JIWHEYẸWHE PO TITÒ ETỌN PO HLAN GBẸTỌ LẸPO

Apọsteli Pita ylọ Messia lọ dọ Yẹwhegán opagbè tọn to Owé DEUTELONOMI 18:18 tọn mẹ. É dọ to Owé OWALỌ 3:22-23 tọn mẹ, dọ, “Mọse dọ hlan otọ́ lẹ nugbonugbo, dọ, OKLUNỌ JIWHEYẸWHE mìtọn na zé yẹwhegán de tite hlan mì to mẹmẹsunnu mìtọn lẹ mẹ, di yẹn hunkọ; ewọ wẹ mì ni yise to onú he é na dọ hlan mì lẹpo mẹ. E nasọ wá jọ̀, ayiha depope he ma yí yẹwhegán lọ sè, wẹ yè na súdo sọn gbẹtọ lẹ mẹ.” OKLUNỌ Lọsu dóna basi kẹdẹdi Yẹwhegán de. Enẹwutu, avàse lọ yín niná, dọ, alindọn lẹ depope he ma na tùntóai hlan Yẹwhegán lọ na yín vivàsúdo. Mí dóna dotó É bo sọ yí I sè.

To Osó Nukunmẹdidiọ tọn ji, ogbè de yín sisè sọn aslọ huhlọnnọ de mẹ, dọ, “…Ehe wẹ ovi yínwanna ṣie, mẹhe mẹ yẹn yín homẹhùnnọ te talala; mì nọ sè etọn.Whenuena núplọ́ntọ etọn lẹ sè, yé flẹ jẹ nukunmẹ yetọn ji, bo yín avòsatọ.” (MATIU 17:5-6). Eyin mí tindo budisi JIWHEYẸWHE tọn to mí mẹ, whenẹnu wẹ mí na tindo jijọdagbe pannukọn Ohó OKLUNỌ tọn, po onú he É wà lẹpo po. Eyín mí mọ Jesu Klisti to gigo mẹ, whenẹnu mí dóna payi do ohó helẹ go, dọ, “Mì nọ sè Etọn!” Mí ma tindo hùdo nado sè oplọ́n devo de gba, yẹwhehódọtọ de kavi aṣẹ̀patọ de gba; yè dọ hlan mí nado sè Ewọ tọn kẹdẹ podọ nado sètónuna ẹn.

Ewọ lọ wẹ OKLUNỌ, mẹhe to azọ́nwà kẹdẹdi Yẹwhegán de, bo to ojlo pipé JIWHEYẸWHE tọn wà gbọn Ohó pipé JIWHEYẸWHE tọn dali. Yè kànbiọ Johanu Baptizi dọ, “Bé hiẹ wẹ Yẹwhegán nẹ lọ?” É sọ gblọn bo dọ, dọmọ, “Lala” (JOHANU 1:21). Johanu yín yẹwhegán daho de, na é dè aliho Alẹ̀nù Hóhó po Alẹ̀nù Yọ́yọ́ po tọn, bo sọ do Messia lọ hia taidi Lẹngbọvu JIWHEYẸWHE tọn, ṣigba Johanu ma wẹ Yẹwhegán nẹ́ he Mọse dọhó Etọn gba. Ehe wẹ Messia lọ. Gbọn Ewọ dali, yè hẹn dọdai apáde titò whlẹngan tọn tọn zùn yinyọ́nẹn bo sọ yín hinhẹn ṣẹ̀ gbọn devizọ́nwiwà Etọn dali. To Owé JOHANU 6:14 tọn mẹ, mí hia dọ, “Mọwẹ whenuena gbẹtọ lẹ mọ ohia he é basi, yé dọmọ, Nugbo, ehe wẹ yẹwhegán he ja aihọn mẹ lọ.”

