OSỌHIALỌ – Bé owé he gọna hiadonu 7 lẹ we?

Apáwhé tintan ota fọtọ̀n-nukun-ẹnẹtọ lọ tọn do alọwle Lẹngbọvu lọ po Asivu Etọn po tọn hia, ṣigba nado dlẹnalọdo bibẹ́nu lọ dọ whẹ̀dida Jiwheyẹwhe tọn he É ko basi gbọn ahọ́suyí ohùn devi Etọn lẹ tọn tọn dali. Ayajijẹ daho susugege mẹfligọ̀ lẹ tọn to olọn mẹ dali, yín kinkàn dólé, dọ, “Halleluia; Whlẹngan, po gigo po, yẹyi po huhlọn po, hlan Oklunọ Jiwheyẹwhe mítọn: na nugbo po dódó po wẹ whẹ̀dida etọn lẹ: na é ko dawhẹ̀na ayọ̀detọ daho lọ, he yí ayọ̀dide etọn do hẹn aigba gble, bo sọ yíahọ́su devi etọn lẹ tọn to alọ etọn mẹ. Yé sọ vọ́ dọmọ, Halleluia. Azọ̀ etọn sọ hẹji kakadoi. Mẹho konukun-ẹnẹlẹ lọ, po mẹdidá ẹnẹlẹ lọ po sọ jẹklo, bo litaina Jiwheyẹwhe he sinai to ofìn ji, bo dọmọ, Niṣẹ; Halleluia. Ogbè de sọ tọ́nsọn ofìn lọ dali, dọmọ, Mì pa Jiwheyẹwhe mítọn, mì devi etọn lẹ, po mì he dibusi i lẹ po, pẹvi po daho po” (OSỌHIA 19:1-5).

Dinvie, awhàngbatọ he tin to olọn mẹ helẹ, yín didè tọ́njẹgbonu sọn awufiẹsa aigba ji tọn lẹpo mẹ, bo sọ yín lilẹ́gọ̀do azán vu whenu yetọn tọn (JOB 33:25). Na awufiẹsa kavi okú, kavi ylando, kavi awutu, kavi yọnhopipò ma na tin ba, adavo gigo pipé lọ po dagbewà po, podọ ayajijẹ madopòdo lọ. “Ṣigba dilé yè wlán ẹn dọ, Nukun ma ko mọ, mọ otó ma ko sè, Mọ e ma ko sọ biọ ayiha gbẹtọ tọn mẹ, Onú he Jiwheyẹwhe wléawu etọn lẹ na yé he yinwan nệ lẹ” (1 KỌLINTINU 2:9).

“Yẹn sọ sè taidi ogbè gbẹtọ susu tọn, podọ di ogbè osìn susu tọn, podọ di ogbè wanyinyẹ̀n daho osò tọn, dọmọ, Halleluia: na Oklunọ Jiwheyẹwhe Ganhunupo dùahọlu. Homẹ mítọn ni hùn, mí ni jaya, bo na yẹyi i: na alọwle Lẹngbọvu lọ tọn whenu wá, asi etọn ko sọ sọ́nu do ogo. Ewọ wẹ yè na dọ yè ni yí alavọ̀ dagbedagbe, wéwé he ma kudu do dóaṣọ̀na: na alavọ̀ dagbedagbe lọ wẹ dódó mẹwiwè lẹ tọn” (OSỌHIA 19:6-8).

To ojlẹ nukunbibia tọn mẹ to aigba ji, Asivu lọ na ko tin to Alọwle Hùnwhẹ kọ̀n po Asisúnọ olọn tọn po, yèdọ apajlẹ Mẹhe tọn mẹ yè diọ Ẹ do tọn. Na ehelẹ wẹ oviplọ́nji lọ, yèdọ Asivu Lẹngbọvu lọ tọn. Na yè ko sùwhẹ̀na Ẹn mlẹnmlẹn, bo ko lẹ̀ Ẹ wé, bo ko sọ yí alavọ̀ wéwé do dóaṣọ̀ nệ. Podọ ewọ lọ wẹ yè gọ̀ dódó Jiwheyẹwhe tọn jo na gbọn Jesu Klisti dali.

