To bibẹ́nu ota kòtọ lọ tọn, yè dọ núhe jọ do Satani go hlan mí, yèdọ mẹhe yín dòdó onú ylankan lẹpo tọn, podọ kẹ̀ntọ Jiwheyẹwhe tọn. Ewọ na yín bibla bo sọ yín dindọ̀n dlán odò mapote mẹ. “Yẹn sọ mọ angẹli de jẹte sọn olọn mẹ ja odò, é tindo họ̀nhùngàn odò mapote lọ tọn, kọ̀gàn daho de sọ tin to alọ etọn mẹ. É sọ dè alọ bo hẹn dlagọni lọ, odàn hóhó lọ, he yín Lẹgba Satani, bo dogàn ẹn họ̀ owhè fọtọ́n, bo dọ́n ẹn dlán odò mapote lọ mẹ, bo súnúdo é, bo yí hiadonu do tlẹ́ ẹ, na é klọ akọta lẹ bà blo, kaka owhè fọtọ́n nado pé: to enẹgodo yè nasọ jo é dote whenu gli de” (OSỌHIA 20:1-3).

Kẹdẹdilé mí ko mọ dó to ota wiawe mẹ, yè ko dọ̀n Satani po hodotọ etọn lẹ po dlán aigba to ojlẹ jiyìyì Asivu lọ tọn tọn mẹ. Ṣigba to ofi, yè dọ hlan mí é na yín dindọ̀n dlán sọn aigba ji biọ odò mapote mẹ. Enẹwutu, yẹwhegán Isaia hopana mí dọ awhànpa goyítọ he zé ede yìji lọ tọn lẹpo, enẹ wẹ nado dọ, dọ, yé he tin hẹ Satani lẹpo, na yín mẹsáyana po aṣẹpatọ aihọn tọn he jẹagọ̀do Oklunọ lẹpo po plidopọ́ do ogànhọ̀ mẹ (ISAIA 24:21-23). Podọ Paul whlán dogbọn huhlọn po ogán helẹ po he ji yè ko dù do bo sọ to aglinjẹ gbọn Jiwheyẹwhe dali to Klisti mẹ tọn lẹ dali (KOLOSINU 2:15). Dinvie, huhlọn kẹ̀ntọ tọn he ji yè ko dù do helẹ pó gbẹ́sọ tin to ogbẹ̀ to agahomẹ. Enẹwutu wẹ Paul do wlánwé hlan yisenọ lẹ nado hoavùn gbigbọnọ he lọ. “Na e ma yín agbasalan po ohùn po wẹ míwlẹ to ahidi hẹ gba, ṣigba hẹ ogán lẹ, hẹ huhlọn lẹ, hẹ nukọntọ zinvlu aihọn he tọn lẹ, hẹ nútẹgbẹ̀ gbigbọnọ lẹ to otẹn he tin to olọn lẹ mẹ” (EFESUNU 6:12).

To Owé OSỌHIA 20:4 tọn mẹ, yè do núyiwà vivẹ titegbe awe delẹ hia mí, ehe na sọawúhia jẹnukọnna bibẹ́nu Owhè Fọtọ́n tọn. Tintan tọn, enẹ wẹ whẹ̀dida he na wá jẹnukọn de, nado dọ dọ, whẹ̀sùna na yín bibasi. Podọ awetọ lọ wẹ yín dọ, yé he yè hù to hùhùsúdo whenu lẹ to ojlẹ homẹkẹn tọn mẹ lẹ na gọ̀wá nọ̀gbẹ̀ whladopo dogọ́. “Yẹn sọ mọ ofìn lẹ, yé sinai to yé ji, yè sọ ná whẹ̀dida hlan yé, yẹn sọ mọ alindọn yé he yè gbòtana na okunnuhó Jesu tọn, po ohó Jiwheyẹwhe tọn po tọn wutu, podọ yé he ma ko litaina kanlin lọ, podọ na boṣiọ etọn, kavi yé he ma ko yí ohia etọn do nukọn yetọn, kavi to alọ yetọn mẹ; yé tin to ogbẹ̀, bo sọ to ahọludù hẹ Klisti họ̀ owhè fọtọ́n” (OSỌHIA 20:4).

