Ota wiawetọ lọ yín tadèna jẹagọ̀ pẹde gbọn Biblu-plọ́nmẹtọ lẹ dali. Na tùnmẹ dogbọn yọnnu tọn dali yín alọdlẹndo sọn Islaẹli mẹ, sọn Malia ji kaka jẹ agùn lọ ji.

To núyiwà he lọ lọsu mẹ, mí dóna nọ wunzẹn talala bo nasọ hia tùnmẹ lẹpo jẹ. Podọ eyín tùnmẹ de tin he ma sọgbè kẹdẹdilé odohia te, bé whenẹnu núde tin he ma sọgbè to finẹ. Do ayi e go, tadèna he mí ko mọdona jẹ egbé, ma ko sùwhẹ̀na ohó lọ gba. Enẹwutu, mí mọ bọ yè wlán to bibẹnu lọ, dọ,

“Ohia daho de sọ yín mimọ to olọn mẹ; yọnnusi he yè yí owhè do dòaṣọ̀na de, osùn sọ tin to afọ etọn glọ́, ojẹgbakun sunwhlẹvu tọn wiwawe sọ tin to ota etọn: lé é mọhò, é dawhá, ajlù ovi tọn hẹn ẹn, é sọ tin to awufiẹsa mẹ nado jivi” (OSỌHia 12:1-2).

Bé mẹde tin he sọgan lẹn dọ ohó he lọ to alọdlẹndo Malia po jiji Jesu tọn po wẹ? Bé to whenẹnu, mí dóna mọdona dọ yè do núhe na wá sọawúhia to nukọn mẹ lẹ po ehe ko jọ̀ dote lẹpo hia hlan Johanu to osó Patmọsi tọn ji. Podọ núyiwà he yè dlẹnalọdo dogọ́ lẹ ma yín ṣiṣẹ̀ po Malia po kavi po Jesu po gba. Do ayi e go, Malia ma yín dindọn yì biọ zùngbo mẹ gba, podọ yè ma sọ zé Jesu yì olọn to jiji Etọn godo gba. Na Ewọ fó fligọ̀zọ́n Etọn whẹ́, bo fọ́n sọn oṣiọ lẹ mẹ bo sọ hẹji yì olọn. Do ayi e go, yè ma tlẹ dọ whladopo lọsu to whenuena yè dlẹnalọdo É taidi hẹ Enọku kavi Elija dogbọn “bẹ́yìlọnmẹ” kavi “zizéyì” dali gba, adavo dọ, É hẹji yì olọn, enẹwutu wẹ mí ma do tindo azán oflin tọn na “Jiyìyì Klisti tọn” tọn gba.

To Alẹ̀nù Hóhó mẹ, yè dọhó do Islaẹli go whlasusu gbọn Jiwheyẹwhe dali di yọnnu he tin to alẹ̀nùnù mẹ hẹ Ẹ (JELEMIA 3:6, 11; HOSEA 2:4; po owéfọ devodevo lẹ po). Do ayi e go, Jiwheyẹwhe nọ zán pọ́ndego jọwamọ lẹ nado ná tùnmẹ gbigbọ mẹ tọn lẹ. Enẹwutu, É dọmọ, “Yẹn bo nasọ dà we hlan dẽ nugbowà mẹ…” (HOSEA 2:20), podọ “… na hòmẹ Oklunọ tọn hùn do ogo we, yè nasọ wléalọ hẹ aigba towe” (ISAIA 62:4). To Owé ISAIA 54:5-10 tọn mẹ, Oklunọ dọ pannukọn Islaẹli dọmọ:

“Obasitọ towe wẹ asú towe; Oklunọ awhànpa lẹ tọn wẹ oyín etọn; Omẹflitọ towe, Omẹ Wiwé Islaẹli tọn: Jiwheyẹwhe aihọn lẹpo tọn wẹ yè na nọ ylọ ẹ. Na Oklunọ ko ylọ we di yọnnu he yè gbẹ́dai, he yè hẹn hòmẹgblena to gbigbọ mẹ, podọ di asi yọpọ whenu tọn whenuena yè gbẹ́ we, wẹ Oklunọ towe dọ…”