To Owé MATIU 25:10 tọn mẹ, mí hia dogbọn kọlẹ́wá Asisúnọ lọ tọn dali, po awhli núyọ́nẹntọ he tọn dali yè dọ gbọn po, dọ, “… yé mẹhe wléawu lẹ biọ họmẹ hẹ ẹ yì alọwle hùnwhẹ kọ̀n; yè sọ sú ohọ̀n”.

Podọ to Owé Matiu 22 tọn mẹ, yè lá hùnwhẹ alọwle lọ tọn. Podọ yé mẹhe yè ylọ to ojlẹ vòvo mẹ lẹpo sọawúhia po whẹjijọ alọpãlọpa lẹ po, podọ to vivọnu, ohọ̀ lọ sọ gọ́na jónọ. Dinvie, eyín omẹ depope sọgan zé owéfọ Owé Wiwé tọn lẹ do aṣẹpipa dopolọ glọ́, whenẹnu ewọ na mọ dọ awhli núyọ́nẹntọ lẹ po Asivu lọ po, po jónọ he yè ylọ lẹ po, yín awhànpa plọ́nji lẹ lọ tọn. Na olọn mẹ ninọ̀ yetọn na tin to asiko Alọwle Hùnwhẹ tọn kẹdẹ kọ̀n, podọ Mẹfligọ̀ lẹ wẹ na yín jónọ to finẹ lọ, bo nasọ lẹ́gọ̀wá po Oklunọ po sọn finẹ lọ nado dùahọlu po É po to aigba ji to Ahọludù Owhè fọtọ́n tọn whenu. Po ohóta vòvo helẹ po, yè do awhànpa he lọ hia to kọ̀ndopọ́ alọpãlọpa lẹ mẹ. Kẹdẹdi awhlidógbèji yè ma sọgan dóalọ yé go, podọ di Asivu yé yín mẹkọ̀ndopọ́ hẹ Asisúnọ lọ, podọ di jónọ yé yín mẹdidè he sinai po Oklunọ yetọn po to hùnwhẹ daho lọ kọ̀n (MATIU 8:11; LUKU 13:29).

“É sọ dọ hlan mi dọ, Wlánwé, Donanọ wẹ yé he yè ylọ do núdùdù alọwle Lẹngbọvu lọ tọn kọ̀n lẹ. É sọ dọ hlan mi, dọmọ, Ehelẹ wẹ ohó nugbo Jiwheyẹwhe tọn. Yẹn sọ jẹklo to afọ etọn go nado litai nệ. É sọ dọ hlan mi, dọmọ, Pọ́n, hiẹ basi mọ blo: devi hatọ de wẹ yẹn po hiẹ po, po mẹmẹsunnu towe lẹ po, he hẹn okunnuhó Jesu tọn go: litaina Jiwheyẹwhe: na okunnuhó Jesu tọn wẹ gbigbọ dọdai tọn: (OSỌHIA 19:9-10).

Do ayi e go, gbigbọ dọdai tọn lọ jẹdo yẹwhegán he ko dọ dọdai jẹnukọn dogbọn wiwá Mẹfligọ̀tọ lọ tọn dali lẹ ji. Na Jesu wẹ ohùkan ṣẹnṣẹn mẹ tọn to titò Jiwheyẹwhe tọn whlẹngan tọn lọ mẹ. Podọ okunnuhó Etọn sọ yín mimọ di okàn núpinplán tọn to Owé Wiwé lẹpo mẹ gbọn Gbigbọ Wiwé dali, Podọ na okunnuhó Jesu tọn wẹ gbigbọ dọdai tọn lọ, e ma yín núniná dọdai tọn gba. Na omẹ susu tindo núniná dọdai tọn lẹ, ṣigba to ofi, mí to hódọ do kunnuhó olọn tọn he yín Jesu Klisti Lọsu tọn go, kẹdẹdilé É ná mí dó to Owé OSỌHIA 1:8 tọn mẹ, dọ: “Oklunọ dọmọ: Yẹn wẹ Alfa, yẹn wẹ Omẹga, odòdó, opòdo, mẹhe tin, bo ko tin, bo sọ ja, Ganhunupo”. Enẹwutu, mẹdepope ma sọgan dọ sọn wuntùntùn etọn mẹ dọ, Jesu Klisti wẹ Oklunọ, bo sọ dlẹnalọdo É di Jiwheyẹwhe gba, adavo gbọn dọpọ́n wiwé mẹde titi tọn he yè hùndohia hlan ẹn gbọn Gbigbọ Wiwé dali. Enẹwutu, yé he na tin po Oklunọ po to ojlẹ nẹ mẹ lẹpo tindo osọhia Jiwheyẹwhe tọn he lọ po kunnuhó Jesu Klisti tọn po, dilé e yín hùnhùndohia hlan Johanu dó gbọn Gbigbọ lọ dali.