To owéwinwlán he mẹ, mí ma mọ dọ yè dọhó de dogbọn Bẹ́yìlọnmẹ dali, kavi dogbọn Núdùdù Alọwle Hùnwhẹ tọn dali gba, na núhe mí hia to ota 20 he lọ mẹ sọawúhia to Bẹ́yìlọnmẹ godo podọ to Núdùdù Alọwle Hùnwhẹ tọn godo. Na Ohó Jiwheyẹwhe tọn sọgbè to ninọ̀mẹ popo mẹ. Dinvie, mí tindo nukunnumọjẹnugo godogodo tọn lọ to ofi dogbọn hùhùsúdo yé he yín nugbonọ to ojlẹ nukunbibia tọn mẹ lẹ bọ yé ma sọ kẹalọyí ohia lọ, kavi bo sọ litaina boṣiọ lọ gba.

Podọ whẹ̀dida he tọn yè dọ to ofi, na sọawúhia jẹnukọnna bibẹ́nu Ahọludù lọ tọn, bo ma nasọ yín wuwlu po Whẹ̀dida Ofìn Wéwé lọ tọn po gba, yèdọ to whenuena oṣiọ lẹpo na fọ́ntite bo nasọ yín mẹdawhẹ̀na.

Yẹwhegán Daniẹli wlán dogbọn whẹ̀dida he sọgbè lọ tọn dali bo sọ dọhó dólé, dọ, “Yẹn to pinpọ́n yè do zé ofìn dlán ai, bọ mẹde he yín hóhótọ azán lẹ tọn sinai: avọ̀ etọn yín wéwé di osìn-agó, podọ odà ota etọn tọn taidi lẹngbọfún wiwé; ozòlọ miyọnnọ lẹ wẹ ofìn etọn, podọ kẹkẹfọ etọn miyọn jijji. Asisà miyọnnọ de tọ́njẹgbonu sọn ewọ nukọn wá: fọtọ́n fọtọ́n lẹ to devizọ́nwà hlan ẹn, podọ fọtọ́n ao donu fọtọ́n ao ṣite to ewọ nukọn: yè zé whẹ̀dida lọ dai, yè sọ hùn owé lẹ… Yẹn sọ mọ to númimọ ozán lọ mẹ tọn lẹ mẹ, bo, dayi e go, mẹde po aslọ olọn tọn lẹ po taidi visunnu gbẹtọ tọn de wá finẹ, ewọ sọ wá yèdọ jẹ hóhótọ azán lẹ tọn lọ de, yé sọ hẹn ewọ wá sẹpọ́ ewọ nukọn. Yè sọ yí ahọluigba na ẹn finẹ, po gigo po, po ahọludù de po, na gbẹtọ lẹpo, po akọta lẹ po, po ogbè lẹ po nado nọ sẹ̀n ẹn: ahọluigba madopòdo de wẹ ahọluigba etọn, he ma na juwáyì, podọ ahọludù etọn, enẹ he ma na yín vivà” (DANIẸLI 7:9-10, 13-14).

Dinvie, eyín Jiwheyẹwhe yín didohia taidi Hóhótọ Azán lẹ tọn lọ, enẹ ma to didohia dọ Ewọ yín tọ́gbó-tọ́gbó he ko poyọnho de gba; na Gbigbọ wẹ Ewọ, É ma tindo bibẹ́nu kavi vivọnu gba. To ofi, yè do É hia di Whẹ̀datọ to aṣẹpipa Etọn he yìaga lọ mẹ, enẹwutu wẹ odà Etọn do wé di lẹngbọfún. Do ayi e go, whẹ̀datọ daho lẹ nọ jló É bo sọ nọ ṣinyọn odà wéwé de do ota. Podọ awúsọhia Oklunọ Jiwheyẹwhe tọn to ninọ̀mẹ he lọ mẹ kẹdẹdi Whẹ̀datọ to aṣẹpipa Etọn po jijẹ Etọn po dohia.

