JIWHEYẸWHE PO TITÒ ETỌN PO HLAN GBẸTỌ LẸPO

Yè wlán nújijọ̀ daho de to Owé DANIẸLI 7:9-10 tọn mẹ, dọ, “Yẹn to pinpọ́n yè do zé ofin lẹ dlan ai, bọ mẹde he yín hóhótọ azán lẹ tọn sinai: avọ̀ etọn yín wéwé di osìn agó podọ odà ota etọn tọn taidi lẹngbọfún wiwé; ozòlọ miyọ́nnọ lẹ wẹ ofin etọn, podọ kẹkẹfọ etọn miyọ́n jiji…” Nugbo JIWHEYẸWHE ma nọ pòyọ́nhó, É ma yín Otọ́-otọ́ mítọn lẹ tọn gba, ṣigba Otọ́ mítọn wẹ, JIWHEYẸWHE dopolọ, he ma nọ diọ gbèdé. To númimọ he mẹ, Daniẹli mọ Ẹn taidi Owhẹ̀datọ de, Mẹhe tindo aṣẹpipa lẹpo to ogándudu Etọn mẹ. Númimọ lọ yín didohia to Owé DANIẸLI 7:13 tọn mẹ, dọ, “Yẹn sọ mọ to númimọ ozán lọ mẹ tọn lẹ mẹ, bo, dayi e go, mẹde po aslọ olọn tọn lẹ po taidi visunnu gbẹtọ tọn de wá finẹ, ewọ sọ wá yèdọ jẹ hóhótọ azán lẹ tọn lọ de, yé sọ hẹn ewọ wá sẹ̀pọ ewọ nukọn.”

Owéfọ mọtọnhunkọ yín zinzán nado do gbẹtọ delẹ hia to JIWHEYẸWHE yínyín mẹ, yẹwhegán Alẹ̀nù Hóhó mẹ tọn lẹ mọ núhe to na jọ̀ to Alẹ̀nù Yọ́yọ́ mẹ lẹ jẹnukọn. Númimọ he ma ko yín hinhẹn ṣẹ̀ kakajẹ azán egbé tọn lẹ mẹ: “Yè sọ yí ahọluigba na ẹn to finẹ, po gigo po, po ahọludu de po, na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn: ahọluigba madopòdo de wẹ ahọluigba etọn, he ma na jùwáyi, podọ ahọludu etọn enẹ he ma na yín vivà.” (DANIẸLI 7:14).

Ojlẹ lọ ja whenuena Klisti na duahọlu, bọ mí na tin po É po. Bé e sọgan yín awujinú na we nado mọ dọ Ovi Gbẹtọ tọn dopolọ wẹ yín Hóhótọ azán lẹ tọn? Nado mọdona ehe, gbọ mí ni hia Owé OSỌHIA 1:13-14 tọn, “To zògbántin ṣinawe lẹ lọ ṣẹnṣẹn, mẹde taidi Ovi gbẹtọ tọn, he yè ṣinyọn avọ̀ he dite jẹ afọkọ na bo sọ yí gbàja sika tọn do gbàn anọ́ na. Ota etọn po odà etọn po wé di sekanfún, yé wé di kẹnsu; nukun etọn sọ di zodẹ́…”

Eyín mí dọhó dogbọn ohógbe he yè zán to Alẹ̀nù Yọ́yọ́ mẹ lẹ go, mí na dọ, dọmọ, Daniẹli mọ Otọ́ lọ po odà wéwé de po, Johanu lọsu sọ mọ Ovi lọ po odà wéwé de po. Ninọ̀mẹ nẹlẹ yín ninọ̀mẹ dopolọ. Ehe sọ dohia whladopo dogọ́ dọ, Ovi lọ wẹ awúsọhia Otọ́ lọ tọn podọ to godo mẹ, nasọ wá biọ JIWHEYẸWHE yínyín mẹ, kẹdẹdilé yè wlán dó to Owé 1 KỌLINTINU 15:28 tọn mẹ, dọ, “Whenuena yè na yí onú lẹpo do oglọ etọn, whenẹnu wẹ Ovi na ede na yín mẹmẹglọ ga hlan ewọ he yí onú lẹpo do oglọ etọn, na JIWHEYẸWHE nido yín popo to onú popo mẹ.” Ehe sọgbe titegbe.

Ojlẹ de ja, whenuena Ovi lọ ma na tin ba, ṣigba É na lẹzùn OKLUNỌ lọ; dinvie É tin taidi Ovi de, ṣigba to enẹgodo, É na yín OKLUNỌ whladopo dogọ́. Omẹ dopolọ he Johanu mọ to zọnlinzin to ṣẹnṣẹn zògbántin ṣinawe lẹ lọ mẹ taidi Ovi Gbẹtọ tọn, Ewlọsu wẹ dèkunnu Ede titi tọn dọ, “Yẹn wẹ Alfa, yẹn wẹ Omẹga, odódó, opòdo, mẹhe tin, bo ko tin, bo sọ ja, Gánhúnupo.” (OSỌHIA 1:8). Whẹ́po OKLUNỌ do dèkunnu Ede titi tọn, Johanu mọ Ẹn to númimọ de mẹ dọ, É ja, “Dayi e go, é ja po aslọ po; nukun lẹpo wẹ na mọ ẹn, yé he sọ́whán ẹn lẹ ga: hẹnnu aigba tọn lẹpo wẹ na blawu to é ji. Yèdọ mọwẹ. Niṣẹ.” (OSỌHIA 1:7).

