí do sọgan dójlo Etọn gba (ISAIA 53). Podọ ga, to Osó Kalvali tọn ji, aidowhẹ̀do de matin to ota Etọn ji gba, adavo ojẹgbakun owùn tọn to ota Etọn.

Dinvie, tadèna helẹ pó yín onú vivẹ de nado mọdona Owé Osọhia 10 lọ tọn hézéhézé. Whenẹnu yè ma dọhó do Oklunọ lọ go di Ovi gbẹtọ tọn, kavi di Ovi Jiwheyẹwhe tọn kavi Ovi Davidi tọn gba, adavo di Angẹli huhlọnnọ He yè yí aslọ do ṣinyọnavọ̀na de. Do ayi e go, aidowhẹ̀do he lẹ́do É pé lọ to hódọ dogbọn alẹ̀nùnù de dali. Podọ nukunmẹ Etọn di owhè he yí huhlọn etọn lẹpo do họ́nwun (MATIU 17:2; OSỌHIA 1:16). Mí sọ do ayi e go to ofi he lọ dọ, awhànpa olọn tọn lẹ de kavi angẹli lẹ de, kavi yèdọ Mẹfligọ̀ lẹ lọsu depope ma jẹgodona Oklunọ gba. To whenẹnu, Ewọ kẹdẹ wẹ na wá, bo nasọ to lìlì di kinnikinni de. Do ayi e go, awhágbè Etọn na biọ onú lẹpo mẹ. Sọ do ayi e go dọ, whenuena Josẹfu hẹn ede zùn yinyọ́nẹn hlan mẹmẹsunnu etọn lẹ whlãwetọ, mẹdevo depope matin to finẹ gba (GENẸSISI 45; OWALỌ 7:13). Mọdopolọ wẹ Oklunọ na jo Asivu lọ do to olọn mẹ to ojlẹ nẹ mẹ to Alọwle Hunwhẹ Núdùdù tọn kọ̀n dó, bo na jẹte wá whlãwetọ, yèdọ Ewọ kẹdẹ bo nasọ do Ede hia hlan mẹmẹsunnu Etọn Ju lẹ.

To ojlẹ he lọ mẹ, owé dabla he yè ko sú bo ko sọ tlẹ́ kaka jẹ ojlẹ godogodo tọn mẹ (DANIẸLI 12:4; OSỌHIA 5) ko yín hùnhùn dote bo ko sọ yín mimọ to adusilọ Etọn mẹ. Do ayi e go, ehe lọ to didohia to ede mẹ dọ, nújijọ̀ he yè dọhó etọn to ota 10 lọ mẹ tọn na sọawúhia to godo he yè na hùn hiadonu ṣinawe lẹ po owé dabla lọ po.

“É tindo owé hùnhùn pẹvi de to alọ etọn mẹ: é sọ yí adufọ etọn do ohù ji, bo sọ yí amiọnfọ etọn do aigba húhú ji” (OSỌHIA 10:2). Do ayi e go, Oklunọ wẹ Mẹhe tindo onú popo nugbonugbo. Podọ na Ewọ, yèdọ gbọn Ewọ dali wẹ yè dá onú popo (KOLOSINU 1:17). Enẹwutu, yè sọ dọhó dogbọn Ewọ tọn dali di Omẹ He na dùgú akọta lẹpo tọn (PSALM 82:8). Dinvie, É na wá nado biọ nútindo Etọn lẹ whẹpo É nido ṣẹ̀ po Ahọludù Etọn Owhè Fọtọ́n tọn po. Do ayi e go, mí ko mọ tùnmẹ ohia he yín afọzédo aigba ji tọn dote po owé Jọṣua tọn po, dọ, “Ofi he afọpãhomẹ towe na zín lẹpo, mì wẹ yẹn ko ná ẹn hlan, dilé yẹn ko dọhó hlan Mọse dó” (JỌṢUA 1:3).

