YÈ WLÁN ẸN DỌ … (IT IS WRITTEN…)

Adọkun daho he mí sọgan hẹn to alọ mítọn lẹ mẹ wẹ Ohó Jiwheyẹwhe tọn he yè wlán lọ, na olọn po aigba na juwayì, ṣigba Ohó Jiwheyẹhwhe tọn nọte kakadoi. Titò Etọn hlan gbẹtọ lẹpo yín didohia to Ohó Etọn mẹ. Ohó he yè dọ lọ he wá yẹwhegán lẹ de, bo sọ yín winwlán dai. To godo mẹ, yè dè apọsteli lẹ nado yín kunnudetọ. Mí tindo Alẹ̀nù Hóhó po Yọ́yọ́ po. To Alẹ̀nù Hóhó mẹ, mí mọ oyẹ lẹ, po ninọ̀mẹ lẹ po podọ opàgbe lẹ tọn po; to Alẹ̀nù Yọ́yọ́ mẹ, mí mọ ṣiṣẹ̀ huhlọnnọ onú he yè wlán do Owé wiwé mẹ lẹpo tọn. Enẹ wẹ kandeji mítọn.

Do ayi e go, Alẹ̀nù Yọ́yọ́ bẹ́ po ṣiṣẹ̀ dọdai lẹ tọn po. Johanu baptist yín yẹwhegán he yè dopàgbe etọn, podọ Whlẹngantọ mítọn, he yín Mẹfligọ̀tọ mítọn he yè dopàgbe Etọn. Yise nugbo yín didoai do opàgbe Ohó Jiwheyẹwhe tọn tọn lẹ ji. Jiji Jesu Klisti tọn, po ogbẹ̀zán Etọn po, po devizọ́n Etọn po, po yajiji Etọn po, po okú Etọn po, po didi Etọn po, po fọ́nsọnkú Etọn po, podọ zizéyì aga Etọn: ehe lẹpo jọ domọ kẹdẹdi lé yè ko dọ do jẹnukọn gbọn yẹwhegán lẹ dali. Nugbonugbo, Jiwheyẹwhe tindo ohó hóhó whènu tọn he ko yín winwlán to owhè fọtọ́n susu godo jẹnukọn. Eyín núdabla bo sọ jawu! Otànhókantọ lẹ nọ do ayi e go bo sọ nọ wlán onú jijọ lẹ to whenuena yé ko jọ godo. Jiwhẹwhe mọ vivọ̀nu sọn bibẹ́nu bo ko sọ dike na yè ni wlán onú lẹpo jẹnukọn.

To wiwá tintan Oklunọ mítọn podọ Whlẹngantọ mítọn tọn whènu, dọdai he hú kanwekó tọn yín hinhẹn ṣẹ̀. Dọdai lẹ sọn Owé GENẸSISI 3:15 tọn mẹ dogbọn okún yọnnu lọ tọn dali, he na gbà ota odàn lọ tọn, kaka jẹ Owé MALAKI 3:1 tọn mẹ, dọ Oklunọ na biọ tẹmpli wiwé Etọn mẹ ajiji, yín hinhẹn ṣẹ̀. E jẹ dọ omẹlẹ pó ni hia Alẹ̀nù Yọ́yọ́ po odẹ̀ po, po ayidonúgo po nado payi ofi dopodopo he mì mọ ohógbè taidi, “dilé yè wlán ẹn do” kavi “dilé Owé Wiwé dọ do” kavi “na ehe yè ko dọ gbọn yẹwhegán lẹ dali nido di dọ.” To Owé LUKU 24 tọn mẹ, Oklunọ dọhó hlan núplọ́ntọ delẹ, hinhẹn sọn Mọse ji, po Psalm lẹ po, po Yẹwhegán lẹ po ji, nado dohia dọ onú lẹpo ko yín ṣiṣẹ̀. Na Jesu Klisti gbẹ́ sọ to dopolọ yín, enẹwutu É dóna dlẹn alọ do Owé Wiwé lẹ he ko yín hinhẹn ṣẹ̀ dinvie. Eyin mí nado mọdona núhe Jiwheyẹwhe dóna wà, bé mí dóna dindona jẹnukọn núhe É dopàgbe etọn.