Podọ kẹdẹdidlé e te to Owé Osọhia tọn mẹ dó, mọdopolọ wẹ e te to hinhọ́nnu dó to Owé Daniẹli tọn mẹ, dọ whẹ̀dida he lọ na sọawúhia to opòdo owhèta he lọ tọn. Enẹwutu, yẹwhegán Daniẹli yì to tadèna he kàn apáwhé vivọnu lọ tọn to nukọnyìyì dinvie tọn mẹ, bo ma sọ yín to ahọludù owhè fọtọ́n lọ tọn godo gba, dọ, “Yẹn pọ́n to ojlẹ nẹ mẹ na ogbè ohó daho lẹ lọ tọn he azò lọ to didọ tọn wutu; yẹn to pinpọ́n yèdọ yè do hù gbékanlin lọ, bo sọ và agbasa etọn, yè sọ jó e nado yí miyọn do mẹ̀ ẹn. Podọ na pipòtọ gbékanlin lẹ lọ tọn tọn, yè yí ahọluigba yetọn yì: gãnṣo yè hẹn ogbẹ̀ yetọn lẹ dite na osã de po ojlẹ de po. Yẹn sọ mọ to númimọ ozán lọ mẹ tọn lẹ mẹ, bo, dayi e go, mẹde po aslọ olọn tọn lẹ po taidi visunnu gbẹtọ tọn de wá finẹ, ewọ sọ wá yèdọ jẹ hóhótọ azán lẹ tọn lọ de, yé sọ hẹn ewọ wá sẹpọ́ ewọ nukọn. Yè sọ yí ahọluigba na ẹn finẹ, po gigo po, po ahọludù de po, na gbẹtọ lẹpo, po akọta lẹ po, po ogbè lẹ po nado nọ sẹ̀n ẹn: ahọluigba madopòdo de wẹ ahọluigba etọn, he ma na juwáyì, podọ ahọludù etọn, enẹ he ma na yín vivà” (DANIẸLI 7:11-14).

Do ayi e go, Jesu Klisti He do Ede hia di Visunnu gbẹtọ na yí tẹnmẹ Etọn to whenẹnu bo sọ sinai to Ofìn Gigo Etọn tọn ji. “Ṣigba Ovi gbẹtọ tọn na wá to gigo etọn mẹ, po angẹli lẹpo po é po, whenẹnu wẹ é na sinai to ofìn gigo etọn tọn ji. Nukọn etọn wẹ yè na bẹ́ akọta lẹpo pli do: é nasọ klán yé dovò sọn yénọzo go, dilé lẹngbọhọtọ nọklán lẹngbọ etọn lẹ sọn gbọgbọẹ lẹ go dó” (MATIU 25:31-32).

To Owé Daniẹli tọn mẹ, owé lẹ yín hùnhùndonùvo, ṣigba e ma yín Owé Ogbẹ̀ tọn lọ gba. Na to finẹ, mí hia dogbọn gbékanlin he asiko yetọn yín didè na owhè po azán lọ po tọn lẹ dali. Podọ Visunnu gbẹtọ tọn lọ sọ sọawúhia to nukọn Hóhótọ Azán lẹ tọn tọn, bo yí huhlọn po gigo po, podọ ahọludù he na nọte kakadoi. Do ayi e go, onú helẹ pó ma yín mimọ to owé winwlán he kàn whẹ̀dida godogodo tọn lọ gba. Núhe tin to Owé Daniẹli tọn po Owé Matiu tọn po mẹ, dọhó na yédelẹ. Podọ to ota 7 Daniẹli tọn lọ mẹ, yè dọhó dogbọn owhè atọ̀n-dá nukunbibia tọn lọ tọn dali. To whenẹnu, ahọludù aihọn he lọ tọn lẹ na dóalọte, bọ Ahọludù olọn tọn nasọ yín didóai to aigba ji.

“Ewọ bo na nọ dọ ohó lẹ do Gigogán go, bo nasọ hẹn agbọ́pé mẹwiwé Gigogán tọn lẹ: ewọ bo nasọ lẹn nado diọ ojlẹ lẹ po osẹ́n lọ po; yè nasọ jó yé do alọ etọn mẹ kaka ojlẹ depolọ ojlẹ lẹ po odá ojlẹ de tọn po. Ṣigba whẹ̀dida na sinai, yé bo nasọ yí ahọluigba etọn yì, nado hùsúdo podọ nado và ẹ jẹ opòdo lọ. Podọ ahọludù lọ po ahọluigba lọ po, podọ kiklo ahọludù lẹ lọ tọn to olọn pete glọ́, wẹ yè na ná hlan gbẹtọ lẹ sọn mẹwiwé Gigogán tọn lẹ mẹ: ahọludù madopòdo de wẹ ahọludù etọn, ahọluigba lẹpo na nọ sẹ̀n bo sọ sètónuna ẹn” (DANIẸLI 7:25-27). Onú helẹ pó ma yín zinzán to whẹ̀dida godogodo tọn whenu gba, na bibẹ́nu pipé yọ́yọ́ de wẹ na ṣẹ̀ to aigba yọ́yọ́ de ji to whenẹnu.