Apáde devizọ́nwiwà Messia tọn he yín didọdai de, dóna tin. Owéfọ lẹpo dóna yín hinhẹn ṣẹ̀. Eyín yè dọhó Etọn taidi Yẹwhegán de, É dóna yígbè dọ yè do É hlan kẹdẹdilé yè do yẹwhegán he pò lẹ hlan do gbọn azọ́n wiwé de dali. Ehe wẹ azọ́n he É hẹn lẹ, to whenuena É sọawúhia di Ovi. Enẹwutu, mí hia to Owé JOHANU 5:19 tọn mẹ, dọ, “Enẹwutu Jesu gblọn, bo dọ hlan yé, dọmọ, nugbo, nugbo, wẹ yẹn dọ hlan mì, Ovi ma sọgan wà núde ededenu, adavo onú he é mọ Otọ́ wà: na núdepope he é wà, ehelẹ wẹ Ovi to wiwà mọ ga.”

Kẹdẹdi Ovi Gbẹtọ tọn, É sọawúhia to gbẹtọ yínyín Etọn mẹ dolé yẹwhegán lẹ sọawúhia do. To ofi, É ma yín JIWHEYẸWHE madogánnọ de, bo to ohódọ hlan JIWHEYẸWHE Huhlọnnọ de gba, ṣigba Ovi Gbẹtọ tọn, he yín Jesu Klisti, to azọ́nwiwà dọdai Etọn tọn mẹ, wẹ to hódọ hlan JIWHEYẸWHE. Yẹwhegán he JIWHEYẸWHE dohlan lẹ yín númọtọ; gbọn gbọdemẹ Gbigbọ Wiwé tọn de dali, wẹ yé do mọnú, bọ ojlo JIWHEYẸWHE tọn yín didohia hlan yé. To ofi, mí mọ Ovi Gbẹtọ tọn, to otẹn yẹwhegán de tọn mẹ, É yín númọtọ de, nado hẹn Owé Wiwé lẹ ṣẹ̀. É dọ onú he É mọ bo sọ sè lẹpo.

Podọ ga, Owé Alẹ̀nù Hóhó tọn he yín winwlán to Owé PSALM 40:7 tọn mẹ, dlẹn alọ do É, kẹdẹdilé yè wlán do to Owé HEBLU 10:7-9 tọn mẹ, dọ, “Whenẹnu wẹ yẹn dọmọ, do ayi e go, yẹn wá… nado wà ojlo towe, JIWHEYẸWHE È.” Yẹwhegán lẹ po dódónọ susu po jlo nado wà ojlo JIWHEYẸWHE tọn, ṣigba to fide, yé jai. Jesu wẹ Mẹhe ma nọ jai, É ma wà ẹ poun gba, ṣigba É tindo huhlọn nado wà ẹ wutu. To Owé HEBLU 10:10 tọn mẹ, mí hia dọ, “Gbọn ojlo he mẹ yè hẹn mì zùn wiwé gbọn yíyí agbasa Jesu Klisti tọn do sánvọ́ whladopo akàn dali.” Ewọ wẹ Lẹngbọvu nugbo lọ, yèdọ avọ́sánnu nugbo lọ, gbọn Ewọ dali wẹ mí tindo fligọ̀ pipé.

Kẹdẹdi Ovi dètọ́n dopo akàn JIWHEYẸWHE tọn, É bẹ́ tólivivẹ Adam tintan tọn sẹ̀ bo zé tónúsisè hlan JIWHEYẸWHE dai. Na É wá bo sọ hẹn ojlo JIWHEYẸWHE tọn pipé di to aigba ji. Yè tùn mí do otẹn he mẹ mí sọgan wà ojlo JIWHEYẸWHE tọn te. Kẹdẹdi to Owé KOLOSINU 2:13 tọn mẹ, mí mọ jona ylando pipé yí, “Podọ mìwlẹ mẹhe, ko kú to ylando mìtọn lẹ mẹ po owhẹ̀magbo agbasalan mìtọn tọn po mẹ, wẹ yè sọ diọzùn ogbẹ̀nọ dopọ́ hẹ ẹ ga, bo sọ jo ylankan mìtọn lẹpo na mì.” Mí omẹ pó yọ́nẹn dọ, Klisti dóna yín Yẹwhegán de, ṣigba É yì aga hú yẹwhegán yínyín. Ewọ wẹ “YẸN WẸ” he dọhó gbọn yẹwhegán lẹpo mẹ. Ewọ lọ wẹ sọgan dọ, dọmọ, “Whẹ́po yè ji Ablaham, Yẹn tin” (JOHANU 8:58).