JIWHEYẸWHE PO TITÒ ETỌN PO HLAN GBẸTỌ LẸPO

Messia dóna yín yẹwhenọ daho ga na gbèyíyí mítọn. To Owé HEBLU 9:11-14 tọn mẹ, mí hia dọ, “Ṣigba Klisti ko wá nado yín yẹwhenọ daho onú dagbe he ja tọn, gbọn gohọ̀ he klo bo sọ sọgbe gbahu dali, ehe yè ma yí alọ do basi, enẹ wẹ nado dọ, e ma sọn didá he mẹ gba; mọ e ma yín gbọn ohùn gbọgbọẹ po oyìnvu tọn po dali, ṣigba gbọn ohùn etọn titi mẹ wẹ é biọ fiwiwé nẹ mẹ whladopo, to ehe godo é mọ ofligọ̀ madopòdo yí na mí. Na eyín ohùn oyìnsú tọn po gbọgbọẹ tọn po, po afin oyìn asiwhè tọn he yè nọ húnhún do mawenọ lẹ go po, nọ hẹn omẹ zùn wiwé na olẹ̀wé agbasalan tọn: nẹmunẹmu wẹ ohùn Klisti tọn, mẹhe gbọn Gbigbọ madopòdo mẹ yí agbasa ede tọn do sánvọ́ hlan JIWHEYẸWHE, ma na lẹ́ ayiha mìtọn wé sọn azọ́n kúkú mẹ nado sẹ̀n JIWHEYẸWHE ogbẹ̀nọ lọ?” Kẹdẹdi Yẹwhenọ, mí mọ Ẹn di Mẹhe jẹ nado sánvọ́. To tẹndodoponẹ mẹ, É nọte na Lẹngbọvu lọ, yèdọ Avọ́sánnu lọ.

To azán Etọn lẹ mẹ to aigba ji, É hòdẹ̀. Ehe ma yín ayihún de gba, na onú to taji wẹ na gbẹtọ. To Owé HEBLU 5:7-10 tọn mẹ, mí hia dọmọ, “Mẹhe to azán agbasalan etọn tọn lẹ mẹ, whenuena é yí awhá lélé po dasin po do hòdẹ̀, bo sọ vẹvẹ na mẹhe sọgan whlẹn ẹn sọn okú mẹ, yè sọ sè etọn na obúdi i wutu; lé e tlẹ yín Ovi nẹ, gãnṣo é klọ́n otónuse gbọn onú he mẹ é jiyà te; lé yè hẹn ẹn sọgbe, é lẹzùn mẹhe dá whlẹngan madopòdo dai hlan yé mẹhe yise lẹpo; ehe yè ylọ dọ yẹwhenọ daho sọn JIWHEYẸWHE de kẹdẹdi ohùkàn Mẹlkizedẹki tọn.” To agbasalan mẹ, gbẹtọ wẹ; É jiyà; É yín tónusetọ pipé. Enẹlẹ pó yín apáde titò daho fligọ̀ JIWHEYẸWHE tọn tọn. É whlẹn mí, na mí ma sọgan gọalọna míde lẹ gba wutu.

Mí hia dogbọn dawe dabla Mẹlkizedẹki he tọn dali to Owé GENẸSISI 14:18 tọn mẹ, dọmọ, “Mẹlkizedẹki ahọlu Salẹmu tọn sọ hẹn akla po ovẹ́n po jẹgbonu wá, ewọ wẹ yẹwhenọ JIWHEYẸWHE gigogán tọn. Ewọ sọ dona ẹn, bo dọmọ, donanọ wẹ Ablam sọn JIWHEYẸWHE gigogán mẹ, didátọ olọn po okẹ́ po tọn: donanọ sọ wẹ JIWHEYẸWHE gigogán he yí kẹ̀ntọ towe lẹ do alọ towe mẹ. É sọ jo madao onú lẹpo tọn nẹ́.” Eyín mẹde hia Owé Wiwé he ṣokẹdẹ, é sọgan lẹn dọ, ahọlu de wẹ É yín to Jelusalẹm mẹ, Mẹhe sọ tindo devizọ́n yẹwhenọ tọn.