Awhágbè Mọse tọn yín mílọsu tọn ga, “Enẹwutu dinvie, yẹn vẹ̀ we, eyín yẹn ko mọ ojọmiọn to nukun towe mẹ, bo do aliho towe lẹ hia mi dinvie…” (EKSỌDUSI 33:13). Jiwheyẹwhe nọ wà onú lẹpo kẹdẹdi lé Ohó Etọn dọ do, bo sọ dọ, dọmọ: “Na linlẹn ṣie ma yín linlẹn mìtọn, mọ aliho mìtọn ma yín aliho ṣie, wẹ Oklunọ dọ. Na lé olọn yì oji hú aigba do, mọkẹdẹ wẹ aliho ṣie yì oji hú aliho mìtọn” (ISAIA 55:8-9). Medepope he mọ ojọmiọn nugbo yí sọn Jiwheyẹwhe de, na tunwun aliho Etọn lẹ po omẹ Etọn lẹ po, he yín máhẹtọ to núdepope he É to wiwà to ojlẹ he mẹ. Mí dóna dindona Owé Wiwé dagbedagbe whẹpo mí nado tindo kandeji ehe mí to nukundo tọn.

To asiko he mẹ tukla daho nọ fọ́n to yẹwhehódọtọ susu lẹ mẹ pannukọn Owé Wiwé he dọ, dọmọ, “Yè wlán ẹn dọ”, to asiko dopo nẹlọ mẹ wẹ tunmẹ jẹagọ po zinzán jẹagọ po wá yín zizédoai to Ohó Jiwheyẹwhe tọn mẹ. Jesu Lọsu mọ mẹplọ́ntọ agùn lẹ tọn to ninọ̀mẹ dopolọ to azán Etọn lẹ mẹ. Yé hẹn Ohó Jiwheyẹwhe tọn zùn núvọ́ to gbẹtọ lẹ de, bo sọ to ogbèdai gbẹtọ tọn lẹ plọ́nmẹ (MALKU 7:13). To nugbo de mẹ, Satani lọsu yọ́nẹn dọ Jiwheyẹwhe tin (JAKỌBU 2:19) podọ Ohó Etọn ga (LUKU 3:1-13). Ṣigba bo nọ zé tunmẹ etọn titi do Ohó lọ mẹ, podọ ohókanbiọhú etọn do godo na. Mẹde sọgan vọ́ dọ, dọmọ: “Yè wlán ẹn dọ, yè wlán ẹn dọ” bo na doaṣọ́na Ohó lọ po ewlọsu po sọn aga jẹ odò, ṣo bo tin ma tin núdohiamẹ Jiwheyẹwhe tọn, bo sọ tin to gbonu patapata hlan ojló Jiwheyẹwhe tọn. Vogbingbọn daho de tin to núdohiamẹ Jiwheyẹwhe tọn po tunmẹ gbẹtọ tọn po ṣẹnṣẹn. Ode sọn Jiwheyẹwhe de, awetọ sọn Satani de–ode hẹn Ogbẹ̀ wá bọ awetọ hẹn okú wá. Dẹn sọlé Adam po Evi po yise, bo sọ sètonuna Ohó Jiwheyẹwhe tọn, to whenẹnu yé tindo ogbẹ̀ madopòdo, whenuena yé sètonuna tunmẹ odàn hóhó lọ tọn, yé jai bo sọ kú (GENẸSISI 3). Mẹsusu ko gbẹ́ atin ogbẹ̀ tọn lọ dai na atin núyọ́nẹn tọn lọ wutu, bo ko sọ lẹzùn núyọ́nẹntọ to yéde mẹ - yé tindo ohia jijọ-di-Jiwheyẹwhe tọn ṣigba yé mọ́n huhlọn etọn (2TIMỌTI 3:5).

