JIWHEYẸWHE PO TITÒ ETỌN PO HLAN GBẸTỌ LẸPO

To Owé PSALM 2:7 tọn mẹ, mí hia dọ, “Yẹn na dọ osẹ́ndoai lọ: OKLUNỌ ko dọ hlan mi, dọmọ, Hiẹ wẹ Ovi ṣie; egbè wẹ yẹn dè we tọ́n.” Ohógo he yín “egbè he”, kavi kẹdẹdilé tùnmẹ devo sọgan yín zinzán do, dọ, “azán egbè tọn”, ma tindo kànṣiṣa de po madopòdo po gba. E nọ dọhó do ojlẹ lẹ ji. To Alẹ̀nù Hóhó mẹ, eyín opagbè he yè do dogbọn onú he ja na wá jọ go. Dinvie, mí na gọ̀yì godo bo pọ́n ṣiṣẹ̀ etọn. Titò whlẹngan tọn lẹpo yín didoai to ohó dọdai Alẹ̀nù Hóhó tọn mẹ; ṣigba ṣiṣẹ̀ pagbè lẹpo tọn yí tẹnmẹ to Alẹ̀nù Yọ́yọ́ mẹ. To Owé PSALM 2:8 tọn mẹ, mí hia dogbọn Ovi lọ dali dọ, “Biọ mi, yẹn nasọ yí kosi lẹ na we na ogú towe, aigba pòdo lẹ na nútindo towe.” To afọ etọn 7-8 mẹ, mí sè dogbọn Ovi lọ tọn dali, dọ, kosi lẹpo na yín niná hlan Ẹn na ogú de. Eyín didohia hézéhézé hlan omẹ lẹpo dọ, mẹde ma sọgan yín whinwhlẹngan gbọn yise dohlan tintin JIWHEYẸWHE tọn poun dali gba, na aovi lẹ lọsu yise to É mẹ bo sọ sisọ́ (JAKỌBU 2:19). Ofligọ̀ lọ, yise whlẹngan tọn wẹ nado dó yise dọ JIWHEYẸWHE dopolọ ko dọwhẹ̀gbọ na mí hlan Ede gbọn Ovi lọ mẹ. Eyín mẹdepope ma dó yise to awúsọhiamẹ gbaungba JIWHEYẸWHE tọn to Klisti mẹ, omẹ lọ búali patapata. Owé Wiwé gbẹ́ tin to ote tẹgbẹ̀, “Yí Jesu Klisti OKLUNỌ sè, yè nasọ whlẹn we po whédo towe po.” (OWALỌ 16:31). Ovi lọ lẹzùn Whlẹngantọ mítọn; enẹwutu, mí dóna yise to É mẹ, na mí nido mọ whlẹngan.

To Owé PSALM 2:12 tọn mẹ, yè sọ vọ́ hinhọ́n tá do ohóta lọ ji. Mí mọ ohógbè he dọ, dọmọ, “Yí nùdonùgo na Ovi lọ, é nikã sadi, mìwlẹ bo nasọ và to ali lọ ji, whenuena homẹgble etọn fọ́ngú vude. Donanọ wẹ yé he din fibẹ̀tado to é mẹ lẹ.” Mí ma sọgan dasà Ohó he gba. Gbẹtọ susu nọ dọhó dogbọn JIWHEYẸWHE dali, dogbọn wanyínna Otọ́ olọn tọn dali, ṣigba bo ma yọ́nẹn dọ, Otọ́ lọ ko lẹzùn Whlẹngantọ mítọn gbọn Ovi lọ mẹ. Enẹwutu, yise nugbo to Otọ́ mẹ yín bibẹ́ po yise to Ovi lọ mẹ po, na gbọn Ovi lọ mẹ wẹ fligọ̀ mítọn wá te. Yise nugbo to JIWHEYẸWHE mẹ, wẹ yín yíyise to OKLUNỌ Jesu Klisti kẹdẹ mẹ. Na to Ewọ kẹdẹ mẹ JIWHEYẸWHE pé gbẹtọ te, podọ Ewọ mẹ wẹ mí na pé JIWHEYẸWHE bo nasọ mọ JIWHEYẸWHE, podọ bo nasọ yín whinwhlẹngan. Mí dóna yise to Ewọ mẹ dolé É sọawúhia dó na mítọn wutu.

