Nado mọdona núyọ́nẹn po wiwà agọ̀jẹdo-Klistigotọ lọ tọn po hézéhézé, bé Satani ji wẹ mí dóna dọhó do jẹnukọn. Ehe lọ sọgan di onú paṣapaṣa de, ṣigba mí na do onú he tin to ṣẹnṣẹn ewọ tọn po agọ̀jẹdo-Klistigotọ lọ tọn po hia mì. Enẹwutu, to Owé EZEKIẸLI 28:12-15 tọn mẹ, mí hia dólé dọ, “… Hiẹ yí hiadoni do dohia osọha lọ, he gọ́na núyọ́nẹn, bo sọ pé to owhànpẹ mẹ. Hiẹ tin to Edẹni mẹ ojipa Jiwheyẹwhe tọn lọ; zannu akuẹgégénu lẹpo wẹ oṣinyọn towe, saldiusi, topazi, po diamọndi po, belili, oniksi, po jaspeli po, sapfili, ẹmelaldi, po kalbunkle po, po sika po: anatọ́zọ́n ohún towe lẹ tọn po okète towe lẹ tọn potin to hiẹ mẹ; to azán he mẹ yè dá hiẹ te, yè ko wléawuna yé. Hiẹ wẹ kẹlubimi yíamìsisádodè he ṣinyọn: yẹn sọ zé we do, mọ bọ hiẹ tin to osó wiwé Jiwheyẹwhe tọn ji; hiẹ ko zinzọnlin hẹji bo to tejẹ to gblagbla zannu miyọn lẹ tọn tọn mẹ. Hiẹ yín mẹpipé to aliho towe lẹ mẹ sọn azán he gbè yè dá hiẹ, kaka yè do mọ mawàdódó to hiẹ mẹ”.

To ofi, matin oyẹ mayise tọn de, Lukifẹli go wẹ yè to ohódọ do, mẹhe Jiwheyẹwhe dá di angẹli de. Kẹdẹdi núdidá Jiwheyẹwhe tọn de, ewọ sọgbè, ṣigba dilé yè ná huhlọn ẹn po ojlo mẹdekannujẹ tọn po, mọwẹ é ko te dai. Ṣigba nado diọ linlẹn na Núdátọ lọ, ewọ zé ede daga bo sọ lẹ́ jẹagọ̀do Jiwheyẹwhe go. Onú dopolọ wẹ yè dọ dogbọn afọzédotetọ etọn he zé ede daga na onú lẹpo dali. Na Satani ma yín mẹhe mọdona onú popo gba, na é ma sọgan mọ hlan lé núyiwà etọn dinvie tọn lẹ to dindọn do godo dó jẹnukọn gba. Mọwẹ e te hlan agọ̀jẹdo-Klistigotọ he dóna zán aṣẹpipa etọn kaka jẹ opòdo lọ dó. Ṣigba yè whlá whẹ̀dida etọn do é. É mọdona onú susu, ṣigba bo ma yín onú popo gba.

Kẹdẹdilé yè ko dọ hlan mí dó, Satani ko tin to jipa Edẹni tọn mẹ. Podọ to aijijẹ etọn to finẹ godo, é zé ede biọ odàn lọ mẹ, podọ to ninọ̀mẹ nẹ lọ mẹ, é klọ gbẹtọ tintan lọ nado vẹ́tóli bo sọ gbàsẹ́n Ohó Jiwheyẹwhe tọn tọn. Na ewọ kànhóbiọ bo sọ dọmọ, “Bé Jiwheyẹwhe dọ enẹ lọ nugbo?” Mọwẹ é dá mayise pannukọn Ohó Jiwheyẹwhe tọn to yé mẹ dó. Onú dopolọ wẹ afọzédotetọ etọn to wiwà to aigba ji. Enẹwutu, gbẹtọ lẹpo sọn bibẹ́nu gọ̀ biọ gbọdemẹ dawe ylankan nẹ lọ tọn glọ́, yèdọ mẹhe nọ jlo nado zé ohù núkànbiọ tọn do godona Ohó Jiwheyẹwhe tọn to whepoponu. Jẹnukọn, e ṣẹ̀ po ylando mayise tọn po pannukọn Ohó lọ, to enẹgodo, tolivivẹ́ jẹgodona, ppodọ to vivọnu, osẹ́ngbigbà lọ wá gbèsisọ mẹ. Mọwẹ aijijẹ lọ sọawúhia dó, ehemẹ yè dọn mí omẹ pó biọ. Na dopodopo mítọn ko wànú jẹagọ̀do ojlo Jiwheyẹwhe tọn go bo sọ ylanwhẹ̀ – bọ mí ko wànú bo ko sọ zinzọnlin kẹdẹdi Adam po Evi po.

