YÈ WLÁN ẸN DỌ … (IT IS WRITTEN…)

Kẹdẹdi winwlántọ owé he tọn, yẹn jlo nado dọ onú pẹvi helẹ, linlẹn dọ gbẹtọ lẹ na do ayi e go po odẹ̀ po.

Yẹn tindo jlọjẹ daho de nado lẹzùn họntọn hẹ Jiwheyẹwhe to jọunjọja ṣie mẹ. Sọn owhè 1949 tọn mẹ, yẹn sè sọn yẹwhehódọtọ Amẹlikanu lẹ de, dogbọn azọ́n huhlọnnọ he Jiwheyẹwhe wà gbọn dawe he dali. Yẹn jó dê na ojlọjẹ susu nado yì núwiwà vọ́fọ́n po azọ̀nhẹngbọ tọn po kọ̀n to yovotò Europe po U.S.A po mẹ. To osùn ṣinatọ̀ntọ, owhè 1955 tọn mẹ, yẹn yì núwiwà he yín pinplán gbọn William Branham dali kọ̀n, to otò Germany tọn mẹ na osẹ̀ dopo blébu, he hẹn nújijọ pataki de jọ̀ to gbẹ̀zán yise ṣie tọn mẹ, he yẹn ma sọgan wọn gbèdé. Núhe hẹn mi dote wẹ yín vọ́fọ́n pipli “ogbè azọ̀nhẹngbọ” he yè basi to osùn ṣidopotọ, owhè 1958 tọn mẹ, to otò Dallas tọn mẹ to Texas. To opli nẹlẹ tó, to oklé, yẹwhehódọtọ susu nọ dọyẹwhehó. To whèjai jlẹ lẹ mẹ, dawe huwhẹ̀nọ he, mẹsẹ́do sọn Jiwheyẹwhe de wẹ ohódọtọ daho lọ. Núhe yẹn mọ to devizọ́nwiwà etọn susu lẹ mẹ to otò Germany tọn mẹ podọ to otò U.S.A tọn mẹ, tindo kanṣiṣa dopolọ po devizọ́nwiwà Oklunọ mítọn Jesu Klisti, Mẹsia lọ tọn po to aigba ji.

Yẹn sè oylọ de sọn Oklunọ de nado dọyẹwhehó Ohó lọ tọn, po ogbè lélé de po to whèjai, to azán awetọ, osùn ẹnẹtọ, owhè 1962 tọn mẹ he yín yinyọ́nẹn gbọn nọvisunnu Branham dali, to azán atọ̀ntọ, osùn wiawetọ, owhè dopolọ tọn mẹ, to nukun okunnúdetọ awe tọn mẹ. To ehe mẹ, devizọ́nwiwà ṣie kọndopọ hẹ devizọ́nwiwà etọn. To whenuena yẹn ko zán hú owhè kó to devizọ́n lọ mẹ, to otò susu mẹ, to Azia mẹ, to Aflika, podọ to otò Europe tọn mẹ kaka jẹ otò Rusia tọn mẹ, yẹn lẹn dọ ojlẹ lọ ko wá na omẹ Jiwheyẹwhe tọn lẹpo nido mọdona onú he jọ̀ lẹpo. Mì do ayi e go dọ, yè ma dọ hlan nọvisunnu Branham dọ ewọ wẹ na jẹnukọnna wiwá Klisti tọn awetọ gba, ṣigba yè dọ hlan ẹn dọ, dọmọ: “Yè sẹ́ we do po owẹn de po jẹnukọnna wiwá Klisti tọn awetọ”. Jiwheyẹwhe yí yẹwhegán lọ, ṣigba bo jó owẹn lọ do na mí. Owẹn ehe wẹ opàgbe Jiwheyẹhwe tọn, podọ Ohó núdohiamẹ egbè tọn tọn. Eyín apáde owẹndagbe madopòdo he dóna yín lilá gbọn akọta lẹpo mẹ na okunnú de (MATIU 24:14; po OSỌHIA 14:6 po). Owẹndagbe pipé lọ gọ́na dọdai Owé Wiwé mẹ tọn lẹpo hlan ojlẹ godo tọn mẹ.

