JIWHEYẸWHE PO TITÒ ETỌN PO HLAN GBẸTỌ LẸPO

Dinvie, mí na dọhó do gbẹtọ yínyín Klisti tọn ji. To JIWHEYẸWHE mẹ võ, É do Ede hia kẹdẹdi Ovi JIWHEYẸWHE tọn, Ovi Gbẹtọ tọn, Ovi Davidi tọn, Lẹngbọvu JIWHEYẸWHE tọn, Whẹ̀gbọtọ, Whẹ̀yídọtọ, Yẹwhegán, po onú he pò lẹ po. Mí hia dogbọn Etọn dali, dọ, “Ṣigba é klọ́n gigo etọn dai, é yí ojlẹmọ afànumẹ tọn de na ede, yè sọ basi i to apajlẹ gbẹtọ lẹ tọn mẹ: mimọ ẹn to apajlẹ gbẹtọ de tọn mẹ, é whiwhẹ ede, bo sọ lẹzùn tónusètọ kaka jẹ okú, yèdọ okú satin tọn.” (FILIPINU 2:7-8).

OKLUNỌ gigonọ diọ zùn afànumẹ; Yahweh sọawúhia di Yashua he tùnmẹ Etọn yín Jesu, bo yín jiji do aihọn he mẹ, taidi ovi devo lẹ (LUKU 2:7). Nado pégo bo flí mí gọ̀, Ohó lọ dóna lẹzùn agbasalan (JOHANU 1:14). É yín gbẹtọ pipé kanwe-kó do kanwe-kó ji. Kẹdẹdi ovi, yè gbowhẹ̀na Ẹn kẹdẹdi osẹ́n lọ, “Whenuena azán ṣinatọ̀n pé nado gbowhẹ̀na ẹn yé ylọ oyín etọn dọ JESU, he yè ylọ mọ gbọn angẹli lọ dali, whẹ́po yè do mọhò etọn do adọ̀ mẹ.” (LUKU 2:21).

Nugbo, ehe sọgan yì aga húgan domọnanú mítọn. Ṣigba gbọn yise dali, mí kẹalọyí núdepope he yín máhẹtọ to titò daho Etọn tọn mẹ. Whenuena jiji Klisti tọn yín lilá, angẹli lọ dọ, dọmọ: “E nasọ ji visunnu de, JESU wẹ hiẹ na ylọ oyín etọn, na ewọ wẹ na whlẹn omẹ etọn lẹ gán sọn ylando yetọn lẹ mẹ.” (MATIU 1:21). Ovi he lọsu yín zizéwhle to JIWHEYẸWHE nukọn kẹdẹdilé mí sọgan hia do to Owé LUKU 2:22-23 tọn mẹ, dọ, “…Yé hẹn ẹn wá Jelusalẹm, nado jo é hlan OKLUNỌ: dilé yè wlán ẹn to osẹ́n OKLUNỌ tọn mẹ dọ, ovisunnu depope he hùn adọ̀ wẹ yè na ylọ dọ wiwé hlan OKLUNỌ.” Ewọ sọ wẹ oviplọ́nji to agbasa mẹ, kẹdẹdilé Malia to godo mẹ, wá tindo visunnu lẹ po viyọnnu lẹ po dó (MATIU 13:55-56).

Ohó depope matin he mí sọgan zán nado mọdona núdabla daho he, adavo mí yise poun. Mí hia to ofi de dọ, “Na yè ji whlẹngantọ de hlan mì to egbè to otò daho Davidi tọn mẹ, he yín Klisti OKLUNỌ.” (LUKU 2:11). To alọ devo mẹ, yè dọ hlan mí dọ, ovi lọ yín didohia to OKLUNỌ nukọn podọ zizéwhle kẹdẹdi oplọ́nji. E to dandan mẹ nado pọ́n hlan onú nẹlẹ, ehe jọ̀ to Alẹ̀nù Yọ́yọ́ mẹ, sọn Owé Alẹ̀nù Hóhó tọn mẹ. Yahweh wẹ OKLUNỌ JIWHEYẸWHE tintin to gbigbọ mẹ to agbasalan mẹ, mọdopolọ wẹ Jesu yín awúsọhia gbaungba to gohọ̀ agbasalannọ de mẹ.