Satani ma jai kẹdẹ poun to whenuena é zé ede yìji gba, é sọ hẹn vàsúdo po tukla lẹpo po wá gbẹtọ lẹpo ji. Ṣigba to aijijẹ lọ godo, Oklunọ sọ lá dogbọn wiwá Mẹfligọ̀tọ lọ tọn dali, kẹdẹdilé É dọhó dogbọn jinukún he na tọ́njẹgbonu sọn yọnnu lọ mẹ nado gbàna odàn lọ (GENẸSISI 3:15). Owhẹ̀jijọ he lọ wutu Jesu ma do ylọ Malia dọ, “onọ̀” gbèdé, adavo “yọnnu”. Na Ewọ lọ wẹ jinukún he mẹ pagbè Jiwheyẹwhe tọn yín hinhẹnzùn nugbo te dilé e diọzùn agbasalan dó. Do ayi e go, Jinukún de wẹ Ohó Jiwheyẹwhe tọn (LUKU 8:11), podọ yè sọ dọhó do jinukún dagbe lọ go di visunnu po viyọnnu Ahọludù Jiwheyẹwhe tọn po tọn lẹ (MATIU 13:38). Na yé jọ̀ sọn jinukún wiwé he lọ mẹ, podọ to kọ̀ndopọ́ mẹ, yé lẹzùn whẹndo Jiwheyẹwhe tọn de (1 PITA 2:9; OWALỌ 17:29).

To yẹwhegán Isaia mẹ, mí mọ aijijẹ Satani tọn he yè dlẹnalọdo dólé, dọ, “Nawẹ hiẹ flẹ́ sọn olọn dó, hiẹ Lukifẹli, sùnwhlẹvu afọnnu tọn! nawẹ yè sán we liai dó, hiẹ he hẹn akọta lẹ zùn madógánnọi! Na hiẹ ko dọ to ayiha towe mẹ, dọmọ, yẹn na hẹji yì olọn, yẹn na zé ofìn ṣie yìaga hú sùnwhlẹvu Jiwheyẹwhe tọn lẹ: yẹn na sinai to aga oplitó gbẹtọ lẹ tọn ji, to agéawji dali. Yẹn na hẹji zẹ̀ oji yìyì aslọ tọn go; yẹn na taidi Ganhúnupo” (ISAIA 14:12-14).

Do ayi e go, sọn jipa Edẹni tọn mẹ gbộn wẹ ewọ tẹnpọ́n nado nọ paṣẹ to gbẹtọ lẹ ji. Kaka jẹ egbé, é ma diọ sọn zinzán etọn mẹ gba. Na é jlo nado hẹn titò etọn lọ wá ṣiṣẹ̀ mẹ. Podọ to ojlẹ nẹ mẹ tọn mí ko hia, ewọ biọ ahọlu Tile tọn mẹ, yèdọ mẹhe mẹ mí mọ apajlẹ gbẹtọ po aṣẹpipa Satani tọn po te to aigba ji to ofi. Na ewọ tọn, Jiwheyẹwhe dọ dogbọn onù yẹwhegán Etọn mẹ dọmọ, “Na ayiha towe yín zédaga wutu, bọ hiẹ ko sọ dọmọ, yẹwhe de wẹ yẹn, yẹn sinai to aisinnú Jiwheyẹwhe tọn mẹ, to gblagbla ohù lẹ tọn mẹ; gãnṣo gbẹtọ de wẹ hiẹ, Jiwheyẹwhe ma gba, yín hiẹ tlẹ zé ayiha towe do diayiha Jiwheyẹwhe tọn…” (EZEKIẸLI 28:2)