Do ayi e go, ojlo Jiwheyẹwhe tọn nugbo hlan gbẹtọ lẹpo wẹ yín dọ nado dùgán to aigba ji. Ṣigba núyọ́nẹn wintinwintin Satani tọn he yè dohia gbọn odàn mẹ, gbẹtọ tintan lọ yín didèsẹ̀ sọn gbèdidè daho he lọ kọ̀n. Podọ e ma yín dọ yé hẹn aṣẹpipa yetọn kẹdẹ bú gba, ṣigba yé jo yédelẹ hlan aṣẹpipa Satani tọn bọ aihọn lọ blébu yín hinhẹn biọ aṣẹpipa Satani tọn glọ́. Enẹwutu, whenuena Klisti wá aigba ji, Satani ná ahọludù aihọn tọn lẹpo hlan Oklunọ. Ṣigba É gbẹ́, na É yọ́nẹn jẹnukọn dọ Ewọ dóna flí gbẹtọ lẹpo gọ̀, to enẹgodo, onú didá lẹpo ga. Enẹwutu wẹ Ohùn Etọn do yín kinkọ̀ndai tofi to aigba he ji, na fligọ̀ mítọn po whẹdọgbọ mítọn hẹ Jiwheyẹwhe po. Whenẹnu wẹ mí sọgan yín gigọ̀ do dòdó mítọn tintan lọ ji, kẹdẹdi gúdùtọ Jiwheyẹwhe tọn podọ whédùtọ hẹ Jesu Klisti.

Dinvie, Oklunọ wẹ Mẹhe tindo aigba po ohù po, enẹwutu wẹ É do zé afọ dopo do aigba húhú ji podọ awetọ do ohù ji whẹpo Ewọ nido ṣẹ̀ ahọdù ji.

“Bo to awhádo ogbè lélé, di whenuena kinnikinni to gbigbo gángán; whenuena é dawhá mọ vọ̀, osò ṣinawe yí ogbè yetọn do yẹ̀nwan” (OSỌHIA 10:3).

Do ayi e go, osò ṣinawe lẹ ma na yẹ̀nwan to dinvie dilé omẹ susu to didọ dó gba, ṣigba bo na wà mọ to ojlẹ didè lọ mẹ, dilé yè ko dọ hlan mí to ota 10 lọ mẹ dó. Podọ ohógo“kinnikinni” tọn he to alọdlẹndo Oklunọ lọ yín onú vivẹ de to kọ̀ndopọ́ he mẹ. E ma yín whladopo gẽ bọ yè dọhó do Oklunọ mítọn go to Alẹ̀nù Yọ́yọ́ lẹpo mẹ kavi to kọ̀ndopọ́ hẹ Agùn Alẹ̀nù Yọ́yọ́ mẹ tọn lọ mẹ di Kinnikinni lọ gba. Do ayi e go, adavo to hùnhùn owé dabla he lọ tọn whenu kẹdẹ wẹ Ewọ na tọ́njẹgbonu wá kẹdẹdi Kinnikinni lọ sọn whẹndo Juda tọn mẹ, yèdọ Mẹhe ko gbawhàn lọ (OSỌHIA 5:5). Enẹwutu, owéfọ susu to Owé dọdai tọn lẹ mẹ dohia mí ehe yín tadèna ohógo “lìlì” tọn yín, dilé yè dlẹnalọdo É to Owé OSỌHIA 10 lọ tọn mẹ dó. Podọ Owéfọ mọtọnhunkọ lẹ tahinhọ́n susu do núyiwà he ji mí to hódọ do bo sọ tin to kọ̀ndopọ́ mẹ hẹ Islaẹli.

“… Oklunọ na dogbè sọn oji aga, bo do ogbè etọn sọn fininọ̀ etọn wiwé mẹ, ewọ na yí hlọnhlọn do dogbè do yìndùgbo etọn go; ewọ na ná abobo de, di yé he to vệnsinsẹ́n lẹ zín, do tòmẹnu aigba lọ tọn lẹpo go” (JELEMIA 25:30).

