Obufumbo – Ekizibu Eky’eira

Katonda yaluubirira ghabeegho obufumbo obw’emiraala. Emiraala bwe giba gyagaanibwa mu bafumbo, ebyetaagisa biri n’okusooka okubaagho. Eri abo abaisuka abali bakali kubayiiza, omutume yabagha amagezi, nga bwe yakoba, »olw’ekiragiro kya Katonda«, “Katonda ayenda, mube batukuvu, era mulekere irala obwenzi. Kiisi mulala ku imwe amanhe okwebisanga mu butukuvu era ni mu kitiisa ni mukazi we. Mutafugibwanga mairu ga mubiri ng’oti n’abantu ab ‘ensi abatatya Katonda bwe bakola. Ku nsonga eno ey’okwebisa mu butukuvu, ghatabangagho muntu akola MuKurisito mwine bubi. Kuba nga bwe twabalabuliragho, Katonda abonereza abakola ebintu ng’oti n’ebyo. Katonda atweta tube batukuvu aye ti kuba badankaanu. Kale, aloba bino aba talobye bya bantu buntu, aye aba alobye bya Katonda oyo abagha Mwoyo we Omutukuvu (Ab’e Thessalonika 4:3-8).

Musengwa yayogera mu lwatu einho ku bigema ku bufumbo, okubinga omukazi ate n’obusobozi obw’okubayiiza kabiri; mu maiso agho, tusoma abeegeresebwa kye baakoba, “Abeegeresebwa baamukoba bati: oba nga ensonga dhityo bwe ndhiri ku musaadha ni ku mukazi we ekisinga n’obutabayiiza. Yesu yaabakoba ati: Ti kiri nti abantu boonaboona baghanga okutegeera Ekibono kino, okutoolaku abo be kyagheebwa. Kuba eriyo abatabayiiza olw’okuba baazaalibwa nga tibaghanga kubayiiza, yaabaayo abaafuulibwa okuba abatasobola kubayiiza, ate yaabaayo abaasalagho beene obutabaiyiiza olw’Obwakyabazinga obw’omu igulu. kale oyo akitegeire atyo ategeere.” (Matayo 19:10-12). Ebintu bino ebisatu bwe bitaba ku mwisuka, kale atalonza lonza atwale obuvunhannhizibwa nga Owoluganda mu Kurisito abayiize mwaninaife mu Kurisito. Aboluganda ni baaninaife abakali abato abaloba obufumbo, mangu ago oba oluvanhuma bafuna obuzibu obwa buliidho ate n’obw’embeera edh’omubiri. Katonda yamanha lwaki Yataagho obufumbo. Kuba Kyaghandiikibwa, “… kuba okubayiiza oba okubaira kusinga okusiriira n’amairu.” (1 Ab’e Korintho 7:9)

Ayinza okuba Owoluganda Branham mu kitabo ekyo Ebibuuzo n’ebiribwamu aghantu aghandi ghe yayogera eri abayisuka abali baja kusalagho, ndi kwogera kino nga njira ku kwidhukira kwange; bw’obona nga tosobola kubaagho aghazira mughala oyo, nga tosobola kuba mulamu ghaazira, ate nga obona nti ogwaniire okumubayiiza, agho, omanha nti n’oyo omutuufu. Oyo asobola okuba Owoluganda Frank. Aye ensonga yonayona edhidhusa ekenga omunaana edh’omukitabo eky’olwembo lwa Solomoni, ekyogera ku mugole n’oyo Abayiiza, ate n’obulamu obw’abafumbo. Mu kenga 8, obunhiriri 6-7, tusoma ku mukwano ogwogerwaku guti: “Gonzanga mulala nze zenka, onsibe ku omwoyo gwo ng’akamanhiso. Olobenga kugemerera wundi mu makono go okutoolaku nze zenka. Kuba okugonza kuli n’amaani agaagayaga n’agolumbe; eighali liri n’obukambwe obwagayaga n’obw’okufa. Okugonza kutumbuka ng’oti muliro gwene, kwayokya ng’oti n’omuliro oguli kubbeibbera ogw’amaani. Okugonza ni bw’okufukirira amaadhi amangi einho tikuzi, nib we guba omwidhuuzo ogw’amaadhi tigasobola kumira kugonza okwo, ni kudimira. Ole bw’aghaayo obukombe bwonabwona bw’ali nabwo agule okugonza, bamunhooma bunhoome.”