E yọ́n titegbe nado mọdona dọ gbẹtọ de sọgan lẹn ede di Jiwheyẹwhe de. Ṣigba enẹ ma yín gbẹtọ lọ gba, adavo Satani he to gbẹtọ lọ mẹ, yèdọ ehe yè ylọ dọ yẹwhe de bo sọ yín aṣẹpatọ aihọn he lọ tọn (2 KỌLINTINU 4:4). Satani tlẹ biọ sọn Oklunọ mítọn Lọsu si dọ Ewọ ni jai to nukọn etọn bo sọ sẹ̀n ẹn. Do ayi e go, ewọ na ná ẹn adọkun aihọn he tọn lẹpo É (MATIU 4:8-10). Enẹwutu ehe to ofi, yèdọ mẹhe nọtena Satani to aigba ji, dóna tindo ohia dopolọ ga. Adọkun po sinsẹ̀n lẹpo dóna tin to finẹ, sọmọ bọ Klisti matindo fie É na zé ota Etọn do de gba. Ṣigba omẹ he lọ nọ lẹn nado yín mẹgbọn de, yèdọ Jiwheyẹwhe; podọ é sọ lẹn nado yí tẹnmẹ Klisti tọn. Ṣigba é tindo azọ́n Satani he jlo nado yín dopolọ po Jiwheyẹwhe po tọn. Do ayi e go, ewọ kẹalọyí adọkun he Klisti gbẹ́dai lẹpo.

Mí yì nukọn bo sọ hia dọ, “Gbọn núyọ́nẹn towe dali podọ gbọn wuntùntùn towe dali, hiẹ ko tindo huhlọn na we, bo ko sọ tindo sika po fataka po do adọkunnu towe lẹ mẹ: gbọn núyọ́nẹn daho towe dali podọ gbọn ajọ́ towe dali wẹ hiẹ ko hẹn huhlọn towe sudeji, bọ ayiha towe sọ yín zizé daga na huhlọn towe wutu” (EZEKIẸLI 28:4-5). Podọ ehe tin to gbaungba he lọ, yèdọ odohia aigba ji tọn lọ to vivẹ mẹ talala. Na ehe lọ yín zinzán na yé omẹ awelẹ, enẹ wẹ Satani po afọzédotetọ etọn he é nọ zán po. Podọ núdepope ma ko diọ kaka jẹ egbé gba. Bé mẹnu wẹ tin bo ma mọdona fie adọkun po huhlọn lẹpo po tin te to egbé? Bé mẹnu wẹ tin he ma ko sè dogbọn adọkun madósọha lọ tọn dali, dogbọn sika po fataka lẹ po, po zannu akuẹgégénu lẹpo po, po onú devodevo lẹpo po tọn dali?

Do ayi e go, yẹwhegán lọ sọ to nukọnyì to onú winwlán etọn mẹ to gbọdemẹ Gbigbọ Wiwé tọn glọ́, dọmọ, “Gbọn gégé ajọ́ towe tọn dali, yé yí huhlọn do gọ́ ogblagbla hiẹ tọn mẹ, hiẹ ko sọ wàylando: enẹwutu wẹ Yẹn ko do dlan we di mẹfuflu sọn osó Jiwheyẹwhe tọn ji …” (EZEKIẸLI 28:16). Sọn whetẹnu gbộn wẹ Satani ko biọ ajọ́wiwà mẹ? To odohia he lọ mẹ, yè dọhó do Satani go whladopo, podọ to enẹgodo, whladopo dogọ́ do aṣẹpatọ aigbanu he mẹ Satani to ninọ̀. Do ayi e go, gbigbọ wẹ Satani podọ ewọ sọ dóhùdo agbasa he nukun to mimọ de tọn he ewọ sọgan zédo, na ewọ nido zán huhlọn etọn.

Dinvie, mí dóna hia odohia pipé dogbọn Satani tọn dali lọ jẹ, po ohia etọn alọpãlọpa he mí dóna zé hẹn do ayiha mẹ go po, do mí na wá gbẹ́sọ to yé mọ deji jãnwẹ, dilé mí na to ohódọ do afọzédotetọ etọn he tin to aigba ji go dó. Ehe gbọn núvivẹ dèdovo lọ tọn dali wẹ yín dọ, é nọ sọawúhia kẹdẹdi angẹli hinhọ́n tọn, yèdọ mẹhe mẹ Satani ko dọn ede biọ. Enẹwutu, Paul ko wlán dote to azán nẹlẹ mẹ, dọ, “Na apọsteli lalonọ wẹ omẹ mọtọnhunkọ lẹ, azọ́nwàtọ oklọnọ, he nọ diọadana yéde biọ apọsteli Klisti tọn lẹ mẹ. E ma sọ yín nújawu de; na Satani lọsu nọ diọadazùn angẹli hinhọ́n tọn. Enẹwutu, e ma yín onú daho de eyín devizọ́nwàtọ etọn lẹ ga yín mẹdiọada di devizọ́nwàtọ dódó tọn lẹ gba; opòdo mẹhetọn na nọ̀ kẹdẹdi azọ́n yetọn lẹ” (2 KỌLINTINU 11:13-15).