Kẹdẹdilé mí ko dọ dó jẹnukọn, yẹwhegán Daniẹli mọ nújijọ̀ alọpãlọpa lẹ to ninọ̀mẹ ohia po apajlẹ he yín azán godo tọn mẹ lẹ tọn po. Ewọ sọ dèkunnu to ahọlu lọ nukọn po ohó helẹ pó, dọmọ, “Ṣigba Jiwheyẹwhe de tin to olọn mẹ he nọ dè aṣli lẹ hia, podọ ewọ ko sọ hẹn núhe na tin to azán godo tọn lẹ mẹ zùn yinyọ́nẹn hlan Nẹbukadnẹzali” (DANIẸLI 2:28). Dinvie, omẹ Jiwheyẹwhe tọn lẹ tin dilé yè ko nọ hopana yé dogbọn núhe É nọ wà lẹ dali po núhe nọ jọ̀ lẹpo tọn dali to whepoponu. Enẹwutu, núhe Oklunọ dọ to Owé MATIU23:34 tọn mẹ gbẹ́sọ to nugbo yín jẹ egbé, dọ, “Enẹwutu, mì do ayi e go, Yẹn do yẹwhegán lẹ hlan mì, po gbẹtọ núyọ́nẹntọ lẹ po, po wékantọ lẹ po …” Do ayi e go, politikinọ lẹ po omẹ gbõgbo lẹ po tin to kàndodeji yétọn mẹ, ṣigba yé he yọ́n ojlẹ lẹ po ohia lẹ po kẹdẹdi Ohó Jiwheyẹwhe tọn, mọdona núhe to yìyì. Yé sọ mọdona dọ mí tin to asiko dọdai tọn mẹ to dinvie, ehe tùnmẹ dọ, dọdai Biblu tọn lọ ko to ṣiṣẹ̀ to dinvie. Sọ do ayi e go, omẹ delẹ tin to aigba ji bo tindo nukun po wuntùntùn po nado mọ núhe yẹwhegán lẹ po apọsteli lẹ po ko mọ to númimọ mẹ bo ko sọ wlán yé to gbọdemẹ Gbigbọ Wiwé tọn glọ́. Podọ yé sọ mọdona lé yé dóna dó yé ai dagbedgabe dó. Do ayi e go, Ohó Jiwheyẹwhe tọn nọ wá yẹwhegán lẹ de to whepoponu, e ma yín hlan núyọ́nẹntọ aihọn tọn lẹ de gbèdé gba, na yéwlẹ wẹ yé he nọ ná tùnmẹ yetọn titi lẹ.

Enẹwutu, yẹwhegán nugbo dopodopo po apọsteli nugbo dopodopo po, kavi devizọ́nwàtọ Jiwheyẹwhe tọn dopodopo dóna wà kẹdẹdi Daniẹli bo sọ yigbè, dọ, “Ṣigba na yẹn tọn, yè ma dè aṣli he hia hlan mi na núyọ́nẹn depope he yẹn tindo húgan ogbẹ̀nọ depope gba…” (DANIẸLI 2:30). Podọ to odẹ̀hiho etọn mẹ, Daniẹli pà Oklunọ bo sọ dọmọ, “… É nọ ná núyọ́nẹn hlan núyọ́nẹntọ lẹ, po oyọ́nẹn po hlan yé he yọ́n wuntùntùn lẹ. É nọ dè onú sisósisó po aṣli po hia: Ewọ yọ́n núhe tin to zinvlu mẹ, podọ É de wẹ hinhọ́n sọ nọnọ̀” (DANIẸLI 2:21-22).