To Alẹ̀nù Yọ́yọ́ mẹ, yè dọhó hlan mí dogbọn Asivu po Asisúnọ po tọn dali, podọ owé (JOHANU 3:29, tọn po owéfọ devodevo lẹ po), podọ to Owé Matiu 25 tọn mẹ dogbọn alọwiwle dali. Do ayi e go,yọnnu he Johanu mọ lọ ma sọgan yín fi devo de tọn hú Agùn Alẹ̀nù Yọ́yọ́ mẹ tọn, ehe to ede mẹ ko bẹ́ po Islaẹli po to Jelusalẹm to aigba Ju lẹ tọn ji. Kọ̀ndopọ́ Jiwheyẹwhe tọn po Omẹ Etọn lẹ po kẹdẹdi asi Etọn to wanyin Etọn po kọ̀ndopọ́ hẹ Agùn Etọn po dohia (EFESUNU 5:29-32). Oklunọ Jesu do jinukún Ohó Etọn tọn do ohò Agùn Etọn tọn mẹ. Enẹwutu, yè dè mí tọ́njẹgbonu to ninọ̀mẹ vọ́ji tọn de mẹ di ovisnnu po viyọnnu Jiwheyẹwhe lẹ po.

Dinvie, owhè he yè do dóaṣọ̀na Agùn lọ to alọdlẹndó Mẹflitọ Lọsu, yèdọ Mẹhe yín Owhè Dódó tọn. To Alẹ̀nùnù Yọ́yọ́ lọ whenu, mí yín mẹdóaṣọ̀na to Hinhọ́n Etọn po yózò Etọn po mẹ.

Do ayi e go, osùn he tin to afọ etọn glọ́ to didohia dọ Agùn lọ nọte gligli do dòdó Ohó wiwé Alẹ̀nù Hóhó mẹ tọn. Dilé osùn nọ yí hinhọ́n owhè tọn zán dó, mọwẹ Alẹ̀nù Hóhó yí hinhọ́n Alẹ̀nù Yọ́yọ́ tọn zán dó to hinhẹn ṣẹ̀ ohó dọdai tọn he ji Agùn lọ nọte do tọn (EFESUNU 2:20-22).

Ojẹgbakun he gọ́na sunwhlẹvu wiawe lẹ to didohia núplọ́nmẹ apọsteli wiawe lẹ tọn, na enẹ wẹ yè do ṣinyọn jẹgbakun na Agùn Alẹ̀nù Yọ́yọ́ tọn lọ. Podọ sunwhlẹvu ṣinawe he tin to alọ Oklunọ he fọ́nsọn oṣiọ lẹ tọn mẹ wẹ angẹli-wẹnzagun ṣinawe he yè dohlan agùn ṣinawe lẹ lọ (OSỌHIA 1:20). Sunwhlẹvu wiawe he tin to jẹgbakun etọn go to didohia dọ Agùn Asivu lọ tọn jẹ na gbèdidè ahọludù olọn tọn, bo sọ tindo núplọ́nmẹ nugbo apọsteli wiawe lẹ tọn (OWALỌ 2:42). Kẹdẹdi kunnudidè Owé Wiwé lẹ tọn, Agùn Alẹ̀nù Yọ́yọ́ tọn na gọ̀yì dòdónu núplọ́nmẹ po wiwà apọsteli lẹ tọn po ji jẹnukọnna wiwá Klisti tọn (MATIU 17:11; OWALỌ 3:19-21, po owéfọ devodevo lẹ po).