Whenuena Klisti yín whiwhlépọ́n gbọn Satani dali to gblagbla azán kandé tọn mẹ, eyín ayidonúgo dọ Satani lọsu dọ, dọmọ: “Yè wlán ẹn dọ…” Eyín didohia sọn jipa Edẹni tọn mẹ dọ Satani zán Ohó Jiwheyẹwhe tọn jẹagọ. Enẹ wẹ yín onú dobú he tin to É mẹ. É na gbẹ́ sọ to mọ wà kaka jẹ opòdo, bo to omẹ lẹ klọ́ dogbọn Ohó Jiwheyẹwhe zán jẹagọ dali, ehe ma jẹ dọ ni yín tunmẹ gbẹtọ de tọn (2PITA 1:20). Yẹwhegán lalonọ lẹ (MATIU 24:24) po apọsteli lalonọ lẹ po (2KỌLINTINU 11:13) nọ do yéde hia di omẹ sẹ́do sọn Klisti de. Satani lọsu nọ do ede hia di angẹli hinhọn tọn. “E ma sọ yín nújawu de; na Satani lọsu nọ diọadazùn angẹli hinhọn tọn. Enẹwutu e ma yín onú daho de eyín devizọ́nwatọ etọn lẹ ga yín mẹdiọada di devizọ́nwatọ dódó tọn lẹ; opòdo mẹhe tọn na nọ kẹdẹdi azọ́n yetọn lẹ.”  (2KỌLINTINU 11:14-15).

Opàgbehó Jiwheyẹwhe tọn dóna yín dọpọ́n, e ma yín tunmẹ. Ohódọdai Jiwheyẹwhe tọn dóna yín mimọ kẹdẹdile É to ṣiṣẹ̀ do.

Oklunọ mítọn tindo jlọjẹ nado zán Owé Wiwé, gbọn enẹ dali É gbàwhàn Satani tọn. Eyín opàgbehó egbè tọn sọawúhia gbọn yisenọ lẹpo mẹ, yé tindo jlọjẹ nado zán Owé Wiwé. Ohókanbiọ lọ wẹ yín dọ: Nawẹ mẹde sọgan mọdona fie yè to Ohó nugbo Jiwheyẹwhe tọn dọ te, podọ mẹnu wẹ omẹ nẹlẹ he Oklunọ Lọsu zọ́n azọ́n nado dọhó to Oyín Etọn mẹ? Jesu dọ dogbọn mẹhe É dọ hlan lẹ tọn dali, dọmọ: “Mẹhe yí mì, é yí mi, mẹhe sọ yí mi, é yí mẹhe do mi hlan” (MATIU 10:40). É sọ dọ, dọmọ: “Nugbo, nugbo, wẹ yẹn dọ hlan mì, mẹhe yí omẹ depope he yẹn dohlan, é yí mi…” (JOHANU 13:20). Enẹgodo, É dọ dogbọn mẹhe É dè na devizọ́n lọ tọn lẹ dali dọmọ: “…Lé Otọ́ do mi hlan do, yèdọ mọwẹ yẹn do mì hlan do” (JOHANU 20:21).

Mẹdepope he Jiwheyẹwhe ylọ nugbo, sọgan dọ núhe Paul wlán dọmọ, “Ṣigba yẹn dọ hlan mì, mẹmẹsunnu emi, wẹndagbe he yẹn dọ yẹwhehó etọn ma gbọn gbẹtọ tọn dali gba. Na yẹn ma yí i sọn gbẹtọ de gba, kavi yè ma plọ́n ẹn mi adavo gbọn osọhia Jesu Klisti tọn mẹ” (GALATIANU 1:12). Ehe Paul dọ sọgbè ga hẹ ehe apọsteli Pita dọ, dọmọ, “…Ehe wẹ Ohó lọ he yè gbọn wẹndagbe dali to yẹwhehó etọn dọ hlan mì” (1PITA 1:25). Apọsteli Johanu sọawúhia po ohógbè huhlọnnọ de po dọmọ: “Jiwheyẹwhe de míwlẹ jọ̀ sọn: ewọ he yọ́n Jiwheyẹwhe nọ sè mítọn: ewọ he ma jọ̀ sọn Jiwheyẹwhe de ma sè mítọn gba. Ehe mẹ wẹ mí yọ́n gbigbọ nugbo tọn lọ, po gbigbọ bubu tọn lọ po” (1JOHANU 4:6). Jesu Oklunọ mítọn dọ, dọmọ: “Na mẹhe Jiwheyẹwhe dohlan wẹ dọ Ohó Jiwheyẹwhe tọn…” (JOHANU 3:34). To Owé JOHANU 8:43 tọn mẹ, É kanbiọ dọmọ, “Etẹwutu wẹ mì ma yọ́n ohógbè ṣie? Yèdọ na mì ma sọgan sè Ohó ṣie wutu.” To afọ 47 mẹ, é gbẹnkanna bo dọ, dọmọ, “Mẹhe yín Jiwheyẹwhe tọn nọ sè ohó Jiwheyẹwhe tọn lẹ; ehe tọn wutu wẹ mìwlẹ ma sè, na mì ma yín Jiwheyẹwhe tọn wutu.” Kẹdẹdi ohó Oklunọ mítọn tọn nẹlẹ, omẹ dopodopo dóna dindona ede eyín é kẹalọyí Ohó Jiwheyẹwhe tọn kavi lala, podọ eyín é nọte to Ohó Jiwheyẹwhe tọn dopodopo mẹ, ma tin nukundiọsọ kavi owhẹ̀jijọ de to ewlọsu mẹ. Whepoponu, mẹhe to yẹwhehódọ, nọ hia apáde Ohó Biblu mẹ tọn tọn, enẹgodo wẹ é na do É hia gbangba kẹdẹdi linlẹn etọn titi, bo ma nọte to dògbo Ohó Jiwheyẹwhe tọn nugbo lọ mẹ. Ehe wẹ whenu godo tọn na mí nido gbà míde lẹ mẹ pọ́n. Mí dóna dindona onú lẹpo.

