EBARUHA ERIKWETORORA OKW`IKUMI-OKW`IKUMI N`EBIRI 2014

Omu kwijuuka haza kurimu okusiima okw`orutayaayo rwangye rw`engiri rw`okubanza omuri Buhindi omu kwezi kw`ikumi 1964, ninyenda kugaruka kureebaho omu bugufu ebyabeireho enyima.

Okuruga obwe, mbatsize kuburira omurundi gutari gumwe omu ndeembo 23 z`eihanga eryo erihango, kandi okw`ikumi oku, Ruhanga ku arakunde, ninyija kugarukayo omurundi gwangye gw`abiri n`itano.

Omu myaka egi 50 ehingwiire, nkaikirizibwa kuburira ekigambo omu ndeembo eziri kuhingura 600 omu mahanga agarikuhingura 400, obariiremu Moscow hamwe na Beijing, Cairo hamwe na Damascus, okugamaho nkye ahari ezo. Za miliiyoni z`abantu babasize kuhikwaho engiri okuraabira ahari za puloguramu za rediyo hamwe na TV. Kandi ezimwe aharizo zikiri aha mbeho omu mahanga gatari gamwe.

Omu kyaanga kya Africa (Continent) eby`okusharuura bikiri biingi, enkumi n`enkumi z`abaikiriza nibiija omu nterane omu ndeembo nyiingi.

Nikimanywa kurungi ngu omwanya gwaitu gw`okuramizamu gukigurwamu omu butongore omu mwaka gwa 1974. Reero omu kwezi kwa mushanju 18, 1976, MUKAMA Yagamba nanye omu eiraka rihaango ati: “muhereza Wangye, irooko oze aha kyombeko ekiri kukurataho, okinyereze kandi okyombekyereho…” Nkarabira omu kashaka nateeka amaju kandi nakyeeza kuba ekya MUKAMA. Omu myaka eyakuratsireho, ebyombeko by`ekanisa bikombekwa ngu bibase kuraaza abagyenyi ababaire nibaruga hare barikwija aha kanisa kushaba kandi ebyombeko ebi birimu za ofiisi ah`okutereera ebitabo hamwe n`ekitongore ky`okuta ebintu aha meeri.

Ninsiima Ruhanga ahabw`ekanisa yaitu. Nitugiraho enteerane z`omutaano omu Saande y`okubanza buri kwezi, abantu okuruga omuri Buraaya yoona hamwe n`okuruga obuseeri bwa mayanja nibiija kuhurira ekigaambo, kandi enkumi n`enkumi z`abantu n`izitwegaitaho kurabira aha mitimabagano ya intaneti. Oba eitebezo ririyo niriburirwa omuri Krefeld, omuri London nari omuri Paris, abantu omunsi yoona nibabasa kuhurira kandi bagaruke bareebe eki Ruhanga ariyo nakora omu bwire obu. Amosi 8:11 buzima ehikirire: Ruhanga ayoherize enjara y`okuhurira ekigambo kye, ekihuuro kya MUKAMA kitebeekanisibwe gye.

Kandi nyongera nsiima ab`eishe-emwe boona abari kuvunuura hamwe n`abeishe-emwe abahereza abari omu murimo gw`okugabura ekyokurya ky`Omwoyo ekitafungwiire. Omu muriingo ogu, Matayo 24:45-47 nayo ehikiriire kandi omugore orundinwe omunsi yoona ayejumbiire omu kuburira engiri. Kandi hamwe n`ekyahandikirwe eki MUKAMA omu karaka akoroobi akakinyeteramu aha Saande, omu kwezi kwa mwenda ebiro 19, 1976. Aga nigo mazima nk`oku Ruhanga Ari Ohuriire.

Omu itebezo “ekintu ekyomarireho obwire bwaawe bwoona kugira ngu okihemu kiri kirungi” (The Masterpiece), okuruga omu kwezi kwa mushanju ebiro 5, 1964, ow`eishe-emwe Branham akagaamba aha kworekwa omu yarebiire Omugore arikuruga aha kigyendererwa kandi yagaruka yareeba Omugore nagaruka omu buteeka kandi ari kwikirizana naburi kigambo kyona ekya Ruhanga. Omu kicweka eki, hariho ekigambo eky`amazima ekiriyo nikiburirwa, kandi abo boona abari omu kanisa y`Omugore nibakihurira bakikiriza kandi bakyorobera. Eiraka ry`aha muheru nirigumizamu riri kugira riti: “Reeba kishwera yaija; mushohore muze ku mubugana”. Amiina.