Dogbọn yọnnu lọ tọn dali, yè dọ ajlù ovi tọn hẹn ẹn, bo sọ tin to dọpọ́n awúfiẹsa vijiji tọn mẹ. Ehe lọ sọ to oyẹ jọwamọ yọnnu he to jinukún de yí, podọ to asiko he jẹ lọ mẹ, ewọ na ji ogbẹ̀ yọ́yọ́ de. Enẹwutu, mí tindo zinzán gbigbọ tọn de. Do ayi e go, awhli didè he to gbeji de wẹ Malia nado kẹalọyí jinukún olọn mẹ tọn lọ, enẹwutu wẹ Ohó lọ do lẹzùn agbasalan – yè ji Ovi Jiwheyẹwhe tọn. To Owé GENẸSISI 3:15 tọn mẹ, yè sọ ylọ ẹ dọ yọnnu podọ to Owé JOHANU 2:4 tọn mẹ ga; podọ ga, yè sọ ylọ ẹ dọ awhli to gbeji de to Owé ISAIA 7:14 tọn po Owé MATIU 1:22-23 tọn po mẹ. Mọdopolọ wẹ yè dọhó do Agùn lọ go dó kẹdẹdi yọnnu podọ di awhli to gbeji wiwé de (2 KỌLINTINU 11:2). Ewọ lẹzùn yọnnu to whenuena jinukún olọn mẹ tọn sọn Ohó Jiwheyẹwhe tọn mẹ yín didóai do é mẹ. Podọ sọn ewọ mẹ wẹ ovi – sunnu lọ, yèdọ awhànpa awhàngbatọ lẹ tọn na tọ́njẹgbonu wá. Do ayi e go, ohógo he yín “ovi – sunnu lọ” to hódọ do whinwhẹ́n gbigbọ mẹ tọn de ji. Na titò Jiwheyẹwhe tọn po Agùn Etọn tọn po na wá gbèsisọ mẹ, ṣigba to ninọ̀mẹ etọn godo tọn mẹ, e na wàzọ́n dopolọ po piplimẹ Islaẹli tọn po ga. Whenuena Jiwheyẹwhe ylọ Islaẹli jẹgbonu sọn Egipti nado yín Agùn Etọn, É zán ohógbè he yín “Ovisunnu-plọ́nji lọ”. Tọn “… Lé wẹ Oklunọ dọ, Islaẹli wẹ visunnu ṣie, oplọ́nji ṣie: yẹn ko sọ dọ hlan we dọ, Gbọ visunnu ṣie ni yì, na ewọ nido sẹ̀n mi; …” (EKSỌDUSI 4:22-23).

To Owé ISAIA 66:6-7 tọn mẹ, mí mọ odohia mọhunkọ tọn kẹdẹdi ehe tin to Osọhia 12 he lọ tọn mẹ, dọ, “Whẹpo é wá ajipanu, é ko jivi; whẹpo awúfiẹsa etọn wá, é ko ji ovisunnu de”.

To owéfọ he lọ mẹ, mí mọ ohó he jẹ hẹ ovi – sunnu lọ, podọ to afọ he jẹgodona ẹn mẹ, yè dọ hlan mí dogbọn vọ́ji Islaẹli tọn gbigbọ mẹ tọn tọn dali, dọ, “Mẹnu wẹ sè onú he hunkọ? Mẹnu wẹ mọ onú he hunkọ? Bé yè na hẹn aigba wú onú jẹgbonu to azán dopo mẹ? Kavi yè sọgan ji akọta to whladopo? Na lé Ziọni jẹ ajipanu gẽ wẹ, e ji ovi etọn lẹ” (ISAIA 66:8).

To owéfọ Owé Wiwé lẹ tọn he mẹ, mí mọ onú awe he yè ylọ dogbọn ovi – sunnu lọ dali podọ ga dogbọn otò lọ blébu he yè ji whladopo lọ dali. Piplimẹ Ju lẹ tọn na yín awhanpa de, bọ oylọ jẹgbonu omẹ fọtọ́n-kantọ̀n-konukun-ẹnẹ lẹ tọn tọn to owhè atọ̀n-dá mẹ, ṣigba osọhia Mẹssia lọ tọn na sọawúhia to azán dopo gẽ de ji. To otẹn dopolọ mẹ podọ to gànhiho dopolọ mẹ, yé na pọ́n hlan Ẹn, Ewọ Mẹhe yé ko sọwhán bo nasọ mọ ogbẹ̀ yí sọn Jiwheyẹwhe de (HOSEA 6:1-3).

Whladopo he ovi – sunnu lọ na yín jiji jẹnukọnna Bẹ́yìlọnmẹ, whenẹnu wẹ ewọ na yín jiji to gọ́fla apájlẹ Klisti tọn he pégan lọ mẹ, dlagọni ota ṣinawenọ lọ na wá tin agọ̀do Agùn lọ go, “dlagọni lọ sọ ṣite to nukọn yọnnusi he wléawu bo to ovi na ji lọ tọn, nado hù ovi etọn sunnu dù lé yè ji i” (OSỌHIA 12:4). Do ayi e go, yè ko yàn Satani, dlagọni hóhó lọ jẹte sọn olọn mẹ (JOHANU 12:31; LUKU 10:18), bọ é ko sọ zé ofìn etọn dai, bọ nọtẹn etọn hóhó lọ sọ tin to aigba ji to ofi (OSỌHIA 13:2). Dinvie, ehe lọ to ohódọ do “aisintẹn” kẹ̀ntọ Jiwheyẹwhe tọn lọ tọn go, yèdọ ogán kẹ̀ntọ Islaẹli tọn podọ Agùn Jesu Klisti tọn lọ tọn.