Mwaninaife yeena ali n’okwetegereza einho, nti ateegerere okutuusa omutuufu mwene bw’aliidha, oyo gwaidha okuba naye obulamu bwe bwonabwona; aye, ti ky’amagezi okuteegerera okutuusa lw’okairigha (1 Ab’e Korintho 7:36). Mwaninaife akali omuto ataganha kwonooneka mu nsambo yonayona. Ateekwa okukwekuuma obutamanha musaadha yenayena era aidhe mu bufumbo atyo, olwa kino, iba idha kuba musiimu mu bufumbo bwaibwe bwonabwona. Kisobola okuwulikika oti kyaira inho, kyaghaaku, aye kireetera obulamu bw’abafumbo bwonabwona okuba obw’okusagamba n’eisanhu.

Okutuukira irala ni mu biseera byaife, kyali kimaniibwa nti omughala asigala mu nhumba yabazaire be okutuusa lw’abaira era yaaba n’amaka ge mwene. Ekiri kukolebwa olwaleera kiri nti bangi bava mu maka gaibwe amangu irala okwemerera, nga bwe bakoba bati, ku bigere byaibwe beene, era n’okutaagho embeera mwe basobola okubaagho bonka. Wano ekibuuzo kisobola okubuuzibwa mu butuufu; “Abaghala batyo oluvanhuma baghanga okuba mu bufumbo era baaba abakazi abawulize mu bufumbo baatukiriza ebyo ebyendebwa baiba baibwe era baaba mu kwesiima ng’abafumbo ng’ebyaghandiikibwa bwe bikoba?”

Ghazira muntu ateekwa kuba mu bwangu mu by’obufumbo, kuba kintu ky’osalagho omukuzi mulala mu bulamu. Bombi bateekwa okutegeera mu kusooka nti mu buli mbeera ate n’abuli kipimo okutuuka ku bibuuzo ebigema ku kwikiriza nga baisania. Kiri n’okuba kiti, kuba Katonda Mwene yakoba, “… ndidha kumukolerayo omubeezi amugwanira” (Amainhama 2:18). Agho ni ghonka omuntu bw’abeera n’obukakafu nti yali Katonda Mwene eyagaita abantu abo bombi obulamu bwaibwe bwonabwona.

Katonda ali n’ebintu kamaala byakoba Aboluganda boona, “Imwe abasaadha mugonzenga bakazi baimwe, nga Kurisito bwe yagonza Ekikunsu eky’Abaikiriza mu Kurisito ni yeeghayo ku lwa kyo” (Ab’e Efeso 5:25). “Mu nsambo n’endala eyo abasaadha mubenga ni bakazi baimwe nga mwidhi muti mu kikula kyaibwe banafu…” (1 Petero 3:7a). Abasaadha bagwaniire okubaagho mu nsambo egheesa ekitiisa ate n’okughanga abakazi baibwe akanhagansi kuba kikula kyaibwe banafu. Ti kya kwesimuliraku bityomi waire abakozi ab’omu nhumba.

Abakazi bali n’okuba, nga Omutume Petero bw’aghandiika mu 1 Petero. 3, “Nga bali n’omwoyo omuwombeefu ate n’emiraala” basobole okughangula n’okusikiriza baiba baibwe okubagonzanga. Kiri eri omukazi okureeta mu maka embeera ey’omu igulu, agho ni Iba n’abaana bwe baba mu miraala. Bw’atafaayo, yaakola ekyo baibuli ky’eyogera aja kuba omukazi omuyombi, agho asobola okuleetera amaka ge okuba amagombe ate yaayonoona obufumo bwe n’amaka ge.

Omutume yeyongera okwogera mu lwatu ku buvunhanizibwa obw’omusaadha n’omukazi. “Omusaadha atuukirizenga ebimusabibwa mu bufumbo era n’omukazi akolenga atyo. Omukazi ti n’afuga omubiri gwe mwene, aye iba n’agufuga. N’omusaadha ti n’afuga mubiri gwe mukazi we n’agufuga” (1 Ab’e Korintho 7:3-4). Atyo Katonda bwe yategeka obulamu obw’abafumbo eri abo abaagaitibwa mu mwoyo era ni mu mubiri. Gino n’emiraala mu bulala nga Ye Mwene bwe yakoba, “ababiri balifuuka mubiri mulala.” omutume yeyongera, okugha ensonga ndala ku nsonga enkulu ey’obufumbo, “Ole atalobanga mwine; okutoolaku nga musoose kwisania mwataagho ekiseera eky’okusabiramu Katonda. Aye ekiseera ekyo nga kiwoireku mwirengamu nga buliidho, kuba Sitaani asobola okubasendasenda mwaloba kwekuuma” (1 Ab’e Korintho 7:5). Bakagwireku oyo omusaadha oba omukazi mangu ayenda okuba n’obukumu ku mibiri gyaibwe mu bufumbo. Abo abakali omulala beesaliragho beene. Abafumbo tibasobola kukola ekyo ng’eisomo lyaife lino bwe li kyoleka. Kiri nti omusaadha n’omukazi bombi bwe batwala Ekibono kya Katonda baakola nga bwe kikoba, agho bwe ban’esiima mu bulamu bwaibwe obw’obufumbo, nga beegaise mu kugonza okw’omu nsi n’okw’omu igulu.

