Do ayi e go, yẹwhegán Daniẹli ná mí ohia lẹ po nújawu dawe he lọ tọn lẹ po, ehe go mí ma sọgan dènukun sọn gba. Podọ yè sọ dlẹnalọdo é di ahọlu de. Họnmẹ etọn yín kiklo bo sọ yọnwhànpẹ talala hú họnmẹ ahọlu he pò lẹpo tọn to jijlẹ mẹ. Dinvie, to Owé DANIẸLI 11:36 tọn mẹ, mí hia linlẹn he jẹgodona lẹ, yèdọ ehe yè ko dọ jẹgbonu lẹ lọ, dọ, “… ewọ nasọ zé ede daga, bo sọ nọ hẹn ede klo to yẹwhe lẹpo ji, bo sọ nọ dọhó onú jawujawu lẹ tọn do Jiwheyẹwhe yẹwhe lẹ tọn go: ewọ nasọ mọ dagbe…” Dinvie, mí ko sọawúhia to sọha ojlẹ lẹ tọn mẹ to ohógbè dopo lẹ lọ po linlẹn lẹ lọ po mẹ. Na to vlẹkẹsi de mẹ, dawe he lọ na zé ede daga na onú popo bo na dọ núhe é jlo, é nasọ wàdagbe to enẹ lọ mẹ. To nukọnyìyì mẹ, mí hia dólé dọ, “Mọ ewọ ma na hò yẹwhe otọ́ etọn lẹ tọn lẹ pọ́n gba, kavi nujlo yọnnu lẹ tọn, kavi hò yẹwhe depope pọ́n gba …” (DANIẸLI 11:37). Do ayi e go, Jiwheyẹwhe ko hẹn mí nado mọdona ohia dawe he lọ tọn lẹ hézéhézé, yèdọ yín e tlẹ yín omẹ pẹvi lọsu ma sọgan gbọagba etọn gba. Mì sọ do ayi e go dọ, Jiwheyẹwhe ko dègbe alọwle tọn, ṣigba dawe he lọ na gbẹ́ alọwle, podọ enẹwutu, é gbẹ́ gbèdide he Jiwheyẹwhe ná lọ. Enẹwutu, yé dọ dogbọn ewọ tọn dali dọ, é ma na hò wanyin yọnnu lẹ tọn pọ́n gba. Ehe lọ wẹ Daniẹli wlán to gbọdemẹ Gbigbọ Wiwé tọn glọ́.

Paul po nukunmọ etọn dọdai tọn po zé ohóta lọ do owé winwlán etọn mẹ hlan devihatọ etọn Timọti. To finẹ lọ, é wlán dogbọn oplọ́n po núplọ́nmẹ po dali, yèdọ ehe tọ́nsọn gbigbọ mawé de bo sọawúhia gbọn gbigbọ he nọ klán omẹ jẹ̀lá sọn ohó lọ mẹ, podọ to enẹgodo, é sọ yawu wá gblagbla núyiwà lọ tọn mẹ po ohó helẹ pó, dọ, “yé na nọ kọ́ dọ mẹde ma na wlealọ; yé na nọ dosẹ́n dọ yè ni sú olàn …” (1 TIMỌTI 4:3). Whladopo dogọ́ to dinvie, e dóna yín núhe ji yè táhinhọ́n do dọ, Oklunọ ko dó alọwle ai, ehe agọ̀jẹdo-Klistigotọ he lọ ko jẹagọ̀do na ede podọ na yé he nọ sẹ̀n ẹn lẹpo ga. Do ayi e go, Oklunọ lọ sọ dọmọ, “E ma yọ́n na sunnu lọ ni yín dopokẹdẹ gba, Yẹn na hẹn ẹn basi alọgọ́tọ de he jẹ nệ” (GENẸSISI 2:18). Dinvie, núplọ́nmẹ he yín yè ma na wlealọ tọn na sọawúhia kẹdẹdi núyiwà sinsẹ̀n tọn, ṣigba to Ohó magbọvọ Jiwheyẹwhe tọn mẹ, yè do enẹ lọ hia kẹdẹdi núplọ́nmẹ he jẹagọ̀ de, yèdọ ehe tọ́nsọn gbigbọ mawé lẹ de. Enẹwutu, mì jale bo flin dagbedagbe dọ: Mẹdepope he jẹagọ̀do Ohó Jiwheyẹwhe tọn go, ehe tùnmẹ dọ, “agọ̀jẹdo-Ohó lọ gotọ”, ewọ dopolọ sọ wẹ “agọ̀jẹdo-Klistigotọ lọ”, na Klisti wẹ Ohó lọ wutu.