Dogbọn yọnnu lọ tọn dali, yè dọ, dọmọ, “É sọ ji ovisunnu de, mẹhe na nọ yí ogànpò do hẹn akọta lẹpo sẹ̀n: yè sọ wlé ovi etọn yì Jiwheyẹwhe de, podọ do ofìn etọn kọ̀n” (OSỌHIA 12:5). Do ayi e go, Islaẹli ma na yín máhẹtọ to bẹ́yìlọnmẹ mẹ gba, na lẹnvọjọ yetọn do Klisti Mẹssia lọ de na sọawúhia to godo he yè ko zé Agùn Asivu lọ tọn yì.

Do ayi e go, e nọ yín ayajẹnú daho de nado mọ kándeji he Gbigbọ Wiwé yí do Ohó lọ ji. Yè dè ovi – sunnu lọ nado dùgán do akọta lẹ ji, ṣigba é dóna yín zizéyì olọn mẹ jẹnukọn whẹ́. Gbèdidè pipé lọ wẹ yín ehe: Jẹnukọn, Bẹ́yìlọnmẹ po Núdùdù Alọwle Hunwhẹ lọ tọn po hẹ Asivu lọ podọ hẹ Asisúnọ lọ to olọn mẹ; podọ to enẹgodo, ahọludù hẹ Klisti to aigba ji. Enẹwutu, mì dóna payi e go dọ, pagbè nado hẹn akọta lẹ sẹ̀n yín niná hlan awhàngbatọ lẹ. E ma yín hlan Mẹfligọ̀tọ lọ kẹdẹ gba, adavo hlan Mẹfligọ̀ he yè ko dè lẹ lọ ga. Enẹwutu, yè wlán ẹn dọ, “Ewọ he gbawhàn, bo sọ yí azọ́n ṣie whlá jẹ pòdo, wẹ yẹn na ná huhlọn to akọta lẹ ji: ewọ nasọ yí opò ogàn tọn do hẹn yé sẹ̀n; …” (OSỌHIA 2:26-27).

Dinvie, ṣavi nado tindo wuntùntùn pagbè he lọ tọn dagbedagbe tin to ota 12 lọ lọsu mẹ. Na to Bẹ́yìlọnmẹ ovi – sunnu lọ tọn godo, yọnnu he yín Agùn lọ, họ̀nyì zùngbo mẹ na ojlẹ owhè atọ̀n-dá tọn. “Yọnnusi lọ sọ họ̀n yì zùngbo mẹ, fie yè ko wléawu otẹn tọn dai nệ te sọn Jiwheyẹwhe de, na yè nido to núdùdù ná ẹn to finẹ họ̀ azán fọṣidopo e lán kandeko” (OSỌHIA 12:6).

To Owé Osọhia tọn lẹpo mẹ, mí mọ ohógbè dopolọ he tin to oló mẹ lẹ, yèdọ ehe tin to ninọ̀mẹ he mẹ Oklunọ dọhó do kẹdẹdi Ovi gbẹtọ tọn to devizọ́n dọdai Etọn tọn mẹ, dilé mí mọ dó to wẹndagbe lẹ mẹ. Enẹwutu, tùnmẹ podọ tadèna nugbo he yè zéwhlá to apájlẹ po ohia lẹ po ma sọgan yín hùnhùndohia hlan omẹ lẹpo gba kẹdẹdi ojlo Mẹplọ́ntọ lọ tọn, adavo hlan hodotọ Etọn he yè ko dè na lẹ kẹdẹ. Whenuena É to hódọ hlan núplọ́ntọ Etọn lẹ, Oklunọ dọmọ, “Na mìwlẹ wẹ yè ná nado yọ́n onú jawu ahọludù olọn tọn, ṣigba yè ma ná yewlẹ gba” (MATIU 13:11).

