JIWHEYẸWHE PO TITÒ ETỌN PO HLAN GBẸTỌ LẸPO

Mọse dọ hlan mí dọ ANGẸLI OKLUNỌ tọn lọ sọawúhia hlan ẹn to ozòlọ miyọ́n tọn de mẹ, he to jiji to ṣẹnṣẹn núkàn lọ tọn (EKSỌDUSI 3:2-6). To afọ etọn 4 mẹ, mí hia dọ, “Whenuena OKLUNỌ (tadena ehe tọn yín Yahweh) mọ dọ é lẹ́jẹ apádopo nado mọ, JIWHEYẸWHE (tadena ehe tọn yín Elohim) dlangbèwhán hlan ẹn sọn ṣẹnṣẹn núkàn lọ tọn, bo dọmọ, Mọse, Mọse. Ewọ sọ dọmọ, yẹn tin to ofi. Ewọ sọ dọmọ, a sẹpọ́ fidali blo: dè afọpa towe sọn afọ towe, na otẹn fietọn ji hiẹ ṣite te aigba wiwé wẹ. Humọ É dọmọ, Yẹn JIWHEYẸWHE Ablaham tọn, JIWHEYẸWHE Isaki tọn, podọ JIWHEYẸWHE Jakọbu tọn. Mọse sọ sọ́ nukunmẹ etọn whlá; na búdi i nado bọ̀nukundo JIWHEYẸWHE go.”

E paṣa, ṣigba to ehe mẹ, mí hia dọ, “… OKLUNỌ mọ …”, “… JIWHEYẸWHE ylọ …”, podọ dogbọn awúsọhia “ANGẸLI OKLUNỌ tọn lọ” dali. Mẹnu wẹ tin to finẹ? Nugbonugbo, e ma yín omẹ atọ̀n gba, ṣigba omẹ dopo podọ omẹ dopolọ to Ede dohia po ohóta vòvo po. ANGẸLI OKLUNỌ tọn lọ wẹ awúsọhia gbangba JIWHEYẸWHE he yè mọ tọn to ninọ̀mẹ angẹli de tọn mẹ. Mọwẹ É ko zinzọnlin do kẹdẹdi Yahweh to jipa Edẹni tọn mẹ bo dọhó na Adam: mọdopolọ wẹ É pé Ablaham do. Kẹdẹdi to Owé GENẸSISI 18 tọn mẹ, É wá é de po angẹli awe po, mẹhe to godo mẹ, wáyì otò Sọdọmi tọn mẹ. To finẹ, mí hia dolé dọ, dọmọ: “OKLUNỌ sọ sọawúhia ẹ to ozùn Mamle tọn ji: ewọ sọ sinai to họntonu ogohọ̀ tọn to yozò azán lọ tọn mẹ” (GENẸSISI 18:1). Ablaham sọ biọ sọn olọnjonọ lẹ lọ de na afọ yetọn lẹ nido yín kiklọ. É sọ wleawu núdùdù de tọn na yé. Angẹli awe he pò lẹ tin to ninọ̀mẹ gbẹtọ tọn de mẹ; to nugbo de mẹ, yé mẹhe gọ́na gbigbọ mawe nado wàn sunnu do sunnu go tọn to otò Sọdọmi tọn mẹ, tẹnpọ́n nado gblealọ do yé go. Ṣigba OKLUNỌ nọte to Ablaham de bo sọ dọhó hẹ ẹ na ojlẹ de. Ninọ̀mẹ angẹli tọn, ehe mẹ OKLUNỌ sọawúhia te, wẹ nado dọ ninọ̀mẹ gbẹtọ de tọn. JIWHEYẸWHE dá gbẹtọ to apájlẹ Etọn titi mẹ!