Na míwlẹ tọn wutu, É dó kọ̀ndopọ Otọ́–Ovi tọn ai. Bọ mí lẹzùn visunnu po viyọnnu JIWHEYẸWHE tọn lẹ po. To Owé 2 SAMUẸLI 7:14 tọn mẹ, mí hia dogbọn dọdai he yè lá tọn dali, dọ, “Yẹn na yín Otọ́ etọn, ewọ nasọ yín visunnu ṣie.” Ṣigba e ma nọte do finẹ gba. JIWHEYẸWHE lẹn visunnu Etọn po viyọnnu Etọn lẹ po do titò daho mẹ. To Owé HOSEA 1:10 tọn mẹ, mí hia dọ, dọmọ: “…Mìwlẹ ma yín omẹ ṣie gba, e na yín didọ hlan yé dọ, Visunnu JIWHEYẸWHE ogbẹ̀nọ tọn lẹ wẹ mì.” Ehe bọawu gbọn Jesu Klisti dali. To Owé 2 KỌLINTINU 6:18 tọn mẹ, Paul dọ dolé dọ, “Bo na yín Otọ́ de hlan mì, mìwlẹ nasọ yín ovisunnu ṣie lẹ, podọ oviyọnnu ṣie lẹ, wẹ OKLUNỌ Gánhunupo dọ.” Ovisunnu podọ oviyọnnu JIWHEYẸWHE tọn lẹpo na yín tónusètọ bo nasọ do yéde lẹ hia di nugbonọ.

To Owé EFESUNU 1:5 tọn mẹ, apọsteli Pita dọ titò JIWHEYẸWHE tọn hlan mí, bo dọ dolé dọ, “Mẹhe ko dè mí na sọdodovi ovi lẹ tọn gbọn Jesu Klisti mẹ na Ede, kẹdẹdi homẹdagbe ojlo Etọn tọn.” Mí to ohódọ dogbọn JIWHEYẸWHE po titò Etọn po hlan gbẹtọ lẹpo tọn dali. Omẹ delẹ tin to aigba ji he mọdona núhe eyín nado yín apáde to titò JIWHEYẸWHE tọn mẹ. Yè ko dè yé to Klisti mẹ, podọ yé sọ tin to É mẹ. Enẹwutu, owhẹ̀gbledo de ma tin to yé ji. Yé ko mọ owhẹ̀suna pipé yí gbọn ofligọ̀ dali. Yé to homẹ JIWHEYẸWHE tọn hẹn hùn, kẹdẹdilé yè ko dè yé di visunnu podọ viyọnnu lẹ do. To Owé PSALM 89:26-27 tọn mẹ, yè dọ dogbọn Ovi JIWHEYẸWHE tọn dali, dọmọ: “Ewọ na dawhá ylọ mi, dọ, hiẹ wẹ Otọ́ ṣie, JIWHEYẸWHE, podọ awinyan whlẹngan ṣie tọn. Yẹn ga nasọ yí i do basi plọ́nji ṣie daho pete ahọlu aigba tọn lẹ tọn.” Dọdai de wẹ ehe lọ yín to Alẹ̀nù Hóhó mẹ, ṣigba mí mọ ṣiṣẹ̀ etọn to Jesu Klisti OKLUNỌ mítọn mẹ. To agbasalan de mẹ, kẹdẹdi Ovi dètọ́n dopo akàn, É jiyà bo sọ kú to otẹn ovisunnu po oviyọnnu JIWHEYẸWHE tọn lẹpo po tọn mẹ. To fọ́nsọnkú Etọn mẹ, agbasa Etọn diọ sọn kúkú mẹ biọ makú mẹ. To nugbo he mẹ, fọ́nsọnkú mítọn po didiọ agbasa mítọn tọn po yín núhe tin to dandan mẹ.