“Onú helẹ pó wẹ Jesu dọ hlan gbẹtọ lẹ to oló mẹ; é ma sọ dọhó de hlan yé matin oló de: Na ehe yè dọ gbọn yẹwhegán lọ dali nido di, dọmọ, Yẹn na kẹ̀ onù ṣie to oló mẹ; Yẹn nasọ dọ jẹgbonu onú he sọawúwhlá sọn dòdó aihọn tọn” (MATIU 13:34-35).

Didè jẹ odò godogodo dlagọni lọ tọn jẹ aigba ji sọn olọn mẹ
Avùnhiho etọn pannukọn Mikaẹli po aijijẹ etọn po

To Bẹ́yìlọnmẹ whenu, Klisti Mẹflitọ lọ, na zé awhànpa plọ́nji Mẹfligọ̀ he ko tindo dọpọ́n gbèsisọ yetọn tọn to whenẹnu lẹ jẹ Gigo olọn tọn mẹ. Whenẹnu Satani he yín mẹslẹtọ mẹmẹsunnu lẹ tọn na tindo jlọjẹ kaka jẹ asiko nẹ lọ mẹ biọ ninọ̀mẹ olọn tọn lẹ mẹ. Enẹgodo, yè na yàn ẹn jẹ odò mlẹnmlẹn jẹ aigba po angẹli etọn lẹ po.

“Awhàn de sọ tin to olọn mẹ: Mikaẹli po angẹli etọn lẹ po to avùnhò hẹ dlagọni lọ; dlagọni lọ sọ to avùnhò po angẹli etọn lẹ po, yé ma sọ gbawhàn; mọ otẹn ma sọ tin na yé to olọn mẹ ba. Yé sọ yàn dlagọni daho lọ jẹgbonu, odàn hóhó lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlán aigba ji, bo sọ yàn angẹli etọn jẹgbonu po é po” (OSỌHIA 12:7-9).

Dinvie, yè dọ hlan mí dọ angẹli-gán Mikaẹli po angẹli Jiwheyẹwhe tọn lẹ po hòavùn hẹ Satani po hodotọ etọn lẹ po. Do ayi e go, Jesu Klisti ko gbawhàn etọn mlẹnmlẹn to Kalvali (KOLOSINU 2:15), bo ma sọ sọgan pé hẹ ẹ whlãwetọ gbèdé ba. Enẹwutu, É na pé omẹ Etọn he É basi to apájlẹ Etọn titi mẹ lẹ to aslọ mẹ bo nasọ hẹn yé jẹ Alọwle Hunwhẹ Lẹngbọvu lọ tọn kọ̀n. Whenuena yé na to ojihẹ yì aga wẹ awhàn godogodo tọn he lọ na sọawúhia. Satani, mẹslẹtọ mẹmẹsunnu lẹ tọn, yèdọ kẹ̀ntọ he ji yè ko dù do lọ na jlo nado glọ́nalina oji yìyì lọ, ṣigba yè na dlán ẹn hlan odò gbọn Mikaẹli dali.

Do ayi e go, owéfọ Owé Wiwé mẹ tọn devo depope ma do kọ̀ndopọ́ he lẹ lọ hia to ninọ̀mẹ he wá hinhọ́nnú de mẹ di ehe hunkọ tọn gba. Ṣogan, ahọludù lọ ma ko ṣẹ̀ to ojlẹ nẹ lọ mẹ gba, na onú he jẹnukọn lọ wẹ yín Alọwle Hunwhẹ, enẹwutu wẹ e do yín lilá po ayajijẹ daho de po dọmọ,

“Yẹn sọ sè ogbè lélé de to olọn mẹ, to didọmọ, Dinvie wẹ whlẹngan, huhlọn, ahọludù Jiwheyẹwhe mítọn tọn, po huhlọn Klisti etọn tọn po wá: na yè ko yàn mẹslẹtọ mẹmẹsunnu mítọn lẹ tọn dlán odò, he nọ to owhẹ̀ yetọn jẹ to Jiwheyẹwhe mítọn nukọn to okle po ozán po” (OSỌHIA 12:10).