To Owé HEBLU 7:2-3 tọn mẹ, yè dọhó dogbọn yẹwhenọ he po ahọlu he po tọn dali, dọmọ, “… mẹhe Ablaham yí vlọndao onú popo tọn hlan; gbọn yínkọ dena dali whẹ́, ahọlu dódó tọn, podọ to godo mẹ ga, ahọlu Salẹmu tọn, he basi ahọlu jijọho tọn; é ma tindo otọ́, é ma tindo onọ, é ma tindo ajitẹn, mọ é ma tindo azán jiji tọn, kavi opòdo ogbẹ̀ tọn; ṣigba yè dá ẹ di Ovi JIWHEYẸWHE tọn; é sọ to yẹwhenọ yín kakadoi.” Omẹ dopo gê wẹ tin he yè ylọ dọ, “Ahọlu Dódó tọn”, podọ “Ahọlu Jijọho tọn”. Ewọ wẹ Ahọlu ahọlu lẹ tọn. To azán Ablaham tọn lẹ mẹ, e ma ko sọawúhia to agbasalan mẹ gba; enẹwutu É ma do bibẹ́nu. Enẹwutu wẹ yèdọ dogbọn enẹ tọn dali dọ, É ma tindo otọ́ kavi onọ. Ṣigba É sọawúhia to agbasalan mẹ, yè sọ ji I di Ovi de; enẹwutu, É dóna tindo otọ́ podọ onọ.

Ahọlu kavi yẹwhenọ aigba ji tọn lẹpo tindo otọ́ po onọ po, ṣigba Mẹlkizedẹki, Ahọlu Jijọho tọn lọ, ma tindo de. Enẹ wẹ núdohia daho de dọ, OKLUNỌ lọ he wá Ablaham de di Yẹwhenọ, bo sọ gọ̀wá aihọn he mẹ di Ovi. Kẹdẹdi Yẹwhenọ de, É hẹn akla po ovẹ́n po wá Ablaham de, ehe to didohia Tenù Núdùdù OKLUNỌ tọn. To godo he é hoavùn bo sọ gbawhàn kẹ̀ntọ lẹ tọn, whenẹnu wẹ Tenù Núdùdù lọ yí tẹn mẹ. Mọdopolọ wẹ na mẹfligọ̀ lẹ ga. Whenuena avùn gbigbọ tọn lọ doalọ te, yé mẹhe gbawhàn lẹ na tin to nùdúdu daho lọ kọ̀n po OKLUNỌ po.

To Alẹ̀nù Hóhó mẹ, yẹwhenọ daho lọ nọ biọ ofi wiwé fiwiwé lẹ tọn mẹ whladopo to owhè mẹ to azán daho avọ́sinsán tọn gbè (HEBLU 9:7). Ṣigba Klisti biọ e mẹ whladopo gbọn Ohùn Etọn titi dali kẹdẹdi Yẹwhenọ daho na mítọn wutu. Gbọn enẹ dali mí mọ fligọ̀ pipé yí. Aigba he ma nù ohùn Etọn gba, ṣigba yè kọ̀n ẹn do e ji, kẹdẹdilé Owé Wiwé dọ do, dọ, É biọ fiwiwé lọ mẹ po ohùn Etọn po bo sọ zé dai to ofin lẹblanu tọn lọ nukọn.

Bẹ́ sọn azán nẹ gbè, Lẹblanu JIWHEYẸWHE tọn tin hlan omẹ lẹpo he dó jlo nado kẹalọyí i. Ohùn lọ gbẹ́ pò to ohódọ do ota mítọn kaka jẹ egbè. Eyín ohùn Alẹ̀nùnù Yọ́yọ́ tọn, ehe to azọ́nwà na yé omẹ he yise to whenu ojọmiọn mẹ tọn lẹ. Ehe lọ flinnu mí dogbọn dọdai he Isaia dọ tọn dali to Owé ISAIA 53:10 tọn mẹ, “Gãnṣo e jlo OKLUNỌ nado gbleawu nẹ́, é yí i do awúbla mẹ: whenuena hiẹ na yí gbigbọ etọn do sánvọ̀ na ylando, é na mọ okún etọn, é na hẹn azán etọn dite, ojlo OKLUNỌ tọn nasọ di to alọ etọn mẹ.”