To Owé OSỌHIA 20:11-12 tọn mẹ, ofin wéwé whẹ̀dida tọn lọ yín didohia to finẹ. Omẹ dopo gê wẹ sinai to ofin lọ ji; Ewọ lọ nukọn wẹ omẹ pó na pli do. Johanu dèkunnu dọ, “Yẹn sọ mọ ofin wéwé daho de, po ewọ he sinai to e ji po, nukọn mẹhe tọn aigba po olọn po họ̀n yì te; yé ma sọ mọ tẹnmẹ de na yé ba. Yẹn sọ mọ oṣiọ lẹ, pẹvi po daho po, yé ṣite to JIWHEYẸWHE nukọn…”

To Owé OSỌHIA 22:1 po 3 tọn mẹ, mí hia dogbọn ofin JIWHEYẸWHE tọn podọ Lẹngbọvu lọ tọn dali, ṣigba eyín mí na do É hia to gbẹtọ yínyín mẹ, yè dọhó Etọn dọ omẹ dopo gê wẹ. “Yé na mọ nukun etọn (e ma yín: nukun yetọn gba); oyín etọn (e ma yín oyín yetọn gba) nasọ tin to nukọn yetọn.” (OSỌHIA 22:4). To godo mẹ, yè nasọ sè ogbè Mẹdopolọ he dọhó to whẹ́whẹ́whenu tọn whladopo dogọ́. To Owé he gbọn godo to Owé Wiwé mẹ, mí sè É dọ, dọmọ, “Bo do ayi e go, yẹn ja yiyáyiyá; ale ṣie sọ tin to dê, nado ná mẹdopodopo kẹdẹdilé azọ́n etọn na te. Yẹn wẹ Alfa, yẹn wẹ Omẹga, odódó po opòdo po, nukọntọ, godotọ.” (OSỌHIA 22:12-13).

Omẹ lẹpo yọ́nẹn dọ, Owéfọ he yín winwlán to Ohóta madopòdo de mẹ. Owéfọ helẹ tin nado gọalọna omẹ dopodopo nido dindona ede gbọn odẹ̀hihò dali. Mí dóna tẹnpọ́n nado nọ̀ otẹn Ohó Wiwé JIWHEYẸWHE tọn tọn mẹ to núdepope he mí yise, bo sọ to pinplọ́nmẹ. Whenuena onú lẹpo na wá pipégan mẹ, mí nasọ do hùdo Whlẹngantọ tọn, Azọ̀nhẹngbọtọ lọ tọn, Owhẹ̀gbọtọ lọ tọn, podọ Owhẹ̀yídọtọ lọ tọn ba gba – omẹ lẹpo na yín hinhẹn gọ̀wá JIWHEYẸWHE de, bo na yín hinhẹn pégán na madopòdo. Whenẹnu mí nasọ sè dogbọn Ovi Gbẹtọ tọn, dogbọn Ovi Davidi tọn, podọ dogbọn Ovi JIWHEYẸWHE tọn tọn dali ba gba – JIWHEYẸWHE na yín popo to popo lẹpo mẹ. Owéfọ dopo he yín niná to anádemẹ kleun de mẹ nado klitana ohó he mí to didọ lẹpo, dọ “…Do ayi e go, gohọ̀ JIWHEYẸWHE tọn tin to gbẹtọ lẹ de, ewọ nasọ nọ̀hẹ yé, yé na yín omẹ etọn, JIWHEYẸWHE lọsu nasọ nọ̀hẹ yé, bo nasọ yín JIWHEYẸWHE yetọn. JIWHEYẸWHE nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko jùwayì. Ewọ he sọ sinai to ofin lọ ji dọmọ, pọ́n, yẹn diọ onú lẹpo zùn yọ́yọ́. É sọ dọ hlan mi, dọmọ, wlánwé: ohó helẹ dódó po nugbo po wẹ. É sọ dọ hlan mi, dọ, E vọ̀, Yẹn wẹ Alfa, yẹn wẹ Omẹga, odódó, opòdo. Yẹn nasọ ná ewọ he nugblahu nù sọn asisa osìn ogbẹ̀ tọn mẹ vọnu. Ewọ he gbawhàn wẹ na dugú onú popo tọn; yẹn nasọ yín JIWHEYẸWHE etọn, ewọ nasọ yín ovi ṣie.” (OSỌHIA 21:3-7).

Owéwlántọ dopolọ ko wàzọ́n do ohóta vivẹ he ji Owé Wiwé dọhó do lẹ. Owé helẹ yín didè tọ́n gbọn ogbẹ̀lọ blébu mẹ to ogbè susu mẹ, bo tindo dona madopòdo hlan omẹ susu.

To devizọ́nwhé ogbẹ̀lọ blébu tọn, mí sọ tindo yẹwhehódidọ owé William Branham tọn, he sọgan yín sisẹ́do mẹhe do ojlo nado tindo e lẹ. Owékandai owé he tin tọn lẹ sọgan yín mimá.

E na yín awújinnu na mì nado yọ́n núdùdù gbigbọ tọn he OKLUNỌ Whlẹngantọ mítọn ko wleawu dai na omẹ Etọn lẹ.