Jẹnukọn, yè dọhó do awhàngbatọ lẹ go kẹdẹdi onú dopo di “ovi – sunnu lọ”, enẹgodo, nukọnyìyì etọn tin to onú susu mẹ. “Yé sọ gbawhàn etọn na ohùn Lẹngbọvu lọ tọn wutu, podọ na ohó okunnu yetọn tọn wutu; yé ma sọ yinwanna gbigbọ yetọn kaka jẹ okú gba” (OSỌHIA 12:11). Dinvie, yise he to ogbẹ̀ yé he tindo e nugbonugbo lẹ tọn wẹ awhàngba to ewlọsu mẹ kaka jẹ awhàngbigba okú tọn ji (1 JOHANU 5). Na omẹ delẹ tin to aigba ji bo mọdona Ohó Oklunọ tọn lẹ, bo yí yé sè, bo nasọ tindo dọpọ́n núdepope he É dọ tọn. Enẹwutu, yisenọ nugbo lẹ ko kú po Klisti po bo sọ fọ́ntite po É po. Podọ ogbẹ̀ yetọn tin to kọ̀ndopọ́ mẹ po É po bo sọ yín whiwhlá to Jiwheyẹwhe mẹ (KOLOSINU 3:3). Enẹwutu, mẹdepope he jlo nado whlẹn ogbẹ̀ ede tọn, é na hẹn ẹn bú, ṣigba mẹdepope he hẹn ogbẹ̀ etọn bú na Ewọ tọn wutu, na mọ ẹn yí. Dopo to pagbè he yè ná hlan awhàngbatọ lẹ mẹ wẹ “… yín nugbonọ jẹ okú, yẹn nasọ ná ojẹgbakun ogbẹ̀ tọn lọ we” (OSỌHIA 2:10).

To ojlẹ he mẹ yè na zé awhàgbatọ lẹ yìji, yé na tin to nọ̀tẹn he yè ko wléawudai na yé to Gigo mẹ. Ewọ he to aliglọ́n, Gbigbọ Wiwé to Asivu lọ mẹ, yèdọ to ovi – sunnu lọ mẹ na yín didè sọn aliho to whenẹnu, na omẹ ylankan lọ nido do ede hia gbaungba (2 TẸSALONIKA 2). “Enẹwutu, mì to ayajẹ, mì olọn lẹ emi, po mì he nọnọ̀ yé mẹ lẹ po. Dindọ̀n hlan aihọnmẹnu lẹ, podọ hlan yé he tin to ohù mẹ lẹ, na Lẹgba ko jẹte wá mì de, po homẹgble daho po wutu, na é yọ́nẹn dọ whenu gli de wẹ é tindo” (OSỌHIA 12:12).

To ninọ̀mẹ nẹ he tindo opòdo ojllẹ tọn lọ whenu, homẹgble Satani tọn gbọn núplọ́nmẹ aihọn tọn agọ̀jẹdo-Klistigotọ lọ tọn dali na yín pinplán jẹagọ̀do yọnnusi he ji ovi – sunnu lọ, yèdọ ehe “yè wlé yì Jiwheyẹwhe de, podọ do ofìn etọn kọ̀n”. Do ayi e go, awhànpa he lọ ko wá oyọ́nẹn pipé Ovi Jiwheyẹwhe tọn tọn mẹ, hlan gbẹtọ he sọgbè de, hlan ojlẹnú tedidi gigọ́ Klisti tọn (EFESUNU 4:13). Awhàngbatọ lẹ wẹ Asivu he yè ji sọn Agùn he tin di yọnnusi he ko yí jinukún Ohó olọn tọn lọ tọn. Do ayi e go, Bẹ́yìlọnmẹ Asivu he na pé Asisúnọ lọ bo nasọ tin po É po to Alọwle Hunwhẹ kọ̀n dopo gẽ wẹ tin. Kẹdẹdilé yè dọhó do “Asivu” lọ go taidi onú dopo dó, mọdopolọ wẹ na ovi – sunnu lọ ga, ṣigba awhànpa he yè ko dè jẹnukọn nẹ lọ tọn wẹ omẹ didè lẹpo. Ehe lọ wẹ Agbasa Jesu Klisti tọn nugbo he tindo awutugonú susu lẹ lọ1KỌLINTINU 12:12-30

Do ayi e go, homẹgble Satani tọn to aijijẹ etọn godogodo tọn sọn olọn mẹ whenu na sinyẹn talala, “na é yọ́nẹn dọ whenu gli de wẹ é tindo.” Enẹ lọ wẹ ojlẹ he na tin to ṣẹnṣẹn zizéyì Asivu lọ tọn po didóai Ahọludù Owhè Fọtọ́n tọn po.