“Yé na nọ zinzọnlin hodo Oklunọ, mẹhe na nọ lì di kinnikinni de: na ewọ na lì, ovi lẹ nasọ to sisọsisọ sọn whèyihọ ji ja” (HOSEA 11:10).

“Podọ Oklunọ na lì sọn Ziọni mẹ, bo sọ dogbè etọn sọn Jelusalẹm mẹ; podọ olọn lẹ po aigba po na whàn: ṣigba Oklunọ na yín fibẹtado de hlan omẹ etọn lẹ, podọ figángán de hlan ovi Islaẹli tọn lẹ” (JOẸLI 3:16).

“Ewọ sọ dọmọ, Oklunọ na lì sọn Ziọni mẹ, bo sọ do ogbè etọn sọn Jelusalẹm mẹ; podọ fininọ̀ lẹngbọhọ́tọ lẹ tọn na blawu, podọ aga Kamẹli tọn nasọ yọ́”AMỌSI 1:2

Do ayi e go, to ṣiṣẹ̀ devizọ́n yẹwhegán awelẹ tọn godo, Oklunọ na zé afọ Etọn lẹ do aigba húhú ji podọ do ohù ji, whenẹnu wẹ Ewọ na pé mẹmẹsunnu Etọn lẹ, yèdọ omẹ fọtọ́n-kantọ̀n-konukun-ẹnẹ lẹ he nọte bo sọ yín hiadogona to Osó Ziọni tọn ji (OSỌHIA 14:1).

Ojlẹ nẹ lọ kẹdẹ mẹ wẹ Oklunọ na lì di kinnikinni de, enẹ wẹ nado dọ ojlẹ he mẹ gẽ osò yẹ̀nwan ṣinawe lẹ – e ma yín ogbè yẹwhehódọtọ ṣinawe lẹ tọn wẹ na dọnú gba.

“Whenuena osò ṣinawe lẹ yí ogbè yetọn do yẹ̀nwan, wẹ yẹn pọ́ winwlán: yẹn sọ sè ogbè de sọn olọn mẹ to didọ hlan mi, dọmọ, yí hiadonu do tlẹ onú he osò ṣinawe lẹ yí wanyẹ̀n do dọ, a sọ wlánwé yetọn blo” (OSỌHIA 10:4).

Do ayi e go, mẹdepope ma mọdona núdidọ he osò ṣinawe lẹ yí do yẹ̀nwan gba, mọ núdidọ nẹ lọ ma sọ kàn míwlẹ gba, na yè ko yí hiadonu do tlẹ to godo he yè ko sègbè etọn vọ̀, bo ma sọ sọgan yín winwlán gba. Enẹwutu, enẹ lọ ma sọgan lẹzùn apáde Owé Wiwé he yín Ohó Jiwheyẹwhe tọn tọn gba, yèdọ ehe mí dóna hia, bo dọyẹwhehó Etọn, bo dótó E bo sọ yí I sè gba (OSỌHIA 1:3). Niṣẹ! Dinvie, azọ́n yé he nọ dọyẹwhehó lẹ tọn wẹ nado nọ̀ po Ohó Jiwheyẹwhe tọn he yè wlán lọ kẹdẹ po (2 TIMỌTI 4:1-5). Podọ núdabla osọhia lọ tọn lẹpo tin to Ohó Jiwheyẹwhe tọn he yè wlán lọ kẹdẹ mẹ, po nugbo he yè whlá do E mẹ lẹpo bo ma sọ yín domọna kaka jẹ egbé lẹ po. Enẹwutu, núhe yè ma wlán lẹpo yín aṣli de na Jiwheyẹwhe He na wà núhe É jlo to ojlẹ didè Etọn lọ mẹ (DEUTELONOMI 29:29). Podọ to osẹ́n niná whenu, yèdọ to Owé EKSỌDUSI 20:1- tọn mẹ, podọ to Owé Job tọn mẹ po Owé Psalm lẹ tọn po mẹ, podọ to Owé JOHANU 12 tọn mẹ, yè dọhó do Ogbè Jiwheyẹwhe tọn go di wanyinyẹ̀n osò lẹ tọn de.

