Ebaruha erikwetorora Okwa - Kashatu/Okwa kana 2014

“Ahabw`okuba kyona ekizairwe Ruhanga kisingura ensi; kandi obu nibwo businguzi obusingura ensi, nikwo kwikiriza kwaitu.” (1 Yoh. 5:4)

Omu Baruha ya Yuda, nitwetwa ku “… kurwanira munonga okwikiriza oku abarikwera bahairwe rimwe kikahwa.” (omush. 3)

Omu b`aheburaayo 3 nikigira kiti: “B`eishe-emwe, mwerinde, omuntu wena omuriimwe atagira omutima mubi, ogutarikwikiriza, gukahabya kuruga ahari Ruhanga ohuriire.” (omush. 12)

Okugumizamu: “Kandi ni baahi abu yaarahiriire okutataaha omu buruhuukiro bwe? T`abo abatarahuriire? N`ahabw`ekyo nitureeba ngu bakaremwa kutaahamu ahabw`okutaikiriza.” (Abaheburaayo 3:18-19)

Ekibi eky`abaandize n`obutaikiriza – ow`eishe-emwe Branham akahamisiriza eki omu matebezo ge emirundi n`emirundi. Sitaane ekasingura omu kukwatira Haawa omu kigaaniiro aha kikwatireine n`eki Ruhanga Yabaire agaambiire Adamu. Okwe nikwo yaabasiize kubiba okubanganisa: “N`eky`amazima, Ruhanga Akagira? … Okufa kwo buzima timurifa … amaisho gaanyu garyaiguka, n`ebindi n`ebindi.” Kwonka nikimanywa gye tikiraheenderiire aha kigaaniiro – kikaretaho okugwa, ahu embibo y`ekishuba yarugire.

Atyo MUKAMA Yagambira enjoka, “Kandi ndyata obuzigu ahagati yaawe n`ogu mukazi, n`ahagati y`oruzaaro rwawe n`orwe; orwe ruryakuteera omutwe, naiwe oryaruteera ekitsintsiino.” (Okut. 3:15)

Ahanyima y`okugwa, MUKAMA Ruhanga akaha okuraganisa okw`aruzaaro kw`obwa Ruhanga kurabira omu mukazi kugira ngu rubaase kuteera omutwe gw`enjoka. Oruzaaro rukabaho; Ekigambo kikeyorekyera omu mubiri. Omuri Isaaya 53:10 nitumushomaho: “…Ku araayehindure ekitambo ahabw`ekibi, Aryareeba oruzaaro rwe, ayongyere aha biro bye, ebi MUKAMA arikwenda bihikiirizibwe gye omu mukono gwe.”

Paulo akahandiika ngu: “Mbwenu shi, Ebiragiro bikabaho ahabw`enki? Bikongyerwaho ahabw`okushiisha, okuhitsya aha kwija kw`omwijukuru ogwo owaaraganisiibwe…” (Abagalatia 3:16-19)

Kikatandika n`omujigaijo, “… ngu abone kuba omujigaijo omu b`eishe-emwe baingi.” (Abarooma 8:29) Mariamu akatuunga obugaanzi na ruhanga kandi yaatuunga okuraganisibwa: “Reeba oryagira enda, ozaare omwana w`omwojo, kandi oryamweeta eizina YESU.” (Luk.1:31) Omwoyo Orikwera akaba nabaasa kwiija ahari Mariamu kwonka obu yaikiriza okuraganisa kandi akagira ati, “Reeba, ndi omuzaana wa MUKAMA; kimbeho nk`oku waagamba. Maraika yaamutsigaho, yaagyenda.” (omush. 38) Atyo Omwana wa Ruhanga Yazaarwa.

Omu rurimi rw`oruyonaani, harimu Ekigambo kimwe ekiri kumanyisa “okutweeka” na “okuzaara.” Aha mushaija nikimanyisa “okutweeka” kandi aha mukazi ni “okuzaara”: Eki omushaija arikutweeka nikizaarwa omukazi. N`ahabw`ekyo nitushoma ahari eki aha Mwana wa Ruhanga: “Ori Omwana wangye, eri izooba naakuzaara.” Kandi na: “… Omwana orizaarwa nikyo aryeterwa Orikwera, Omwana wa Ruhanga.”

Ekyeitu n`okuzaarwa kw`Omwoyo, Okutweekwa kandi okazaarwa ahabw`Omwoyo: “Ekizaarwa omubiri kiba omubiri, n`ekizaarwa Omwoyo kiba omwoyo.” (Yoh. 3:6)

Eky`okubanza, embibo y`Ekigambo eshemereire kuteebwa omu mitima yaitu kugira ngu Omwoyo Orikwera abase kureta omuri itwe amagara agari omu mbibo. Entumwa Yakobo akajurira: “Ahabw`okukunda kwe akatuzaaza Ekigambo ky`amazima, ngu tube nk`emijigaijo y`ebi yaahangire.” (Yakobo. 1:18) Petero akahandiika ngu: “Ruhanga, Ishe wa MUKAMA waitu Yesu Kristo, Asiimwe! Ahabw`embabazi ze nyingi akatuzaara obwa kabiri ngu tugire amatsiko agatahwaho ahabw`okuzooka omu bafu kwa Yesu Kristo.” (1. Pet. 1:3)

Reero nitwiija kureeba eki Paulo yaahandiikire ekiri kuhikiriira: “N`ahabw`ekyo omuntu wena, ku aba ari omuri Kristo, aba ari ekihangirwe kisya…” (2. Abakorinso 5:17) “Abaijukuru baryamuheereza…” (Zab. 22:30a) Wena ozairwe Ruhanga ahabw`Ekigambo hamwe n`Omwoyo aine amagara hamwe n`obuhangwa bwa Yesu n`emicwe Ye yoona. Tihariho mwana wa Ruhanga owazairwe Omwoyo aine obuhangwa bwa Sitaani nk`obwo obwa Kaini. Tihariho mwana wa Ruhanga ozairwe obwa kabiri aine obuzigu, okwangirana, eihari. “Wena ozairwe Ruhanga takora kibi; ahabw`okuba embibo ye eguma omuriwe; kandi tabaasa kukora kibi, ahakuba akazaarwa Ruhanga. (1. Yoh. 3:9)