JIWHEYẸWHE PO TITÒ ETỌN PO HLAN GBẸTỌ LẸPO

To gbẹtọ yínyín Etọn mẹ yè dọhó do Klisti go di devizọ́nwàtọ de. É wá nado hẹn ojlo pipé JIWHEYẸWHE tọn di. Mí hia to Owé ISAIA 42:1 tọn mẹ, dọ, “Pọ́n devi ṣie, mẹhe yẹn gọalọna, mẹvivẹ ṣie, mẹhe go hòmẹ ṣie hùn do; yẹn ko yí Gbigbọ ṣie do é ji: ewọ nasọ hẹn whẹ̀dida jẹgbonu wá na Kosi lẹ.” Ehe yín opagbè de podọ ohó he yè dọdai de to Alẹ̀nù Hóhó mẹ, bọ e wá lẹzùn ṣiṣẹ̀ nugbo de to Alẹ̀nù Yọ́yọ́ mẹ. Visunnu po viyọnnu JIWHEYẸWHE tọn lẹpo po yín alọkẹyí hlan Otọ́ olọn tọn gbọn Jesu Klisti, Ovi lọ dali.

Godo he Gbigbọ JIWHEYẸWHE tọn jẹdo Klisti ji wẹ É yín Messia he yè yí amìsisá do dè, bo sọ ṣẹ̀ devizọ́n Etọn wà. To Owé LUKU 4:18 tọn mẹ, É hia dọdai he yè dọ gbọn Ewọ tọn dali to Owé ISAIA 61:1-2 tọn mẹ, dọ, “GBIGBỌ OKLUNỌ JIWHEYẸWHE tọn tin to oji é; na OKLUNỌ ko yí amìsisá do dè mi nado dọyẹwhehó wẹndagbe tọn hlan hòmẹmimiọnnọ lẹ; é ko do mi hlan nado basi pọ́ngbọ ayiha awublanọ lẹ tọn, nado lá mẹdekannujẹ hlan mẹmẹglọ lẹ, podọ hùnhùn ogànhọ̀ tọn na ogàntọ lẹ. Nado lá owhè alọkẹyí OKLUNỌ tọn…”

Titò didè JIWHEYẸWHE tọn podọ azọ́n Etọn ko yín ṣiṣẹ̀. Na Klisti ko fọ́n sọn oṣiọ lẹ mẹ bo togbẹ̀ to mẹfligọ̀ lẹ mẹ, bo sọ gbẹnkànna devizọ́n Etọn gbọn yé mẹ. Yè whlẹn omẹ dindọ̀n lẹ, mẹhe tin to mẹglọnọ lẹ yín hinhẹn jẹ mẹdekannu, azọ̀ntọ lẹ yín hinhẹn jẹ gángán, na Jesu wẹ dopolọ to osọ, egbé, mọwẹ podọ kakadoi. Mí yín máhẹtọ to alẹ̀nùnù he JIWHEYẸWHE basi gbọn Jesu Klisti mẹ. To Owé ISAIA 42:6-7 tọn mẹ, yè wlán ẹn dọ, “Yẹn OKLUNỌ wẹ ylọ we to dódó mẹ, yẹn nasọ hẹn alọ towe go, bo na yí we whla, bo yí we do basi alẹ̀nù gbẹtọ lẹ tọn, hinhọ́n kosi lẹ tọn de; nado hùn nukun na nukuntọnnọ lẹ, nado hẹn ogàntọ lẹ tọ́n sọn gànwhé, po mẹhe sinai to zinvlu mẹ lẹ po sọn gànhọ̀ mẹ.” Mí yọ́nẹn dọ dọdai he ko lẹzùn onú nugbo de. Ṣiṣẹ̀ etọn sọgan yín hihia to Owé MATIU 12:17-21 tọn mẹ, dọ, “Na ehe yè dọ gbọn onù Isaia yẹwhegán tọn mẹ nido di, dọ, Mì pọ́n, devi ṣie, mẹhe yẹn ko dè; mẹyínwanna ṣie, mẹhe mẹ yè hẹnhòmẹhùn alindọn ṣie te dagbedagbe: Yẹn na yí Gbigbọ ṣie do é ji, ewọ nasọ lá whẹ̀dida hlan Kosi lẹ. É ma to avùn na hò, é ma to awhá na do; mọ mẹdepope ma to ogbè etọn na sè to alihogbó ji. Ofán gbigbà wẹ ewọ ma to na wẹ́n, sekan he to azọ̀ tì wẹ ewọ ma to na ṣi, kaka é do whẹ̀dida hlan gbonu jẹ whàngba mẹ. Oyín etọn mẹ wẹ Kosi lẹ na dotódido te.”