Núhe mí yise bo sọ to wiwà lẹpo, jẹnukọn, dóna nọte na whiwhlépọ́n gbọn Ohó lọ dali. Gbọn núdohiamẹ dali, Paul yì Jelusalẹm mẹ, nado zé yẹwhehódidọ etọn he é to pinplọ́nmẹ jlẹdo Ohó nugbo bibẹ́nu lọ tọn go, é dohia gbangba ehe é to pinplọ́nmẹ to kosi lẹ ṣẹnṣẹn, dọ dọmọ: “…Na yẹn nikã dowezun, kavi ko to wezundo yaya” (GALATIANU 2:1-3). Nukọnyìyì devizọ́n de tọn ma dohia dọ nugbo wẹ yẹwhehó he e hẹn gba. To nukun Jiwheyẹwhe tọn mẹ, nado yàn aovi lẹ jẹgbonu kavi azọ́njawu lẹ po dọdai lẹ po ma pé gba (MATIU 7:21). Jesu na mí avàse dogbọn mẹyíamìsisádode susu lẹ tọn dali, mẹhe na sọawúhia to azán godo tọn lẹ mẹ, bo dọmọ: “Na klisti lalonọ lẹ po yẹwhegán lalonọ lẹ po na fọ́n, bo na yí ohia daho po azọ́ndabla lẹ po hia sọmọ nado hẹnmẹbu, eyín é sọgan yín wiwà, yèdọ mẹṣinṣinyan lẹ” (MATIU 24:24). Eyín núvivẹ talala na mí nido zé yẹwhehó mítọn po núyiwá mítọn lẹ po jlẹdo “oplọ́n dòdónu apọsteli lẹ tọn” go (OWALỌ 2:42), dile Paul wà do.

Yinyọ́n alibubu gbẹtọ lẹ tọn sọn Ohó lọ mẹ jẹnukọn, Oklunọ mítọn sọgan dọ to egbè dọmọ, “Ṣigba yaya wẹ yé to taliaina mi, bo sọ to ogbèdai gbẹtọ lẹ tọn plọ́nmẹ di núplọ́nmẹ yetọn lẹ” (MALKU 7:7). Jiwheyẹwhe ma nọ kẹalọyí núdepope he ma yín wiwà kẹdẹdi Ohó Etọn gba. “Gbigbọ wẹ Jiwheyẹwhe: e jẹ yé he to sinsẹ̀n ẹn lẹ ni nọ sẹ̀n ẹn to gbigbọ mẹ podọ to nugbo mẹ” (JOHANU 4:24). Ohó nugbo tọn lọ nọ zọ̀n hẹ Gbigbọ nugbo tọn lọ to whelẹponu. Yé mẹhe to yẹwhehódọ lẹ po yé mẹhe to sisè lẹ po, ma dóna dawhẹ̀ onú lẹ tọn dolé e sọawúhia yé do to nukunta gba, ṣigba yé dóna gọ̀wá Ohó Jiwheyẹwhe tọn he ma nọ gbọvọ́ mẹ, bo nasọ pọ́n onú lẹ to alihó Jiwheyẹwhe tọn ji.