EBARUHA ERIKWETOROORA okw`ikumi-n`ebiri 2010

Omuri Matayo 24:29-30, MUKAMA waitu akagira ati, “Bwanyima y`okubonabona kw`omu biro ebyo, aho naaho eizooba riryahinduka omwirima n`okwezi tikuryaaka, n`enyonyozi ziryaragara niziruga omu iguru, n`ebyamaani eby`omu iguru biryatengyesibwa; obwo akmanyiso k`omwana w`omuntu karyareebeka omu iguru, amahanga goona ag`ensi garyacura, kandi baryareeba omwana w`omuntu naizira omu bicu by`omu iguru aine obushoboroozi n`ekitinisa kiingi.” (Matayo 24:29-30).

Oku kwiija kwe okw`omurundi ogu nikubaho ahanyima y`okutwarwa (rapture) kandi hamwe n`ahanyima y`ebibonaboneso, kandi tikwinire kimwe kakwate n`ekanisa y`omugore. Kwinire kimwe akakwate n`akamanyiso ka mukaaga, akari kwanjura ekiro kya MUKAMA ahabwokuba aho nihagira hati; “ku yabambwire akamanyiso aka mukaaga, nareeba omutsitsa mwingi; eizooba ryaragura nk`ekiguniya ky`obwoyo oburi kwiagura n`okwezi kwahinduka nk`eshagama…” (Okushuuruurirwa 6:12).

Kandi nabwe Omukushuuruurirwa 1:7 nikirangwa kiti: “Reeba, naija n`ebicu, kandi eriisho ryona riryamureeba, naabo abaamucumisire; n`enganda zoona ez`omunsi ziryaborooga ahabwokwija kwe. Eego; Amiina.”

Kandi nabwe Abayudaaya baryacura, reero obwe ekyahandikirwe omuri Zekaria 12:10b, kibone kuhikirira: “… ku barireeba ou bacumitsire, baryamucurira, nk`oku omuntu acurira omwana we w`omujigaijo…”

Omuri buri kihandikirwe harimu omutwe mukuru ogw`ekintu ekiriyo nikibaho. Kyanguhi munoonga kwetegyereza yaaba nikikwata aha kindi kwija kitarikukwata aha kugaruka kwa Yesu Kristo kutwara omugore we omuka. Eki nakyo nikikwata ahari Matayo 25:31-46: “Omwana w`omuntu ku ariizira omu kitiinisa kye hamwe na bamaraika be boona, aryashitama aha kitebe kye eky`ekitiinisa, amahanga goona gateeranirwe omu maisho ge; kandi aryagashoroora, nk`oku omuriisa ashoroora entaama omu mbuzi…”

Omuri 2 Abatesalonika 1:7-8 nihagaruka hagamba aha kundi kwija: “n`okuha imwe abarikushaasha okuhuumura naitwe, MUKAMA waitu Yesu ku arishuuruurwa naaruga omu iguru na bamaraika be ab`amaani, ari omu muriro oguri kawaka, okuhoora enzigu abatari kumanya Ruhanga n`abari kwanga kworobera engiri ya MUKAMA waitu Yesu.”

Kandi nabwe okwija kwa Yesu Kristo okw`omu Kushuuruurirwa 16 tikwine kakwate n`okutwarwa kw`ekanisa y`omugore. Omu bwiire bwa kamanyiso ka mukaaga kandi hamwe n`okweteekateekyera orugamba rwa Haramagedoni, Hakurataho okwehanangiriza oku: “Reeba, niinyija nk`omushuma! Aine omugisha orikuguma naareeba, akarinda ebijwaro bye, ngu arekye kugyenda ajwaire busha, bakareeba enshoni ze.” (orunyiriri 15). Kiniire kimwe akakwate n`eizooba rya MUKAMA, nk`oku kiri kureebwa omu kyahandikirwe eki: “Ahabwokuba imwe aha bwanyu nimumanya gye ngu ekiro kya MUKAMA kiryaija nk`omushuma wa nyekiro.” (1 Abatesalonika 5:2). Hanu nokokwata ahari Israeli, nk`oku kiri omuri Zekaria 14, obu MUKAMA ariija akemereza ekigyere kye aha rushozi zeituuni.

MUKAMA akamanyisa omuri Luka 12 abo abarishangwa betekateekire MUKAMA ku arishuuma ahanyuma y`obugyenyi bw`omwana gw`entaama: “Naimwe mube nk`abantu abategyereize mukama waabo okugaruka omuka naaruga omu bugyenyi, ngu ku ariija yaayeranga, barahukye kumwiguriraho.” (orunyiriri rwa 36). Ekigambo kya Ruhanga kihikire! Amiina.