Omusaadha oba omukazi yeyawula okuva ku mwine nga tibasoose kwisania, okwo kuba kwonoona ku Kibono kya Katonda okw’olwatu ku mwine. Omuntu bw’alowoza ati ghaligho obusobozi obw’okweyawula okuva ku mwine nga tibasoose kwisania, kale oyo asabibwa okulaga mu Kibono kya Katonda Ekitukuvu okwikirizibwa oti n’okwo ghe kwagheebwa. Ghazira afuuka mutukuvu, aye ekyo, musango oguwakania amateeka agateebwagho obulamu obw’abafumbo. Obufumbo butukuvu ate ghazira kyonakyona , mu bwo ekisaana okunhoomebwa. Aya abafumbo bateekwa okuba aghalala ate ghazira mulala ku asobola okukola ky’ayenda. Ebintu byonabyona mu n’okusooka okwisania. Ekisa, mu kino, kyoleka nti abafumbo bali n’okuba ghalala nga bafugibwa n’Ekibono kya Katonda.

Mu Lusuku lwa Edeni, Musengwa Katonda yali amaze okukoba omukazi ati, “… oidha kwendanga inho okuba aghali balo,” (Amainhama 3:16). Omusaadha tagwana kukoberwa atyo, kuba kimwidhira bwidhire. Yatondebwa atyo mu kuzaalaganwa. Olwekyo kyaghandiikibwa nti omukazi yatondebwa ku lwa musaadha. Y’omusaadha obulamu obw’obufumbo kirabo kiva eri Katonda olw’okufaabikana era n’okufaayo ku bulamu buno obwa buliidho. “Sanhukiranga obulamu buno ni mukazi wo y’ogonza enaku dhoonadhoona edh’obulamu bwo buno obuziramu muganhulo. Ogwo n’omugabo gwo Katonda gw’akugha mu kufaabiikana kwo ku nsi.” (Omulangirizi 9:9).

Omutume yeyongera okughandiikira abo abafumbo, “Aye abafumbo baba n’ebizibu kamaala …” (1 Ab’e Korintho 7:28). Kityo bwe kiri, aye kabiri tusobola okwesigama ku buyambi bwa Musengwa. “Aye omusaadha omufumbo yeeraliikirira eby’ensi eno, kuba afuba okusiimia mukazi we. Omwoyo gwe guba ghano ni ghale. Omukazi atali mufumbo oba omughala omwegha yeeraliikira bya Musengwa, kuba ayenda okwegha Musengwa yeenayeena mu mubiri ni mu mwoyo. Aye omukazi ali mu bufumbo yeeraliikirira eby’omu nsi, kuba ayenda okusiimia iba” (1 Ab’e Korintho 7:33-34). Yeenayeena ali mu bufumbo akimanha nti amagira abiri gafuuka enjira ndala. Eidiiro, ekisenge eky’okusulamu n’ebintu byonabyona, bombi byabwe. Mu bufumbo ghazira eky’omuntu mulala ate ghazira bulamu bwa mulala. “Obufumbo buteebwengamu ekitiisa abantu boonaboona era obufumbo bukuumibwenga nga butukuvu …” (Abaheburayi 13:4).

Omutume Petero yali afaayo ate agha ekidhuubo ekirungi y’abakazi abo baiba baibwe abatatambula mu nsambo egwaine, Omuntu ky’asobola okulowoozaku, “Mu nsambo n’endala, abakazi muwulirenga baiba imwe. Olwo abandi ku abo waire mperaano tibaikiriza kibono, basobole okuleetebwa mu kwikiriza olw’empisa dhaimwe enkalamu nga ghazira kye mubakobyeku” (1 Petero 3:1). Ti kubitira mu kwekudumbaza n’okusoola ate n’okuloopa, aye ng’Ebyaghandiikibwa bwe bikoba mu isomo lyaife “aye olw’empisa dhaimwe enkalamu.”