Awhàn godo tọn he Oklunọ Lọsu mágbè Etọn

To apáwhé awetọ ota fọtọ̀n-nukun-ẹnẹtọ lọ tọn, mí mọ dọ Oklunọ mítọn gọ̀ja odò to Nùdúdú Alọwle Hùnwhẹ lọ tọn godo po jẹgbakun susu po to ota Etọn di Awhàngbatọ daho he sinai to osọ́ wéwé de ji. Podọ awhànfuntọ olọn tọn lẹ na hodo É nado yín máhẹtọ to awhàn godo tọn lọ mẹ to azán Jiwheyẹwhe Ganhunupo tọn mẹ to whenuena yè ko zín ahàndanú lọ. Na ehe yè ko mọ bo ko sọ dọdai do owéfọ susu Alẹ̀nù Hóhó po Yọ́yọ́ po tọn mẹ, na wá ṣiṣẹ̀ mẹ. Matin hihó, yè dohia to ehe mẹ to ofi dogbọn awhàn godo tọn to apáwhé Ahọludù Owhè Fọtọ́n he mẹ dali, dọ.

“Yẹn sọ mọ olọn hùn do nùvò, pọ́n osọ́ wéwé de: mẹhe hẹ́ e ji wẹ yè nọ ylọ Nugbonọ, Dódónọ, dódó mẹ wẹ é sọ to whẹ̀da te, bo sọ to awhànfùn te. Nukun etọn taidi zodẹ́, to ota etọn wẹ ojẹgbakun susu tin te; é sọ tindo oyín he yè wlán de, he mẹde ma yọ́nẹn, adavo ewlọsu. Yè sọ doavọ̀ he yè ylọ́n do ohùn mẹ de nệ; bo sọ nọ ylọ oyín etọn dọ Ohó Jiwheyẹwhe tọn. Awhànpa he tin to olọn mẹ lẹ sọ to hihodo é to godo to osọ́ wéwé lẹ ji, he yè doalavọ̀ dagbedagbe na, wéwé madódu. Sọn onù etọn mẹ wẹ ohi didà de tọ́nsọn jẹgbonu, dọ ewọ wẹ é na yí do hò akọta lẹ: bo nasọ yí opò ogàn tọn de do hẹn yé sẹ̀n: é sọ zín ahàndanú homẹgble Jiwheyẹwhe Ganhunupo tọn tọn he hùnzo. É sọ tindo to avọ̀ etọn go podọ to asápada etọn ji oyín he yè wlán de; AHỌLU AHỌLU LẸ TỌN, OKLUNỌ OKLUNỌ LẸ TỌN” (OSỌHIA 19:11-16)

To ojlẹ nẹ mẹ, yè ma dọhó dogbọn owanyin po jọmiọn Jiwheyẹwhe tọn po tọn dali gba. Na gbẹtọ he na tin togbẹ̀ bo nasọ klán sọn Jiwheyẹwhe go to ojlẹ nẹ mẹ lẹpo na gbẹ́ owanyin po jọmiọn Etọn po, enẹwutu yé na dọn homẹgble Etọn po whẹ̀dida Etọn po do yédelẹ ji. “Yẹn sọ mọ angẹli dopo to ote to owhè homẹ; é yí ogbè lélé do dawhá bo to didọ hlan ohẹ̀ he to zinzlọn to jiwhé nukunmẹ lẹpo, dọmọ, Mì wá, mì bẹ́ mìde plidopọ́do núdùdù daho Jiwheyẹwhe tọn kọ̀n; na mì nido dù agbasalan ahọlu lẹ tọn, agbasalan awhàngán lẹ tọn, agbasalan mẹgángán lẹ tọn, agbasalan osọ́ lẹ tọn, po yé he sinai to yé ji lẹ po tọn, agbasalan gbẹtọ lẹpo tọn, mẹmẹdekannu po mẹmẹglọ lẹ po tọn, pẹvi po daho lẹ po tọn” (OSỌHIA 19:17-18).