Dinvie, mí tin to ojlẹ núwiwà tọn he Owé HEBLU 13:8 tọn, po Owé JOHANU 14:12 tọn po, po Owé MALKU 11:22-23 tọn po mẹ, podọ ehe Owé susu devodevo lẹ dọ, dóna wá ṣiṣẹ̀ mẹ. Ehelẹ wẹ yín Owé atọ̀n he tọn dali nọvisunnu Branham dọhó gbọn. É mọ ṣiṣẹ̀ yetọn gbọn Owé Wiwé dali, ehe mẹdepope ma ko mọ sọn azán Jesu Klisti tọn lẹ mẹ kaka jẹ dinvie. Mí dóna tindo kandeji dọ, onú lẹpo sọgbe hẹ Ohó Jiwheyẹwhe tọn he yè wlán. Ohókanbiọ lọ wẹ yín dọ, e ma yín dọ mí yí omẹde kavi gbẹ́ ẹ gba, ṣigba mí hẹn azọ́n he Jiwheyẹwhe ko wà lẹ go. Mí mọ nugbo dọ, whladopo dogọ dọ Jiwheyẹwhe sọawúhia to huwhẹ̀ mẹ. Mí na wá whèdọ hlan Ẹn to owhẹ̀dazángbè, e ma yín hlan gbẹtọ de gba. Fie núyiwà huhlọnnọ nẹlẹ yín ṣiṣẹ̀ te, núdindọn gbẹtọ tọn lẹpo ni yì do ovọ́ mẹ.

Yẹn wá mọ dọ owẹn sọn Ohó Wiwé Jiwheyẹwe tọn mẹ, to owhèta agùn godo tọn he mẹ, na wá jẹnukọnna wiwá Klisti tọn awetọ. Yisenọ nugbo lẹpo na hodò owẹn lọ. Whenẹnu wẹ mí na wá donukun onú huhlọnnọ he Jiwheyẹwhe ko dópa yetọn lẹ, he na jọ gbọn Asivu Etọn he yè hẹn gọ̀wá dali. Mí omẹ pó dóna tindo tẹnmẹ mítọn to Agbasa Klisti tọn mẹ. Oklunọ Lọsu na dọ̀n mí dopọ hẹ Ede, bo plán omẹdidè lẹ biọ awhàngbigba daho whepoponu tọn mẹ. Yé na yín awhàngbatọ, mẹhe yè dópa hlan lẹ. Mí sọgan donukun zizédaga godo tọn sọn Jiwheyẹwhe Gánhunupotọ de to vlẹkẹsi mẹ whenuena mí kọ̀n míde dopọ po Ohó Etọn he yè wlán po. É na lẹzùn “Ohó didọ ogbẹ̀ tọn lọ” gbọn ehe dali huhlọn Jiwheyẹwhe tọn na yín didohia.

Kẹdẹdile yè dopàgbe do, whladopo dogọ Jiwheyẹwhe na whàn aigba po olọn lẹpo (HEBLU 12:26). Whenẹnu wẹ Owé Wiwé he na wá ṣiṣẹ̀ mẹ, dọ, “Yẹn na gblọn, wẹ Oklunọ dọ, yẹn na gblọnna olọn lẹ, yewlẹ bo na sọ gblọnna aigba lọ” (HOSEA 2:21). Yisenọ lẹ na tindo tẹnmẹ yetọn, kẹdẹdile yè wlán ẹn do to Owé ZEKALIA 10:1 tọn mẹ, dọ, “Mí nọ biọ jikun to ojlẹ jikun agọ̀gbọnẹn tọn mẹ sọn Oklunọ si, yèdọ sọn Oklunọ he basi abi lẹ si; ewọ bo na sọ ná finfán jikun tọn lẹ yé…” Kẹdẹdile yè dọ do jẹnukọn, dọ, ojlẹ awúmimiọn tọn na wá jẹnukọnna kọlilẹwá Klisti tọn. Nugbo, ojlẹ ojijẹ tọn ko wá! Le Oklunọ Ojijẹ tọn lọ dọ hlan mí do, wẹ mí na wà do, “Whenẹnu wẹ é dọ hlan núplọ́ntọ etọn lẹ, dọmọ, ojijẹ sù nugbo, ṣigba azọ́nwàtọ lẹ ma sù: enẹwutu mì hòdẹ̀ hlan Oklunọ ojijẹ tọn, na é ni do azọ́nwàtọ lẹ hlan ojijẹ etọn mẹ” (MATIU 9:37-38).

Otọ́ mítọn he tin to olọn mẹ,
Hihiọ wẹ oyín towe.
Ahọludu towe ni wá.
Ojlo towe ni yín wiwà to aigba go,
dile e te to olọn mẹ.
Ná egbè núdùdù egbèsọ mítọn mí.
Bo jo ahọ́ mítọn lẹ na mí,
Dile mí ko jona ahọ́tọnọ mítọn lẹ do.
A dọ̀n mí do whlepọ́n mẹ blo,
ṣigba whlen mí sọn danunọ si.
Na towe wẹ ahọludu lọ, huhlọn po
Gigo po, kakadoi. Niṣẹ.

Jesu Klisti dopolọ to osọ, egbè,
mọwẹ podọ kakadoidoi.
(HEBLU 13:8)