To owéfọ Owé Wiwé tọn helẹ mẹ, yè ma sọ dọ núdepope dogbọn fọ́nsọnkú oṣiọ lẹpo tọn dali kavi dogbọn dindọ̀n godogodo tọn lọ tọn to miyọn hihla mẹ tọn dali gba, ṣigba yé dọhó do Visunnu gbẹtọ tọn go, yèdọ Mẹhe na dawhẹ̀ to ahọludù aigba ji tọn lẹ ṣẹnṣẹn, whẹpo É nado ṣẹ̀ Ahọludù Etọn olọn tọn lọ to aigba ji.

Ehe dopolọ sọ yín zinzán na Owé MATIU 25:34-40 tọn, yèdọ fie yè ma sọ hùn Owé Ogbẹ̀ tọn lọ donùvo te gba, kẹdidẹdilé e na nọ̀ to Whẹ̀dajan Ofìn Wéwé tọn lọ nukọn dó. Do ayi e go, yè tùnmẹ owéfọ Owé Wiwé mẹ tọn awe helẹ jẹagọ̀ dilé e tin to alọdlẹndo Ofìn Wéwé Whẹ̀dida tọn lọ dó. Enẹ lọ ma sọ sọgbè to alọdepope mẹ gba. Podọ odohia devo lẹ wẹ sọ yín dọ, e ma yín omẹ dopodopo gba, ṣigba yè dawhẹ̀na akọta he do dagbewà hia kavi he ma do dagbewà hlan mẹmẹsunnu lẹ gba, yèdọ Ju lẹ to ojlẹ hpomẹkẹn yetọn tọn mẹ. Mì sọ dayi e go, ehe na sọawúhia jẹnukọnna bibẹ́nu ahọludù lọ tọn, enẹwutu Ahọlu lọ wẹ Mẹhe to hódọ to ofi, e ma yín Whẹ̀datọ lọ gba: “Whenẹnu wẹ Ahọlu na dọ hlan yé mẹhe to adusilọ etọn mẹ lọ, dọmọ, Mì wá, mì donanọ Otọ́ ṣie tọn, mì dugú ahọludù he yè ko wléawu etọn dai na mì sọn dòdó aihọn tọn wá … Ahọlu nasọ gblọn, bo dọ hlan yé…” Dinvie, Ahọludù lọ Whenu wẹ Owhè Fọtọ́n tọn, e ma yín to madopòdo mẹ gba (1 KỌLINTINU 15:25).

Do ayi e go, yẹwhegán Isaia lọsu dlẹnalọdo whẹ̀dida he lọ, dọ, “É na dawhẹ̀ to akọta lẹ ṣẹnṣẹn, é na wọ́hẹ omẹ susu: yé nasọ yí ohi yetọn do tùn agbogọdọẹ: akọta ma to na zé ohi do akọta ji bà, mọ yé ma to na plọ́n awhànfùn bà” (ISAIA 2:4).

To whẹ̀dida he lọ kọ̀n, apọsteli wiawe lẹ na sinai po Oklunọ yetọn po bo nasọ dawhẹ̀na whẹndo wiawe Islaẹli tọn lẹ. “Jesu sọ dọ hlan yé, dọmọ, Nugbo wẹ yẹn dọ hlan mì, dọ, Mì mẹhe ko hodo mi to vọ́ji mẹ, whenuena Ovi gbẹtọ tọn na sinai to ofìn gigo etọn tọn ji, mìwlẹ ga na sinai to ofìn wiawe ji, bo to whẹ̀dana whẹndo wiawe Islaẹli tọn lẹ” (MATIU 19:28).