Hati hahingwireho emyaka 49 okuruga ow`eishe-emwe Branham natwaarwa kuba na MUKAMA. Ruhanga Akitebekanisiize Israeli omu muriingo ngu omu mwaka gwa makumi atano, omwaka ogwa Jubili, boona babe bagarukire omu butaka bwabo hamwe n`omubabo (Abaleevi 25). Ruhanga akoriire bikuru ab`eishe-emwe abatari kubarwa omu myaka 49 ehingwiire. Kandi ab`eishe-emwe boona bakitegyereize ebindi biingi, nibenda kureeba okugarurwa butsya kwona, okukora kw`Omwoyo okw`ahamuheru kandi okuri kufundikira byona. Ruhanga n`omwetsigwa. Nabasa kugira omwaka gwa makumi atano omu bwiire bwaitu ogwa maani munonga omu ntebekanisa Ye ey`okujuna. Naitwe tutegyereize n`ekihika kiingi, kwonka Ruhanga Niwe Arikumanya obwiire hamwe n`eshaha obu birahikirire. Ekitiinisa kimugarukire. We takyerererwa. Amiina.

Tituri kuza kuataaha munoonga omunda aha bintu ebiriyo nibibaho omu biro ebi. Amakuru ga buri izooba nigatugambira omu bwijwiire aha butabanguriko hamwe n`entaro ebiri kubaho omunsi yoona. Amaisho gaitu goona gorekyereire amahanga ga rwagati ya burigwa-izooba ga Buharabu (Middle East) hamwe na Yerusaleemu, orureembo oru Ruhanga Wenka Yayetoranaire. Yerusaleemu rutwiire ruri orureembo rwa Buyudaaya kumara emyaka eri kureenga 3300, kandi orureembo oru Yerusaleemu rugambirweho omuri Baibuli emirundi erikureenga 700, kandi tirugambirweho n`omurundi na gumwe omuri Korani. Ruhanga We weenka akehera okuraganitsa omuri Baibuli kugaruka kugarura abantu Be omu butaka bwaba ishenkuru bo (Yeremia 23:7-8; Ezekieli 36:24-28; Mika 2:12-13; Zefania 3:19-20; Zekaria 2:16-17), kandi tukabaasa kwereebera nikihikirira, obwiire nibwiija kuhika obu Zekaria 14:16-21 nayo erahikirire, kndi amahanga goona agaratsigare ahanyima y`orutaro rw`ahamuheru nigaija kwiija Yerusaleemu kandi gajaguze obugyenyi bw`ensisira.

Kanshabe ngu abantu boona betegyereze ngu kyoona ekirikubasharisaho kuhagira Israeli nainga shi kugirwanisa nibatunga omugisha nainga shi omukyeeno, nk`oku MUKAMA Ruhanga yakiraganitse Abrahamu: “Ndyaha omugisha abarikushabira omugisha, n`orikukyeena ndyamukyeena; kandi omuriiwe enganda zoona ez`omu nsi nimwo ziriheerwa omugisha.”  (Okutandiika 12:3)!

Reka turamatire aha butumwa obw`amazima ahabw`okuba abo boona abarikugumisiriza mpaka aha muheru baryajwekwa ekiruunga. Okurugirira aha Barooma 11, Ruhanga naija kubanza Ahendere omuriimo Gwe n`ekanisa okuruga omu mahanga goona obwe reero akuratseho Israeli. Ekitiniisa kimugarukire ebiro byoona. Amiina.

“Omwoyo n`Omugore nibagira ngu, ija. Orikuhurira agire ati: Ija! Oine eiriho aije; kandi weena orikwenda atwarire busha amaizi g`amagara.”

Ahabw`ogwo owatumirwe

Brother Frank