Yé mẹhe nọ gọ́na kunnudidè pipé Owé Wiwé mẹ tọn lọ tọn lẹ, yèdọ kaka jẹ Owé Osọhia tọn lọsu ji ga, na yín hihò gbọn Ohó Jiwheyẹwhe tọn dali, bọ yé nasọ gbọn nukunbibia daho lọ mẹ bo nasọ dóakọ́nna awufiẹsa lẹ lọ kẹdẹdilé Owé OSỌHIA 22:18-19 tọn lọ dọ dó. Enẹwutu, na linlẹn depope he kàn osò yẹ̀nwan ṣinawe lẹpo ni yín lalo. Na núdepope he yè dọyẹwhehó etọn dogbọn wanyinyẹ̀n osò ṣinawe lẹ tọn dali ni yín lalo bo sọ gbọvọ, bo sọ yín didè sọn linlẹn yẹwhehódọtọ lẹ lọ tọn mẹ. To nugbo de mẹ, gbẹtọ depope matin to nukunmẹ aigba tọn ji he sọgan dọ ewọ mọdona núwhiwhlá wanyinyẹ̀n osò ṣinawe lẹ tọn gba. Enẹwutu, Oklunọ Jiwheyẹwhe ko yín ayajẹnọ nado zé e whlá kaka jẹ whenuena ojlẹ lọ na wá, na e na yín núpaṣamẹ titegbe de. Podọ to kọ̀ndopọ́ he mẹ, Jiwheyẹwhe Lọsu wẹ na yín Ogbètunmẹtọ Ewlọsu tọn. Na onú popo na sọawúhia kẹdẹdi gbèdidè Jiwheyẹwhe tọn bo nasọ yìnukọn to ojlẹ didè lọ mẹ.

Ohógo vivẹ devo he tin to kọ̀ndopọ́ mẹ hẹ nújijọ̀ daho he lọ, yèdọ ehe yè ko sọ dọhó etọn to Owé OSỌHIA 10 lọ tọn mẹ, wẹ ohógo “whiwhlé” tọn. “Angẹli he yẹn mọ bọ é ṣite to ohù ji podọ to aigba húhú ji zé alọ etọn daga hlan olọn, bo sọ yí ewọ he tin to ogbẹ̀ do whlé, mẹhe dá olọn, po onú he tin to e mẹ lẹ po, aigba, po onú he tin to e ji lẹ po, ohù, po onú he tin to e mẹ lẹ po, dọ, ojlẹ matin ba: ṣigba to azán ogbè angẹli ṣinawetọ tọn gbè, whenuena é na ṣẹ̀ do kúnkún ji, yè na dótana núdabla Jiwheyẹwhe tọn lọ, dilé yè dọ hlan devi etọn yẹwhegán lẹ dó” (OSỌHIA 10:5-7).

Kẹdẹdi ota ṣinatọ̀n lọ po ṣinẹnẹ lọ po, angẹli ṣidopo ko kún opẹ̀n yetọn lẹ dote. Podọ opẹ̀ngbè angẹli ṣinawetọ lọ tọn ko yín lilá titegbe dovò, na onú gbọnvo de sọawúhia wutu. Ohógbè Alẹ̀nù Hóhó mẹ tọn he yín, “Devi Etọn lẹ po yẹwhegán Etọn lẹ po” to alọ titegbe de dlẹn bo ma sọ yín hlan whèta agùn lọ tọn gba, adavo hlan Islaẹli. Enẹwutu, to Alẹ̀nù Yọ́yọ́ mẹ, ohógbè he yè zán wẹ, “Apọsteli Etọn lẹ po yẹwhegán Etọn lẹ po” (EFESUNU 3:5 po owéfọ devodevo lẹ po).

