Obufumbo – Ekizibu Eky’eira

Paulo yayogera ku nsonga embi einho mu 1 Ab’e Korintho 5, omusaadha bwe yali atwaire mwalikwa wa inhinha okuba mukazi we. Mu kugemagania ku kino, tukoberwa tuti, “Otawemulanga lata wo ng’oba n’owundi ku bakazi be mu buliri.” (Abalevi 18:8). Omusaadha ono ti yakola kibi kyonka aye yali wansi w’ekikolimo kuba kye yakola kiri kirala ku bikolimo eikumi n’ebibiri Katonda bye yayogeraku, “Omusaadha yeenayeena anaawemulanga ise, ng’aba n’owundi ku baka ise mu buliri, akolimirwenga!” olwo abantu boonaboona baliiramu bati, Amiina.” (Amateeka Agokubiri 27:20).

Mu Balevi, ekengsa 18 okutuuka 20, twagaana olukalala olw’ebyonoono kamala ebirobera omuntu okwingira mu bwakyabazinga bwa Katonda, nga bino bwe bikontana n’obutukuvu kuba aghazira obwo, ghazira alibona Musengwa (Abaheburayi 12:14). Agho, twena twagaana ebintu eby’endhawulo ebyogeirwaku ebiraga ensambo abasaadha n’abakazi bwe bwandikoze ekikolwa kino n’ensolo; ate kabiri n’abakazi bwe basobola okuba ni bakazi banaibwe mu buliri ate abasaadha ni basaadha banaibwe mu buliri nga Paulo bw’ayogera mu B’e Roma, ekenga 1. Mu lwatu inho Baibuli ekyoleka, “Otabanga na musaadha mwino mu buliri mu nsambo abasaadha ye babaamu n’abakazi. Ekyo ky’enhinhalwa. Omusaadha oba omukazi atabanga na nsolo, mu nsambo abasaadha ye babaamu n’abakazi mu buliri. Obudankaanu obwo bumufuula atali mulongoofu.” (Abalevi 18:22-23). “Kyova Katonda yabaleka okufugibwanga okwegomba kwaibwe okubi. Abakazi baibwe mu kifo eky’okukozesa emibiri gyaibwe ng’obutonde bwe buli, bagikozesa bindi ebitajiira ku butonde. Mu nsambo n’endala abasaadha baalekayo okwebisa n’abakazi ng’obutonde bwe buli, beegombanga basaadha banaibwe era baadankaananga nabo, era beereetaku ekibonerezo ng’okwonoona kwaibwe bwe kuli.” (Ab’e Roma 1:26-27). “Nenda era okubaidhusa Sodoma ni Gomorra n’ebibuga ebindi ebyali biriiraine agho, byona ebyakola ebikolwa eby’ensoni n’eby’amairu ag’abasaadha n’abakazi agatagiira ku butonde. Bino byabonerezebwa mu muliro ogutazikira, byafuuka eky’okuboneraku.” (Yuda 7)

Musengwa waife Mwene yayogera nti nga bwe kyali mu nnaku dha Sodoma ni Gomorra bityo bwe biriba ni mu biseera eby’enkomerero. Mu lwatu inho mu maiso g’abantu, tukibona nga kibaagho. Ekikyamu kiragibwa nga ekituufu ate ekituufu kyalagibwa ng’ekikyamu. Bano abadankaanu abasaadha aba mu buliri ni basaadha banaibwe bagheebwa enkabi mu kkanisa, ate abakazi ababa mu buliri ni bakazi banaibwe boona bagheebwa enkabi. Okulanga kungi okukolebwa, era emikutu gy’empulirisa gikozesebwa olw’ebikolwa bityo, aye ku lw’obufumbo, Katonda bwe yataagho, era ni ku lw’amaka, kiboneka oti tikikaaligho mu bantu. Kino kireetagho omuvuyo ogw’amaani mu nnaku dhino edhisembayo, Owoluganda Branham dhe yayeta ati »Edeni ya Sitaani«. Omulonde omutuufu yenka n’aliwona omwoyo ogufuga oluse luno ate yeeghaayo yaaganha okukulemberwa ni mwoyo mutukuvu ate yaaleka Ekibono kya Katonda kimufuge mu bintu byonabyona eby’obulamu bwe.

Mu 1 Ab’e Korintho 6 tusoma, “Timwidhi ng’abakozi b’ebibi tibalingira mu bwakyabazinga bwa Katonda? Mulobe kwerimba ghazira badankaanu, waire abasinza ebitali Katonda, waire abenzi, waire abatamiivu, waire abasaadha abadankaana ni basaadha banaibwe, abalingira mu bwakyabazinga bwa Katonda.” (vv. 9-10) Ebintu ebighandiikibwa mu lukalala wano kituufu biri lobera bangi obutaingira mu bwakyabazinga bwa Katonda nga Ebyaghandiikibwa bingi ebifaanana n’ebyo bwe byogera ate by’adhuulira. Buti, buli muntu atalinga ku nsonga ndala eno yonka ye tuli kwogeraku, aye alowooze ku bintu byonabyona aghalala ebiturobera okwingira mu bwakyabazinga bwa Katonda. Buli muntu alinge mu byaghandiikibwa ebyo ng’alinga mu ndabirwamu okubona nga bw’etuboneka mu maiso ga Katonda.

ATYO BW’AKOBA MUSENGWA, “Kale mubenga batukuvu, kuba ninze Musengwa Katonda waimwe. Mugemenga amateeka gange era mugagiirengaku, kuba ninze Musengwa abafuula abatukuvu.” (Abalevi 20:7-8). “Aye ng’oyo eyabeeta bw’ali Omutukuvu, n’imwe beene mwena mubenga batukuvu mu buli kye mukola. Kuba kyaghandiikibwa kiti: mubenga batukuvu, kuba Nze ndi Mutukuvu.” (1 Petero 1:15-16) Mu kusaba kwe, nga kabona omukulu Musengwa waife yakoba, “Batukuze n’amazima! Ekibono kyo n’amazima.” (Yoanne 17:17). Kituufu, Ekibono kye tuli kugabana kitegeeza ekibono n’ekirala ekyo ate olwekyo kiri n’okufuuka kirala ku bulamu bwaife, agho ghe tutukuzibwa mu bintu byonabyona mu bulamu bwaife.