JIWHEYẸWHE PO TITÒ ETỌN PO HLAN GBẸTỌ LẸPO

Owéfọ susu wẹ dèkunnu dọ, JIWHEYẸWHE yín Owhẹ̀datọ; mọ dopolọ, mí mọ OKLUNỌ taidi Owhẹ̀datọ. Owé PSALM 50:6 tọn, dọ, dọmọ: “…na JIWHEYẸWHE Lọsu wẹ whẹ̀ datọ”; Owé PSALM 58:11 tọn dọ, dọmọ: “…Nugbo, JIWHEYẸWHE de tin ehe to whẹ̀ da to aigba ji.” Yẹwhegán Isaia wlán to Owé ISAIA 33:22 tọn mẹ, dọ, “Na OKLUNỌ wẹ whẹ̀ datọ mítọn, OKLUNỌ wẹ osẹ́ nnọ mítọn, OKLUNỌ wẹ ahọlu mítọn; ewọ na whlẹn mí gán.” Omẹ dopolọ he ná osẹ́n nasọ dawhẹ̀ kẹdẹdi osẹ́n Etọn. To Alẹ̀nù Yọ́yọ́ mẹ, Jakọbu dọ, dolé dọ, “Osẹ́ nnamẹtọ dopo wẹ tin, mẹhe sọgan whlẹn omẹ, bo sọ sọgan hùsúdo…” (JAKỌBU 4:12). Yẹwhegán JELEMIA sọ dọhó OKLUNỌ tọn di whẹ̀datọ, dọmọ: “Ṣigba OKLUNỌ Awhànpa lẹ tọn, he nọ yí dódó do dawhẹ̀ …” (JELEMIA 11:20). To vivọnu ogbẹ̀ Paul tọn tọn é dọ, dọmọ: “Sọn dinvie yè ko zé ojẹgbakun dódó tọn daga na mi, ehe OKLUNỌ, whẹ̀ datọ dódónọ, na ná mi to azán nẹ gbè.” (2 TIMỌTI 4:8). To Owé JOHANU 5:22 tọn mẹ, yèdọ, dọmọ: “Na Otọ́ ma nọ dawhẹ̀ mẹdepope tọn, ṣigba É ko yí whẹ̀ dida lẹpo na Ovi.”

To Owé OWALỌ 10:42 tọn mẹ, whenuena Pita to yẹwhehódọ to owhé Kọnẹliọsi tọn gbè, é zán ohógbè de dọ, Jesu Klisti wẹ whẹ̀datọ omẹ gbẹ̀ po oṣiọ lẹ po tọn. Zizé ehe jlẹdo Owé HEBLU 12:23 tọn go fie JIWHEYẸWHE yín didohia te taidi Owhẹ̀datọ, dọ, “…to JIWHEYẸWHE whẹ̀ datọ gbẹtọ lẹpo tọn de…” Whladopo dogọ́, omẹde sọgan kànbiọ dọ, mẹnu wẹ Whẹ̀datọ to whenẹnu? Nugbo, Owhẹ̀datọ dopo wẹ na tin, kẹdẹdi Osẹ́nnamẹtọ dopo. Eyín mí hia gbọn JIWHEYẸWHE dali, gbọn OKLUNỌ dali, Otọ́ dali, kavi Ovi, e ma tindo vògbingbọn depope. Dopolọ wẹ to whelẹponu. Mí dóna mọdona kakadoi dọ, mí to azọ́nwà po JIWHEYẸWHE dopo po, Mẹhe mí mọ to awúsọhia võvo mẹ.