Jẹnukọn, yẹwhegán Daniẹli mọ boṣiọ lọ kẹdẹdilé e yín didohia to nukọn ahọlu Nẹbukadnẹzali tọn to odlọ mẹ dó. Ewọ sọ dọ odlọ lọ, dọmọ, “Boṣiọ he, ehe yín hlọnhlọnnọ, podọ sisẹ́ mẹhetọn yín gigodahonọ, ṣite to nukọn towe; podọ mimọ etọn lọ sọ yín núdobu. Na boṣiọ he tọn, ota etọn tin sọn sika dagbedagbe mẹ, anọ́ etọn po awà etọn lẹ po sọn fataka mẹ, ohòto etọn po asapada etọn lẹ po sọn ogànvệ mẹ. Azàngándán etọn lẹ sọn ogànyũ mẹ, podọ adade sọn oko mẹ” (DANIẸLI 2:30-33). Nado dọ gbaungba, boṣiọ he lọ nọtena gbẹtọ de, kẹdẹdilé mí na din ehe sọgbè hẹ ota lọ, po anọ́ lọ po, po awà lẹ po, podọ sọn agbasa lọ jẹ odò afọ lẹ tọn po afọgbẹn lẹ tọn po. Podọ to ojlẹ dopolọ mẹ, e nọtena ahọludù aihọn tọn ẹnẹ he na bọdo yénọzo lẹ go.

Podọ to Owé DANIẸLI 2:37-45 tọn mẹ, ewọ ná tadèna po tùnmẹ ahọludù aihọn tọn ẹnẹ he yè yọ́nẹn gbọn otànhó dali, dọ: Ahọludù Babilọni tọn he yè dohia to boṣiọ he lọ mẹ kẹdẹdi ota sika tọn, he nọte sọn owhè núọntọ̀n e lán ṣidopotọ mẹ jẹ owhè fowe-kantọ̀n-fọtọ̀n e lán atọ̀ntọ mẹ jẹnukọnna wiwá Klisti tọn, he to aihọn lọ plán to asiko nẹ mẹ. Podọ ahọludù Mẹdianu lẹ po Pẹsianu lẹ tọn po, he yín didóhia di ẹnẹtọ bọ anọ́ etọn po awà etọn po sọn fataka mẹ, yín yinyọ́nẹn nado tin sọn owhè fowe-kantọ̀n-fọtọ̀n e lán atọ̀ntọ mẹ jẹ owhè kantọ̀n-aotọ mẹ jẹnukọnna wiwá Klisti tọn. Enẹgodo wẹ Ahọludù Glẹkinu lẹ tọn to aṣẹpipa Alẹsandlu Daho lọ tọn glọ́ bo yín didohia gbọn alìnkan lọ po odò agbasa lọ tọn po dali, yè sọ do e hia po gànvệ po bo sọ nọte sọn owhè kantọ̀n-aotọ mẹ jẹ ogbàntọ mẹ jẹnukọnna wiwá Klisti tọn. Podọ sọn whenẹnu kaka jẹ ojlẹ godo tọn mẹ, Ahọludù Lomunu lẹ tọn wẹ to aṣẹpa. Ehe lọ wẹ onú vivẹ daho pete he yè dóna mọdona lọ.

Do ayi e go, yẹwhegán dopolọ mọ lé agósú ẹnẹ olọn tọn lẹ ko whàn ohù daho gbẹtọ lẹ tọn dó, yèdọ ehemẹ gbékanlin huhlọnnọ ẹnẹ tọ́njẹgbonu wá sọn to Owé Daniẹli 7 tọn mẹ. Tintan lọ taidi kinnikinni de, awetọ lọ sọ taidi béali, atọ̀ntọ di opọ̀, podọ yè ma sọ ná oyín de ẹnẹtọ lọ gba, ṣigba yè do e hia dólé, dọ, “To ehe godo, yẹn sọ mọ to númimọ ozánmẹ tọn lẹ mẹ, bo dayi e go gbékanlin ẹnẹtọ de, kanylantọ bo dobu bo sọ dóhuhlọn gbahugbahu; e sọ tindo ogànyũdú daho lẹ; e vàsúdo bo sọ gbà do flinflin, bo sọ yí afọ etọn lẹ do zín pipòtọ dai: e sọ yín hùnkọhùnkọ sọn gbékanlin he tin to ewọ nukọn lẹpo mẹ; e sọ tindo azò ao” (DANIẸLI 7:7).