To Owé EKSỌDUSI 33:11 tọn mẹ, mí hia dọ, “OKLUNỌ lọ sọ dọhó hlan Mọse wédédé, dilé omẹde nọ dọhó hlan họntọn etọn do.” Mọse dọ ojlo etọn, bo biọ sọn OKLUNỌ si nado yì po É po. “Ewọ sọ dọmọ, nukun ṣie na to yìyì po hiẹ po, Yẹn nasọ ná ogbọjẹ we. É sọ dọhlan ẹn dọmọ, eyín nukun Towe ma na yìyì po yẹn po gba, A plán mí hẹji yì sọnfi blo.” (EKSỌDUSI 33:14-15). Nugbonugbo, Mọse ma hò to opagbè he yè nẹ mẹ, ṣigba é jlo nado mọ ṣiṣẹ̀ etọn, na to Owé EKSỌDUSI 23:20-21 tọn mẹ, OKLUNỌ ko nẹ kàndeji gbọn ohó helẹ dali, dọmọ, “Dayi e go, Yẹn do angẹli de hlan nukọn towe, nado pọ́n ogo we to aliho, bo sọ hẹn we wá biọ otẹn lọ mẹ he Yẹn ko wleawuna. Mì payi e go, bo sọ tùntóai hlan ogbè etọn; mì yín tólivẹtọ do é go blo: na ewọ ma na jona ylanwiwà mìtọn gba; na Oyín ṣie tin to ewọ mẹ.” Eyín awúsọhiamẹ OKLUNỌ Lọsu titi tọn.

Owé Wiwé devodevo lẹ tin, he dọhó do awúsọhia gbangba OKLUNỌ tọn ji. To Owé ISAIA 63:9 tọn mẹ, mí hia dọ, “To nukunbibia yetọn lẹpo mẹ, yè bianukun nẹ, angẹli nukọn etọn tọn sọ whlẹn yé: to owanyín etọn mẹ podọ to lẹblanu etọn mẹ ewọ ko fli yé gọ̀: é zé yé, bo sọ hẹn yé to azán hóhó whenu tọn lẹpo mẹ.” OKLUNỌ tin to ninọ̀mẹ angẹli de tọn mẹ. Ewọ Mẹhe whlẹn Islaẹli gán; Ewọ sọ wẹ Mẹhe yé to nọtepọ́n. To Owé MALAKI 3:1 tọn mẹ, yè wlán ẹn dọ, “…podọ OKLUNỌ, Mẹhe mì to dindin yì, na wá jẹ tẹmpli Etọn mẹ ajiji; yèdọ angẹli alẹ̀nù tọn lọ…” Ohógo he yín “angẹli” po ohógo he yín “wẹnzagun” tọn po, dopolọ wẹ yé. To Owé OWALỌ 7:38 tọn mẹ, mí hia dogbọn osẹ́n lọ he yè ná yé dali, podọ Mọse po angẹli he dọhó hẹ ẹ po dali, dọmọ: “Ehe lọ wẹ mẹhe tin to agùn mẹ to zùngbo mẹ po angẹli he to hódọ hẹ ẹ po to Osó Sinai tọn ji, podọ hẹ otọ́ mítọn lẹ: mẹhe yí ohó ogbẹ̀ tọn nado ná mí.” Mí omẹ pó yọ́nẹn dọ JIWHEYẸWHE ma do angẹli de hlan gba, ṣigba OKLUNỌ Lọsu na Ede jẹte wá bo ná osẹ́n lẹ Mọse. To vlẹkẹsi de mẹ, É sọawúhia to ninọ̀mẹ angẹli he yè mọ de tọn mẹ.

Awúsọhia gbaungba ninọ̀mẹ Etọn tọn to Alẹ̀nù Hóhó mẹ, yín núvivẹ de na núdohiamẹ Etọn titi to ninọ̀mẹ agbasa gbẹtọ tọn de mẹ. Mí na ylọ Jakọbu di kunnudètọ de. Dogbọn etọn dali, mí hia dọmọ, “Mọwẹ, ewọ tindo huhlọn to angẹli lọ ji, bo sọ glonú: ewọ viavi, bo sọ basi ovẹ̀vẹ̀ hlan é de: é mọ ẹn to Bẹti-eli, podọ finẹ wẹ ewọ dọhó hẹ mí te; na JIWHEYẸWHE Awhànpa lẹ tọn wẹ OKLUNỌ; OKLUNỌ wẹ oflinnú etọn.” (HOSEA 12:4-5). Vlavo, eyín yè dọhó dogbọn OKLUNỌ Awhànpa lẹ tọn dali kavi JIWHEYẸWHE, omẹ dopolọ wẹ to whelẹponu he nọ do Ede hia to alọ susu mẹ, ṣigba bo to dopolọ yín kakadoi. Yè dọhó do dọpọ́n Jakọbu tọn po OKLUNỌ tọn po go to Owé GENẸSISI 32:24-30 tọn mẹ, dọ: “E sọ pò Jakọbu dopo akàn. Omẹ de sọ to ahidi hẹ ẹ to finẹ kaka jẹ afọnnufú… É sọ dọmọ, yè ma to oyín towe na ylọ Jakọbu ba gba, adavo Islaẹli: na hiẹ ko diahi hẹ JIWHEYẸWHE po gbẹtọ po, bo sọ zìn i dai… Jakọbu sọ ylọ oyín finẹ lọ tọn dọ Peniẹli: na yẹn mọ JIWHEYẸWHE nukun na nukun, yè sọ hla ogbẹ̀ ṣie dai.”