Mí ma to hódọ do núplọ́nmẹ ehe ji gbẹtọ lẹ sọgan dọ̀nnú do gba. Ṣigba mí to alọ dlẹn do domọna titò whlẹngan JIWHEYẸWHE tọn tọn, mẹhe yí visunnu gbẹtọ tọn lẹ do basi visunnu JIWHEYẸWHE tọn lẹ. E ma yín dọ yè jo ylando mítọn lẹ na mí poun wẹ gba, ṣigba mí sọ yín mẹfligọ̀ sọn okú si bo sọ yín túntún dote sọn lọnzòdo si. To Owé PSALM 68:19-20 tọn mẹ, mí hia dọ, “Donanọ wẹ OKLUNỌ, mẹhe to agbàn hẹn na mí egbèsọegbèsọ, yèdọ JIWHEYẸWHE whlẹngan mítọn tọn. JIWHEYẸWHE whlẹngan tọn de wẹ JIWHEYẸWHE hlan míwlẹ; JEHOVA OKLUNỌ wẹ hẹndogbẹ̀ sọn okú si yín.”

Omẹde matin to aihọn mẹ he tindo huhlọn to okú ji gba. Nado dọ, omẹ lẹpo wẹ okú zé yì adavo Enọku po Elija po. Mí tindo ṣiọditẹn susu lẹ́do mí, gbẹtọ yín jiji do aihọn he mẹ bo sọ nọ kú. Ṣigba OKLUNỌ dọ, dọmọ: “Yẹn na flí yé sọn alọ kútòmẹ tọn mẹ; yẹn na flí yé sọn okú mẹ: okú È, fie wẹ azọ̀nylankan towe lẹ te? Kútòmẹ È, fie wẹ vivà towe te? Lẹnvọjọ na yín whíwhla sọn nukun ṣie lẹ mẹ.” (HOSEA 13:14).

Ehe wẹ opagbè de to Alẹ̀nù Hóhó mẹ, nugbo wẹ e sọ yín to dinvie. Mí yọ́n Ewọ he gbawhàn okú po Satani po tọn, podọ olọnzòdo tọn na mítọn wutu. To Owé ZEKALIA 9:11 tọn mẹ, mí hia dọ, “Na hiẹ tọn ga, na ohùn alẹ̀nù towe tọn tọn wutu yẹn ko do ogàntọ towe lẹ hlan jẹgbonu sọn odò mẹ ehe mẹ osìn de ma te.” To Lazalọsi po adọkunnọ po ṣẹnṣẹn, mẹnu wẹ to avivi na osìn tọn wutu?

Yé mẹhe nọte pọ́n avọ́sinsán wiwá Mẹssia lọ tọn tọn, yì paladisi mẹ, ṣigba whenuena Klisti fọ́n, yé mẹhe tin to asiko Alẹ̀nù Hóhó tọn mẹ, he tindo tẹnmẹ to fọ́nsọnkú tintan mẹ, fọ́nsọn oṣiọ lẹ mẹ po É po (MATIU 27:51). To Owé EFESUNU 4:8 tọn mẹ, mí hia dọ, “Enẹwutu wẹ, whenuena é ko hẹji yì aga, é plán mẹglọnọ lẹ do wlé awhànkanlinmọ, bo sọ ná núniná gbẹtọ lẹ.”