Gbékanlin ẹnẹ he tọ́njẹgbonu wá sọn agùnvi gbẹtọ susu gédegéde aihọn he lọ tọn lẹ mẹ lẹ, nọtena ahọludù ẹnẹlẹ, ṣigba aṣẹpatọ lẹ po ota lẹ lọ po dopolọ wẹ yé. Dinvie, mí ma dóhùdo nado zán whenu bo sọ dọhó do atọ̀n tintan he ko jẹnukọn lẹ tọn go gba, kẹdẹdilé yé matindo núde nado wà po ojlẹ mítọn po wutu. Ṣigba mí jlo nado mọdona dogbọn gbékanlin ẹnẹtọ he tin to dinvie lọ tọn dali (DANIẸLI 7:19). Do ayi e go, Daniẹli sọ mọ pahonamẹ he jẹgodona enẹ lọ yí, dọ, “Gbékanlin ẹnẹtọ lọ na yín ahọludù ẹnẹtọ de to aigba ji, he na yín hùnkọdevo sọn ahọludù lẹpo mẹ, bo nasọ và aigba lọ pete súdo, bo nasọ li i do odò, bo sọ gbà hanyanhanyan” (DANIẸLI 7:23). Dinvie, gbékanlin ẹnẹtọ he yín Ahọludù Lomunu lẹ tọn, zé aigba lẹpo mì bo sọ zín i do afọ etọn glọ́ kẹdẹdi dọdai Biblu tọn. Enẹ wẹ LÉ WẸ OKLUNỌ DỌ to Ohó Etọn mẹ.

Johanu lọsu sọ mọ gbékanlin dopolọ po azò ao po he tọ́njẹgbonu wá sọn ohù mẹ. E sọ tindo ota ṣinawe, podọ oyín nùzinzán tọn lẹ tin to ota ṣinawe lẹ ji. Na jẹgbakun ao tin to azò lẹ lọ ji (OSỌHIA 13:1). Do ayi e go, ehe lọ sọgbè titegbe bo sọ sọawúhia hẹ Owé DANIẸLI 7:24 tọn, dọ, “Podọ na azò ao lẹ tọn, ahọlu ao na fọ́nsọn ahọludù he mẹ: podọ devo nasọ fọ́n to yé godo; ewọ na yín hùnkọdevo sọn tintan tọn mẹ, ewọ bo nasọ yí ahọlu atọ̀n do odò.” Dinvie, gbékanlin atọ̀n he jẹnukọn lẹ yín yinyọ́nẹn kẹdẹdi ahọludù atọ̀n he Daniẹli mọ lẹ, sọ yín mimọ whladopo dogọ́ to Owé OSỌHIA 13:2 tọn mẹ bo sọ sọgbè hẹ gbékanlin ẹnẹtọ lọ, “Kanlin he yẹn mọ lọ taidi opọ̀, afọ etọn sọ di afọ béali tọn, onù etọn taidi onù kinnikinni tọn …”

E tin to vivẹ mẹ titegbe nado payi e go dọ, Satani zé ofìn etọn po huhlọn etọn po na gbẹtọ de to vivọnu ahọludù aihọn godo mẹ tọn he lọ tọn, dọmọ, “… dlagọni lọ sọ ná huhlọn etọn ẹn, po aisinnu etọn po po aṣẹ daho po. Yẹn sọ mọ dopo to ota lẹ mẹ di yè húnú hlan okú: alàn etọn hlan okú ko kúata; aihọn lẹpo sọ to hẹ̀likẹ̀ hodo kanlin lọ to godo…” (OSỌHIA 13:2-3). Mẹnu wẹ dlagọni lọ, ehe ná huhlọn godo tọn he lọ po aṣẹ etọn po, po ofìn etọn po, he tọn dali yè dọ hlan mí to Owé OSỌHIA 12:9 tọn mẹ, dọ, “Yé sọ yàn dlagọni daho lọ jẹgbonu, odàn hóhó lọ, hè yè nọ ylọ Lẹgba, podọ Satani …” Do ayi e go, ahọludù aihọn godogodo tọn lọ tọn na tin to gbọdemẹ Satani lọsu tọn glọ́. Podọ sọn ehe lọ mẹ wẹ agọ̀jẹdo-Klistigotọ lọ tọ́njẹgbonu wá sọn kẹdẹdilé mí to na mọ dó to madẹnmẹ.