Yẹwhegán Isaia do Mẹflitọ lọ hia di devizọ́nwàtọ de to oyàjiji Etọn lẹ mẹ hinhẹn sọn Owé ISAIA 52:13 tọn mẹ jẹ ota 53:12 tọn mẹ. Yẹwhegán lẹ ko mọ aliho Etọn sọn Jipá Gethsemane tọn mẹ jẹ Osó Kalvali tọn kọ̀n gbọn núdohiamẹ wiwé de dali. Isaia wlán dọ, “…Whenuena yè mọ ẹn, é ma tin awufẹ́ he é do do jlo mí. Yè vlẹ ẹ, yè sọ gbẹ́ ẹ to gbẹtọ lẹ de, gbẹtọ awublanọ, he yọ́n awubla: e sọ taidi mí hẹn nukun mítọn whla sọn é go; yè vlẹ ẹ, mí ma sọ hò é pọ́n. Nugbo ewọ ko hẹn awubla mítọn, é ko zé nukunbia mítọn yì: gãnṣo mí hlẹ ẹ di omẹ hihò, di omẹ yè linu to JIWHEYẸWHE de, bọ yè sọ bia nukunna. Ṣigba yè húnú in na ylando mítọn, yè sọ gbleawu nẹ́ na ylankan mítọn, hihò jijọho mítọn tọn tin to é ji: podọ hihò etọn wẹ yè yí do hẹnazọ̀n mítọn gbọ̀.” (ISAIA 53:2-5).

To Owé PSALM 129:3 tọn mẹ, yè ko dọhó oyàjiji Etọn tọn dai, “Whẹ̀nflitọ lẹ fliwhẹ̀n to nẹgbé ṣie ji: yè hẹn whẹ̀ndọvlọ yetọn lẹ dite.” E sọgan paṣa mí núhe wutu É dóna gbọn oyàjiji mẹ, ṣigba mí mọdona dọ É dóna hẹn oyàjiji mítọn. Míwlẹ wẹ owhẹ̀hùtọ lẹ lọ. To Owé ISAIA 50:6 tọn mẹ, linlẹn dopolọ yín didohia, dọ, “Yẹn jó nẹgbé ṣie na núlimẹtọ lẹ, alaka ṣie na fúnsùntọ lẹ: Yẹn ma yí nukun ṣie whla sọn winyàn tántúndogona tọn si.” Biblu hiatọ lẹ, yọ́n lé yè vlẹ, bo hò, bo sọ túntán do Oklunọ podọ Whlẹngantọ mítọn go do. Onú he yẹwhegán lẹpo dọ dogbọn Etọn dali lẹ wá ṣiṣẹ̀ mẹ.

Kẹdẹdi afanúmẹ de, Mẹssia lọ yín vivlẹko to ninọ̀mẹ he mẹde ma sọgan doakọ́nna. Yè wà hẹ ẹ di owhẹ̀hùtọ daho de to aigba ji. To Owé MALKU 14:65 tọn mẹ, mí hia dọ, “Omẹ delẹ sọ ṣẹ̀ tántún do ogo nẹ́, bo sọ bla nukunmẹ etọn, bo to akotokún li i, bo sọ to didọ hlan ẹn, dọ, Dọdọdai: linzọ́nyítọ lẹ sọ to alọpahomẹ yetọn yí do to tómẹhò nẹ́.” Mẹnu wẹ sọgan mọdona dọ OKLUNỌ Gigonọ lẹzùn awublanọ, avinọ, podọ awufiẹsanọ? To Owé MALKU 15:28 tọn mẹ, mí sọgan hia dogbọn jẹgbekun owùn tọn lọ dali, ehe yè ṣinyọ́n do ota etọn, podọ lé mẹvlẹtọ lẹ vlẹ ẹ ko do, “Owé Wiwé sọ di, ehe dọmọ, yè hia ẹ dogọ́ ylandonọ lẹ.”