Do ayi e go, yẹwhegán Daniẹli mọ hlan ojlẹ opòdo tọn lọ. É sọ hopana mí dogbọn Angẹli He na yí Ewọ He tin to ogbẹ̀ kakadoi do whlé dali. Whenẹnu ewọ yín awujinọ bo sọ kànbiọ dọ, “Nawẹ e na yín dindẹn sọ jẹ opòdo awujinú helẹ lọ tọn? Yẹn sọ sè dawe yè ṣinyọn alavọ na lọ, he tin taga osìn otọ̀ lọ tọn lẹ, whenuena é zé alọ etọn adusi po alọ amiọn etọn po daga hlan olọn, bo whlé gbọn ewọ he togbẹ̀ kakadoi dali dọ e na tin na ojlẹ de, ojlẹ lẹ, po odá de po; podọ whenuena yè ko basi opòdo gbigbà huhlọn omẹ wiwé lẹ tọn tọn de hanyanhanyan, onú he lẹpo na yín tadóna” (DANIẸLI 12:6-7).

Dinvie, kọ̀ndopọ́ he tin to Owéfọ Owé Wiwé mẹ tọn awe helẹ mẹ, ma sọgan yín núhe go yè na dè nukun sẹ̀ sọn gba. Na to ojlẹ Daniẹli tọn mẹ, Angẹli lọ sọgan zé alọ Etọn awelẹ hlan olọn, na yè ma ko hùn owé lọ wutu, enẹwutu, e ma ko tin to alọ Etọn mẹ to whenuena É whlé gbọn Ewọ He tin togbẹ̀ kakadoi dali gba. Podọ to Owé Osọhia 10 tọn mẹ, adusilọ Etọn kẹdẹ wẹ É zé hlan olọn, na owé núdabla tọn he yè ko hùn dote lọ tin to alọ Etọn awetọ lọ mẹ wutu, É sọ whlé gbọn Ewọ he tin to ogbẹ̀ kakadoi dali. Enẹ lọ sọgbè. Do ayi e go, yẹwhegán Daniẹli mọ núdohiamẹ lọ yí dọ sọn ojlẹ he mẹ yè na dlẹnalọdo whiwhlé lọ kaka jẹ opòdo etọn lọ tọn, whenẹnu wẹ huhlọn ewọ he na và omẹ wiwé lẹ lọ tọn na wá opòdo to owhè atọ̀n-dá mẹ. Enẹwutu, yè dọ hlan Johanu dọ, “ojlẹ ma na tin ba.” Awelẹ pó sọgbè. Na sọn ojlẹ nẹ mẹ wẹ hihia lọ ko to mizọn-mizọn ji hlan opòdo na nukunhunhun he lọ tọn.

Do ayi e go, Oklunọ lọ jẹte wá odò kẹdẹdi Angẹli Alẹ̀nù tọn lọ, bo sọ lì taidi kinnikinni de. Ṣigba to ehe lọ godo, Ewọ na do Ede hia hlan omẹ fọtọ́n-kantọ̀n-konukun-ẹnẹ lẹ di Lẹngbọvu he yè dètana dọ Fligọ̀tọ yetọn. Podọ húnhún owé lọ tọn yèdọ awelẹ ko yín didọ, yèdọ Kinnikinni lọ po Lẹgbọvu lọ po (OSỌHIA 5:5- 6) to asiko nẹ mẹ omẹ didè to Islaẹli mẹ na nọ pọ́n hlan Ewọ Mẹhe yé sówhán lọ (ZEKALIA 12:10) podọ to vivọnu devizọ́n yẹwhegán awelẹ tọn, omẹ didè sọn whẹndo wiawe lẹ mẹ nasọ bẹ́ yédelẹ plidó Osó Ziọni tọn lọ ji. Podọ to asiko dopolọ mẹ wẹ Islaẹli na flín Mẹsia yétọn, whenẹnu wẹ yé na mọdona omẹ he hunkọ agọjẹdoklistigotọ lọ yín, podọ to enẹgodo, alẹ̀nù he ko tin ṣẹnṣẹn ewọ po Islaẹli po tọn po otò alabia tọn lẹpo na yín gbigbá to asiko nẹlọ mẹ (DANIẸLI 9:27)