Na avùn tintan lọ tin pannukọn ovi – sunnu lọ, awetọ wẹ yín pannukọn yọnnu lọ, “Whenuena dlagọni lọ mọ dọ yè yàn ẹn hlan aigba, é dohomẹkẹn yọnnusi he jivi sunnu lọ. Yè sọ ná awà awe akùn daho de tọn yọnnusi lọ, na ewọ ni zlọn yì zùngbo mẹ, yì otẹn etọn mẹ, ofi he yè to núdùdù nệ te, na ojlẹ de, podọ ojlẹ lẹ, po odá ojlẹ de tọn po, sọn nukun odàn lọ tọn mẹ” (OSỌHIA 12:13-14). Oyẹ he lọ blébu tin to hinhọ́n mẹ. Enẹwutu, Agùn he mẹ Asivu lọ na tọ́njẹgbonu sọn na yín whiwhlá bo nasọ yín awúwlena to ninọ̀mẹ he yè ná Ẹn de mẹ to zùngbo mẹ.

Dinvie, ohógo “zùngbo mẹ” tọn yín yinyọ́nẹn hlan Bibluhiatọ lẹpo to kọ̀ndopọ́ hẹ “zizéwhlá” gbaungba to azán Mọse tọn lẹ mẹ, whenuena yè dè Islaẹli jẹgbonu sọn Egipti. To Owé NEHEMIA 9:21 tọn mẹ, yè dọ hlan mí dọ, “Nugbo, owhè kande wẹ hiẹ do yìn yé to zùngbo mẹ, yé ma sọ bà núde pò; avọ̀ yetọn lẹ ma dohó, podọ afọ yetọn lẹ ma sọ jí”.

Nado dlẹnalọdo Islaẹli, Oklunọ dọmọ, “Yẹn mọ Islaẹli taidi ovệnsinsẹ́n lẹ to zùngbo mẹ; yẹn sọ mọ otọ́ mìtọn lẹ di bibiatintan to ovòtin lọ mẹ to osã etọn tintan mẹ…” (HOSEA 9:10; JELEMIA 2:1-3). “Dinvie, mì plọ́n oló ovòtin tọn…” (MATIU 24:32). Ewọ sọ dọhó dogbọn Islaẹli he yè na ylọ do ninọ̀mẹ zùngbo mẹ tọn mẹ dali, “Enẹwutu, dayi e go, Yẹn na doklọ ewọ bo hẹn ẹn wá biọ zùngbo mẹ, bo sọ yí homẹmiọn do dọhó hlan ẹn” (HOSEA 2:14).

Onú lẹpo bọawuna Jiwheyẹwhe. Ewọ yìn Islaẹli họ̀ owhè kande to whenuena É dè yé tọ́njẹgbonu sọn Egipti mẹ, yé sunnusi fọtọ́n fọtọ́n donu núọntọ̀n hunkọ to ma lẹ̀n yọnnu lẹ po yọpọvu lẹ po (EKSỌDUSI 12:37). Ewọ gbẹ́sọ to dopolọ yín. Podọ dilé mí mọ winwlán dó, yè na yìn yọnnu-agùn lọ na ojlẹ owhè atẹ́n-dá tọn. Podọ awà akùn daho lọ tọn to alọdlẹndo Jiwheyẹwhe Lọsu He zé Omẹ Etọn lẹ hẹn. To kọ̀ndopọ́ mẹ hẹ Islaẹli, mí mọ winwlán he dọ,

“Di akùn he to adọ́ etọn wlú de, he to didẹlẹ́do to ovú etọn lẹ ta, dindlẹn awà etọn lẹ tọn, bẹ́ yé, zé yé hẹn to awàfun etọn lẹ ji: Oklunọ lọ kẹdẹ wẹ plán ẹn yì, podọ yẹwhe alọpade matin finẹ po é po gba. É hẹn ẹn hẹ́ ofi yìji aigba tọn lẹ ji, é bo sọ dù jideji oglegbo lọ tọn; é bo sọ hẹn ẹn gbọ́n owín sọn osé lọ mẹ, podọ amì sọn osé okẹ́nnọ lọ mẹ; anọ́sìnhiho oyìn lẹ tọn, po anọ́sìn lẹngbọ lẹ tọn po, po ojó lẹngbọvu lẹ tọn po …” (DEUTELONOMI 32:11-14).