Yè ko dopagbè alẹ̀nùnù yọ́yọ́ lọ tọn to Alẹ̀nù Hóhó mẹ. Mí to azọ́nwà po ṣiṣẹ̀ Ovi yínyín tọn po. Yẹwhegán Jelemia wlán to Owé JELEMIA 31:31-34 tọn mẹ, dọ, “Dayi e go, azán lẹ wá, wẹ OKLUNỌ dọ, bọ yẹn na basi alẹ̀nù yọ́yọ́ de hẹ owhé Islaẹli tọn, podọ hẹ owhé Juda tọn: kẹdẹdi alẹ̀nù he yẹn basi hẹ otọ́ yetọn lẹ to azán he mẹ yẹn yí alọ do hẹn yé nado hẹn yé tọ́n sọn aigba Egypti tọn ji ma wẹ gba; alẹ̀nù ṣie he yé gbà, lé yẹn tlẹ yín OKLUNỌ to yé ji do, wẹ OKLUNỌ dọ. Ṣigba ehe wẹ alẹ̀nù he yẹn na basi hẹ owhé Islaẹli tọn to azán nẹlẹ godo, wẹ OKLUNỌ dọ; Yẹn na yí osẹ́n ṣie do ohò yetọn mẹ dọn, podọ ayiha yetọn mẹ wẹ yẹn na wlán ẹn do; Yẹn nasọ yín JIWHEYẸWHE yetọn, yéwlẹ nasọ yín omẹ ṣie: yé ma sọ to na plọ́n omẹ dopodopo kọmẹnu etọn, podọ omẹ dopodopo nọvisunnu etọn ba, dọmọ, yọ́n OKLUNỌ; na yé omẹ pó wẹ na yọ́n mi, sọn mẹwhiwhè yetọn mẹ jẹ mẹkiklo yetọn mẹ, wẹ OKLUNỌ dọ; na yẹn na jona oylanwà yetọn, ylando yetọn wẹ yẹn ma sọ to na flin ba gba.”

OKLUNỌ JIWHEYẸWHE dopagbè he bo sọ hẹn ṣẹ̀ dọ, “Ayiha yọ́yọ́ de ga wẹ yẹn na ná mìwlẹ, podọ gbigbọ yọ́yọ́ de wẹ yẹn na yí do mì hòmẹ: yẹn bo nasọ de ayiha zannu tọn sẹ̀ sọn agbasalan mìtọn mẹ, yẹn bo nasọ ná ayiha agbasalan tọn de mì. Yẹn bo nasọ yí gbigbọ ṣie do mì hòmẹ, bo sọ hẹn mì nado nọ zinzọnlin to osẹ́ndoai ṣie lẹ mẹ, mìwlẹ bo nasọ yìn whẹ̀dida ṣie lẹ bo sọ nọ basi yé.” (EZEKIẸLI 36:26-27).

Mí ni pọ́n hlan azán daho avọ́sinsán tọn nẹ́ bo yọ́nẹn dọ, É jona agọ̀jijẹ mítọn bo ma sọ flin oylan mítọn lẹ ba. Ewlọsu dèkunnu etọn whẹ́po e do jọ̀, to Owé MATIU 26:28 tọn mẹ, mí hia dọ, “Na ehe wẹ ohùn ṣie alẹ̀nù yọ́yọ́ lọ tọn, he yè kọ̀ndai na omẹ susu hlan odèsẹ̀ ylando tọn.” Owẹndagbe lọ gọ́na onú he jọ̀ whenuena whlẹngantọ mítọn kú. Kunnudètọ delẹ sọ mọ Ẹn to fọ́nsọnkú Etọn godo. E ma yín ajlu de gba, nugbo wẹ. É sọawúhia di Awhàngbatọ Huhlọnnọ de.

