YÈ WLÁN ẸN DỌ … (IT IS WRITTEN…)

Nado yín dopo ko tin sọn bibẹ́nu. Sọn whẹ́whẹ́nu, gbẹtọ tẹnpọ́n nado biọ dopoyínyín nẹ lọ mẹ. Ṣigba adavo núde yín wiwà dolé Jiwheyẹwhe ko lẹndo jẹnukọn, e ma sọgan nọte to nukọn Etọn. Ogàn ko hò na omẹ Jiwheyẹwhe tọn lẹ nado yín dopo. Dopoyínyín–ṣigba to aliho tẹ ji? Ohókanbiọ vivẹ susu tin he dóna yín gbingblọn gbọn Ohó Jiwheyẹwhe tọn he yè wlán dai lọ dali. Whenu nado tuntóai hlan onú he gbẹtọ lẹ na dọ dogbọn ohóta vivẹ nẹ lọ tọn dali, ma tin ba gba. Ehe wẹ whenu Jiwheyẹwhe tọn hlan omẹ Etọn lẹpo nado tuntóai hlan nugbo he ma dó oblọ.

Awhágbè dopoyínyín tọn wẹ yín núvivẹ talala ojlẹ he mẹ tọn, na jijọho, podọ na whlẹngan. Otògán lẹ po nukọntọ agùn tọn lẹ po yín dopo to dopoyínyín daho he mẹ. Whenuena mí pọ́n hlan ninọ̀mẹ alọpãlọpa nukọnyìyì wẹndagbe lẹ tọn, mí nọ sè awhágbè dopolọ yèdọ po ehe Biblu Lọsu tẹdẹ́ji po. Mẹdopodopo to zinzán Owé JOHANU 17:21 tọn he dọ, dọmọ: “…Na yé omẹ pó nido yín dopo”. Mẹnu lẹ wẹ Oklunọ to ohódọ hlan, mẹnu lẹ wẹ É hodẹ̀ na, na yé omẹ pó nido yín dopo? Yé mẹhe to ohókọndopọ tọn dọ, podọ gbọn dopoyínyín dali nugbonugbo tindo whẹ̀jijọ alọpãlọpa po núdonukun alọpãlọpa lẹ po.

To Owé GENẸSISI 11 tọn mẹ, mí hia dogbọn yé mẹhe nọ dopoyínyín mẹ tọn dali. Yé tindo ninọ̀mẹ dopo podọ ogbè dopo. Ogbèmimá yetọn wẹ yín dọ yé ni gbá ohọ̀ lọ yì sọ́ olọn, kẹdẹdi lé e yín didọ do to Owé Wiwé mẹ, yé jlo na tindo oyín de na yéde. Bé ehe wẹ yín apajlẹ de to egbè? Núplọ́nmẹ vivẹ he jẹ na mí ni tindo, wẹ yín dọ núwiwà Jiwheyẹwhe tọn ma sọgan yín wiwà gbọn aliho gbẹtọ tọn ji gba.

Pọ́ndego delẹ sọgan yín mimọ to Owé Wiwé mẹ, nado dohia ninọ̀mẹ alọpãlọpa he yín dopoyínyín tọn. To Owé 1 AHỌLU 22 tọn po 2 OTANNUGBO 18 tọn po mẹ, to finẹ mí mọ yẹwhegán fowé (400) he tin to dopoyínyín mẹ, bo to ohó dopolọ dọ. Ahab ahọlu Islaẹli tọn, kanbiọ Jehọsafati ahọlu Juda tọn dọmọ, bé hiẹ na yì po yẹn po jẹ awhànfuntẹn? Ahọlu jó gbègbo etọn do, bo sọ yígbè hlan ẹn dọ, dọmọ: “Yẹn tin di lé hiẹ te, omẹ ṣie lẹ di omẹ towe lẹ, osọ́ ṣie lẹ di osọ́ towe lẹ.”