Whenẹnu omẹ Jiwheyẹwhe tọn sọn akọta lẹ mẹ na wá sinai hẹ Ẹ ga, bo nasọ dawhẹ̀na akọta lẹ jẹnukọnna ahọludù. “Mì ma yọ́nẹn dọ mẹwiwé lẹ na dawhẹ̀na aihọn? Eyín yè na dawhẹ̀na aihọn gbọn mì dali, bé mì yín mẹmajẹ nado dawhẹ̀na owhẹ̀hó he whèhúgan lẹ?” (1 KỌLINTINU 6:2). Enẹwutu, onú popo nọ sọawúhia to osã sisọ lọ mẹ po Jiwheyẹwhe po. Podọ núhe yè dọ dogbọn Núdùdù Alọwle Hùnwhẹ tọn kọ̀n dali na sọawúhia to finẹ, mọdoplọ wẹ to Ahọludù Owhè Fọtọ́n tọn whenu, podọ ga po whẹ̀dida alọpãlọpa lẹpo po.

Enẹwutu, mẹhe yè hù to nukunbibia mẹ, na yín máhẹtọ to fọ́nsọnkú tintan mẹ, bo nasọ yín máhẹtọ to Ahọludù lọ mẹ. Enẹwutu ga, yisenọ lẹpo dóna tindo ojló dagbe nado yín nugbonọ kaka jẹ okú, na mẹdepope ma mọdona awhànpa he mẹ ewọ na yì mọ ede te gba. Eyín mẹde tin to apáde Asivu he yè dè lọ tọn mẹ, kavi yín apáde agùn he yè ylọ lọ tọn, bé whenẹnu nugbonọ lẹ wẹ yè dóna dóyẹyidogona to onú popo mẹ.

Dinvie, yisenọ he ma tin to awhànpa he yè ko dè sọn oviplọ́nji lẹ lọ mẹ lẹ, podọ to whenẹnu yé ma na tin to Bẹ́yìlọnmẹ mẹ podọ to Núdùdù Alọwle Hùnwhẹ lọ tọn kọ̀n gba, enẹwutu yé dóhùdo nado yín nugbonọ, na to tódidó mẹ dọ eyín yé tlẹ tọ́n gbọn nukunbibia mẹ, yé na yín máhẹtọ to Ahọludù lọ Whenu (Mì pọ́n OSỌHIA 7, apáwhé awetọ).

Podọ mẹhe yè na hù to Ju lẹ mẹ to hiadonu atọ́ntọ mẹ lẹ na nọte kaka jẹ whenuena omẹ he pò lẹ na yín hùhù ga kẹdẹdilé yè ko hù yéwlẹ dó. To otẹn awelẹ mẹ, ohó titegbe lọ wẹ “alindọn lẹ”. “… ayiha yé he yè hù na ohó Jiwheyẹwhe tọn…” – “… yẹn sọ mọ alindọn yé he yè gbòtana na okunnuhó Jesu tọn, po ohó Jiwheyẹwhe tọn po tọn wutu…” (OSỌHIA 6:9; OSỌHIA 20:4). Eyín mí pọ́n hlan fọ́nsọnkú Jesu Klisti tọn po yé he fọ́ntite po É po lẹ po kẹdẹdi Owé Matiu 27 tọn, kavi di fọ́nsọnkú to kọlẹ́wá Klisti tọn whenu (1 KỌLINTINU 15; 1 TẸSALONIKA 4; po owéfọ devodevo lẹ po), kavi di awhànpa he na tin to opòdo nukunbibia tọn mẹ lẹ tọn, yé omẹ pó sọn wiwá Oklunọ tọn tintan whenu lẹ jẹ bibẹ́nu Ahọludù Owhè Fọtọ́n tọn whenu, yèdọ yé he fọ́ntite lẹ na tin to “fọ́nsọnkú tintan” tọn mẹ.

“Ṣigba oṣiọ he pò lẹ ma tin to ogbẹ̀ bà kaka owhè fọtọ́n nado pé. Ehe wẹ fọ́nṣonkú tintan. Donanọ, mẹwiwé wẹ ewọ he tindo tẹnmẹ to fọ́nsọnkú tintan lọ mẹ: mẹmọtọnhunkọ ji wẹ okú awetọ matindo huhlọn de te, ṣigba yé na yín yẹwhenọ Jiwheyẹwhe tọn lẹ po Klisti tọn po, bo nasọ dùahọlu hẹ ẹ họ̀ owhè fọtọ́n” (OSỌHIA 20:5-6). To ojlẹ nẹ mẹ, osọha yé he yín fọ́nsọnkú tintan tọn lẹ tọn na sọgbè.