Do ayi e go, yẹwhegán Ezekiẹli ko mọ awhàn godo tọn he lọ po ahọlu lẹ po podọ po awhànfùntọ he na yín máhẹtọ to e mẹ lẹpo po, bo sọ hẹn ehe wá hinhọ́nnu dọ, “Podọ hiẹ, visunnu gbẹtọ tọn, lé wẹ Oklunọ Jiwheyẹwhe dọ: Dọhó hlan ohẹ̀ hunkọ lẹpo tọn, podọ hlan gbékanlin danji tọn lẹpo, dọ, Bẹ́ mìde plidopọ́, bo wá; ṣinyan mìde pli to awà lẹpo ji hlan avọ́ ṣie kọ̀n he yẹn na sán na mì, yèdọ avọ́ daho de to osó Islaẹli tọn lẹ ji, na mì nido dù agbasalan bo sọ nù ohùn. Mìwlẹ na dù agbasalan hlọnhlọnnọ lẹ tọn, bo sọ nù ohùn ahọvi aigba tọn lẹ tọn, agbò lẹ tọn, lẹngbọvu lẹ tọn, po alunkùn lẹ po tọn, oyìnsú lẹ tọn, popo yetọn kanlinyìnyìn Baṣani tọn lẹ. Mìwlẹ nasọ dù ojó kaka mì do yín gigọ́, bo sọ nù ohùn kaka mì do yín múmúnọ, sọn avọ́ ṣie he yẹn ko sán na mì mẹ. Yè nasọ yí osọ́ lẹ po kẹkẹ lẹ po do gọ́ mì, po omẹ hlọnhlọnnọ lẹ po, po omẹ awhàn tọn lẹpo po, to tafo ṣie ji, wẹ Oklunọ Jiwheyẹwhe dọ” (EZEKIẸLI 39:17-20).

To ojlẹ nẹ mẹ, omẹ awe he yín aṣẹpatọ titegbe lẹ, yèdọ ogán politiki tọn po ogán agùn tọn na yín dindọ̀n gbẹ̀te dlán miyọn hihla mẹ. “Yẹn sọ mọ kanlin lọ, ahọlu aigba tọn lẹ, po awhànpa yetọn lẹ po, plidopọ́ nado fùnawhàn hẹ ewọ he sinai to osọ́ ji po awhànpa etọn po. Yè sọ wlé kanlin lọ, po yẹwhegán lalonọ etọn po ga, he nọ to ohia basi to nukọn etọn, he é do nọ klọ yé he yí ohia kanlin lọ tọn lẹ, po yé he nọ litaina boṣiọ etọn lẹ po. Omẹ awe helẹ wẹ yè dọ̀n gbẹ̀te dlán miyọn hihla mẹ, he nọ yí whèmí do ji” (OSỌHIA 19:19-20).

Do ayi e go, awhàn godo tọn he lọ ma na tindo ogàntọ awhàn tọn mọ mẹdepope ma nasọ họ̀ngán gba. Na awhànfùntọ he na wá gbọn aṣẹpipa Satani lọsu tọn dali sọn Agewàji jẹ aigba Islaẹli tọn ji lẹpo ma na gán gba. Enẹwutu, yè wlán ẹn, dọ, “Omẹ he pò lẹpo wẹ yè yí ohi ewọ he sinai to osọ́ ji tọn do hù, ohi he tọ́nsọn onù etọn mẹ jẹgbonu: ohẹ̀ lẹpo sọ gọhò to agbasalan yetọn dùdù mẹ” (OSỌHIA 19:21).

“Yẹn nasọ yí azọ̀nylankan po ohùn po do dowhẹ̀gbè do ewọ ji: yẹn bo nasọ jà do e ji, podọ do awhànpa daho etọn lẹ ji, podọ do akọta susu he tin to e de lẹ ji, jikunfinfán wududu de, po kẹnjikun daho lẹ po, miyọn, po owhèmì po. Yẹn bo nasọ jlayinna dẽ, bo sọ klán dẽ do wiwé, yẹn nasọ hẹn dẽ zùn yinyọ́nẹn to nukun akọta susu tọn mẹ; yé bo nasọ yọ́nẹn dọ yẹn wẹ Oklunọ” (EZEKIẸLI 38:22-23).