Jehọsafati mẹhe dibúsi Jiwheyẹwhe, jlo nado sè sọn Oklunọ de bo sọ kanbiọ ahọlu Ahab dọmọ, “Yẹn vẹ̀ we, kanbiọ, to Ohó Oklunọ tọn de to egbè”. Jehọsafati gbẹ́ sọ to ayi awe mẹ dogbọn dọdai yẹwhegán fówé lẹ tọn dali. Yẹwhegán nẹlẹ tin to amìsisá daho de glọ, bo to didọ, dọmọ: “Hẹji yì; Lamọti gileadi bo wá dagbe na Oklunọ na jó e do alọ ahọlu tọn mẹ”. Jehọsafati ma hunhomẹ to dọdai dopoyínyín nẹ tọn mẹ gba. Enẹwutu Jehọsafati kanbiọ dọ, “Yẹwhegán Oklunọ tọn de ma sọ tin to ofi dogọ́, na mí nido kanbiọ sọn ede?”

Mì pọ́n, to dopoyínyín yẹwhegán fówé lẹ tọn mẹ, ṣogan ahọlu Jehọsafati to omẹ dopo de kanbiọ, mẹhe tindo Ohó nugbo Oklunọ tọn (1 AHỌLU 17:24)! Húdo ehe tọn wẹ mí tindo to egbè. Mẹsusu tin to dopoyínyín he yè ylọ, dọ, “mẹmẹsunnu to gbigbọ mẹ” mẹ; Agùn Protestant tọn, po Katọliki tọn po, podọ agùn devodevo he pò lẹpo, he já na wá nọ̀pọ́ po yé po. Ṣogan, mí dóna mọdona Ohó nugbo Oklunọ tọn lọ.

Mikaia, mẹhe hó Ahab dọ, dọmọ, “Ṣigba yẹn gbẹwanna ẹn”, nugbonugbo é ma sọ tin to ogbẹ́ agùn pipli yetọn lẹ tọn mẹ gba. É tin to gbonu na ẹntẹ agùn pipli yetọn lẹ tọn, ṣigba bo tin to dopoyínyín mẹ po Jiwheyẹwhe po to oglọ amìsisá Gbigbọ nugbo tọn lọ tọn. Zẹdekia lọsu hò alaka na yẹwhegán Mikaia, mẹhe basi azò ogàn tọn lẹ bo dọmọ, “Lé wẹ Oklunọ dọ…”, omẹ he pò lẹpo yìgbe nẹ to dopoyínyín mẹ. Kọndopọ daho tẹ wẹ ehe? Ṣigba, yé omẹ pó tin to oglọ gbigbọ lalo tọn tọn, yé omẹ pó yín mẹkiklọ́, bo dọ dọdai dopolọ, dọmọ, “Lé wẹ Oklunọ dọ…”!

Wẹnzagùn he yé dohlan nado ylọ Mikaia dọ hlan ẹn dọ, ni nọ̀pọ́ po yé po bo dọ onú dopolọ. Omẹ Jiwheyẹwhe tọn lọ gblọn bo dọmọ, “Lé Oklunọ to ogbẹ̀, onú he É dọ hlan mi wẹ yẹn na dọ”. Yẹwhegán lọ dọ nugbo bo sọ mọ númimọ (2 OTANNUGBO 18:18-22). Nugbo é sè ohó he yè to didọ to olọn mẹ. Númimọ etọn sọgbe hẹ Ohó Oklunọ tọn, he É dọ gbọn yẹwhegán Elija dali pannukọn whẹ̀dida Ahab tọn (1 AHỌLU 21:19; ota 22:38).

Mikaia tindo kandeji sọmọ, bo dọ hlan Ahọlu he jlo nado wà danú hẹ whenuena é lẹ́gọ̀ sọn awhànfuntẹn to jijọho mẹ. Whenẹnu wẹ Mikaia dọ hlan ẹn dọmọ: “Gigọ̀ eyín hiẹ gọ̀ jijọho mẹ, bé Oklunọ ma dọhó gbọn dê gba.” Ahọlu lọ sọ hẹn ohó nẹ do ayi mẹ, bo dọmọ, “Sè, mì gbẹtọ lẹ, popo mìtọn”. Yẹwhegań nugbonọ depope, to whedepopenu dóna tin to kọndopọ pipé mẹ po yẹwhegán lẹpo po, he dọhó to Oyín Oklunọ tọn mẹ. Mọdopolọ wẹ na apọsteli, na mẹplọ́ntọ, na wẹndagbelátọ - na devizọ́n depope to Agbasa Klisti tọn mẹ.