To afọ 7-9 tọn mẹ, yè dọ núhe na jọ hlan mí to kleun mẹ, yèdọ to whenu pẹvi de mẹ to opòdo Ahọludù Owhè Fọtọ́n lọ tọn tọn. “Whenuena owhè fọtọ́n na pé vọ́, yè na tún Satani dote sọn gànhọ̀ etọn mẹ jẹgbonu, é nasọ tọ́nyì nado klọ akọta he tin to adà ẹnẹ aigba tọn lẹ mẹ, Gọgi po Magọgi po, nado bẹ́ yé plidopọ́ hlan awhàn: sọha yé mẹhe tọn taidi tọ̀kẹ́n ohù tọn. Yé sọ hẹji gbọn gbigblo aigba tọn mẹ yì, bo sọ lẹ́do osla mẹwiwé lẹ tọn pé, po otò daho yinwanna lọ po: miyọn sọ flẹ́ sọn Jiwheyẹwhe de sọn olọn mẹ bo hù yé súdo” (OSỌHIA 20:7-9).

Dẹnsọlé Satani na tọ́njẹgbonu sọn odò mapdote mẹ, to tẹndodopolọ mẹ, é na klọ yé akọta mayisenọ he tin to aigba ji lẹ. To Ahọludù Whèta lọ tọn whenu, yè paṣẹna yé to jijọho mẹ, ṣigba na yé ma tindo dọpọ́n mẹde titi po Jiwheyẹwhe po gbèdé wutu, bo ma sọ yọ́n owhẹ̀dọgbọ yetọn to Klisti gba wutu, yé gbẹ́sọ yín mẹkinklán sọn Ede. Enẹwutu wẹ dindọ̀n godogodo tọn lọ na wá Satani po yé he tin to aṣẹpipa etọn glọ́ lẹ po ji to whenẹnu.

“… miyọn sọ flẹ́ sọn Jiwheyẹwhe de sọn olọn mẹ bo hù yé súdo. Yè sọ dọ̀n Lẹgba he klọ yé sọ yì dlán miyọn hihla po whèmì tọn po mẹ, fie kanlin lọ po yẹwhegán lalonọ lọ po te” (OSỌHIA 20:9-10).

Kanlin lọ po yẹwhegán lalonọ lọ po ko yín dindọ̀ndlán do miyọn hihla po whèmì tọn po mẹ dote (OSỌHIA 19:20).

Dinvie, awhànpa kọ̀ndopọ́atọ̀nyínyín tọn he yín hógbè jonọ tọn he, yèdọ: Satani po kanlin lọ po, po yẹwhegán lalonọ lọ po na wá tin to opọ́ po yé he tin to oglọ́ aṣẹpipa yetọn tọn lẹ po to whenẹnu. Podọ yé ma nasọ tin gbède ba kakadoi. Mọ mí ma sọ to na mọ yé kavi sè ohó de dogbọn yetọn dali gbèdé bà.

Fọ́nsọnkú awetọ po whẹ̀dida godogodo mẹ tọn lọ po

To Owé OSỌHIA 20:11-15 tọn mẹ, mí mọ odohia whẹ̀dida godogodo tọn lọ tọn. Owé winwlán he lọ tin hinhọ́nnu, podọ kẹdẹdi owéfọ Owé Wiwé tọn devodevo lẹ, ehe lọ ma dóhudo tùnmẹ depope tọn gba. “Yẹn sọ mọ ofìn wéwé daho de, po ewọ he sinai to e ji po, nukọn mẹhetọn aigba po olọn po họ̀nyì te; yè ma sọ mọ tẹnmẹ de na yé bà. Yẹn sọ mọ oṣiọ lẹ, pẹvi po daho po, yé ṣite to Jiwheyẹwhe nukọn; yè sọ hùn owé lẹ dai; yè sọ hùn owé devo de dai, he yín owé ogbẹ̀ tọn; yè sọ dawhẹ̀na oṣiọ lẹ sọn onú he yè wlán do owé lẹ lọ lẹ mẹ, kẹdẹdi azọ́n yetọn lẹ. Ohù hẹn oṣiọ he to e mẹ lẹ jẹage; okú po kútòmẹ po sọ hẹn oṣiọ he tin to yé mẹ lẹ jẹage: yè sọ dawhẹ̀na yé dopodopo kẹdẹdi azọ́n yetọn lẹ. Okú po kútòmẹ po wẹ yè sọ dọ̀n yì dlán miyọn hihla mẹ. Ehe wẹ okú awetọ. Mẹdepope he yè ma mọ yín winwlán do owé ogbẹ̀ tọn mẹ, yè dọ̀n ẹn yì dlán miyọn hihla mẹ” (OSỌHIA 20:11-15).