Apọsteli Pita wlánwé dogbọn nújijọ̀ daho he lọ tọn dali, dọ, “Na Klisti lọsu ga jiyà whladopo na ylando wutu, dódónọ na mawàdódónọ, na é nido hẹn mí wá JIWHEYẸWHE de, mẹhe yè hù to agbasalan mẹ, ṣigba bọ yè hẹn wá ogbẹ̀ to gbigbọ mẹ.” (1 PITA 3:18). Akuẹ he vẹ́ahi wẹ yè do họ̀ mí. Yè flí mí gọ̀, yè whlẹn mí. Okú po okútòmẹ po ma sọ tindo huhlọn de to mí ji ba. Mí yise to onú he JIWHEYẸWHE dọ to Ohó Etọn mẹ, dọmọ, “Bé lé eyín ovi lẹ yín máhẹtọ to agbasalan po ohùn po mẹ, Ewlọsu basi máhẹtọ to e mẹ ga; dọ gbọn alọ okú tọn mẹ é nido hù mẹhe tindo huhlọn okú tọn sùdo, enẹ wẹ, lẹgba; bo whlẹn yè he gbọn osi okú tọn mẹ tin to ogbẹ̀whenu yetọn lẹpo mẹ jẹ mẹglọnọ mẹ.” (HEBLU 2:14-15). É dótana azọ́n ofligọ̀ tọn, dilé É fọ́n to azán atọ̀ntọ gbè do. Whenenu, É nọ̀hẹ núplọ́ntọ Etọn lẹ họ̀ azán kandé, bo to ohó dọ hlan yé dogbọn núhe yín Ahọludu JIWHEYẸWHE tọn lẹ tọn dali. Enẹ godo, É hẹ ji yì olọn mẹ to nukun núplọ́ntọ Etọn lẹ tọn mẹ (LUKU 24:50-51). Mí omẹ pó yọ́n Owé Wiwé helẹ.

Apawhé he dabla lọ wẹ yín dọ, onú lẹpo ko yín didọ jẹnukọn to Alẹ̀nù Hóhó mẹ podọ yè sọ dèkunnu yetọn bo sọ dó dọpọ́n yetọn to Alẹ̀nù Yọ́yọ́ mẹ. To Owé PSALM 68:18 tọn mẹ, yè wlán ẹn dọ, “Hiẹ ko hẹ ji yì aga, hiẹ ko wle awhànkanlinmọ lẹ sọha de; hie ko mọ núniná yí na gbẹtọ lẹ.” Ohógbe mọhunkọtọn sọ yín mimọ to Owé PSALM 47:5 tọn mẹ, dọmọ, “JIWHEYẸWHE hẹji yì po awhá po, OKLUNỌ po ogbè opẹ̀n tọn po”. Mí omẹ pó yọ́nẹn dọ Jesu Klisti hẹji yì aga, ṣigba mí sọ do ayi e go dọ, Ewọ lọ wẹ JIWHEYẸWHE he sọawúhia to agbasa mẹ. Enẹwutu, nugbo wẹ dọ, JIWHEYẸWHE hẹji yì po awhá po. Nugbo wẹ titò JIWHEYẸWHE tọn dohlan gbẹtọ lẹpo. To Owé EFESUNU 4:10 tọn mẹ, mí hia dọ, “Omẹ dopo he ko jẹte wẹ ko sọ hẹji yì fie yì aga hú olọn lẹpo, na É nido gọ́ onú lẹpo.”

Mí sọgan yì nukọn to Owéfọ devo lẹ mẹ, dogbọn ohóta he lọ tọn dali. Mí na dotana Owéta he po ohó he po, dọmọ, “Na jẹnukọnna popo ehe yẹn ko mọ yí ga wẹ ehe yẹn yì na mí, lé Klisti kú na ylando mítọn lẹ kẹdẹdilé Owé Wiwé lẹ dọ do; podọ yè dì i, podọ É sọ tite to azán atọ̀ntọ gbè kẹdẹdilé Owé Wiwé lẹ dọ do: podọ yè mọ ẹn to Kefa de, podọ whenẹnu to omẹ wiawe lẹ de: enẹ godo yè mọ ẹn to mẹmẹsunnu he lán to fowe-kanwe-kó ji lẹ de whladopo; susu mẹhe tọn pò jẹ dinvie, ṣigba vundè ko mlọnai damlọn. To enẹ godo yè mọ ẹn to Jakọbu de; podọ whenẹnu to Apọstẹli lẹpo de. To godo yé omẹ popo tọn, yè mọ ẹn to yẹn de ga, di to omẹ he yè ji jẹnukọnna ojlẹ etọn de.”(1 KOLINTINU 15:3-8).