Do ayi e go, psalmwlántọ lọsu dọhó do awà lẹ lọ go, dọ: “… Nugbo, oyẹ̀ awà towe tọn glọ́ wẹ yẹn na yí do basi fibẹ̀tado ṣie, kaka hẹngble lọ nado juwáyì” (PSALM 57:1).

“É na yí awà etọn lẹ ṣinyọn oji we, podọ to awà etọn lẹ glọ́ wẹ hiẹ na nọ din fibẹ̀tado te; …” (PSALM 91:4).

“Ṣigba hlan mì he dibusi oyín ṣie lẹ wẹ owhè dódó tọn na zẹ̀ po azọ̀nhẹngbọ po to awà etọn lẹ mẹ …” (MALAKI 4:2).

Mì sọ do ayi e go dọ, Satani na yín adinọ talala kẹdẹdilé é to dindọnsẹ̀pọ́ aijijẹ etọn godogodo tọn lọ dó, dọ, “Odàn lọ sọ tún osìn jẹgbonu sọn onù etọn mẹ to godo yọnnusi lọ tọn di otọ̀ daho de, na é nido yí otọ̀ lọ do zé yọnnusi lọ yì. Aigba sọ gọ́alọna yọnnusi lọ, aigba kẹ̀nù etọn, bo sọ zé otọ̀ lọ nù, ehe dlagoni lọ tún jẹgbonu sọn onù etọn mẹ” (OSỌHIA 12:15-16). Kẹdẹdi owé he lọ tọn, aṣẹpipa ahọlu aigba ji tọn lẹ tọn na sọawúhia bo nasọ zé otọ̀ homẹkẹn tọn lọ mì, yèdọ ehe yè do tin agọ̀do Agùn he tọ́nsọn sinsẹ̀nnọ lẹ de.

Whenẹnu wẹ dlagọni hóhó lọ na lẹ́ pannukọn yé he tọ́njẹgbonu wá to Islaẹli mẹ lẹ gbọn devizọ́n yẹwhegán awelẹ tọn dali to ojlẹ owhè atọ̀n-dá lọ tọn mẹ. Na yé yise bo sọ yín hiadogonanọ. Podọ yé yín jinukún Jiwheyẹwhe dopolọ tọn bo sọ tindo okunnuhó Jesu tọn to ojlẹ nẹ mẹ, dọ: “Dlagọni lọ gblehomẹ talala do yọnnusi lọ go, bo sọ tọ́n yì fùnawhàn hẹ ovi etọn he pò lẹ, ehe to osẹ́n Jiwheyẹwhe tọn yìn, bo sọ hẹn okunnu Jesu Klisti tọn go gligli lẹ” (OSỌHIA 12:17).

Do ayi e go, awhànpa atọ̀ntọ matindo núdepope nado wà po Kosi lẹ po gba, enẹ lọ yín didohia gbọn alọdlẹndo de dali, dọ, “Yé he to osẹ́n Jiwheyẹwhe tọn yìn, bo sọ hẹn okunnu Jesu Klisti tọn go gligli lẹ”. Dinvie, osẹ́n podọ gbèdidè Jiwheyẹwhe tọn yìn bibasi to kọ̀ndopọ́ mẹ hẹ Islaẹli kẹdẹ. Agùn lọ sọ tin to Klisti mẹ bo sọ yín whẹ̀sùna mlẹnmlẹn gbọn yise dali to whenẹnu (LOMUNU 10:4). Do ayi e go, osẹ́n-nátọ lọ ma wá nado hẹn osẹ́n gble gba, adavo nado hẹn osẹ́n dì, bo na zé ylando lẹpo hẹn bo nasọ jiya okú tọn he yín alè ylando tọn (LOMUNU 6:23). Kẹdẹdilé yè ko dọ ẹ dote dó, awhànpa atọ̀n helẹ tin kẹdẹdi titò whlẹngan tọn: Ovi – sunnu lọ, yọnnusi lọ po Islaẹli po. Podọ Satani sọ homẹgbledo yé go talala.