EBARUHA ERIKWETOROORA okw`ikumi-n`ebiri 2010

Obu hati tutegyereize okwija kwa kabiri okwa MUKAMA waitu, okugambirweho emirundi ikumi na mwenda nka okugaruka omu ndagaano entsya. Okurahanisa kweki kukaruga omukanwa ka MUKAMA waitu omukundwa kqndi omujuni; kihandikirwe omuri Yohaana 14: “Kandi kundabe ninza kuba shemereza omwanya, ndyagaruka aha mbatwaare ei ndi; okwo ei ndi, naimwe mube niyo mwatuura.” (enyiriri 2-3)

Omu Baheburaayo 9:28, nitushoma ebi ebirikukwata aha kwija kwa Yesu kristo okw`okubanza hamwe n`okwakabiri: “Nikwo na Kristo, ku yaheebwayo rimwe kwekorera ebibi bya baingi, aryareebeka omurundi gwa kabiri, tihabwe bibi, kureka ahabw`okujuna abariba bamutegyereize. Amiina!”

Entumwa Petero nawe akahandiika ahaishomo eri omuri 2 Petero 1:16: “Mumanye ngu titurakuratiire nfumu ezagunzirwe n`obwengye, obu twabamanyisa obushobooroi bwa MUKAMA waitu Yesu Kristo n`okwiija kwe, kureka tukaba turi bakareebi b`ekitinisa ky`obukama bwe.” (Matayo 17; Mako 9)

Yakobo entumwa nawe akatugumya omu shuura ya 5:7 arikugira ati: “N`ahabw`ekyo b`eishe-emwe mugumisirize okuhitsya ahu MUKAMA waitu ariizira. Reeba, omuhingi ategyereza emyaka ei yaahingire ey`obuguzi bwingi, agigumisiriza okuhitsya obu etunga enjura ey`ibiba n`eya katumba.”

Paulo nawe akahandiika ahaishomo eri erikuru emiru ndi eshatu obwe arikuhandikira ekanisa eyo muri Tesalonika yagira ati: “Abone kuhamya emitima yaanyu, eshangwe etaine ki erikugaywa omu kwera omu maisho ga Ruhanga Tataitwe aha kiro ky`okwija kwa MUKAMA waitu Yesu n`barikwera be boona (abafereire omuri Kristo).” (1 Abatesolonika 3:13)

“Ahakuba ku turaabe nitwikiriza ngu Yesu akafa yaazooka, n`abaagwejegyereire omuri Yesu nikwo Ruhanga aribeeta atyo hamwe nawe. Kandi nitubagambira eki, tukigambirwe MUKAMA waitu ngu itwe abahuriire abarishanga bakiriho aha kiro ky`okwija kwa MUKAMA, tituribandiza abo abaagwejegyeire. Ahakuba MUKAMA aryayeimukira ashuume naaruga omu iguru agambe munonga n`eiraka rya maraika omukuru n`enzamba ya Ruhanga; kandi abaafeereire omuri Kristo nibo baribanza kuzooka; bwanyima naitwe abariba bakiriho turyatwarwa nabo omu bicu kubugana MUKAMA waitu omu kaabunga; tutyo tugume na MUKAMA ebiro byona.” (Abatesalonika 4:14-16).

“Ruhanga MUKAMA w`obusingye we wenka abeereze kimwe; kandi emyoyo yaanyu n`amagara gaanyu n`emibiri yaanyu birindwe gye, bishangwe bitaine ki birikuhanwa aha kiro ky`okwija kwa MUKAMA waitu Yesu Kristo.” (Abatesolonika 5:23).

Ow`eishe-emwe Branham akagamba aha kwija kwa Kristo kw`emiringo eshatu aha kikwatireine n`ekanisa y`omugore:

“Akaija omurundi gumwe kucungura omugore we.

Nagaruka ogundi murundi omu kutwarwa kutwara omugore we.

Nagaruka ogundi murundi omu butegyeki bw`emyaka rukumi hamwe n`omugore we.” (Okwakashatu 18, 1962)

Omuri Matayo 25:1-10 nihagamba aha kwija kwe nka kishwera: “Reeba, kishwera yaija! Mushohore tumubugane.” Abaishiki abashugaine ab`obwengye abariba betekatekire aha kiro ky`okugaruka kwa Kristo nibo bariba abagore kandi baryaza na kishwera aha bugyenyi (orunyiriri rwa 10).

Omu kushuuruurirwa 19:7 nitushoma ngu: “Tushemererwe, tunanukye, tumuhe ekitiniisa; ahakuba obugyenyi bw`omwana gw`entaama buhikire, kandi omugore we ayeteekateekire.”

Kandi nabwe n`omushuura ya aha muheru omu kitabo ky`okushuuruurirwa, eshuura egi etuura n`egaamba aha mugore. Omu shuura ya 21:2 nihagira hati: “Kandi nareeba orurembo orurikwera Yerusaleemu orutsya, ni rushuuma okuruga omu iguru ahari Ruhanga, ruteekateekirwe nk`omugore ocumiirwe iba.”

“Bwanyima haija omwe ahari baamaraika mushanju abaabaire baine enyabya mushanju ezijwiire ebibonaboneso mushanju eby`ahamperu, yangira ati: ija nkworekye omugore muka omwaana gw`entaama. (orunyiriri rwa 9).

Omu shuura ya ahamuheru, aha muheru gwa byoona nitworekwa omugore arikushanira kimwe na kishwera: “Omwoyo n`omugore nibagira bati, ija! Oine iriho aije; kandi weena orkwenda atwarire busha amaizi g`amagara.” (orunyiriri rwa 17).

Ahanyima yeeki, nk`oku kyabaire kiri aha kutandika, n`aha kumariira niahagaruka okundi kwehanangiriza okwa maani ngu hatagira kigambo na kimwe ekyayongyerwaho aha bigambo ebi eby`obunabi ebiri omuri eki kitabo kandi hatagira kigambo na kimwe ekyayihwaho okuruga aha bigambo ebihandikirwe omu kitabo eki. (Okushuuruurirwa 22:18-19; Okushuuruurirwa 1:1-3).