Do ayi e go, hlan agùn Kọlintinu tọn, Paul kànwé dọmọ, “Bé míwlẹ matindo huhlọn nadonọ plán nọviyọnnu he yín asi de, dilé apọsteli he pò lẹ te; di mẹmẹsunnu Oklunọ tọn lẹ, po Kefa po?” (1 KỌLINTINU 9:5). To ofi, yè dọ dogbọn mẹmẹsunnu Jesu tọn lẹ lọsu dali, ehe tùnmẹ dọ yé he tọ́njẹgbonu wá sọn alọwle Malia po Josẹfu po tọn kẹdẹ mẹ lẹ wẹ tindo asi. Ṣigba to ohógbè he lọ mẹ, yè dóna hia Owé MATIU 1 :25 tọn jẹ̀ hézéhézé, yèdọ fie yè dọ te dọ Josẹfu, “ma yọ́n ẹn kaka ewọ do ji ovi de: é sọ ylọ oyín etọn dọ JESU.” Mọwẹ dọ to jiji Jesu tọn godo, Josẹfu wá yọ́n Malia kẹdẹdi Ohó wiwé Jiwheyẹwhe tọn. Do ayi e go, awhlidògbèji de wẹ ewọ to whenuena é ji Jesu Klisti, Ovi Jiwheyẹwhe tọn, ṣigba po kandeji po ewọ ma sọ yín awhidògbèji to egbé gba. Na to wẹndagbe lẹ mẹ, oyín mẹmẹsunnu Jesu tọn lẹ tọn yín didọ whlasusu. Podọ to Owé MATIU 13:55 tọn mẹ, mí tindo oyín nẹlẹ kinkàn dólé, “Jakọbu, Jose, Simọni, po Juda po.” Nado gbẹ́ ohó nugbo helẹ lọ he tin to gbaungba otànhó gbẹ̀zán mẹwiwé hóhó nẹ lọ tọn dọ Malia matindo ovi devo depope gba, bọ nugbo he lọ sọ yín whiwhlá na sinsẹ̀n he yè nọ basi na Malia tọn wutu. Enẹwutu, do ayi e go dọ, to gblagbla omẹ kantọ̀n he nọ̀ abò aga tọn lẹ mẹ, Malia onọ̀ Jesu tọn po nọvisunnu Etọn lẹ po lọsu nọ̀ finẹ ga (OWALỌ 1:14).

Sọn ota núyiwà he lọ tọn mẹ, mí hia to nukọnyìyì mẹ dọ, “Ṣigba to azọ́nhọ̀ etọn mẹ wẹ ewọ na nọ gbògbéna yẹwhe agbóhomẹ lẹ tọn: podọ yẹwhe mẹhe otọ́ etọn lẹ ma yọ́nẹn de wẹ ewọ na yí sika, po fataka po do gbògbéna, po zannu họakuẹ lẹ po, po onú whànpẹnọ lẹ po” (DANIẸLI 11:38). Dinvie, ohógbè he yín dọ ewọ na gbògbéna yẹwhe agbóhomẹ tọn lẹ, to hódọ dogbọn awhàn po vàsúdo tọn po dali dọ, huhlọn sinsẹ̀n tọn he lọ na nọte to godo. Na otànhó lọ to kunnudè dogbọn vọfọ́n lẹ dali, dogbọn awhàn sinsẹ̀n tọn lẹ dali, dogbọn vàsúdo he yè basi to oyọ́nẹn Jiwheyẹwhe tọn mẹ to oglọ́ ohia satin tọn tọn. Nado hẹn kọ̀ndopọ́ lọ wá gbaungba, yiylọ sika po fataka po tọn, podọ zannu akuẹgégénu lẹ tọn ma yín jijodai gba. Podọ yẹwhe he ewọ ko yí ede do basi ma yín Jiwheyẹwhe he otọ́ etọn lẹ ko sẹ̀n to nugbo de mẹ gba. Na Jiwheyẹwhe Ablaham tọn, Isaki tọn po Jakọbu tọn po yèdọ Jiwheyẹwhe he gbọnvo mlẹnmlẹn de wẹ Ewọ.