Podọ to enẹgodo, owhè atọ̀n-dá nukunbibia daho vivọnu asiko he lọ tọn tọn. Dinvie, nado do núlilá núdidọ angẹli ṣinawetọ lọ tọn tọn to ota 10 lọ mẹ ko yín didohia dote na ojlẹ lọ, whenuena yè na to ahọludù lọ lá (OSỌHIA 11:15). Enẹwutu, ehe lọ to hódọ do “ogbè” angẹli ṣinawetọ lọ tọn go. Do ayi e go, whẹ̀dida kẹdẹ wẹ pẹ̀ngbè ṣidopo tintan tọn he jẹnukọn lẹ, ṣigba yé matindo núlilá de kavi ogbè de gba.

Kẹdẹdilé mí tindo kàndeji dogbọn ogbè angẹli ṣinawetọ lọ tọn hlan whèta agùn godogodo tọn lọ tọn dali dó, yè hẹn núdabla he tin to Ohó Jiwheyẹwhe tọn mẹ lẹpo zùn yinyọ́nẹn podọ Agùn Asivu lọ tọn na wá pipégan etọn mẹ, bo na to sisè, bo nasọ nátó awhágbè zángbodoawe mẹ tọn he to didọmọ, “Do ayi e go, Asisúnọ ja! Mì tọ́nyì pé É!”, onú dopolọ wẹ dọ to ogbè angẹli ṣinawetọ lọ tọn gbè, yè na dègbè núlilá Ahọludù tọn lọ tọn.

Dinvie, angẹli agùn ṣinawetọ lọ tọn na dọ owẹn vọjladó tọn godogodo tọn lọ kẹdẹdi Owé OSỌHIA 3:11-22). Gbọn devizọ́n etọn dali, núdabla he whlá to Alẹ̀nù Hóhó po Yọ́yọ́ po mẹ sọn núhe jọ̀ to Owé Genẹsisi tọn mẹ kaka jẹ owéfọ godogodo tọn to Owé Osọhia tọn mẹ lẹpo yín hinhẹnzùn yinyọ́nẹn. Do ayi e go, to Owé Osọhia 10 tọn mẹ, yè ma dọ núdepope dogbọn núdabla Ohó Jiwheyẹwhe tọn he dóna yín hinhẹnzùn yinyọ́nẹn lẹ tọn dali gba, ṣigba Owé Wiwé dọhó do kọ̀ndopọ́ he kàn núdabla gbọnvo de tọn dali, dọ, “… whenuena é na ṣẹ̀ do kúnkún ji, yè na dotana núdabla Jiwheyẹwhe tọn lọ.” Kẹdẹdi Owé KOLOSINU 2:2 tọn mẹ, Klisti wẹ núdabla Jiwheyẹwhe tọn dopo gẽ to agbasalan mẹ. To Klisti mẹ, titò whlẹngan Jiwheyẹwhe tọn tọn lẹpo ko ṣẹ̀ bo sọ to awuwlé nado dóalọte, kẹdẹdilé É ko hùn in dohia hlan devi Etọn yẹwhegán Alẹ̀nù Hóhó mẹ tọn lẹ dó, podọ ga hlan apọsteli devi Etọn Alẹ̀nù Yọ́yọ́ mẹ tọn lẹ.