To whẹ̀dida godogodo tọn he lọ kọ̀n, omẹ delẹ sọ tin he yè mọ oyín yetọn to Owé Ogbẹ̀ tọn lọ mẹ ga. Yéwlẹ ko mọ ogbẹ̀ madopòdo yí to whenuena yé tin to aigba ji. Enẹwutu, okú awetọ lọ ma dóhuhlọn depope do yé gba. Do ayi e go, okú tintan lọ nọ sọawúhia to whenuena alindọn lọ jó agbasa lọ do; podọ okú awetọ lọ nọ sọawúhia to whenuena gbigbọ lọ jó alindọn lọ do. Whenẹnu wẹ he na yín ṣiṣẹ̀, dọ, “alindọn he wàylando, é na kú” (EZEKIẸLI 18:4). To ofi, ylando ma yín sẹ́ngbigba osẹ́n Jiwheyẹwhe tọn hlan mẹde titi kẹdẹ gba, bo nasọ ylanwhẹ̀do Jiwheyẹwhe Ganhunupo go, na omẹ lẹpo wẹ wàylan bo sọ whète do gigo Jiwheyẹwhe tọn go wutu. Ṣigba to ofi, mí to hódọ do ylando okú mayise tọn tọn go, yèdọ ehe tọn Oklunọ mítọn dọ, dọmọ, “Enẹwutu wẹ yẹn dọ hlan mì, dọ, Mì na kú to ylando mìtọn mẹ: na eyín mì ma yise dọ yẹn lọ wẹ, mì na kú to ylando mìtọn mẹ” (JOHANU 8:24). To egbé, ylando mayise tọn wẹ nọ yín owhẹjijọ gbẹtọ tọn nado kú to ylando he mẹ é to ninọ̀. Do ayi e go, ale yise tọn azọ́nwàdótana fligọ̀ tọn wẹ yín jóna ylando pipé, po whẹ̀sùna po, podọ po ogbẹ̀ madopòdo po.

Na Klisti kẹdẹ mẹ wẹ Jiwheyẹwhe do Ede hia te nado whlẹn mí gán, podọ gbọn yise kẹdẹ dali to Ewọ mẹ, mí sọgan yín mẹwhlẹngán te. “Ehe sọ wẹ kunnudidè, dọ Jiwheyẹwhe ná ogbẹ̀ madopòdo hlan mí, ogbẹ̀ he tin to Ovi etọn mẹ. Ewọ he tindo Ovi tindo ogbẹ̀; ewọ he ma sọ tindo Ovi, matindo ogbẹ̀ gba” (1 JOHANU 5:11-12).

Dinvie, mẹdepope he tin to aigba ji, bo ma sọ yín máhẹtọ to fọ́nsọnkú tintan mẹ, nọ sọawúhia to whẹ̀dida godogodo tọn lọ nukọn. Yè bo nasọ dawhẹ̀na yé kẹdẹdi azọ́n yetọn he yé wà to ogbẹ̀ whenu yetọn lẹ. Na mẹhe yise to Klisti mẹ lẹ tin, mọwẹ yé he ma sọ yise to É mẹ lẹ sọ tin dó ga. Enẹwutu, mẹdepope he yè ma mọ yín winwlán to Owé Ogbẹ̀ tọn mẹ na yín dindọ̀n dlán miyọn hihla mẹ. Enẹ wẹ okú awetọ he matindo ogbẹ̀. Na mí ma sọ to na mọ yé gbèdé bà. To whenẹnu, Jiwheyẹwhe na ṣẹ̀ po dòdónu yọ́yọ́ de po to aigba ji po ovi Etọn lẹ po.