Dọpọ́n he lọ ma yín núhe yè pọ́n jẹhọn mẹ bo dọ tọ́n de gba. JIWHEYẸWHE Gánhunupo, Mẹhe tin to Ahọlu yínyín Etọn titi mẹ, bo nọnọ̀ ofi lẹpo bo sọ sọgan do Ede hia to ninọ̀mẹ gbẹtọ de tọn mẹ, Mẹhe Jakọbu diahi hẹ. Whepo Jakọbu do kú, é dona visunnu Josẹfu tọn awe lẹ, bo zé alọ etọn adusi hlan amiọnwhé, podọ amiọn tọn hlan adusiwhé bo dọmọ, “JIWHEYẸWHE mẹhe nukọn otọ́ ṣie lẹ Ablaham po Isaki po zinzọnlin te, JIWHEYẸWHE he yìn mi to ogbẹ̀ whenu ṣie lẹpo mẹ jẹ egbé he, angẹli he fli mi sọn oylan lẹpo mẹ, ni dona yọpọsunnu ewlẹ…” (GENẸSISI 48:15-16). JIWHEYẸWHE he nukun ma nọ mọ sọgan sọawúhia to ninọ̀mẹ he nukun mọ de mẹ. To Owé EKSỌDUSI 24:9-11 tọn mẹ, mí hia dọmọ: “Whenẹnu wẹ Mọse hẹji yì aga, po Aalọn po, Nadabi, po Abihu po, po mẹho kande-gbàn ovi Islaẹli tọn lẹ tọn po: yé sọ mọ JIWHEYẸWHE Islaẹli tọn lọ… yé bo sọ to JIWHEYẸWHE pọ́n, bo dù bo sọ nù.”

Mẹnu wẹ sọgan lẹn dọ mẹde sọgan sọawúhia to JIWHEYẸWHE Gánhunupo nukọn bo dù, bo sọ nù? Mí yise dọ nugbo wẹ, na yè wlán ẹn dai to Owé Wiwé Etọn mẹ wutu. Mẹde ma sọgan mọ JIWHEYẸWHE whenuena É tin to gọfla gigo Etọn tọn mẹ, to ninọ̀mẹ Gbigbọnọ madopòdo Etọn mẹ. Yè mọ ẹn to whẹ́whẹ́whenu godo he É do Ede hia to agbasa gbigbọnọ de mẹ. Mẹho kande-gbàn lẹ po omẹ nẹlẹ he tin po Mọse po, mọ OKLUNỌ JIWHEYẸWHE to gigo Etọn mẹ. Nugbo wẹ JIWHEYẸWHE. É sọgan dọhó, É sọgan sè ohó, É sọgan wlán Owé, po onú devodevo lẹ po.

Yẹwhegán Ezekiẹli lọsu dọhó dogbọn dopo to dọpọ́n etọn lẹ mẹ, dọ: “Podọ to dovlomẹ lọ to aga he tin to ota yetọn lẹ wẹ apajlẹ ofìn de tọn te, di awúsọhia ozannu sapfile de tọn: podọ to apajlẹ ofìn lọ tọn ji wẹ apajlẹ de te, di awúsọhia gbẹtọ de tọn to e ji aga.” (EZEKIẸLI 1:26). E ma tin to whedepopenu he mẹde mọ gbẹtọ awe kavi atọ̀n to ofìn lọ ji gba. Ohógo he yín “JIWHEYẸWHE atọ̀n to dopo mẹ”, kavi “JIWHEYẸWHE atọ̀n tọn” ma tin to Owé Wiwé lẹ mẹ gba. Yẹwhegán de kavi omẹ depope to apọsteli lẹ mẹ, ma tùnmẹ Owé Wiwé gbèdé dọ omẹ atọ̀n wẹ JIWHEYẸWHE gba. Ṣigba mí mọ awúsọhiamẹ alọpãlọpa JIWHEYẸWHE dopo nẹ lọ tọn.