Do ayi e go, yè ko lá Agùn Alẹ̀nù Yọ́yọ́ mẹ tọn po núdabla Jiwheyẹwhe tọn lọ po sọn whẹ́whẹ́whenu, dilé Paul wlán dó, dọ, “Podọ matin núdindọn, daho wẹ núdabla jijọ-di-Jiwheyẹwhe tọn: yè yí Jiwheyẹwhe hia to agbasa mẹ …” (1 TIMỌTI 3:16; po devodevo lẹ po). Do ayi e go, Islaẹli kẹdẹ wẹ yín mẹhe ma sọgan mọ dai kavi ma sọ sọgan mọ núdabla he lọ kaka jẹ egbé. To whenẹnu núdabla Jiwheyẹwhe tọn to Klisti mẹ he yè mọdona jẹagọ̀, nado dọ, dọ, Klisti wẹ Mẹssia yetọn, na yín hinhẹnzùn yinyọ́nẹn hlan yé. Kaka jẹ asiko nẹ mẹ, núṣinyọnnú Mọse tọn gbẹ́sọ tin to ayiha yetọn lẹ ji (2 KỌLINTINU 3:15-16), ṣigba to ojlẹ nẹ lọ mẹ, yè na dè núṣinyọnnú lọ sẹ̀ bọ Klisti na yín yinyọ́nẹn to nukun yetọn mẹ. Whenuena angẹli ṣinawetọ lọ, yèdọ kẹdẹdi Osọhia 10 lọ tọn, na Osọhia 11 lọ tọn ṣẹ̀ do kúnkún, enẹ lọ na jọ̀. To ojlẹ nẹ lọ mẹ, núlilá lọ na tọ́njẹgbonu podọ enẹwutu, núdabla Jiwheyẹwhe tọn lọ na mọ pipé etọn.

Johanu po owé pẹvi lọ po

“Ogbè he yẹn sè sọn olọn mẹ sọ vọ́ dọ hlan mi, dọmọ, Yì yí owé pẹvi he hùn dai to alọ angẹli he ṣite to ohù ji podọ to aigba húhú ji tọn mẹ. Yẹn sọ yì angẹli lọ de, bo dọ hlan ẹn, dọ, yí owé pẹvi lọ na mi. É sọ dọ hlan mi, dọ yí i, bo dù i; e na hẹn homẹ towe vẹ́, ṣigba e na vivi to onù towe mẹ di owín. Yẹn sọ yí owé pẹvi lọ sọn alọ angẹli lọ tọn mẹ, bo dù i; e sọ vivi to onù ṣie mẹ di owín: lé yẹn sọ dù i vọ̀, homẹ ṣie vẹ́. É sọ dọ hlan mi, dọ, Hiẹ ma na nọma vọ́ dọdai dọ to gbẹtọ susu nukọn gba podọ to akọta susu nukọn, podọ to ogbè susu mẹ podọ kavi to ahọlu susu nukọn gba” (OSỌHIA 10:8-11).

Sọn ohó he lọ mẹ, vivẹnudido nado dù owé pẹvi he lọ tin to hinhọ́nnu. Dọpọ́n mọhunkọ tọn lẹ yín didohia na pọ́ndego gbọn yẹwhegán Ezekiẹli dali (EZEKIẸLI 2:8- ; EZEKIẸLI 3:3). Asiko awelẹ to ninọ̀mẹ apajlẹ tọn mẹ, yè dohia mí dogbọn omẹ Jiwheyẹwhe tọn nẹlẹ tọn dali, dọ, yé dóna dù owé lọ jẹnukọn, enẹ wẹ nado dọ, dọ yé dóna yí Ohó Jiwheyẹwhe tọn do ayiha yetọn titi lẹ mẹ whẹpo yé nido dọ Ẹ hlan omẹ he pò lẹ. To ehe godo, númọtọ lọ dọmọ, dọdai lọ na tin to akọta lẹ po ahọlu lẹ po ji. Mì jale bo payi e go, yè ma dọ to ofi dogbọn Wẹndagbe lilá dali gba, ṣigba dogbọn dọdai to akọta lẹ nukọn dali. Vogbingbọn daho de wẹ enẹ lọ. Do ayi e go, yẹwhegán awelẹ ma na dọyẹwhehó hlan akọta lẹ gba, adavo hlan Islaẹli ṣigba bo na dọdọdai do akọta lẹ ji. (OSỌHIA 11). Dinvie, yè ko to Wẹndagbe madopòdo lọ lá hlan akọta lẹ kẹdẹdi okunnu de (MATIU 24:14). Ṣigba to devizọ́n yẹwhegán awelẹ tọn whenu, LÉ WẸ OKLUNỌ DỌ na tọ́njẹgbonu wá akọta he yè na yí azọ̀nylankan talala do hò lẹ ji.