É dóna yín gbẹtọ pipé kanwe-kó do kanwe-kó ji na É nido mọdona gbẹtọ lẹ, podọ nado flí yé gọ̀. E ma yín onú yaya de, ṣigba nugbo wẹ. É jiyà bo sọ viavi, bọ yè mọ Ẹn to alọ lẹpo mẹ kẹdẹdilé míwlẹ te, ṣigba tin matin oylan. Na É nido kú, É dóna yín gbẹtọ. Nado gbawhàn okú, po okútomẹ po, po satani po tọn, É dóna yín JIWHEYẸWHE. To gbẹtọ yínyín Etọn mẹ, É dù bo sọ nù, agbọpé É bọ É sọ damlọn, É hòdẹ̀ kẹdẹdilé míwlẹ nọ hòdẹ̀ do – É yín gbẹtọ to alọ lẹpo mẹ.

To Owé HEBLU 2:17 tọn mẹ, mí hia dọ, “Enẹwutu to onú lẹpo mẹ, e jẹ yè ni basi i di mẹmẹsunnu etọn lẹ, na é nido yín yẹwhenọ daho, lẹblanunọ, nugbonọ to onú he yín JIWHEYẸWHE tọn mẹ, nado basi ovẹ̀sè na ylando gbẹtọ lẹ tọn.”

Whedepopenu he mí mọ mẹyínwanna OKLUNỌ mítọn, mí nọ mọ Ẹn to JIWHEYẸWHE de to gbẹtọ yínyín mẹ. Jesu Klisti wẹ Ovi dètọ́n dopo akàn JIWHEYẸWHE tọn. Na gbọn ehe dali mì nido yín máhẹtọ jọwamọ yẹwhe (2 PITA 1:4). Enẹwutu ohùn Etọn, po linlẹn Etọn po, podọ ogbẹ̀ Etọn – onú Etọn lẹpo yín wiwé bo ma tindo oylan depope gba. Okú ma tindo huhlọn depope to É ji, mọdopolọ wẹ na okútòmẹ, podọ satani. Ṣigba É yí otẹn mítọn, podọ tukla mítọn lẹpo wẹ É zé do Ede ji. Owẹndagbe ẹnẹ lẹ do Messia lọ hia sọn jiji whenu Etọn kaka jẹ olọn yìyì Etọn to gbẹtọ yínyín Etọn mẹ. É do tónusisè pipé hia bo sọ yín bibaptizi gbọn Johanu dali, kẹdẹdilé omẹ he pò lẹ wà do. Enẹwutu, mí hia to Owé LUKU 3:21-22 tọn mẹ, dọ, “Dinvie, e sọ wá jọ̀ whenuena yè baptizi gbẹtọ lẹpo, wẹ yè baptizi Jesu lọsu ga, lé é to dẹ̀hò, yè hùn olọn do nùvo, Gbigbọ Wiwé sọ jẹte to ojlẹmọ agbasa tọn de mẹ di apoe de, do é ji, ogbè de sọn olọn mẹ wá, dọmọ, Hiẹ wẹ Ovi yínwanna ṣie; hiẹ mẹ yẹn yín hòmẹhùnnọ talala.”

E ma yín dọ mí na dọhó do onú lẹ go poun wẹ gba, ṣigba mí dóna mọdona núyiwà visunnu po viyọnnu JIWHEYẸWHE tọn lẹ po tọn. Omẹ depope he yise nugbo, dóna sètónuna Ohó JIWHEYẸWHE tọn bo sọ jo ede nado yín bibaptizi kẹdẹdilé Biblu dọ do. Kẹdẹdilé olọn hùn do nùvo hlan Ovi JIWHEYẸWHE tọn do, bọ Gbigbọ Wiwé jẹdo É ji, mọdopolọ wẹ na visunnu po viyọnnu JIWHEYẸWHE tọn lẹ po mọ olọn hùn do nùvo do, bọ Gbigbọ Wiwé jẹdo yé ji to ninọ̀mẹ dopolọ kẹdẹdi to azán Pẹntikọsti tọn gbè. Baptẹm osìnmẹ tọn to didohia dọ mí kẹalọyí Klisti; to baptẹm Gbigbọ tọn mẹ, JIWHEYẸWHE to didohia dọ Ewọ ko kẹalọyí mí. Núhúnu huhlọnnọ he to dandan mẹ, na mí nido zán gbẹ̀zán he hẹn hòmẹ JIWHEYẸWHE tọn hùn di visunnu po viyọnnu Etọn lẹ po.