To oyàjiji Etọn mẹ, mí mọ ẹn di Ahọlu to whànpẹ Etọn mẹ gba; mí mọ ẹn di afànumẹ de, mẹhe bẹ́ agbàn gbẹtọ lẹpo tọn do Ede ji. Yẹwhegán Isaia lọsu ko dọ núhe sinsẹ́n oyàjiji Etọn tọn na yín, “É na mọ sinsẹ́n tukla ayiha etọn mẹ tọn, é nasọ pékọ nẹ́: gbọn núyọ́nẹn etọn dali wẹ devi ṣie dódónọ na sùwhẹ̀na omẹ susu, na ewọ na hẹn ylando yetọn lẹ.” (ISAIA 53:11). Ewọ wẹ OKLUNỌ, ṣigba bo jiyà di afànumẹ de. Míwlẹ wẹ yín owhẹ̀hùtọ he jẹ na okú lẹ, ṣigba bo yín owhẹ̀sùna gbọn yise dali. Mí yín omẹ gbigbẹ́ sọn JIWHEYẸWHE de, ṣigba to whenẹnu, É yí otẹn mítọn bo kú do satin ji, bo dáwhá po ogbè lélé de po, dọ, “JIWHEYẸWHE ṣie, JIWHEYẸWHE ṣie, etẹwutu wẹ hiẹ gbẹ́ mi dai?” Ojlẹ nẹ mẹ wẹ, ylando aihọn lẹpo tọn yín bibẹ́ do É ji. JIWHEYẸWHE ma sọgan yígbèna ylando gba, enẹwutu wẹ É do tọ́n sọn É mẹ to satin ji, ṣigba to ojlẹ he bọdego mẹ, whenuena yè sọ́whán adàja mẹ nẹ́, wẹ Ohùn wiwé lọ yín kinkọ̀n dai na ofligọ̀ mítọn; whenẹnu wẹ mí yín mẹgbowhẹ̀ hẹ JIWHEYẸWHE.

To Owé PSALM 22:1 tọn mẹ, Davidi ko dọ gbọn gbọdemẹ wiwé de dali dọ, ehe na jọ̀. To afọ etọn 7 mẹ, mí hia dọ, “yé he mọ mi lẹpo to vivlẹ mi ko: yé to nùflo yetọn dlẹn, bo to ota yetọn mimi…” Mí yọ́n ehe mẹ yé wà enẹ sọn. Davidi sọ yì nukọn, bo dọ to afọ etọn 16-18 mẹ, dọ “Na avún lẹ lẹ́hla mi: agùn mẹylankan lẹ tọn glọ́n mi do: yè só alọ ṣie po afọ ṣie po. Yẹn sọgan hia ohú ṣie lẹpo: yé núpọ́n, yé bọnukun do ogo é. Yé má avọ̀ ṣie to yéde ṣẹnṣẹn, bo sọ do ovò awù ṣie ji.”

Bé mí yọ́nẹn nugbo dọ, dọdai hú kanwe-kó he yín didọ to Alẹ̀nù Hóhó mẹ, yín ṣiṣẹ̀ to wiwá Klisti tọn tintan mẹ? Onú lẹpo sọn jiji whenu Etọn jẹ jiyìyì Etọn biọ olọn mẹ, yín didọdai bo sọ lẹzùn nugbo. Apọsteli Pita dọhó helẹ, dọ, “Bo sọ to opòdo yise mìtọn tọn yí, whlengan alindọn mìtọn lẹ tọn. Whlẹngan he tọn yẹwhegán lẹ kànbiọ, bo sọ yí vivẹnu do dindona talala, yé he dọdọdai ojọmiọn he ja mìde tọn: yé to dodinna etẹ, kavi ojlẹ tẹ mẹ tọn hunkọ wẹ Gbigbọ Klisti tọn he tin to yé mẹ to didohia, whenuena é ṣẹṣẹ dèkunnu oyà Klisti tọn, po gigo he na bọdo é go gbọn godo tọn po.” (1 PITA 1:9-11).

Kẹdẹdilé Gbigbọ JIWHEYẸWHE tọn do núhe ja na wá jọ̀ hia yẹwhegán lẹ do, mí na pọ́n hlan godo dinvie, bo mọ núdohiamẹ Gbigbọ Wiwé tọn dopolọ he jọ̀ na mítọn wutu. Paul dohia to whànpẹ de mẹ to Owé EFESUNU 2:13-18 tọn mẹ, dọ, “Ṣigba dinvie to Klisti Jesu mẹ mí he ko tin to aganu bóbó to hóhó whenu wẹ yè sọ hẹn sẹpọ́ gbọn ohùn Klisti tọn mẹ. Na ewọ wẹ jijọho mítọn, mẹhe basi awelẹ do dopo, bo sọ họ́ adó he yè do gbohọ̀ nẹ́ to ṣẹnṣẹn; bo sọ hù okẹ̀n nẹ́ súdo to agbasalan ewlọsu tọn mẹ, yèdọ osẹ́n aṣẹ̀ lẹ tọn, ehe tin to ogbèdai lẹ mẹ; na é nido dá gbẹtọ yọ́yọ́ dopo to ewlọsu mẹ sọn awelẹ mẹ, mọwẹ é to jijọho basi; podọ nido hẹn yé omẹ awelẹ gbowhẹ̀ hẹ JIWHEYẸWHE to agbasa dopo mẹ gbọn satin lọ mẹ, é ko sọ hù okẹ̀n lọ to e mẹ: é sọ wá bo to yẹwhehó jijọho tọn dọ hlan mì he tin to aganu bóbó lẹ, podọ hlan mẹhe sẹpọ́ ẹ lẹ. Na gbọn ewọ mẹ wẹ mí omẹ awelẹ ko mọ ali gbọn Gbigbọ dopo de jẹ Otọ́ de.” Mí yín alenọ dọ, mí yín yinyọ́nẹn gbọn yise dali, dọ mí yín núhe JIWHEYẸWHE dọ mí ni yín gbọn Jesu Klisti Whlẹngantọ mítọn dali. Mí ma sọ yín núhe satani yí mí do basi gbọn tólivivẹ po ylando po tọn dali ba gba. Mí mọdona ofligọ̀ pipé mítọn he gọ̀ mí wá do otẹn visunnu po viyọnnu JIWHEYẸWHE tọn po yínyín mẹ, he mẹ mí tindo ogbẹ̀ madopòdo te.

Nado lẹn dọ OKLUNỌ mítọn dóna zinzọnlin dolé na mítọn wutu, mí taidi onú ma do huhlọn de. Ojọmiọn dabla Etọn tọn yín kinkọ̀n do mí ji, Wanyínyín Etọn yín didohia hlan mí. É gbẹ́ nado yín yiylọ dọ OKLUNỌ podọ Mẹplọ́ntọ whenuena É to azọ́nwà kẹdẹdi afànumẹ, “Ogán de sọ kanbiọ ẹ dọmọ, Mẹplọ́ntọ dagbe, etẹ yẹn na wà do dugú ogbẹ̀ madopòdo tọn? Jesu sọ dọ hlan ẹn, dọmọ, etẹwutu wẹ hiẹ ylọ mi dagbe? Mẹde ma yín dagbe, adavo omẹ dopo, ene wẹ JIWHEYẸWHE.” (LUKU 18:18-19).

Whenuena mí mọ ẹn to gbẹtọ yínyín Etọn mẹ, É ma yí yẹyi kavi gigo sọn omẹ depope si gba. É dọ to Owé JOHANU 5:41 tọn mẹ, dọ, “Yẹn ma yí gigo sọn gbẹtọ si gba.” To afọ etọn 44 mẹ, É dọ, dọmọ, “Nawẹ mì sọgan yise do, mì mẹhe to yẹyi yí sọn mìnọzo de, bo ma din yẹyi he sọn JIWHEYẸWHE ṣo kẹdẹ de?” Enẹ to azọ́n afànumẹ Etọn tọn dohia. Domọ, É wá nado wà ojlo JIWHEYẸWHE tọn podọ azọ́n ofligọ̀ tọn nado wá ṣiṣẹ̀ mẹ. Na ehe tọn wutu, É dọ, dọmọ, “Ewọ mẹhe do mi hlan tin to dê: Otọ̀ lọ ma jo yẹn dopo do gba; na yẹn to onú he yín họmẹhùn hlan ẹn lẹ wà to whepoponu.” (JOHANU 8:29). Kẹdẹdi afànumẹ de, É wá nado wà devizọ́n. Enẹwutu, mí hia to Owé MATIU 20:28 tọn mẹ dọ, “Yè dọ dilé Ovi gbẹtọ tọn ma wá nado yílizọ́n na, adavo nado yílizọ́n na omẹ, podọ nado yí ogbẹ̀ etọn do basi ofligọ̀ na omẹ susu.”

To awúsọhia gbonu Etọn tọn mẹ, Mẹssia yín afànumẹ, ṣigba to É mẹ, É gbẹ́ to OKLUNỌ gigo tọn yín. E to dandan mẹ na É nido yín onú lẹpo, na titò daho Whlẹngan tọn lọ nido yín hinhẹn ṣẹ̀.